ܫܽܘܼܥܠܳܝܳܐ ܘܫܽܘܼܒܗܳܪܳܐ

ܫܽܘܼܥܠܳܝܳܐ ܘܫܽܘܼܒܗܳܪܳܐ

ܣܽܘܼܓܐܳܐ ܕܩܶܛܪ̈ܶܐ ܘܒܽܘܼ̈ܠܒܳܠܐ ܘܕܽܘܼ̈ܘܳܕܶܐ ܦܽܘܼܪ̈ܢܳܣܳܝܶܐ ܕܡܳܚܶܝܢ ܫܰܝܢܳܐ ܓܰܘܳܝܳܐ ܘܒܰܪܳܝܳܐ ܠܰܝܬܰܝܗܽܘܿܢ ܐܶܠܳܐ ܝܰܠܕ̈ܶܐ ܕܗܰܝܡܳܢܽܘܼܬܳܐ ܐܰܠܺܝܼܠܬܳܐ ܘܦܽܘܼܪܣܳܢܳܝܬܳܐ ܗܿܳܝ ܕܠܳܐ ܝܳܨܦܳܐ ܘܐܳܦܠܳܐ ܣܳܥܪܳܐ ܕܝܽܘܼܬܪ̈ܳܢܶܐ ܪ̈ܰܒܶܐ ܐܶܠܳܐ ܕܗܶܢܝ̈ܳܢܶܐ ܙܥܽܘܼܪ̈ܶܐ.

ܘܬܽܘܼܪ̈ܣܳܝܶܐ ܡܿܰܢ ܗܿܳܠܶܝܢ ܪ̈ܶܥܝܳܢܝܶܐ ܕܰܫܟܺܝܼܚܺܝܢ ܘܰܒܕܺܝܼܪܺܝܢ ܒܓܽܘܼܫܡܳܐ ܗܳܢܳܐ ܠܩܺܝܼܛܳܐ ܦܳܠܚܺܝܼܢ ܘܟܳܪܒܺܝܼܢ  ܬܰܪܥܺܝܼܬܳܐ ܒܗܰܝܡܳܢܽܘܼܬܳܐ ܬܪܺܝܼܨܬܳܐ ܘܕܳܡܣܺܝܼܢ ܘܫܳܕܟܺܝܼܢ ܒܰܪܢܳܫܳܐ ܥܰܠ ܫܽܘܼܥܳܐ  ܕܐܶܢܰܚܢܳܝܽܘܼܬܳܐ ܢܰܗܺܝܼܪܬܳܐ. ܘܠܰܘ ܒܰܠܚܽܘܿܕ ܗܳܕܶܐ ܐܶܠܳܐ ܐܳܦ ܕܳܚܩܺܝܼܢ ܘܛܳܪܕܺܝܢ ܡܶܢܶܗ ܬܰܪܥܺܝܼܬܳܐ ܗܿܳܝ ܚܳܠܢܳܝܬܳܐ ܕܐܶܢܳܢܳܝܽܘܼܬܳܐ  ܚܶܫܽܘܼܟܬܳܐ. ܒܰܕ ܕܠܳܐ ܟܶܫܠܳܐ ܘܰܕܠܳܐ ܦܽܘܼܠܳܓܳܐ ܚܳܫܚܺܝܼܢ ܘܐܳܙܠܺܝܼܢ ܠܰܥܨܳܒܳܐ ܘܣܽܘܼܡܣܳܡܳܐ ܕܟܽܠܗܽܘܿܢ ܡܰܪ̈ܥܶܐ ܢܰܦܫ̈ܳܢܳܝܶܐ ܗܿܢܽܘܿܢ ܕܫܳܓܫܺܝܼܢ ܘܣܳܓܦܺܝܼܢ ܡܽܘܼܙܳܓܳܐ ܒܰܣܺܝܼܡܳܐ ܒܟܽܠ ܐܰܬܰܪ ܘܦܶܢ̈ܝܳܢ.

ܘܡܼܶܢ ܓܰܒܳܐ ܬܰܪܣܺܝܼܬܳܢܳܝܳܐ ܘܡܕܰܒܪܳܬܽܘܼܢܳܝܳܐ ܡܠܽܘܼ̈ܐܶܐ ܐܶܢܽܘܿܢ ܙܽܘܼ̈ܡܳܝܶܐ ܕܢܳܣܟܺܝܼܢ ܘܫܳܦܥܺܝܼܢ ܚܰܝܠܐ ܡܨܰܝܒܳܢܐ ܘܰܡܫܰܒܠܳܢܐ ܒܕܰܪ̈ܓܶܐ ܥܺܕ̈ܬܳܢܳܝܶܐ ܘܐܰܩܡ̈ܶܐ ܥܳܠܡ̈ܳܝܶܐ: ܝܺܩܰܪ̈ܬܳܢܳܝܶܐ ܘܰܟܢܽܘܼ̈ܫܝܳܝܶܐ ܘܐܰܡ̈ܢܳܝܶܐ ܘܐܽܘܼ̈ܡܬܳܢܳܝܶܐ ܘܦܽܘܼ̈ܠܺܝܼܛܺܝܼܩܳܝܶܐ ܘܦܽܘܼ̈ܠܚܳܢܳܝܶܐ ܡܼܶܢ ܟܽܠ ܩܰܘ̈ܡܳܢ ܘܡܽܘܼ̈ܫܚܳܢ.

 ܡܳܕܶܝܢ ܓܶܕ ܢܶܩܪܶܐ ܘܢܶܗܕܽܘܿܣ ܗܿܰܘ ܡܳܐ ܕܟܳܬܶܒ ܘܐܳܡܰܪ ܡܳܪܝ ܣܳܗܕܽܘܿܢܳܐ «ܡܰܪܛܽܘܼܪܺܝܽܘܿܣ» ܒܕܳܪܳܐ ܫܒܺܝܼܥܳܝܳܐ ܒܰܨܒܽܘܼܬ ܫܽܘܼܥܠܳܝܳܐ ܘܫܽܘܼܒܗܳܪܳܐ[1] ܗܳܢܳܐ ܕܢܳܬܶܦ ܚܰܘܪܳܐ ܠܡܳܪܽܘܼܬܳܐ ܐܰܠܗܳܝܬܳܐ ܟܰܕ ܡܰܟܶܣ ܘܥܳܕܶܠ ܠܐܰܝܢܳܐ ܕܢܳܦܰܚ ܢܰܦܫܶܗ ܘܡܶܫܬܰܥܠܶܐ ܒܩܰܢܳܝܽܘܼܬܶܗ ܥܳܒܽܘܿܪܬܳܐ ܒܫܽܘܼܡܳܫܳܐ ܘܕܽܘܼܒܳܪܳܐ ܕܕܰܪܓܳܐ ܘܰܒܚܽܘܼܫܳܚܳܐ ܘܬܽܘܼܓܳܪܳܐ ܕܟܰܟܪ̈ܰܐ:

«ܥܰܠ ܐܰܦ̈ܰܝ ܐܺܝܕܳܐ ܡܫܰܩܰܠ ܐܰܢ̱ܬ ܘܪܳܡ ܕܠܳܐ ܒܰܟܝܳܢܳܟ. ܐܳܘ ܒܰܪܢܳܫܳܐ ܚܰܠܳܫܳܐ؟ ܡܳܢܳܐ ܐܺܝܬ ܠܳܟ ܕܫܳܘܶܐ ܠܪܳܡܽܘܬܳܐ؟ ܒܪܰܒܽܘܬ ܛܽܘܗܡܳܐ ܟܰܝ ܡܶܫܬܰܒܗܰܪ ܐܰܢ̱ܬ ܘܡܶܬܬܪܺܝܡ؟ ܚܙܺܝ: ܕܡܼܶܢ ܛܽܘܗܡܳܐ ܐܰܢ̱ܬ ܥܰܦܪܳܢܳܐ ܕܐܳܕܳܡ. ܘܐܰܟܘܳܬܶܗ ܠܶܗ ܗܳܦܶܟ ܐܰܢ̱ܬ.

ܘܐܶܠܳܐ ܒܥܽܘܬܪܳܐ ܘܫܽܘܠܛܳܢܳܐ؟ ܕܰܥ: ܕܥܰܪܛܶܠ ܐܰܝܟ ܚܳܕܽܘܪܳܐ ܡܢܗ ܢܳܦܩ ܐܢܬ. ܘܐܶܠܳܐ ܒܚܰܝܠܳܐ ܕܓܰܢ̱ܒܳܪܽܘܬܳܐ؟ ܕܐܰܝܟ ܫܰܦܠܳܐ ܡܶܢܶܗ ܡܶܫܬܰܢܶܐ ܐܰܢ̱ܬ. ܘܐܶܠܳܐ ܒܫܽܘܦܪܳܐ ܘܒܰܚܙܳܬܳܐ؟ ܐܶܬܒܰܝܰܢ ܡܳܢܳܐ ܒܳܬܰܪܟܶܢ ܗܳܘܶܐ ܐܰܢ̱ܬ܇ ܒܰܚܙܳܬܳܐ ܕܣܽܘܕܳܪܳܐ ܕܟܽܠܢܳܫ ܥܳܪܶܩ ܡܶܢܳܗܿ. ܐܶܠܳܐ ܒܠܶܫܳܢܳܢܽܘܬܳܐ ܘܒܺܝܕܰܥܬܳܐ؟ ܘܗܳܐ ܠܳܐ ܥܕܰܟܺܝܠ ܡܶܕܶܡ ܝܺܕܰܥܬ ܐܰܟܡܳܐ ܕܘܳܠܶܐ ܠܳܟ ܠܡܶܕܰܥ. ܘܐܳܦ ܗܺܝܼ ܗܳܕܶܐ ܬܶܬܒܛܶܠ. ܘܠܶܫ̈ܳܢܶܐ ܢܶܫܬܰܬܩܽܘܢ. ܡܶܛܽܠ ܕܩܰܠܺܝܠ ܗ̱ܽܘ ܡܼܶܢ ܣܰܓܺܝ ܝܳܕܥܺܝܢܰܢ (ܐ. ܩܽܘܪ̈ܺܝܢܬܳܝܶܐ: ܝܓ.ܚ.ܛ). ܐܰܝܟ ܡܶܠܳܬ ܦܳܘܠܽܘܣ.

ܘܐܶܢ ܠܳܐ ܒܗܳܠܶܝܢ. ܕܰܠܡܳܐ ܟܰܝ ܒܙܰܕܺܝܩܽܘܬܳܐ ܘܩܰܕܺܝܫܽܘܬܳܐ ܡܶܫܬܰܒܗܰܪ ܐܰܢ̱ܬ؟ ܘܗܳܐ: ܐܳܘ ܒܰܪܢܳܫܳܐ ܕܳܘܝܳܐ ܐܰܥܒܰܪܬܳܝܗܝ ܡܶܢܳܟ ܥܽܘܬܪܳܟ ܒܫܽܘܒܗܳܪܳܟ. ܒܰܛܶܠܬܳܝܗܝ ܦܽܘܠܚܳܢܳܟ. ܣܰܪܶܩܬܳܝܗܝ ܥܰܡܠܳܟ. ܐܰܘܒܶܕܬܳܝܗܝ ܐܰܓܪܳܟ. ܫܪܰܝܬܳܗܿ ܟܽܠܳܗܿ ܙܰܕܺܝܩܽܘܬܳܟ. ܥܒܰܕܬܳܗܿ ܒܪܳܡܽܘܬܳܟ ܠܳܐ ܡܶܕܶܡ. ܐܰܝܟ ܚܶܠܡܳܐ ܕܦܳܪܰܚ. ܘܐܰܝܟ ܛܶܠܳܠܳܐ ܕܥܳܒܰܪ.

ܘܥܰܠ ܡܳܢܳܐ ܒܗܳܠܶܝܢ ܟܽܠܗܶܝܢ ܡܶܫܬܰܒܰܗܪ ܐܰܢ̱ܬ؟ ܕܰܠܡܳܐ ܟܰܝ ܕܺܝܠܳܟ ܐܺܝܬܰܝܗܶܝܢ. ܠܳܐ ܗ̱ܘܳܐ ܟܽܠܗܶܝܢ ܡܶܣܰܒ ܢܣܺܝܼ̈ܒܳܢ ܠܳܟ ܡܼܶܢ ܐܰܠܳܗܳܐ. ܡܳܢܳܐ ܗܳܟܺܝܠ ܐܺܝܬ ܠܳܟ ܕܠܳܐ ܢܣܰܒܬ. ܐܰܝܟ ܡܶܠܰܬ ܫܠܺܝܚܳܐ. ܕܒܶܗ ܐܰܝܟ ܐܰܝܟ ܕܰܒܕܺܝܠܳܟ ܬܶܫܬܰܒܗܰܪ؟ ܘܐܶܢ ܢܣܰܒܬ܆ ܠܡܳܢܳܐ ܡܶܫܬܰܒܗܰܪ ܐܰܢ̱ܬ ܐܰܝܟ ܗܰܘ ܕܠܳܐ ܢܣܰܒܬ؟ (ܐ. ܩܽܘܪ̈ܺܝܢܬܳܝܶܐ: ܕ. ܙ)

ܐܶܢ ܛܽܘܗܡܳܟ؟ ܡܶܢܶܗ ܓܒܺܝܠ ܘܰܡܝܰܩܰܪ. ܘܥܽܘܬܪܳܟ؟ ܕܺܝܠܶܗ ܐܺܝܬܰܘܗܝ. ܘܚܰܝܠܳܟ؟ ܡܶܢܶܗ ܡܫܰܪܰܪ. ܘܫܽܘܦܪܳܟ؟ ܠܶܗ ܡܨܰܒܰܬ. ܘܚܶܟܡܬܳܟ؟ ܡܶܢܶܗ ܝܺܗܺܝܒܳܐ. ܐܶܠܳܐ ܟܒܰܪ ܒܗܳܠܶܝܢ ܠܳܐ ܡܶܫܬܰܒܗܰܪ ܐܰܢ̱ܬ. ܐܰܟܡܰܢ ܕܐܶܬܪܰܚܰܩܬ ܡܼܶܢ ܥܳܠܡܳܐ؟ ܘܐܳܦ ܠܳܐ ܛܳܟ ܫܟܺܝܼܚ ܠܳܟ؟

ܘܐܳܦܶܢ ܐܺܝܬܰܝܗܶܝܢ: ܐܰܝܟ ܙܰܕܺܝܩܳܐ ܕܒܰܓܡܺܝܪܽܘܬܳܐ ܡܗܰܠܶܟ ܡܰܪܦܶܐ ܐܰܢ̱ܬ ܠܗܶܝܢ. ܕܰܫܡܰܥܬܳܝܗܝ ܠܰܫܠܺܝܼܚܳܐ ܕܐܶܡܼܰܪ: ܕܠܳܐ ܗ̱ܘܳܐ ܠܗܳܠܶܝܢ ܓܒܳܐ ܐܰܠܳܗܳܐ. ܐܶܠܳܐ ܠܣܰܟ̈ܠܰܘܗܝ ܕܥܳܠܡܳܐ ܘܠܰܟܪ̈ܺܝܗܰܘܗܝ. ܕܢܰܒܗܶܬ ܠܚܰܟ̈ܺܝܡܶܐ ܘܰܠܚܰܝ̈ܠܬܳܢܶܐ. ܘܠܰܒܨܺܝܼܪ̈ܰܝ ܛܽܘܼܗܡܳܐ ܘܰܠܡܰܣ̈ܠܰܝܳܐ ܘܰܕܠܰܝܬ ܐܶܢܽܘܢ. ܕܰܢܒܰܛܶܠ ܠܐܰܝܠܶܝܢ ܕܐܺܝܬܰܝܗܽܘܢ. ܕܠܳܐ ܢܶܫܬܰܒܗܰܪ ܟܽܠ ܒܣܰܪ ܩܕܳܡܰܘܗܝ (ܐ. ܩܘܪ̈ܝܢܬܝܐ: ܐ. ܟܙ. ܟܛ).»

ܐܰܟܡܳܐ ܕܰܡܒܰܕܩܺܝܼܢ ܝܰܕܽܘܼ̈ܥܬܳܢܶܐ ܕܳܪ̈ܳܢܳܝܶܐ: ܫܽܘܼܒܗܳܪܳܐ ܡܿܰܢ ܠܳܐ ܡܰܘܠܶܕ ܐܶܠܳܐ ܡܫܰܩܠܽܘܼܬ ܚܽܘܼ̈ܫܳܒܶܐ. ܘܫܽܘܼܥܠܳܝܳܐ ܕܶܝܢ ܠܳܐ ܡܰܘܠܶܕ ܐܶܠܰܐ ܬܰܚܬܽܘܼܪܳܐ ܗܿܰܘ ܕܐܳܦ ܗܽܘܼ ܡܰܘܠܶܕ ܬܰܟܬܽܘܼܫܳܐ ܓܰܘܳܝܳܐ ܘܒܰܪܳܝܳܐ. ܡܳܕܶܝܢ ܙܳܕܶܩ ܕܰܢܕܽܘܼܫ ܘܢܶܟܒܽܘܿܫ ܫܽܘܼܥܠܳܝܳܐ ܘܫܽܘܼܒܗܳܪܳܐ ܟܽܠ ܡܿܰܢ ܕܒܳܥܶܐ ܕܢܰܨܠܰܚ ܒܬܽܘܼܓܳܪܳܐ ܕܟܰܟܪ̈ܶܐ ܕܐܰܩܡܳܐ ܘܕܰܪܓܳܐ. ܘܐܶܢ ܠܳܐ ܟܳܫܰܪ ܒܰܐܓܽܘܼܢܳܐ ܗܳܢܳܐ ܠܳܐ ܡܶܫܬܰܘܙܰܒ ܡܼܶܢ ܥܽܘܼܪ̈ܙܳܠܶܐ ܕܐܶܢܳܢܳܝܘܼܬܳܐ ܡܰܠܝܰܬ ܢܶܫ̈ܒܶܐ ܕܫܽܘܼܥܠܳܝܳܐ ܒܠܺܝܼܠܐ. ܡܶܟܳܐ ܥܰܡ ܫܰܦ̈ܠܶܐ ܡܶܬܶܡܢܶܐ ܘܠܳܐ ܡܶܬܚܬܶܡ ܥܰܡܠܶܗ ܛܳܒܳܐܝܼܬ ܩܶܨܰܬ ܦܽܘܼܚܳܡܳܐ…. ܘܪܡܳܝܳܐ ܕܚܽܘܼ̈ܒܠܶܐ.

 

ܝܰܘܣܶܦ ܒܶܓܬܰܫ

ܚܘܕܪܐ ܕܡܪܕܘܬܐ ܘܣܦܪܝܘܬܐ ܕܠܫܢܐ ܣܘܪܝܝܐ: ܡܪܕܝܢ

 

[1] ܟܬܳܒܳܐ ܕܫܽܘܼܡܠܳܝ ܕܽܘܼܒܳܪ̈ܶܐ ܕܰܥܒܺܝܼܕ ܠܩܰܕܝܼܫܳܐ ܡܰܪܛܽܘܼܪܺܝܘܿܣ. ܪܺܝܼܫܳܐ ܕܥܶܣܪܳܐ: ܡܰܟܺܝܼܟܽܘܼܬܳܐ ܡܥܰܠܰܝܬܐ. ܦܰܐܬܐ 353-354. ܛܰܒܥܳܐ ܕܦܰܪܺܝܼܣ ܫܢܬ 1902. ܦܳܪܽܘܿܣܳܐ ܦܳܘܠ ܒܰܝܓܰܢ.