ܡܶܠܬܳܐ ܘܠܶܫܳܢܳܐ

ܡܶܠܬܳܐ ܘܠܶܫܳܢܳܐ

ܦܬܺܝܼ̈ܟܺܝܼܢ ܘܰܦܪ̈ܺܝܼܫܽܝܼܢ ܐ̱ܪ̈ܳܙܶܝܗܿ ܕܡܶܠܬܳܐ. ܘܢܳܬܰܥ ܝܽܘܼܩܪܳܗܿ ܒܪ̈ܽܘܼܫܡܶܝܗܿ ܕܣܶܦܪܳܝܽܘܼܬܳܐ. ܐܶܠܳܐ ܟܰܕ ܦܰܘܕܳܐܝܬ ܡܶܬܡܰܫܚܳܐ ܐܰܘ ܡܶܬܦܰܫܩܳܐ܆ ܣܳܪܚܳܐ ܠܬܰܪܥܺܝܼܬܐ ܘܬܰܪܒܺܝܼܬܳܐ ܕܒܰܪܢܳܫܳܐ. ܒܰܕ ܠܶܫܳܢܳܐ܆ ܡܰܣܰܐܬܰܐ ܗ̱ܘ ܕܡܶܠܬܳܐ ܘܡܰܠܳܚܰܐ ܗ̱ܘ ܕܬܰܪܥܺܝܼܬܳܐ. ܘܰܟܪܽܘܼܡܶܗ܆ ܡܚܰܘܝܳܢܰܐ ܗ̱ܘ ܕܡܰܪܕܽܘܼܬܐ ܕܟܳܬܽܘܿܒܳܐ. ܒܪܰܡ ܣܽܘܼܠܓܳܣܳܐ ܬܒܺܝܼܪܳܐ ܡܰܚܙܺܝܼܬܰܐ ܗ̱ܘ ܕܗܰܘܢܳܐ ܒܠܺܝܼܠܐ.

ܩܶܪܝܳܢܳܐ ܫܰܪܺܝܼܪܳܐ ܠܰܝܬܰܘܗܝ ܒܰܠܚܽܘܿܕ ܟܽܘܼܢܳܫܳܐ ܐܰܘ ܩܽܘܼܒܳܝܳܐ ܕܝܕܰܥܬܳܐ. ܐܶܠܳܐ ܐܳܦ ܚܳܫܰܚ ܘܐܳܙܶܠ ܠܫܽܘܼܦܳܝܳܐ ܕܪܶܥܝܳܢܳܐ ܘܕܽܘܼܟܳܝܳܐ ܕܠܶܒܳܐ ܒܗܳܠܶܝܢ ܕܫܽܘܼܟܠܳܠܳܐ ܓܰܘܳܝܳܐ. ܡܶܟܳܐ ܟܽܠ ܚܰܘܩܳܐ ܐܰܘ ܦܳܣܽܘܿܩܳܐ ܕܡܶܬܩܪܶܐ ܡܰܨܝܳܐ ܕܢܶܒܢܶܐ ܐܰܘ ܕܢܶܗܘܶܐ ܠܶܒܢܳܐ ܚܕܰܬܳܐ ܒܬܽܘܼܩܳܢܳܐ ܕܬܰܪܥܺܝܼܬܳܐ ܨܠܺܝܼܠܬܳܐ.

ܐܶܠܽܘܼܠܳܐ ܗܶܕܣܳܐ ܬܟܺܝܼܒܳܐ ܘܥܰܡܠܳܐ ܫܚܺܝܼܩܐ ܕܩܳܪܽܘܿܝܳܐ܆ ܠܳܐ ܡܶܬܕܰܠܰܠ ܘܐܳܦܠܳܐ ܡܶܬܦܰܫܰܩ ܡܶܬܩܰܪܝܳܢܳܐ. ܗܿܳܢܳܐ ܕܡܶܬܝܰܬܰܪ ܘܡܶܬܝܰܩܰܪ܆ ܟܰܕ ܡܰܪܘܰܚ ܠܐܽܘܼܦ̈ܩܶܐ ܘܦܳܬܰܚ ܟܰܘ̈ܶܐ ܚܰܕ̈ܬܶܐ. ܘܐܶܠܳܐ܆ ܓܰܢܳܒܳܐ ܕܥܶܕܳܢܳܐ ܡܶܬܚܫܶܒ «ܡܶܬܩܰܪܝܳܢܳܐ» ܗܿܰܘ ܐܰܝܢܳܐ ܕܠܳܐ ܦܳܬܰܚ ܐܽܘܼ̈ܦܩܶܐ ܘܟܰܘ̈ܶܐ ܚܰܕ̈ܬܶܐ.

ܡܶܛܽܠܗܳܕܶܐ ܩܶܪܝܳܢܳܐ ܕܦܽܘܼܪܫܳܢܳܐ ܬܰܪܣܺܝܼܬܰܐ ܗ̱ܘ ܠܬܰܪܥܺܝܼܬܳܐ. ܘܠܳܐ ܡܢܺܝܼܚ ܒܪܰܡ ܡܥܺܝܼܪ. ܘܡܰܥܡܶܩ ܘܡܰܚܪܶܦ ܠܒܽܘܼܝܳܢܳܐ. ܘܐܶܢܗܽܘܼ ܕܕܳܚܶܩ ܘܫܳܒܶܩ ܕܢܶܣܬܰܩܒܰܠ ܘܢܶܫܬܰܝܰܢ ܒܰܪܢܳܫܳܐ ܥܰܡ ܢܰܦܫܶܗ ܗܳܝܕܶܝܢ ܡܰܩܢܳܐ ܐܳܦ ܚܰܘܪܳܐ ܒܰܣܺܝܼܡܐ ܘܥܶܢܝܳܢܳܐ ܪܰܟܺܝܼܟܳܐ. ܡܶܟܳܐ ܩܳܪܽܘܿܝܳܐ ܕܦܽܘܼܪܫܳܢܳܐ ܠܰܘ ܒܰܠܚܽܘܿܕ ܡܶܬܒܰܩܶܐ ܘܡܶܙܕܗܰܪ ܒܪܽܘܼܚܳܐ ܘܠܶܫܳܢܳܐ ܕܡܶܬܩܰܪܝܳܢܳܐ܆ ܐܶܠܳܐ ܐܳܦ ܒܳܚܰܪ ܘܦܳܪܶܫ ܡܰܒܽܘܼ̈ܥܶܐ ܘܢܺܝܼ̈ܫܰܘܗܝ ܫܽܘܼܘ̈ܕܳܥܳܝܶܐ. ܒܰܕ ܠܳܐ ܡܰܨܝܳܐ ܕܢܰܩܶܠ ܝܽܘܼܩܪܳܐ «ܕܒܰܪܢܳܫܳܐ» ܐܶܠܳܐ ܪܶܥܝܳܢܳܐ ܚܠܺܝܼܡܳܐ ܡܳܪܶܐ ܣܽܘܼܟܳܠܳܐ ܡܩܰܘܝܳܢܳܐ. ܕܡܶܫܬܓܶܫ ܘܡܶܬܒܰܠܒܰܠ ܬܽܘܼܩܳܢܳܐ ܬܰܪܥܺܝܼܬܳܢܳܝܳܐ ܒܶܠܥܳܕ ܒܨܳܬܳܐ ܕܦܽܘܼܪܫܳܢܳܐ. ܘܗܿܰܘ ܕܩܳܪܶܐ ܒܶܠܥܳܕ ܣܽܘܼܟܳܠܐ ܘܦܽܘܼܫܳܩܳܐ ܠܳܐ ܟܳܢܶܫ ܐܶܠܳܐ ܥܡܺܝܼܪܳܐ ܕܐܶܓܳܪ̈ܶܐ. ܘܦܽܘܼܠܚܳܢܶܗ ܗܳܘܶܐ ܣܪܺܝܼܩܳܐ. ܘܥܰܡܠܶܗ ܦܳܐܶܫ ܕܠܳܐ ܝܽܘܼܬܪܳܢܳܐ. ܡܶܛܠܗܳܕܶܐ ܠܳܐ ܦܰܐܝܳܐ ܕܢܶܬܩܪܶܐ ܡܫܳܟܳܐܝܼܬ ܘܐܰܝܟ ܕܐܳܬܝܳܐ. ܒܰܕ ܥܰܡܠܳܐ ܕܐܰܝܟ ܗܳܢܳܐ ܠܳܐ ܡܰܩܢܶܐ ܐܠܐ ܫܚܽܘܼܩܝܳܐ ܘܰܛܪܽܘܼܦܝܳܐ. ܕܗܰܘܢܳܐ ܕܳܡܶܐ ܠܐܶܣܛܽܘܼܡܟܳܐ ܗܿܳܝ ܕܡܶܬܡܰܥܣܳܐ ܟܰܕ ܡܶܬܡܰܠܝܳܐ ܒܶܠܥܳܕ ܬܰܪܒܺܝܼܬܳܐ ܕܬܰܪܣܺܝܼܬܳܐ. ܡܶܟܳܐ ܡܰܦܩܳܢܳܐ «ܟܶܐܡܰܬ ܦܰܪܳܚܳܐ ܘܠܳܐ ܡܡܰܫܚܳܢܳܐ» ܡܶܬܚܫܶܒ ܩܳܪܽܘܿܝܳܐ ܗܿܰܘ ܐܰܝܢܳܐ ܕܠܳܐ ܦܳܪܶܫ ܘܓܳܒܶܐ ܦܰܛܢܳܐܝܼܬ ܠܡܶܬܩܰܪܝܳܢܳܐ.

ܝܰܘܣܶܦ ܒܶܓܬܰܫ

ܚܽܘܼܕܪܳܐ ܕܡܰܪܕܽܘܼܬܳܐ ܘܣܶܦܪܳܝܽܘܼܬܳܐ ܕܠܶܫܳܢܳܐ ܣܽܘܼܪܝܳܝܳܐ: ܡܰܪܕܺܝܼܢ