ܝܠܕܐ ܒܪܝܟܐ

ܣܰܪ̈ܒܳܢܐ ܘܡܰܚ̈ܒܢܐ ܡܝܰܩܪ̈ܐ ܕܠܫܢܐ ܣܘܪܝܝܐ.

ܘܚܘܒܐ ܘܐܝܩܪܐ ܘܫܠܡܐ ܒܡܪܢ.

ܦܘܼܪܣܐ ܗ̱ܘ ܛܒܐ ܕܢܛܝܒ ܚܢܢ ܠܢ ܕܢܬܝܠܕ ܡܫܝܼܚܐ: ܡܰܟܝܼܟܐ ܘܫܰܦܝܼܪܳܐ ܘܢܰܗܝܪܳܐ ܒܰܡܥܰܪܬܐ ܕܚܘ̈ܫܳܒܝܢ ܘܫܰܪܟܐ ܕܕܘܼܒܳܪ̈ܝܢ ܘܗܘܼܦ̈ܟܝܢ ܠܰܡܬܰܪܣܳܝܘܼܬܢ ܒܣܘܼ̈ܟܠܐ ܡܬܒܰܥ̈ܝܢܐ ܕܒܪܢܫܐ ܚܕܬܐ «ܡܘܠܕܐ ܬܪܝܢܐ» ܗܢܐ ܕܡܛܠܬܗ ܡܰܟ ܘܰܢܚܶܬ ܠܐܘܪܝܐ ܕܒܝܬܠܚܝܡ.

ܣܓܝ ܒܰܣܝܼܡ ܘܰܚܠܐ ܕܘܟܪܢ ܝܰܠܕܐ ܐܠܗܳܝܐ ܗܳܢܐ ܕܰܟܡܐ ܕܡܬܥܰܦܦ ܝܬܝܪ ܚܳܠܐ ܘܒܳܣܡ ܛܰܥܡܗ. ܘܡܰܪܘܰܚ ܘܰܡܢܝܼܚ ܠܠܒ̈ܘܬܐ ܒܰܫܠܡܐ ܡܩܰܘܝܢܐ ܕܢܘܗܪܗ ܡܰܢܗܪܢܐ. ܘܰܡܨܰܝܒ ܡܰܪܕܝܼܬܐ ܒܣܘ̈ܟܳܠܐ ܡܶܬܒܰܥ̈ܝܢܐ ܕܓܳܡܪܝܼܢ ܘܚܳܣܢܝܼܢ ܘܩܳܒܥܝܼܢ ܒܪܢܫܐ ܒܬܰܪܒܝܼܬܐ ܘܡܰܪܕܘܼܬܐ ܟܢܝܼܟܬܐ ܕܡܳܬܩܐ ܡܠܘ̈ܐܐ ܙܘ̈ܡܳܝܐ ܡܼܢ ܗܶܕܣ̈ܘܗܝ ܡܶܫܬܰܦ̈ܥܳܢܐ ܕܒܗܘܢ ܢܶܣܦܰܩ ܠܢܦܫܗ ܘܠܐܚܪ̈ܢܐ ܚܰܟܝܡܐܝܬ ܘܡܰܠܝܐܝܬ.

ܡܶܟܐ ܒܪ̈ܶܓܫܐ ܕܚܰܕܘܐ ܗܢܐ ܥܘܕ̈ܥܳܕܐ ܘܒܘܼܪ̈ܟܐ ܡܩܰܪܒ ܘܡܰܘܫܛ ܐ̱ܢܐ ܠܟܘܢ ܘܒܰܫܡܟܘܢ ܫܘܳܬ ܠܝܩܪ̈ܬܟܘܢ ܘܠܟܠܗܘܢ ܥܡ̈ܘܠܬܢܐ ܗܿܢܘܢ ܕܫܳܗܪܝܢ ܘܥܳܡܠܝܼܢ ܡܛܠ ܡܐܚܝܳܢܘܼܬܐ ܕܠܫܢܐ ܣܘܼܪܝܝܐ ܘܝܪܬܘܼܬܗ ܢܨܝܚܬܐ. ܘܰܡܦܝܣ ܐ̱ܢܐ ܡܢܗ ܕܢܬܗܕܪܘܢ ܘܢܨܛܒܬܘܢ ܟܠܗܘܢ ܣܕܪ̈ܝܢ ܡܕܝ̈ܢܳܝܐ ܘܐܘܡ̈ܬܢܳܝܐ ܒܠܶܒܐ ܘܗܰܘܢܐ ܫܰܠܡܐ ܘܢܬܬܠܝܫܘܢ ܒܚܡܝܼܪܐ ܡܰܚܡܥܳܢܐ ܕܣܘ̈ܟܳܠܘܗܝ ܒܪܝܪ̈ܐ܆ ܘܢܶܣܬܰܡܣܡ ܟܘܼܪܗܢܐ ܦܪܝܼܣܐ ܘܡܬܝܰܒܠܢܐ ܒܰܥܨ̈ܳܒܐ ܡܩܰܘ̈ܝܢܐ ܘܰܡܢܝܼܚ̈ܢܐ…!

ܒܪܝܼܟ ܝܠܕܗ ܕܡܪܢ. ܘܬܬܒܰܪܟ ܫܢܬܐ ܚܕܰܬܐ 2022 ܒܛܒ̈ܬܐ ܘܒܘܼܪ̈ܟܬܐ ܕܝܰܠܕܐ ܟܕ ܙܳܠܚܐ ܫܝܢܐ ܘܫܠܡܐ ܒܥܳܡܰܪܬܐ ܘܰܒܡܰܕܢܚܐ. ܘܣܳܝܓܐ ܘܢܳܛܪܐ ܠܟܠܢ ܒܚܰܝܠܐ ܡܣܝܼܡܳܢܐ ܘܚܘܼܠܡܢܐ ܛܒܐ ܘܛܢܢܐ ܫܪܝܪܐ ܘܟܘܼܫܳܪܐ ܡܢܰܨܚܢܐ. ܐܝܟܢܐ ܕܟܠܢ ܥܡ ܟܠܢ ܝܬܝܪ ܢܡܬܘܿܩ ܘܝܬܝܪ ܢܐܬܪ… ܡܢ ܫܪܪܐ ܕܢܘܼܗܪܗ ܦܪܝܼܣܐ ܘܚܰܘܣܢܗ ܒܪܝܟܐ: «ܕܡܼܢ ܡܰܠܝܘܼܬܗ ܚܢܢ ܟܠܢ ܢܣܰܒܢ. ܘܛܰܝܒܘܼܬܐ ܚܠܦ ܛܰܝܒܘܼܬܐ» (ܝܘܚܢܢ 1: 16).

ܘܣܟܐ ܠܡܐܡܪ: ܩܰܘܘ ܦܨܝܼܚܝܼܢ ܘܰܚܘܝܼܚܝܼܢ ܘܢܝܼܚܝܼܢ ܘܰܒܗܝܼܠܝܼܢ ܒܚܘܒܐ ܘܰܫܠܰܡܐ ܘܣܰܒܪܐ ܘܫܰܝܢܐ ܕܝܰܠܕܐ ܠܗܶܢܝܢܐ ܕܝܳܪܬܘܼܬܢ ܘܠܝܘܬܪܳܢܐ ܕܗܠܝܢ ܕܝܠܟܘܢ. ܥܡ ܐܝܩܪ̈ܝ ܘܥܘܕ̈ܥܕܝ ܒܪ̈ܝܟܐ.

24 ܟܢܘܢ ܩܕܝܡ 2021 ܡܪܕܝܢ ܡܕܝܢܬ ܥܬܝܩܬܐ ܕܒܝܬܢܗܪܝܢ

ܝܘܣܦ ܒܓܬܫ

ܚܘܼܕܪܐ ܕܡܪܕܘܼܬܐ ܘܣܶܦܪܳܝܘܼܬܐ ܕܠܫܢܐ ܣܘܪܝܝܐ

Kolo d-Yaldo

https://www.youtube.com/watch?v=9dYQHX5PJYE

Yaldo Ma-denhoyo

https://www.facebook.com/watch/?v=624300095384997&extid=CL-UNK-UNK-UNK-AN_GK0T-GK1C&ref=sharing

Yaldo Ma-rboyo

https://www.facebook.com/watch/?v=1024049684741566&extid=CL-UNK-UNK-UNK-AN_GK0T-GK1C&ref=sharing