ܡܰܕܪܰܫܬܳܐ ܘܕܳܪܬܳܐ
ܡܰܕܪܰܫܬܳܐ ܘܕܳܪܬܳܐ
«ܡܶܫܬܚܶܩ ܘܡܶܬܕܰܘܰܕ ܒܰܪܢܳܫܳܐ ܕܪܳܚܶܩ ܡܼܶܢ ܢܰܦܫܶܗ ܘܢܳܦܶܩ ܡܼܶܢ ܡܰܕܪܰܫܬܰܐ ܠܕܳܪܬܳܐ. ܘܟܽܠܟܡܳܐ ܕܠܐ ܗܳܦܶܟ ܠܡܰܕܪܰܫܬܳܐ܆ ܦܳܐܶܫ ܪܰܡܝܳܐ ܘܫܰܕܝܳܐ ܠܒܰܪ (ܒܕܳܪܬܐ) ܟܰܕ ܬܒܺܝܼܪ ܘܰܫܚܺܝܼܩ ܘܰܕܠܺܝܼܚ. ܘܗܺܝܼ ܗܳܕܶܐ ܣܳܪܚܳܐ ܘܢܳܟܝܳܐ ܚܰܘܪܳܐ ܕܕܽܘܼܒܳܪ̈ܰܘܗܝ ܘܚܰܘܩܰܐ ܕܥܰܡ̈ܠܰܘܗܝ. ܘܛܳܫܝܳܐ ܚܺܐܪܘܼܬܶܗ ܫܰܪܝܼܪܬܐ: ܫܽܘܼܡܠܳܝܳܐ ܕܨܶܒܝܳܢܶܗ ܕܡܳܪܝܳܐ ܒܺܝܕܰܥܬܳܐ ܘܚܰܕܘܳܐ ܘܚܽܘܼܒܳܐ ܘܚܰܘܣܳܢܳܐ. »
ܠܐ ܟܰܣܝܳܐ ܡܼܶܢ ܡܰܕ̈ܥܶܐ ܦܳܪ̈ܘܿܫܶܐ ܕܠܰܡ ܚܳܐܝܢܰܢ ܒܕܳܪܳܐ ܢܰܗܺܝܼܪܳܐ ܕܒܶܗ ܫܽܘܼܘ̈ܫܳܛܶܐ ܘܛܘܼܘܳܪ̈ܶܐ ܓܳܕܠܺܝܼܢ ܛܰܘܣܳܐ ܠܪܰܘܡܳܐ. ܡܶܕܶܡ ܕܕܳܚܶܩ ܠܝܰܕܘܼ̈ܥܬܳܢܶܐ ܘܡܶܬܬܕܺܝܼ̈ܠܳܢܶܐ ܕܢܶܥܒܕܽܘܢ ܒܽܘܼ̈ܚܳܢܶܐ ܘܒܶܨ̈ܝܳܢܶܐ ܝܽܘܼܠܦ̈ܢܳܝܶܐ ܠܰܡܦܰܓܳܕܽܘܼ ܠܘܼ̈ܒܳܛܶܐ ܡܫܰܚ̈ܩܳܢܶܐ ܘܚܽܘܣܪ̈ܳܢܶܐ ܡܰܟܝ̈ܳܢܶܐ ܕܢܳܒܥܺܝܼܢ ܡܼܶܢ ܚܰܝܠܐ ܕܐܶܢܳܢܳܝܘܼܬܐ ܘܝܰܥܢܽܘܼܬܐ ܘܣܶܢܶܐܬܐ ܘܰܚܣܳܡܳܐ ܘܐܰܟܬܳܐ ܘܚܶܪܝܳܢܳܐ ܘܥܰܘܠܐ ܘܪܽܘܼܫܥܳܐ ܘܣܶܕܩܳܐ ܘܦܽܘܼܠܳܓܳܐ ܘܰܛܠܘܼܡܝܳܐ ܘܫܽܘܼܕܳܠܐ ܕܰܫܟܺܝܼܚ ܗ̱ܘ ܒܡܰܚܫܰܒܬܳܐ ܕܒܰܪܢܳܫܳܐ. ܗܳܕܶܐ ܕܶܝܢ ܡܶܬܥܰܒܕܳܐ ܒܺܝܕܰܥܬܳܐ ܕܒܳܚܪܳܐ ܘܒܳܨܝܳܐ ܩܽܘܼܝܳܡܳܐ ܘܪܽܘܼܒܳܝܳܐ ܐ̱ܢܳܫܳܝܳܐ: ܗܰܘܢܳܢܳܐܝܼܬ ܪܶܓܫܳܢܳܐܝܼܬ ܘܪܽܘܼܚܳܢܳܐܝܼܬ ܘܦܰܓܪܳܢܳܐܝܼܬ.
ܘܰܒܓܰܘܶܗ ܕܫܘܼܘܫܳܛܳܐ ܗܳܢܳܐ܆ ܒܰܪܢܳܫܳܐ ܚܳܙܘܿܩܐ ܗ̱ܘ ܫܓܺܝܼܫܳܐ ܕܒܰܙܒܰܢ ܢܰܨܝܼܚܳܐ܆ ܘܒܰܙܒܰܢ ܢܰܦܺܝܼܠܐ܆ ܢܰܦܝܼܩ ܒܰܒܥܳܬ ܒܘܼ̈ܝܳܢܶܐ ܝܕܰܥ̈ܬܳܢܳܝܶܐ ܕܢܰܦܫܳܐ܆ ܟܰܕ ܛܰܒܺܝܼܥ ܘܰܪܡܶܐ ܒܗܶܕ̈ܣܶܐ ܘܗܶܪ̈ܓܶܐ ܬܟܺܝ̈ܒܶܐ.
ܘܝܰܕܘ̈ܥܬܢܶܐ ܕܳܪ̈ܢܳܝܶܐ ܡܰܕܪܰܫܬܳܐ ܩܳܪܶܝܢ ܠܒܰܝܬܳܐ ܕܪܘܼܚܳܐ. ܗܿܳܝ ܕܩܳܒܥܳܐ ܗܶܕ̈ܣܶܐ ܘܗܶܪ̈ܓܶܐ ܕܒܰܪܢܳܫܳܐ ܒܰܫܪܳܪܳܐ ܘܟܺܐܢܽܘܼܬܐ ܘܰܬܪܽܝܼܨܘܼܬܐ ܕܬܰܩܢܽܘܼܬܳܐ ܪܶܓܫܳܢܳܝܬܐ. ܘܗܶܪ̈ܓܶܝܗܿ ܣܰܡ̈ܡܳܢܶܐ ܐܶܢܽܘܢ ܥܰܫܺܝܼ̈ܢܶܐ ܠܫܽܘܼ̈ܚܢܶܐ ܥܰܛ̈ܠܐ. ܘܠܰܡܦܺܐܕܳܐ ܢܰܗܺܝܼܪܳܐ ܠܰܫܟܽܘܼܚܝܳܐ ܕܰܫܪܳܪܳܐ ܪܰܒܳܐ ܕܚ̈ܰܝܶܐ. ܘܡܶܬܦܰܫܩܳܐ ܡܰܪܕܽܘܼܬܐ ܕܚܽܘܼܒܳܐ ܐܶܢܰܚܢܳܝܳܐ[1] ܡܫܰܡܠܝܳܢܳܐ ܘܡܶܫܬܰܡܠܝܳܢܳܐ. ܘܡܰܠܦܳܐ ܗܿܳܝ ܕܢܶܒܢܶܐ ܒܰܝܬܰܢ ܥܰܠ ܫܽܘܼܥܳܐ ܘܠܰܘ ܥܰܠ ܚܳܠܐ. ܘܠܳܐ ܒܳܥܝܳܐ ܡܶܕܶܡ ܣܛܰܪ ܡܼܶܢ ܗܿܰܘ ܡܳܐ ܕܚܰܝܳܒܺܝܼܢܰܢ ܠܢܰܦܫܰܢ ܘܠܟܽܠܢܳܫ ܒܰܫܒܺܝ̈ܠܐ ܕܫܽܘܼܡܠܳܝܳܐ ܕܘܼܪܳܓܳܝܳܐ ܕܐܳܡܰܪ: «ܨܶܒܝܳܢܶܐ ܐܠܗܳܝܳܐ ܠܐ ܣܳܡܶܟ ܘܐܳܦܠܐ ܡܒܰܪܶܟ ܐܶܠܐ ܠܫܽܘܼ̈ܚܠܳܦܶܐ ܓܰܘ̈ܳܝܶܐ ܛܳܒ̈ܶܐ ܘܙܰܘ̈ܥܶܐ ܚܰܘܣ̈ܳܢܳܝܶܐ ܘܕܘܼܒܳܪ̈ܶܐ ܐܶܢܰܚ̈ܢܳܝܶܐ ܘܬܺܘܼܪ̈ܳܨܶܐ ܡܣܺܝܼ̈ܡܳܢܶܐ ܗܿܳܢܽܘܿܢ ܕܓܳܡܪܺܝܼܢ ܘܩܳܒܥܺܝܼܢ ܒܰܪܢܳܫܳܐ ܒܰܛܢܳܢܳܐ ܕܘܳܠܝ̈ܳܬܗ ܠܐ ܡܶܬܦܰܠܥ̈ܳܢܝܳܬܐ.»
ܘܪܽܘܼܚܩܳܐ ܕܡܶܢ ܣܽܘܼ̈ܟܳܠܐ ܕܡܰܕܪܰܫܬܳܐ ܘܝܕܰܥܬܳܐ ܕܢܰܦܫܳܐ ܘ«ܐܘܼܪܚܳܐ ܘܰܫܪܳܪܳܐ ܘܚܰܝ̈ܐ» (ܝܘܚܢܢ 14: 6) ܘܬܘܼܪܳܨܳܐ ܘܬܘܼܩܳܢܳܐ ܡܶܬܕܰܡܶܐ ܒܕܳܪܬܳܐ ܕܡܰܠܝܳܐ ܪܰܘܒܳܐ ܘܰܫܓܘܼܫܝܳܐ ܪܰܒܳܐ. ܘܡܶܛܠܗܳܕܶܐ ܣܘܼܓܰܐܬ ܥܡܺܝܼܠܺܝܼܢ ܘܰܪܕܺܝܼܦܺܝܼܢ ܒܳܗܿ ܛܰܣܪܳܪ̈ܐ ܢܰܗܺܝܼܪ̈ܶܐ ܘܥܰܡܽܘܼ̈ܠܬܳܢܶܐ ܡܝܰܬܪ̈ܶܐ…
ܠܦܽܘܼܬ ܩܳܢܘ̈ܢܶܐ ܕܡܰܕܪܰܫܬܐ ܕܟܺܝܼܪܬܳܐ ܐܳܪ̈ܚܶܐ ܐܺܝܬܰܝܢ ܒܦܰܘܫܳܐ ܘܢܽܘܼܦܳܫܳܐ ܘܬܘܼܠܡܳܕܳܐ ܕܺܝܠܰܢ. ܐܶܠܐ ܒܪܰܡ ܦܳܗܶܐ ܦܰܘܫܰܢ ܘܥܳܐܩ ܢܽܘܼܦܳܫܰܢ ܘܠܳܗܶܬ ܬܘܼܠܡܳܕܰܢ ܟܰܕ ܠܐ ܚܳܟܡܺܝܼܢܰܢ ܡܰܠܝܳܐܝܬ ܗܶܪ̈ܓܶܝܗܿ ܡܰܪ̈ܬܝܳܢܐ. ܘܫܳܝܛܝܼܢܰܢ ܠܣܶܕܪ̈ܶܐ ܕܰܒܗܽܘܿܢ ܝܳܠܦܺܝܼܢܰܢ. ܘܡܶܫܬܰܥܠܶܝܢܰܢ ܒܬܘܼܠܡܳܕܰܢ. ܘܢܳܦܚܺܝܼܢܰܢ ܢܰܦܫܰܢ. ܟܕ ܠܳܐ ܡܝܰܩܪܺܝܼܢܰܢ ܢܰܦܫܰܢ ܘܪܰܒܳܢܳܐ ܘܰܡܕܰܒܪܳܢܐ..
ܗܽܘܼ ܒܪܢܫܐ ܟܝܳܢܳܐܝܬ ܕܰܟܝܳܐ ܘܫܰܦܝܳܐ ܐܺܝܼܬܰܘܗܝ. ܐܶܠܐ ܡܶܬܕܰܠܰܚ ܘܡܶܬܟܰܬܰܡ ܩܶܨܰܬ ܥܶܠܬܳܐ ܘܥܶܠܬܳܢܽܘܼܬܳܐ ܘܢܰܩܺܝܼ̈ܦܘܳܬܐ ܕܙܰܒܢܳܐ ܘܐܬܪܐ. ܡܶܕܶܡ ܕܫܳܒܶܩ ܕܢܶܦܗܶܐ ܘܢܶܛܥܰܫ ܒܕܳܪܬܳܐ. ܘܥܶܠܬܳܗܿ ܕܗܳܕܶܐ ܠܰܝܬܶܝܗܿ ܐܶܠܐ ܙܳܟܘܼܬܐ ܕܪ̈ܶܓܫܶܐ ܒܠܺܝ̈ܠܐ ܘܪ̈ܶܥܝܳܢܶܐ ܣܡܺܝܼ̈ܡܶܐ ܘܰܚ̈ܢܳܝܶܐ ܢܰܦܫ̈ܳܢܳܝܶܐ ܕܐܰܒܘ̈ܳܬܳܐ ܕܘܼܟ̈ܬܳܢܳܝܳܬܐ ܗܿܳܢܶܝܢ ܕܡܶܬܕ̈ܰܒܩܳܢ ܒܪܰܡ ܠܐ ܡܶܬܥܰܩܪ̈ܳܢ ܡܼܶܢ ܡܰܕܥܳܐ ܐ̱ܢܳܫ̈ܳܝܶܐ. ܡܶܛܠܗܳܕܶܐ ܚܰܕ ܡܼܶܢ ܢܝܼ̈ܫܶܐ ܕܝܼܺܠܰܢ ܡܳܪ̈ܢܳܝܶܐ ܒܝܰܡܳܐ ܫܓܺܝܼܫܳܐ ܕܥܳܠܡܳܐ ܠܰܝܬܰܘܗܝ ܐܶܠܐ ܕܢܶܩܢܶܐ ܡܰܕܥܳܐ ܦܳܪܘܿܫܳܐ ܗܳܢܳܐ ܕܡܶܬܦܰܫܰܩ ܫܘܼܘܫܳܛܳܐ ܪܘܼܚܳܢܳܝܳܐ ܘܣܽܘܼܠܳܩܳܐ ܗܰܘܢܳܢܳܝܳܐ. ܕܦܰܓܪܳܐ܆ ܡܶܨܥܳܝܐ ܗ̱ܘ ܕܫܽܘܼܓܢܳܝܳܐ ܕܒܶܗ ܡܶܬܕܰܪܓܺܝܢܰܢ ܘܡܶܫܬܰܡܠܶܝܢܢ ܒܥܺܝܼܪܽܘܼܬܳܐ ܘܦܳܪܽܘܿܫܽܘܼܬܳܐ ܕܪܽܘܼܚܳܐ: ܐܺܝܼܬܘܼܬܰܢ ܐܘܼܣܝܳܝܬܐ ܒܥܳܠܡܳܐ ܕܰܬܥ̈ܳܫܶܐ ܘܥܳܩ̈ܳܬܐ.
ܘܠܰܝܬ ܡܶܕܶܡ ܕܐܺܝܼܬܰܘܗܝ ܩܰܢܳܝܘܼܬܳܢ ܒܡܰܫ̈ܩܠܐ ܕܐܳܪܚܘܼܬܳܢ. ܕܟܽܠܡܶܕܶܡ ܡܒܰܝܬܰܝ ܠܡܰܕܪܰܫܬܳܐ. ܐܰܟܡܳܐ ܕܠܰܝܬ ܡܶܕܶܡ ܕܥܳܪܶܨ ܡܶܢܶܗ ܘܠܶܗ ܓܶܕܫܳܐܝܬ ܘܰܡܫܳܟܳܐܝܬ. ܘܟܽܠܡܶܕܶܡ ܕܡܶܬܒܥܶܐ ܘܡܶܬܟܪܶܟ ܥܠܰܘܗܝ ܒܕܳܪܬܳܐ «ܟܶܐܡܰܬ ܠܒܰܪ» ܫܟܺܝܼܚ ܗ̱ܘ ܒܓܰܘ ܐܳܦܰܕܢܶܝ̈ܗܿ. ܡܶܟܳܐ ܙܳܕܶܩ ܕܢܺܐܠܰܦ ܪܶܕܝܳܗܿ ܛܘܼܟܳܣܳܝܳܐ ܘܰܫܒܺܝܼܠܳܗܿ ܬܰܪܒܺܝܼܬܢܳܝܳܐ ܟܕ ܡܰܘܕܶܝܢܰܢ ܠܛܰܝܒܽܘܼܬܐ ܕܗܰܘ ܡܳܐ ܕܦܳܪܣܳܐ ܩܕܳܡܰܝܢ (ܡܰܕܪܰܫܬܳܐ) ܒܦܰܘܫܳܐ ܕܐܳܪܚܽܘܼܬܰܢ ܡܼܶܢ ܝܼܕܰܥܬܳܐ ܘܰܚܢܳܢܳܐ ܘܚܰܘܣܳܢܳܐ ܘܐܝܼܩܳܪܳܐ ܘܚܽܘܼܠܡܳܢܳܐ ܘܡܰܕܥܳܐ ܦܳܪܘܿܫܳܐ ܘܫܰܪܟܳܐ ܕܡܰܘܗ̈ܒܳܬܐ. ܘܟܽܠ ܡܳܐ ܕܰܡܫܰܪܬܰܚ ܠܢܰܘܚܳܐ ܕܐܳܪܚܽܘܼܬܰܢ ܠܰܝܬܰܘܗܝ ܐܶܠܐ ܓܽܘܼܥܠܳܢܳܐ ܕܡܰܫܠܰܡ ܠܬܺܐܪܬܳܐ ܚܰܝܬܳܐ ܕܰܒܛܝܼܠܘܼܬܰܢ. ܘܰܠܦܽܘܼܬ ܢܳܡܽܘܿܣܳܐ ܕܡܰܬܿܠܳܐ ܘܡܰܣܒܳܐ܆ ܚܰܝܳܒܺܝܼܢܰܢ ܕܢܶܛܪܺܝܘܼܗܝ ܫܰܠܡܳܐ ܘܰܗܕܺܝܼܪܳܐ ܘܢܰܗܦܟܺܝܼܘܗܝ ܠܡܰܒܽܘܿܥܶܗ ܫܦܺܝܼܥܳܐ ܟܰܕ ܚܠܺܝܼܡ ܒܶܠܥܳܕ ܪܡܳܝܳܐ ܕܚܘܼܽܒ̈ܠܐ. ܕܢܳܡܘܿܣܳܐ ܕܟܺܝܼܪܳܐ ܡܝܰܬܰܪ ܕܢܶܬܶܠ ܘܟܶܢ ܢܶܣܰܒ. ܒܰܕ ܒܚܰܪܬܶܗ ܕܝܰܘܡܳܐ ܡܶܬܚܰܫܒܺܝܼܢܰܢ ܘܡܶܬܕܺܝܢܝܼܢܰܢ.
ܒܪܰܡ ܗܺܝܼ ܗܳܕܶܐ ܠܳܐ ܡܫܬܰܡܠܝܳܐ ܐܶܠܐ ܕܗܽܘܼ ܒܰܪܢܳܫܳܐ ܢܶܫܟܰܚ ܢܽܘܼܗܪܳܐ ܕܚܽܘܼܒܶܗ ܘܬܘܼܟܠܳܢܶܗ ܘܐܝܼܩܳܪܶܗ ܘܰܚܢܳܢܶܗ ܘܚܰܘܣܳܢܶܗ ܓܰܘܳܝܳܐ ܒܗܺܝܼܠܐܝܼܬ. ܘܨܶܒܝܳܢܳܐܝܼܬ ܢܩܰܘܶܐ ܢܰܦܫܶܗ ܘܣܰܪܺܝܼܟܳܐܝܼܬ ܥܰܡ ܢܰܦܫܶܗ ܡܳܐܐ ܒܰܡܐܐ ܟܰܕ ܠܳܐ ܦܳܠܶܩ ܬܪܺܝܼܨܽܘܬܶܗ ܘܓܳܕܶܡ ܟܺܐܢܽܘܼܬܶܗ. ܒܰܕ ܗܳܕܳܐ ܗ̱ܝ ܐܽܘܼܪܚܳܐ ܪܝܼܫܳܝܬܳܐ ܕܛܳܥܢܳܐ ܒܰܪܢܳܫܳܐ ܠܫܰܘܝܳܐ ܛܳܒܳܐ ܕܪܘܼܚܳܐ: ܐܶܡܳܐ ܕܩܽܘܼܝ̈ܳܡܶܐ ܘܪ̈ܽܘܼܒܳܝܶܐ ܡܶܣܬܰܢ̈ܩܳܢܶܐ. ܘܗܶܢܝ̈ܳܢܶܐ ܘܝܽܘܼܬܪ̈ܳܢܶܐ ܡܶܬܪ̈ܰܓܫܳܢܶܐ.
ܘܡܼܶܢ ܓܰܒܳܐ ܐ̱ܚܪܺܢܳܐ ܕܶܝܢ ܡܰܕܪܰܫܬܳܐ ܗܳܕܶܐ ܕܳܪܫܳܐ ܚܶܟܡܬܳܐ ܕܛܘܼܟܳܣܳܐ ܣܢܺܝܼܩܳܐ[2] ܫܽܘܼܦܪܳܐ ܕܫܰܦܺܝܼܪܳܐ. ܕܦܰܓܪܰܢ ܗܳܢܳܐ ܡܶܬܚܰܙܝܳܢܐ ܛܳܥܼܶܢ ܒܓܰܘܶܗ ܬܽܘܼܩܦܳܐ[3] ܕܪܘܼܚܳܐ. ܘܰܚܢܰܢ ܟܽܠܰܢ ܒܝܰܕ ܬܘܼܩܦܳܐ ܗܳܢܳܐ ܡܫܰܘܬܦܳܐ ܫܳܚܢܺܝܼܢܰܢ ܘܩܳܝܡܺܝܼܢܰܢ ܘܦܳܠܚܺܝܼܢܰܢ. ܘܡܶܬܚܰܝܠܺܝܼܢܰܢ ܘܡܶܬܐܰܣܪܺܝܼܢܰܢ ܒܰܚ̈ܕܳܕܶܐ. ܘܡܶܬܬܰܪܣܶܝܢܰܢ ܡܼܶܢ ܟܰܟܪ̈ܶܐ ܘܡܰܘ̈ܗܒܳܬܐ ܕܰܚܕܳܕ̈ܶܐ ܟܽܠܢܳܫ ܐܰܝܟ ܕܥܳܕܪܳܐ ܠܶܗ. ܘܰܡܫܰܡܠܶܝܢܰܢ ܘܡܶܫܬܰܡܠܶܝܢܢ ܟܽܠܰܢ. ܒܪܰܡ ܒܰܙܒܰܢ ܕܳܝܫܺܝܼܢܢ ܢܳܡܘܿܣܳܗܿ ܪܝܼܫܳܝܳܐ ܗܿܰܘ ܕܐܳܡܰܪ: «ܗܕܡ̈ܐ ܐܰܢ̱ܬܘܢ ܦܪ̈ܝܼܫܶܐ ܕܚܰܕ ܓܽܘܼܫܡܳܐ ܕܐܺܝܬܰܘܗܝ ܡܫܺܝܼܚܳܐ» (ܐ. ܩܘܼܪ̈ܝܼܢܬܳܝܶܐ 12: 12).
ܘܡܰܕܪܰܫܬܳܐ ܗܳܕܶܐ ܡܰܠܦܳܐ ܐܳܦ ܗܿܳܝ ܕܠܐ ܡܰܨܝܳܐ ܕܠܳܐ ܕܢܺܐܬܘܿܢ ܡܰܟܫܽܘ̈ܠܐ ܒܡܰܫ̈ܩܠܶܐ ܕܐܳܪܚܽܘܼܬܢ. ܘܕܺܝܠܳܢܳܐܝܼܬ ܟܰܕ ܣܳܒܟܺܝܼܢܰܢ ܒܝܰܨܪܳܐ ܐܶܢܳܢܳܝܳܐ ܒܫܽܘܼܡܠܳܝܳܐ ܕܨܶܒܝܳܢܶܗ ܕܡܳܪܝܳܐ. ܒܰܕ ܠܰܝܬ ܫܘܼܘܙܳܒܳܐ ܘܚܘܼܪܳܪܳܐ ܓܡܺܝܼܪܳܐ ܡܼܶܢ ܚܶܫܘܼܟܳܐ ܕܰܚܕܺܝܼܪ ܘܰܦܪܺܝܼܣ ܟܽܠ ܟܰܪ ܕܰܫܟܺܝܼܚܝܼܢܰܢ. ܡܶܛܠܗܳܕܶܐ ܠܐ ܙܳܕܶܩ ܕܢܶܬܶܠ ܐܰܦܬܳܐ ܕܢܶܫܬܰܘܰܫ ܨܰܘܒܰܢ ܘܢܶܬܥܰܪܩܰܠ ܫܒܺܝܼܠܰܢ ܩܶܨܰܬ ܬܰܟܬܽܘܼܫܳܐ ܓܰܘܳܝܳܐ ܘܚܰܘܪܳܐ ܙܠܺܝܼܡܳܐ ܘܪܶܥܝܳܢܳܐ ܨܢܺܝܼܥܳܐ ܘܩܰܘܡܳܐ ܣܰܩܽܘܼܒܠܳܝܳܐ ܕܐ̱ܚܪ̈ܳܢܶܐ. ܒܰܕ ܚܰܝܠܐ ܚܰܬܝܼܬܳܐ ܘܫܰܪܝܼܪܳܐ ܛܡܺܝܼܪ ܗ̱ܘ ܒܨܶܒܝܳܢܳܐ ܛܳܒܳܐ ܘܣܘܼܥܪ̈ܳܢܶܐ ܡܝܰܬܪ̈ܶܐ ܕܠܐ ܡܶܬܢܰܟܶܝܢ ܡܼܢ ܗܘܼ̈ܦܳܟܶܐ ܣܰܩܘܼ̈ܒܠܳܝܶܐ ܘܕܘܼܒܳܪ̈ܐ ܣܡܺܝ̈ܡܶܐ ܘܩܰܪ̈ܨܶܐ ܕܠܺܝܼ̈ܚܶܐ. ܗܳܝ ܕܐܠܨܳܝܳܐ ܕܢܶܛܥܰܢ ܒܠܶܒܰܢ ܘܰܒܡܶܠܬܰܢ ܘܰܥܒܳܕܰܢ ܢܘܼܗܪܳܐ ܕܨܶܒܝܳܢܰܢ ܛܳܒܳܐ ܘܬܰܪܥܺܝܼܬܰܢ ܬܪܺܝܼܨܬܳܐ ܐܰܝܟܰܢܳܐ ܕܠܐ ܢܶܫܬܚܶܩ ܐܰܘ ܢܶܬܚܢܶܩ ܒܥܽܘܼܪ̈ܩܳܠܐ ܘܣܽܘܼ̈ܓܦܳܢܶܐ ܘܚܽܘܼܣܪ̈ܳܢܶܐ ܟܰܕ ܚܢܰܢ ܪܳܕܶܝܢܰܢ ܒܰܒܥܳܬ ܕܘܼܪܳܓܳܐ ܘܫܘܼܡܠܳܝܳܐ.
ܘܗܳܝ ܓܶܝܪ ܕܰܢܩܰܘܶܐ ܒܰܪܢܳܫܳܐ ܝܳܬܳܗܿ ܕܢܰܦܫܶܗ ܘܥܰܡ ܢܰܦܫܶܗ ܩܨܳܨܳܐ ܗ̱ܘ ܩܰܕܡܳܝܳܐ ܘܐ̱ܚܪܳܝܳܐ ܠܐܦ̈ܝ ܨܰܘܒܳܐ ܕܫܰܘܝܳܐ ܛܳܒܳܐ ܕܫܽܘܼܡܠܳܝܳܐ ܕܽܘܼܪܳܓܳܝܳܐ ܡܶܣܬܰܢܩܳܢܳܐ. ܘܰܒܫܰܪܒܳܐ ܕܫܘܼܘܫܳܛܳܐ܆ ܩܛܺܝܼܪܳܐ ܣܺܝܼܡ ܕܢܶܐܚܽܘܕ ܕܽܘܼܟܬܳܐ ܘܕܰܘܪܳܐ ܒܣܶܕܪ̈ܶܐ ܦܪ̈ܺܝܼܫܶܐ ܕܡܰܕܪܰܫܬܐ. ܐܰܝܟܰܢܳܐ ܕܢܺܐܠܰܦ ܨܶܒܝܳܢܶܗ ܕܡܳܪܝܳܐ ܗܳܢܳܐ ܕܦܳܠܰܚ ܘܬܳܢܶܐ ܘܟܳܪܶܒ ܐܰܪܥܳܐ ܕܝܰܨܪܰܢ ܒܝܼܕܰܥܬܳܐ ܕܰܡܨܰܠܠܐ ܘܰܡܕܰܟܝܳܐ ܪܶܥܝܳܢܰܢ ܠܡܶܩܢܳܐ ܡܰܕܥܳܐ ܦܳܪܘܿܫܳܐ ܕܝܳܗܶܒ ܦܺܐܪ̈ܶܐ ܛܳܒ̈ܶܐ. ܒܰܕ ܨܶܒܝܳܢܶܗ ܕܡܳܪܝܳܐ ܣܰܟܪܐ ܗ̱ܘ ܟܝܳܢܳܝܳܐ ܡܶܛܠܬܰܢ. ܘܙܳܕܶܩ ܕܢܶܬܚܰܣܰܢ ܒܶܗ ܟܰܪ ܕܐܳܙܠܺܝܼܢܰܢ. ܘܰܒܟܽܠܡܳܐ ܕܣܳܥܪܺܝܼܢܰܢ. ܒܰܕ ܡܶܢܶܗ ܡܶܬܬܰܪܣܶܝܢܰܢ ܘܒܶܗ ܚܳܐܝܢܰܢ. ܕܗܽܘܼܝܽܘ ܨܰܘܒܰܢ. ܘܗܽܘܼܝܽܘܼ ܢܽܘܼܗܪܰܢ. ܐܰܟܡܳܐ ܕܠܐ ܚܳܝܶܐ ܢܽܘܼܢܳܐ ܕܢܳܦܶܩ ܡܼܶܢ ܝܰܡܳܐ܆ ܘܪܳܫܶܠ ܘܡܳܐܬ ܡܶܚܕܳܐ ܕܡܶܬܦܪܶܫ ܡܼܶܢ ܝܰܡܳܐ܆ ܗܺܝܼ ܗܳܟܘܳܬ ܐܳܦ ܚܢܰܢ ܠܐ ܡܰܨܝܳܐ ܕܢܺܚܶܐ ܟܰܕ ܠܐ ܗܳܘܶܝܢܰܢ ܐܰܣܺܝܼܪ̈ܶܐ ܘܰܚܙܺܝܼ̈ܩܶܐ ܒܨܶܒܝܳܢܳܐ ܕܡܳܪܝܳܐ. ܕܡܶܨܛܰܘܝܳܐ ܘܡܶܬܚܰܒܠܐ ܪܽܘܼܚܳܐ ܟܰܕ ܡܶܬܦܰܪܫܳܐ ܐܰܘ ܡܶܬܦܰܫܚܳܐ ܡܼܶܢ ܡܰܒܘܼܥܳܗܿ. ܡܛܠܗܳܕܐ ܐܶܡܰܪ ܡܫܺܝܼܚܳܐ ܗܿܳܝ ܕܐܶܡܰܪ: «ܐܰܝܟܰܢܳܐ ܕܰܫܒܶܫܬܳܐ ܠܐ ܡܶܫܟܚܳܐ ܕܬܶܬܶܠ ܦܺܐܪ̈ܶܐ ܡܼܶܢ ܢܰܦܫܳܗܿ. ܐܶܠܐ ܡܩܰܘܝܳܐ ܒܰܓܦܶܬܳܐ܆ ܗܳܟܰܢܳܐ ܐܳܦ ܐܰܢ̱ܬܽܘܿܢ. ܐܶܠܐ ܬܩܰܘܽܘܿܢ ܒܝܼ. ܐܶܢܳܐ ܐ̱ܢܳܐ ܓܦܶܬܳܐ ܘܐܰܢ̱ܬܽܘܿܢ ܫܒܺܫ̈ܬܶܐ. ܡܿܰܢ ܕܰܡܩܰܘܶܐ ܒܺܝܼ ܘܐܶܢܳܐ ܒܶܗ܆ ܗܳܢܳܐ ܡܰܝܬܶܐ ܦܺܐܪ̈ܐ ܣܰܓܺܝ̈ܐܐ. ܡܶܛܠ ܕܰܕܠܐ ܐܶܢܳܐ. ܠܐ ܡܶܫܟܚܺܝܼܢ ܐܰܢ̱ܬܽܘܢ ܠܡܶܥܒܰܕ ܡܶܕܶܡ» (ܝܘܚܢܢ 15: 4-5).
ܘܗܺܝܼ ܗܳܕܶܐ ܡܚܰܘܝܳܐ ܕܠܰܝܬ ܦܽܘܼܪܣܳܐ ܐ̱ܚܪܺܢܳܐ ܕܢܶܬܶܠ ܦܺܐܪ̈ܶܐ ܘܢܶܬܡܰܕܰܥ ܒܚܶܟܡܬܐ ܣܢܺܝܼܩܬܳܐ ܠܐܰܦ̈ܝ ܫܘܼܘܫܳܛܳܐ ܕܐܰܩܡܳܐ ܘܕܰܪܓܳܐ ܘܐܰܡܢܳܐ ܐܶܠܐ ܒܥܽܘܼܦܳܩܳܐ ܕܬܰܡܺܝܼܡܽܘܼܬܳܐ ܘܰܥܪܺܝܼܡܽܘܼܬܳܐ ܕܢܰܦܫܳܐ ܗܿܝ ܕܝܳܪܒܳܐ ܘܢܳܨܚܳܐ ܒܫܽܘܼܡܠܳܝܳܐ ܕܘܼܪܳܓܳܝܳܐ. ܘܠܰܝܬ ܦܘܼܪܣܳܐ ܐ̱ܚܪܺܢܳܐ ܕܢܶܬܗܰܕܰܪ ܒܰܢܝܳܚܳܐ ܘܰܒܣܳܡܳܐ ܐܶܠܐ ܒܰܚ̈ܢܳܝܳܐ ܕܰܚܢܳܢܳܐ ܘܚܰܘܣܳܢܳܐ ܕܢܳܒܰܥ ܘܐܳܬܶܐ ܡܼܢ ܫܰܝܢܳܐ ܘܰܫܠܳܡܳܐ ܓܰܘܳܝܳܐ: ܓܰܙܳܐ ܥܰܬܝܼܪܳܐ ܕܝܰܩܪ̈ܶܐ ܐ̱ܢܳܫ̈ܳܝܶܐ[4]. ܒܰܕ ܠܳܐ ܡܰܨܝܳܐ ܕܰܢܥܰܕܰܪ ܠܐܚܪ̈ܳܢܶܐ ܕܢܶܡܛܽܘܿܢ ܠܫܰܘܝܳܐ ܡܝܰܬܪܳܐ ܕܢܰܦܫܗܽܘܿܢ܆ ܐܶܠܐ ܕܰܚܢܰܢ ܢܶܬܕܰܪܰܓ ܘܢܶܬܝܰܬܰܪ ܒܗܳܠܶܝܢ ܕܫܽܘܼܡܠܳܝܳܐ.
ܡܶܟܺܝܠ ܐܶܢܗܽܘܼ ܕܒܳܥܶܝܢܢ ܕܢܶܬܪܕܶܐ ܘܢܶܬܕܰܪܰܓ ܒܢܘܼܦܳܩܳܐ ܕܣܶܕܪ̈ܶܝܗܿ ܕܡܰܕܪܰܫܬܳܐ ܘܳܠܝܳܐ ܕܢܶܛܰܪ ܢܳܡܘ̈ܣܶܝܗܿ ܕܪܘܼܚܳܐ. ܗܿܳܢܽܘܢ ܕܒܳܥܶܝܢ ܕܢܶܦܠ݀ܽܘܿܚ ܟܰܪܡܳܐ ܕܐܰܒܐ ܫܡܰܝܳܢܳܐ ܟܰܕ ܠܐ ܕܳܝܫܺܝܼܢܰܢ ܬܚܽܘܼ̈ܡܶܝܗܿ. ܕܐܰܡܺܝܼܢܳܐܝܬ ܐܳܡܪܳܐ: «ܡܰܢܽܘ ܓܶܝܪ ܒܨܳܟ؟ ܐܰܘ ܡܳܢܳܐ ܐܽܝܼܬ ܠܳܟ ܕܠܳܐ ܢܣܰܒܬ؟ ܘܐܶܢ ܢܣܰܒܬ܆ ܠܡܳܢܳܐ ܡܶܫܬܰܒܗܰܪ ܐܰܢ̱ܬ ܐܰܝܟ ܗܿܰܘ ܕܠܳܐ ܢܣܰܒܬ؟» (ܐ. ܩܘܪ̈ܝܢܬܳܝܶܐ 4: 7).
ܘܡܶܛܠ ܫܽܘܼܡܠܳܝܳܐ ܕܢܺܝܼܫܳܐ ܗܳܢܳܐ ܡܥܰܠܝܳܐ ܗܽܘܼ ܒܰܪܢܳܫܳܐ ܙܳܕܶܩ ܕܰܢܩܰܘܐ ܚܺܐܪܳܐ ܒܨܶܒܝܳܢܶܗ. ܘܰܢܩܰܘܐ ܥܰܡ ܝܳܬܳܐ ܕܢܰܦܫܶܗ. ܘܢܶܗܘܶܐ ܢܰܦܫܳܐ ܕܝܳܬܶܗ. ܕܐܺܝܼܬ ܠܶܗ ܫܰܠܺܝܼܛܽܘܼܬ ܝܳܬܳܐ ܘܨܶܒܝܳܢܳܐ ܚܺܐܪܳܐ. ܘܡܰܨܝܳܐ ܕܢܶܥܪܘܿܩ ܡܼܶܢ ܣܶܕܪ̈ܐ ܕܡܰܕܪܰܫܬܐ. ܒܪܰܡ ܫܘܼܓܒܳܝܳܐ[5] ܗܳܢܳܐ ܥܕܺܝܼܠܐ ܡܰܦܶܩ ܘܩܳܒܰܥ ܒܕܳܪܬܳܐ ܒܶܠܥܳܕ ܚܶܟܡܬܐ ܡܶܕܶܡ. ܒܰܕ ܠܐ ܡܨܶܐ ܕܢܶܥܪܽܘܿܩ ܡܼܶܢ ܦܽܘܼܪ̈ܥܳܢܶܐ ܘܢܰܩܺܝܼ̈ܦܘܳܬܐ ܕܫܽܘܼ̈ܓܒܳܝܰܘܗܝ.
ܐܰܝܟܰܢܳܐ ܡܨܶܐ ܒܰܪܢܳܫܳܐ ܕܰܢܦܽܘܼܫ ܝܳܬܐ ܕܢܰܦܫܶܗ ܘܰܢܩܰܘܶܐ ܥܰܡ ܢܰܦܫܶܗ ܟܰܕ ܠܐ ܡܚܰܪܰܪ ܘܰܡܢܰܟܪܰܝ ܡܼܶܢ ܟܺܐܒ̈ܶܐ ܢܰܦܫ̈ܢܳܝܶܐ ܘܥܰܪܝܽܘܼܬܳܐ ܣܽܘܼܥܪܳܢܳܝܬܳܐ[6]؟
ܐܰܝܟܰܢܳܐ ܡܨܶܐ ܒܰܪܢܳܫܳܐ ܕܰܢܦܽܘܼܫ ܝܳܬܐ ܕܢܰܦܫܶܗ ܘܰܢܩܰܘܶܐ ܥܰܡ ܢܰܦܫܶܗ ܟܰܕ ܠܐ ܐܳܣܰܪ ܘܰܡܚܰܝܶܕ ܫܒܺܝܼ̈ܠܰܘܗܝ ܓܰܘ̈ܳܝܶܐ ܒܐܘܼܪܚܳܐ ܪܺܝܼܫܳܝܬܳܐ ܕܪܽܘܼܚܳܐ ܗܿܝ ܕܕܳܪܫܳܐ ܡܰܦܩܳܢܳܐ ܡܫܰܝܢܳܐ؟
ܚܒܳܠܝ! ܠܐ ܟܰܣܝܳܐ ܡܼܶܢ ܦܳܪ̈ܘܿܫܶܐ ܕܠܰܡ ܩܶܨܰܬ ܒܨܺܝܼܪܽܘܼܬ ܝܕܰܥܬܳܐ ܘܫܽܘܼ̈ܓܒܳܝܶܐ ܥܕܺܝ̈ܠܐ ܘܪ̈ܶܥܝܳܢܶܐ ܡܰܟ̈ܠܳܢܶܐ[7] ܘܕܘܼܒܳܪ̈ܶܐ ܡܫܰܕ̈ܠܳܢܶܐ ܘܰܚ̈ܢܳܝܶܐ ܡܪ̈ܺܝܼܡܳܢܶܐ ܕܐܰܒܘ̈ܳܬܳܐ[8] ܕܘܼܟ̈ܬܳܢܳܝܳܬܐ ܡܶܬܐܶܠܶܨ ܒܰܪܢܳܫܳܐ ܕܢܶܟܪܽܘܿܟ ܒܕܳܪܬܐ ܒܶܠܥܰܕ ܪܓܽܘܫܼܝܳܐ. ܘܥܶܠܬܳܗܿ ܕܗܳܕܐ ܠܰܝܬܶܝܗܿ ܐܶܠܐ ܕܶܚܠܬܳܐ ܚܒܺܝܼܟܰܬ ܣܘܼܪ̈ܳܕܐ ܘܕܽܘܘ̈ܳܕܐ. ܘܦܽܘܼܪܥܳܢܳܐ ܘܢܰܩܺܝܼ̈ܦܘܳܬܐ ܕܫܽܘܼ̈ܓܒܳܝܶܐ.
ܘܰܠܦܘܼܬ ܬܰܪܒܺܝܼܬܳܐ ܘܬܰܪܣܺܝܼܬܳܐ ܕܡܰܕܪܰܫܬܳܐ ܒܰܪܢܳܫܳܐ ܠܰܝܬܰܘܗܝ ܐܶܠܐ ܪܘܼܚܳܐ ܕܰܠܒܺܝܼܫ ܦܰܓܪܳܐ ܡܶܬܪܰܓܫܳܢܳܐ. ܘܪܘܼܚܳܢܐ ܗ̱ܘ ܕܡܶܬܬܰܪܕܶܐ ܘܡܶܬܕܰܪܰܓ ܐ̱ܢܳܫܳܐܝܼܬ. ܘܠܰܝܬ ܡܰܦܩܳܢܳܐ ܡܫܰܝܢܳܐ ܡܼܶܢ ܥܘܺܝܼܪ̈ܳܬܐ ܘܰܙܠܺܝܼ̈ܡܳܬܐ ܣܛܰܪ ܡܼܶܢ ܬܰܪܒܺܝܼܬܳܗܿ ܘܡܰܪܕܺܝܼܬܳܗܿ. ܡܶܛܠܗܳܕܶܐ ܪܚܽܘܼܩܝܳܐ ܕܬܰܪܒܺܝܼܬܳܗܿ ܘܰܦܪܽܘܼܩܝܳܐ ܕܡܰܪܕܺܝܼܬܳܗܿ «ܕܪܘܼܚܳܐ» ܡܰܡܚܶܠ ܟܽܠܡܶܕܶܡ. ܘܡܰܫܦܶܠ ܪܶܗܛܳܐ ܘܣܽܘܼ̈ܟܳܝܐ ܘܫܽܘܼ̈ܓܒܳܝܶܐ ܕܺܝܼܠܰܢ. ܒܗܿ ܒܰܕܡܽܘܼܬ ܐܝܼܠܳܢܳܐ ܕܪܳܚܶܩ ܡܼܢ ܥܰܦܪܳܐ ܘܢܽܘܼܢܳܐ ܕܢܳܦܶܩ ܡܼܶܢ ܝܰܡܳܐ.
ܘܬܰܪܒܺܝܼܬܐ ܕܪܽܘܼܚܳܐ ܡܿܰܢ ܒܰܬܪܶܝܢ ܡܰܬܩ̈ܳܠܺܝܢ ܡܶܬܚܰܫܚܳܐ ܒܦܰܘܫܳܐ ܕܡܰܕܪܰܫܬܳܐ ܡܶܛܠ ܒܗܺܝܼܠܘܼܬܐ ܓܰܘܳܝܬܐ: ܡܰܬܩܳܠܐ ܩܰܕܡܳܝܳܐ ܡܿܰܢ ܬܰܩܢܽܘܼܬ ܕܽܘܼܒܳܪ̈ܐ (ܐܝܬܺܝܼܩܽܘܢ) ܐܝܬܼܶܝܗܿ ܕܢܳܛܪܳܐ ܘܰܡܛܰܘܪܳܐ ܠܥܳܠܡܳܐ ܓܰܘܳܝܳܐ. ܘܡܰܬܩܳܠܐ ܬܪܰܝܳܢܳܐ ܕܶܝܢ ܡܠܺܝܼܠܽܘܼܬܐ (ܠܽܘܓ݂ܺܝܩܺܝܼ) ܐܝܼܬܶܝܗܿ ܕܢܳܛܪܳܐ ܘܰܡܛܰܘܪܳܐ ܠܥܳܠܡܳܐ ܒܰܪܳܝܳܐ. ܘܐܝܼܬܺܝܼܩܘܿܢ: ܡܰܠܦܳܢܘܼܬܐ ܘܝܳܠܘܿܦܽܘܼܬܐ ܐܝܼܬܶܝܗܿ ܕܰܥܒ̈ܕܶܐ ܠܐ ܦܣܺܝܼ̈ܣܶܐ ܕܠܐ ܦܰܐܝܳܐ ܕܢܶܬܥܰܒܕܽܘܢ ܘܢܶܫܬܰܠܡܽܘܿܢ. ܘܠܽܘܓ݂ܺܝܩܺܝ: ܡܰܠܦܳܢܽܘܼܬܐ ܘܝܳܠܘܿܦܽܘܼܬܐ ܐܺܝܼܬܶܝܗܿ ܕܰܥܒ̈ܕܶܐ ܦܣܺܝܼ̈ܣܶܐ ܕܐܠܨܳܝ ܥܒܳܕܗܽܘܿܢ ܘܫܘܼܡܠܳܝܗܽܘܿܢ.
ܒܰܕ ܪܽܘܼܚܳܐ ܠܰܝܬܶܝܗܿ ܓܘܼܫܡܳܢܳܝܬܳܐ ܘܗܘܼܠܳܢܳܝܬܐ. ܘܰܡܚܰܪܪܳܐ ܡܼܶܢ ܢܶܟܝ̈ܳܢܶܐ ܘܣܽܘܼܪ̈ܚܳܢܶܐ ܕܗܽܘܼܠܐ ܘܢܰܩܺܝ̈ܦܘܳܬܐ ܕܙܰܒܢܳܐ ܘܐܰܬܪܳܐ. ܘܠܰܝܬ ܒܳܗܿ ܣܶܕܩܳܐ ܘܦܽܘܼܠܳܓܳܐ ܕܐܶܢܳܐ ܘܐܰܢܬ. ܘܗܳܢܳܐ ܘܗܿܰܘ. ܘܕܶܟܪܳܐ ܘܢܶܩܒܳܐ. ܘܰܠܦܘܼܬ ܚܰܘܪܳܗܿ܆ ܐܶܢ ܥܳܠܡܳܢܳܐܝܼܬ ܘܐܶܢ ܥܳܠܡܺܝܼܢܳܐܝܼܬ܆ ܠܳܐ ܝܳܬܪܺܝܼܢܰܢ܆ ܐܶܠܳܐ ܡܼܶܢ ܗܿܰܘ ܡܳܐ ܕܝܳܗܒܺܝܼܢܰܢ ܠܐ̱ܚܼܪ̈ܳܢܶܐ. ܘܦܳܠܓܺܝܼܢܰܢ ܥܰܡܗܽܘܿܢ. ܕܢܳܒܥܳܐ ܘܐܳܬܝܳܐ ܡܼܶܢ ܐܠܗܳܐ. ܡܶܛܠܗܳܕܶܐ ܠܐ ܕܳܢܰܚ ܫܰܦܪܳܐ ܘܨܰܦܪܳܐ܆ ܘܐܳܦܠܐ ܨܳܡܰܚ ܬܪܺܝܨܳܐ ܘܢܰܗܺܝܼܪܳܐ ܐܶܠܐ ܒܬܽܘܼܩܦܳܐ ܕܬܰܪܥܺܝܼܬܗܿ ܗܿܝ ܕܠܐ ܡܶܬܦܰܪܣܳܐ ܐܳܦܠܐ ܡܶܬܢܰܨܚܳܐ ܐܠܐ ܒܕܰܟܝܘܼܬܐ ܕܠܶܒܳܐ. ܟܶܐܡܰܬ ܕܢܶܬܢܰܩܰܕ ܒܰܪܢܳܫܳܐ ܡܼܶܢ ܛܘܼܠܫܳܐ ܘܰܫܥܺܝܼܢܳܐ ܕܝܰܨܪ̈ܶܐ ܐܶܢ̈ܢܳܝܶܐ. ܡܶܟܳܐ ܡܳܪܰܥ ܘܡܶܬܟܪܰܗ ܒܰܪܢܳܫܳܐ ܘܓܰܘܳܐ ܕܠܐ ܡܫܰܡܶܫ ܠܣܽܘ̈ܟܳܠܶܝܗܿ. ܗܿܳܢܽܘܢ ܕܠܐ ܡܶܬܩܢܶܝܢ ܐܶܠܐ ܒܡܰܕܥܳܐ ܬܰܡܺܝܼܡܳܐ ܕܠܐ ܡܶܬܬܰܚܰܡ ܒܐܰܡܽܘ̈ܡܶܐ ܕܪ̈ܺܝܫܶܐ ܘܩܰܠ̈ܒܶܐ ܢܩܺܝ̈ܒܶܐ ܘܡܰܬܩ̈ܳܠܐ ܨܠܺܝܼ̈ܚܶܐ ܕܕܽܘܼܟܬܳܢܳܝܽܘܼܬܐ ܘܐܰܬܪܳܢܳܝܽܘܼܬܳܐ. ܕܣܽܘܼ̈ܟܳܠܐ ܕܪܽܘܼܚܳܐ ܐܰܡܺܝܢܳܐܝܬ ܡܰܠܦܺܝܼܢ ܕܡܼܶܢ ܠܓܰܘ ܡܫܰܪܶܐ ܬܘܼܪܳܨܳܐ ܡܩܺܝܼܡܳܢܳܐ ܕܗܳܘܶܐ ܒܝܰܕ ܫܽܘܼܚܠܳܦܳܐ ܡܢܝܼܚܳܢܳܐ. ܘܠܐ ܡܶܬܒܰܪܰܟ ܘܐܳܦܠܐ ܡܶܣܬܡܶܟ ܐܶܠܐ ܪܶܥܝܳܢܳܐ ܡܫܰܘܫܛܳܢܳܐ ܘܬܘܼܪܳܨܳܐ ܡܪܰܒܝܳܢܳܐ ܕܡܶܠܬܳܐ ܘܣܽܘܼܥܪܳܢܳܐ. ܘܟܽܠܰܢ ܥܰܡ ܟܽܠܰܢ ܡܝܰܩܪ̈ܶܐ ܘܚܰܒܝܼ̈ܒܶܐ ܗܳܘܶܝܢܰܢ ܒܚܽܘܼܒܳܐ ܘܐܝܼܩܳܪܳܐ ܘܫܰܝܢܳܐ ܘܬܽܘܼܟܠܳܢܳܐ ܘܰܚܢܳܢܳܐ ܘܚܰܘܣܳܢܳܐ ܕܡܰܠܒܫܺܝܼܢܰܢ ܠܬܶܫܡܶܫܬܢ. ܕܐܳܡܰܪ ܩܰܕܝܼܫܳܐ ܡܳܪܝ ܐܰܦܪܶܝܡ (306-373): «ܐܶܢ ܡܶܫܬܰܝܢܝܼܢ ܪ̈ܶܓܫܶܐ ܒܰܪ̈ܳܝܶܐ ܘܐܳܦ ܓܰܘ̈ܳܝܶܐ ܡܶܫܬܰܝܢܺܝܼܢ.»
ܘܗܽܘܼ ܒܰܪܢܳܫܳܐ ܠܐ ܡܰܨܝܳܐ ܕܢܶܫܬܰܝܰܢ ܐܶܠܐ ܕܢܶܗܦܽܘܿܟ ܠܡܰܕܪܰܫܬܐ ܘܢܶܣܬܰܟܰܠ ܘܢܶܚܟܼܽܘܡ ܡܪ̈ܺܝܼܡܳܢܝܳܬܳܐ ܕܕܳܪܬܳܐ ܒܢܽܘܼܗܪܳܐ ܕܥܺܝܼܪܘܼܬܳܐ ܘܦܳܪܽܘܿܫܽܘܼܬܳܐ ܪܘܼܚܳܢܳܝܬܳܐ. ܘܟܽܠܟܡܳܐ ܕܠܐ ܗܳܦܶܟ ܠܡܰܕܪܰܫܬܳܐ ܕܐܝܼܬܶܝܗܿ ܒܰܝܬܳܐ ܕܪܽܘܼܚܳܐ܆ ܦܳܐܶܫ ܪܰܡܝܳܐ ܘܫܰܕܝܳܐ ܠܒܰܪ «ܒܕܳܪܬܐ» ܟܰܕ ܬܒܺܝܼܪ ܘܰܫܚܺܝܼܩ ܘܰܕܠܺܝܼܚ. ܘܗܳܕܶܐ ܡܪܺܝܼܡܳܢܳܐܝܼܬ ܣܳܪܚܳܐ ܘܢܳܟܝܳܐ ܚܰܘܪܳܐ ܕܕܘܼܒܳܪ̈ܰܘܗܝ ܘܚܰܘܩܳܐ ܕܥܰܡ̈ܠܰܘܗܝ. ܘܛܳܫܝܳܐ ܚܺܐܪܘܼܬܶܗ ܫܰܪܝܼܪܬܐ: ܫܽܘܼܡܠܳܝܳܐ ܕܨܶܒܝܳܢܶܗ ܕܡܳܪܝܳܐ ܒܝܕܰܥܬܳܐ ܘܚܰܕܘܳܐ ܘܚܘܼܒܳܐ ܘܚܰܘܣܳܢܳܐ. ܕܬܚܶܒ ܬܘܼܩܳܢܰܢ ܪܘܼܚܳܢܳܝܳܐ ܟܰܕ ܪܳܚܩܺܝܼܢܰܢ ܡܼܶܢ ܢܰܦܫܰܢ. ܘܗܳܢܳܐ ܡܶܕܶܡ ܗܳܘܶܐ ܥܶܠܬܳܐ ܕܢܶܬܒܰܠܒܰܠ ܛܘܼܟܳܣܰܢ ܓܰܘܳܝܳܐ ܘܢܶܬܦܟܰܪ ܚܰܕܘܰܢ ܒܰܪܳܝܳܐ. ܘܡܶܛܠܗܳܕܶܐ ܠܐ ܫܳܬܩܳܐ ܡܰܠܦܳܢܽܘܬܳܗܿ ܗܿܳܝ ܕܐܳܡܪܳܐ: «ܡܶܫܬܚܶܩ ܘܡܶܬܕܰܘܕ ܒܰܪܢܳܫܳܐ ܕܪܳܚܶܩ ܡܼܶܢ ܢܰܦܫܶܗ ܘܢܳܦܶܩ ܡܼܶܢ ܡܰܕܪܰܫܬܰܐ ܠܕܳܪܬܳܐ.» ܕܡܘܼܙܳܓܳܗܿ ܠܐ ܡܫܰܝܰܢ ܘܟܰܘܪ̈ܳܢܶܝܗܿ ܫܳܢܩܺܝܼܢ ܘܚܳܢܩܺܝܼܢ..
ܡܶܛܠܗܳܕܶܐ ܦܰܐܝܳܐ ܕܢܶܬܒܰܩܶܐ ܒܡܺܐܡܪܳܐ ܕܦܰܪܳܫܳܐ ܕܪܽܘܼܚܳܐ ܩܰܕܝܼܫܳܐ ܡܳܪܝ ܐܰܦܪܶܝܡ (306-373) ܗܳܢܳܐ ܕܩܰܕܶܡ ܟܬܰܒ ܘܗܳܟܰܢܳܐ ܐܶܡܰܪ ܒܫܰܪܒܳܐ ܕܰܥܠܰܘܗܝ ܛܳܦܰܬ ܡܶܠܬܳܐ:
«ܐܰܚܶܒ ܫܶܠܝܳܐ ܬܰܠܡܺܝܼܕܳܐ܆ ܕܒܶܗ ܬܶܫܟܰܚ ܬܰܚܶܐ ܢܰܦܫܳܟ.
ܗܘܺܝܼ ܚܰܙܳܝܳܐ ܕܰܩܢܽܘܼܡܳܟ. ܘܠܐ ܬܚܽܘܼܪ ܠܒܰܪ ܡܶܢܳܟ.
ܟܡܳܐ ܕܰܠܒܰܪ ܡܶܢܳܟ ܬܚܽܘܼܪ܆ ܐܰܢ̱ܬ ܢܰܦܫܳܟ ܠܐ ܚܳܙܐ ܐܰܢ̱ܬ.
ܫܰܝܶܢ ܪ̈ܶܓܫܰܝܟ ܒܰܪ̈ܳܝܐ ܕܢܶܗܘܽܘܢ ܒܫܶܠܝܳܐ ܓܰܘ̈ܳܝܶܐ.
ܕܐܶܢ ܬܰܗܦܶܟ ܚܰܝ̈ܰܝܟ ܠܘܳܬܳܟ܆ ܚܰܙܳܝܐ ܕܢܰܦܫܳܟ ܬܶܗܘܶܐ.
ܫܠܺܝܼ ܡܼܢ ܢܶܟܝ̈ܳܢܐ ܕܰܠܒܰܪ ܕܬܶܫܟܰܚ ܒܢܰܦܫܳܟ ܣܘܼ̈ܟܳܠܐ.
ܟܢܽܘܼܫ ܚܰܘܪܐ ܕܥܰܝ̈ܢܰܝܟ ܨܶܐܕ̈ܰܝܟ܆ ܕܬܶܬܒܰܩܶܐ ܒܰܥܬܺܝ̈ܕܳܬܐ.
ܐܰܚܶܒ ܫܶܠܝܳܐ ܕܦܽܘܼܪܫܳܢܐ܆ ܕܗܘܼܝܘ ܢܶܒܥܳܐ ܕܝܕܰܥܬܐ.
ܐܢ ܬܶܗܘܶܐ ܒܫܶܠܝܳܐ ܕܢܰܦܫܳܟ܆ ܒܫܶܠܝܳܐ ܬܰܪܓܶܫ ܕܐܠܗܳܐ.
ܐܶܢ ܬܶܫܬܘܿܩ ܡܼܶܢ ܥܶܢܝܳܢܐ܆ ܬܶܗܪܳܐ ܢܩܰܒܠܳܟ ܕܐܺܝܼܬܽܘܼܬܳܐ.
ܚܙܝܼ ܐܰܝܟܢ ܐܰܡܝܼܪ: ܕܐܶܢ ܡܶܫܬܰܝܢܝܢ ܪ̈ܶܓܫܶܐ ܒܰܪ̈ܝܳܐ ܘܐܳܦ ܓܰܘܳܝ̈ܐ ܡܶܫܬܰܝܢܺܝܢ.
ܘܪ̈ܶܒܽܘ ܛܳܒ̈ܳܬܐ ܗܳܘ̈ܝܳܢ ܠܰܢ.
ܘܐܶܢ ܡܼܶܢ ܥܶܢܝ̈ܢܶܐ ܕܰܠܒܰܪ ܫܳܬܩܺܝܼܢܰܢ܆ ܣܽܘܼ̈ܟܳܠܐ ܕܠܐ ܣܽܘܼܦ ܡܶܫܟܚܺܝܼܢܢ ܒܢܰܦܫܰܢ.
ܘܐܶܢ ܚܰܘܪܐ ܕܥܰܝ̈ܢܰܝܢ ܠܘܳܬܰܢ ܗܳܘܐ܆ ܟܽܠ ܥܬܺܝ̈ܕܳܬܐ ܗܳܕܣܺܝܼܢܰܢ.
ܘܐܶܢ ܡܶܫܬܰܘܚܕܺܝܼܢܰܢ܆ ܢܶܒܥܳܐ ܕܝܕܰܥܬܐ ܗܳܘܐ ܠܶܒܰܢ.
ܘܐ̱ܚܪ̈ܳܢܶܐ ܦܶܬܓ̈ܳܡܶܐ ܗܳܠܶܝܢ ܐܠܗ̈ܝܶܐ ܐܰܢ̱ܬܘܿܢ ܒܨܰܘ ܐܶܢܽܘܢ. ܕܬܰܪܓܫܽܘܢ ܒܫܶܠܝܳܐ ܕܰܐܠܗܐ.»
ܘܡܶܟܳܐ ܫܳܪܳܐ ܕܠܰܝܬ ܝܘܼܬܪܳܢܳܐ ܕܰܢܚܰܦܶܐ (ܐܘ ܕܢܶܬܚܰܦܶܐ) ܚܶܫܟܰܢ ܓܰܘܳܝܳܐ. ܐܶܠܐ ܡܶܬܒܰܥܝܳܐ ܕܢܰܨܡܰܚ ܢܽܘܼܗܪܰܢ ܒܛܽܘܼܝܳܒܳܐ ܘܣܽܘܼܩܒܳܠܐ ܫܰܦܺܝܪܳܐ܆ ܟܰܕ ܛܳܥܢܺܝܼܢܰܢ ܘܡܳܙܓܺܝܼܢܰܢ ܙܰܠܓܰ̈ܘܰܗܝ ܒܫܽܘܘ̈ܫܳܛܶܐ ܘܟܽܘܼ̈ܝܳܢܶܐ ܒܰܪ̈ܳܝܶܐ. ܡܶܛܠܗܳܕܶܐ ܩܘܼܝܳܡܳܐ ܘܫܘܼܽܒܚܳܐ ܬܰܠܝܐ ܗ̱ܘ ܒܚܽܘܼܡܣܳܢܳܐ ܘܕܘܼܪܳܓܳܐ ܕܣܶܕܪ̈ܶܐ ܕܡܰܕܪܰܫܬܐ ܠܡܺܐܠܰܦ ܗܿܰܘ ܡܳܐ ܕܚܳܫܰܚ ܘܐܳܙܶܠ ܠܰܬܟܽܘܼܣܝܳܐ ܕܣܰܢ̈ܝܳܬܳܐ ܘܰܙܓܽܘܼܪܝܳܐ ܕܰܨܥܺܝܼܪ̈ܳܬܳܐ ܐܰܝܟܰܢܳܐ ܕܢܶܫܪܶܐ ܥܽܘܼܪ̈ܙܳܠܐ ܕܚܰܒ̈ܠܐ ܐܶܢܳܢ̈ܝܶܐ. ܒܰܕ ܠܐ ܩܳܐܶܡ ܘܐܳܦܠܐ ܡܟܰܬܰܪ ܥܽܘܼܗܕܳܢܰܢ ܘܦܽܘܼܪܫܳܢܰܢ ܟܰܕ ܢܳܦܩܺܝܢܰܢ ܠܕܳܪܬܐ ܗܿܳܝ ܕܠܐ ܫܳܒܩܳܐ ܕܢܺܐܨܰܦ ܐܶܠܐ ܕܰܥܡܽܘܼܪܝܳܐ ܘܬܘܼܪܣܳܝܳܐ ܘܡܰܘܠܳܕܳܐ: ܗܿܢܽܘܿܢ ܕܰܫܟܺܝܼܚܝܼܢ ܐܳܦ ܒܥܳܠܡܳܐ ܕܚܰܝ̈ܘܳܬܐ. ܟܰܕ ܛܳܒ ܬܰܡܳܢ ܡܶܕ̈ܡܶܐ ܐ̱ܚܪ̈ܳܢܶܐ ܐܺܝܼܬ ܗ̱ܘ ܕܙܳܕܶܩ ܕܢܶܫܬܰܡܫܽܘܿܢ ܘܢܶܫܬܰܡܠܽܘܿܢ ܪܶܚܡܰܬ ܐ̱ܢܳܫܳܐܝܼܬ ܒܪܶܥܝܳܢܳܐ ܡܰܟܺܝܼܟܳܐ ܘܒܰܣܺܝܼܡܳܐ!
ܣܳܟܳܐ ܠܡܺܐܡܰܪ: ܐܶܢܗܽܘ ܕܒܳܥܶܝܢܰܢ ܕܢܶܚܙܶܐ ܢܰܦܫܰܢ܆ ܠܐ ܙܳܕܶܩ ܕܰܢܚܽܘܿܪ ܠܒܰܪ ܡܶܢܰܢ. ܘܐܳܦܠܐ ܢܚܽܘܼܪ ܒܳܬܪܰܢ ܟܰܕ ܛܳܡܪܺܝܢܰܢ ܟܰܟܪܰܢ. ܒܰܕ ܡܶܬܒܥܶܐ ܡܶܢܰܢ ܕܢܶܫܒܽܘܿܩ ܝܘܼܪܬܳܢܳܐ ܘܝܘܼܬܳܪܢܳܐ ܛܳܒܳܐ ܕܪܰܒ ܡܼܶܢ ܗܿܰܘ ܕܐܶܬܬܰܫܠܰܡ ܘܐܶܬܬܰܓܥܰܠ ܠܰܢ. ܒܬܰܢܘܰܝ ܕܠܐ ܢܶܛܒܰܥ ܐܰܘ ܢܺܐܒܰܕ ܒܕܺܝܼܠܰܢ ܥܕܰܡܳܐ ܠܗܿܳܝ ܕܢܶܣܟܽܘܪ ܥܰܝ̈ܢܶܐ ܘܢܰܗܦܶܟ ܐܰܦ̈ܐ ܡܼܶܢ ܛܢܳܢܳܐ ܘܥܰܡܠܳܐ ܘܠܶܐܘܬܳܐ ܕܐ̱ܚܪ̈ܳܢܶܐ.
ܝܘܣܦ ܒܓܬܫ
ܚܘܕܪܐ ܕܡܪܕܘܬܐ ܘܣܦܪܝܘܬܐ ܕܠܫܢܐ ܣܘܪܝܝܐ. ܡܪܕܝܢ
[1] ܚܽܘܼܒܳܐ ܐܶܢܰܚܢܳܝܳܐ: Diğerkam sevgi / Altruistic love
[2] ܗܳܟܰܢܳܐ ܟܳܬܶܒ ܘܐܳܡܰܪ ܩܰܕܝܼܫܳܐ ܡܳܪܝ ܝܰܥܩܽܘܒ ܕܰܣܪܽܘܼܓ (451-521) ܒܫܰܪܒܳܐ ܕܛܘܼܟܳܣܳܐ ܣܢܺܝܼܩܳܐ: «ܣܳܡ ܒܳܪܘܿܝܳܐ ܒܒܶܪ̈ܝܳܢ ܒܶܪ̈ܝܳܢ ܡܶܕܶܡ ܡܶܕܶܡ. ܕܰܠܬܰܫܡܶܫܬܶܗ ܕܥܳܠܡܳܐ ܢܩܽܘܼ̈ܡܳܢ ܐܰܝܟ ܐܰܡܗ̈ܳܬܐ. ܐܰܝܟ ܕܰܠܡܺܐܡܰܪ ܫܶܡܫܳܐ ܘܣܰܗܪܳܐ ܬܪܶܝܢ ܫܰܡ̈ܳܫܶܐ. ܣܰܗܪܳܐ ܕܢܰܘܥܶܐ ܘܫܶܡܫܳܐ ܢܦܰܛܶܡ ܟܽܠ ܐܶܒܳܢ̈ܺܝܢ. ܘܣܳܡ ܒܶܗ ܒܣܰܗܪܳܐ ܩܰܪܺܝܼܪܘܼܬܳܐ ܘܪܰܛܝܼܒܘܼܬܳܐ. ܘܐܳܐܰܪ ܪܰܓܝܳܐ ܕܡܰܪܚܶܫ ܘܡܰܘܥܶܐ ܟܿܠ ܐܶܒܳܢ̈ܝܼܢ. ܘܣܳܡ ܒܶܗ ܒܫܶܡܫܳܐ ܚܰܡܝܼܡܘܼܬܐ ܘܝܰܒܺܝܼܫܽܘܼܬܳܐ. ܢܒܰܫܶܠ ܦܺܐܪ̈ܐ ܘܢܰܪܡܶܐ ܛܰܥܡܳܐ ܒܟܿܠ ܐܶܒܒ̈ܢܶܐ. ܕܒܳܐܐܰܪ ܪܰܓܝܳܐ ܢܶܗܘܽܘܿܢ ܫܳܘܚܺܝܼܢ ܟܽܠ ܐܶܒܳܢ̈ܝܼܢ. ܘܚܽܘܼܡܶܗ ܕܫܶܡܫܳܐ ܢܰܠܒܶܫ ܐܶܢܽܘܢ ܟܽܠ ܓܰܘ̈ܢܳܢܺܝܼܢ. ܓܰܘܢܳܐ ܘܪܺܝܼܚܰܐ ܘܛܰܥܡܳܐ ܒܫܶܡܫܳܐ ܐܺܝܼܬ ܠܐܒ̈ܢܶܐ. ܡܰܘܥܺܝܼܬܳܐ ܕܶܝܢ ܐܰܦ ܬܰܪܒܺܝܼܬܐ ܒܣܰܗܪܳܐ ܣܺܝܼܡܳܐ.»
[3] ܬܽܘܼܩܦܳܐ: Enerji / Energy
[4] ܝܰܩܪ̈ܶܐ ܐ̱ܢܳܫ̈ܳܝܶܐ: İnsani Değerler / Human Values
[5] ܫܽܘܼܓܒܳܝܳܐ: Tercih / Seçenek / Option
[6] ܥܰܪܝܽܘܼܬܳܐ ܣܽܘܼܥܪܳܢܳܝܬܳܐ: Eylemsel Bağımlılık / Behavioral Addiction
[7] ܪܶܥܝܳܢܳܐ ܡܰܟܿܠܳܢܳܐ: Sinsi Fikir / İnsidious İdea
[8] ܐܰܒܘܼܬܳܐ: Görenek / Örf / Custom / Tardition
