ܬܰܪܥܽܘܼܬܳܐ ܘܫܰܠܡܽܘܼܬܳܐ ܕܝܰܠܕܳܐ

ܬܰܪܥܽܘܼܬܳܐ ܘܫܰܠܡܽܘܼܬܳܐ ܕܝܰܠܕܳܐ

ܒܪܺܝܼܟ ܡܰܘܠܳܕܶܗ ܕܡܳܪܰܢ. ܘܫܰܢܬܳܐ ܚܕܰܬܳܐ ܕܛܳܒ̈ܳܬܐ ܘܒܽܘܼܪ̈ܟܳܬܐ.

ܠܳܐ ܦܰܐܝܳܐ ܘܐܳܦܠܳܐ ܚܳܫܚܳܐ ܕܰܢܩܰܘܶܐ ܒܰܪܢܳܫܳܐ ܣܳܩܽܘܿܪܳܐ ܒܶܠܥܳܕ ܬܰܪܥܽܘܼܬܳܐ ܕܰܫܠܳܡܳܐ ܚܰܣܝܳܐ ܘܚܽܘܼܒܳܐ ܒܰܩܝܳܐ ܥܰܡ ܢܰܦܫܶܗ ܘܰܟܝܳܢܳܐ ܡܠܺܝܼܠܳܐ. ܘܕܺܝܼܠܳܢܳܐܝܼܬ ܒܙܰܒܢܳܐ ܕܒܶܗ ܠܶܒܰܘ̈ܳܬܳܐ ܩܶܛܡܳܐ ܪܳܥܶܝܢ.

ܡܶܛܠܗܳܕܶܐ ܟܽܠ ܫܢܳܐ ܒܰܫܢܳܐ ܕܳܢܰܚ ܥܠܰܝܢ ܥܺܐܕܳܐ ܕܝܰܠܕܳܐ ܐܠܗܳܝܳܐ ܒܚܽܘܼ̈ܟܳܡܰܘܗܝ ܢܰܗܺܝܼܪ̈ܶܐ ܘܡܰܟܺܝܼ̈ܟܶܐ ܐܰܝܟܰܢܳܐ ܕܰܢܫܰܚܶܢ ܘܰܢܥܰܫܶܢ ܨܰܘ̈ܒܶܐ ܘܗܽܘ̈ܕܳܝܶܐ ܕܪܽܘܼܚܳܐ ܒܓܰܘܰܢ ܡܶܛܽܠ ܛܳܒܳܘܼܬ ܬܰܪܥܽܘܼܬܳܐ ܘܫܰܠܡܽܘܼܬܳܐ ܓܰܘܳܝܬܳܐ ܘܰܬܪܺܝܼܨܽܘܼܬܳܐ ܘܬܰܩܺܝܼܢܽܘܼܬܳܐ ܒܰܪܳܝܬܳܐ. ܒܗܿܳܝ ܕܰܡܫܺܝܼܚܳܐ ܠܳܐ ܐܶܬܝܼܠܶܕ ܐܠܐ ܕܰܢܫܰܚܶܢ ܘܰܢܡܰܟܶܟ ܘܢܰܢܗܰܪ ܐ̱ܢܳܫܽܘܼܬܳܐ ܒܪܽܘܼܚܳܐ ܕܣܽܘܼ̈ܟܳܠܰܘܗܝ ܡܰܚ̈ܝܳܢܶܐ. ܘܗܺܝܼ ܗܳܕܶܐ ܫܰܒܰܚ ܘܐܰܘܕܰܥ ܒܠܶܫܳܢܳܐ ܦܪܺܝܼܫܳܐ ܕܠܰܝܬ ܐܰܟܘܳܬܶܗ ܒܥܳܠܡܳܐ.

ܡܶܛܠܗܳܕܶܐ ܟܽܠ ܐܶܡܰܬܝ ܕܣܳܥܰܪ ܠܰܢ ܚܰܕܘܳܐ ܕܝܰܠܕܳܐ ܐܠܗܳܝܳܐ ܦܰܐܝܳܐ ܕܢܶܕܟܰܪ ܘܢܰܕܟܰܪ ܕܠܰܡ ܩܕܳܡ ܕܰܢܨܰܒܶܬ ܐܝ̈ܠܳܢܶܐ ܕܣܳܚܪ̈ܳܬܳܐ ܘܒܺܝܼܪ̈ܳܬܳܐ ܘܐܳܦܰܕ̈ܢܶܐ ܘܒ̈ܳܬܶܐ ܕܺܝܼܠܰܢ ܙܳܕܶܩ ܕܢܶܚܦܽܘܿܪ ܥܰܦܪܳܐ ܕܐܺܝܼܠܳܢܳܐ ܕܒܰܪܢܳܫܰܢ ܓܰܘܳܝܳܐ ܡܶܛܽܠ ܡܰܝܬܝܽܘܼܬ ܦܺܐܪ̈ܶܐ ܛܳܒ̈ܶܐ ܘܡܰܘܬܪ̈ܳܢܶܐ. ܒܰܕ ܠܰܝܬ ܩܪܳܒܳܐ ܕܥܰܫܺܝܼܢ ܘܥܰܙܺܝܼܙ ܐܰܝܟ ܗܿܰܘ ܕܚܳܐܶܫ ܒܰܪܢܳܫܳܐ ܩܶܨܰܬ ܚܶܪܝܳܢܳܐ ܕܰܬܪܰܝܳܢܽܘܼܬܐ: ܣܰܩܽܘܼܒܠܳܝܽܘܼܬܳܐ ܓܰܘܳܝܬܳܐ «ܦܰܓܪܳܐ ܘܪܽܘܼܚܳܐ» ܒܥܳܠܡܳܐ ܓܰܘܳܝܳܐ. ܘܰܩܪܳܒܳܐ ܗܳܢܳܐ ܠܳܐ ܢܳܐܰܚ ܘܐܳܦܠܳܐ ܡܶܫܬܰܝܰܢ ܐܶܠܳܐ ܒܬܰܪܥܽܘܼܬܳܐ ܘܫܰܠܡܽܘܼܬܳܐ ܓܰܘܳܝܬܳܐ. ܡܶܛܠܗܳܕܶܐ ܒܰܪܢܳܫܳܐ ܐܰܡܺܝܼܢܳܐܝܼܬ ܡܶܣܬܢܳܩܘܼ ܡܶܣܬܢܶܩ ܠܣܽܘܼ̈ܟܳܠܶܐ ܕܪܽܘܼܚܳܐ ܒܬܰܟܬܽܘܼܫܳܐ ܗܳܢܳܐ ܐܰܝܟܰܢܳܐ ܕܪܰܕܝܳܐܝܼܬ ܢܶܬܦܰܓܕܽܘܿܢ ܝܰܨܪ̈ܶܐ ܒܺܝܼ̈ܫܶܐ ܘܬܰܩܢܳܐܝܼܬ ܢܶܫܬܰܒܠܽܘܿܢ ܚܽܘܼ̈ܫܳܒܶܐ ܣܢ̈ܰܝܳܐ ܒܐܽܘܼܪܚܳܐ ܡܪܰܥܝܳܢܺܝܼܬܳܐ.

ܠܳܐ ܢܶܛܥܶܐ: ܬܰܪܥܽܘܼܬܳܐ ܘܫܰܠܡܽܘܼܬܳܐ ܓܰܘܳܝܬܳܐ ܕܒܰܪܢܳܫܳܐ ܠܳܐ ܡܶܫܬܰܡܠܝܳܐ ܐܶܠܳܐ ܒܣܽܘܼ̈ܟܳܠܶܐ ܡܰܚ̈ܝܳܢܶܐ ܕܝܰܠܕܳܐ ܐܰܠܗܳܝܳܐ. ܒܰܕ ܡܫܺܝܼܚܳܐ ܣܽܘܼ̈ܟܰܠܘܗܝ ܢܽܘܼܗܪܳܐ ܐܶܢܽܘܢ ܕܪܽܘܼܚܳܐ. ܡܫܺܝܼܚܳܐ ܣܽܘܼ̈ܟܳܠܰܘܗܝ ܫܰܝܢܳܐ ܐܶܢܽܘܢ ܕܢܰܦܫܳܐ. ܡܫܺܝܼܚܳܐ ܣܽܘܼ̈ܟܳܠܰܘܗܝ ܚܶܟܡܳܐ ܐܶܢܽܘܿܢ ܕܗܰܘܢܳܐ. ܡܫܺܝܼܚܳܐ ܣܽܘ̈ܟܳܠܰܘܗܝ ܬܰܪܕܺܝܼܬܳܐ ܘܬܰܪܣܺܝܼܬܳܐ ܘܬܰܪܒܺܝܼܬܳܐ ܐܶܢܽܘܿܢ ܕܦܰܓܪܳܐ. ܡܫܺܝܼܚܳܐ ܣܽܘ̈ܟܳܠܰܘܗܝ ܢܺܝܼܪܳܐ ܐܶܢܽܘܢ ܢܺܝܼܚܳܐ ܘܒܰܣܺܝܼܡܳܐ. ܡܫܺܝܼܚܳܐ ܣܽܘ̈ܟܳܠܰܘܗܝ ܨܰܘܒܳܐ ܐܶܢܽܘܢ ܕܦܽܘܼܪܥܳܢܳܐ ܘܦܽܘܼܪܩܳܢܳܐ.

ܡܳܕܶܝܢ ܓܶܕ ܐܰܟܚܰܕ ܢܨܰܠܶܐ ܘܢܺܐܡܰܪ: ܐܳܘ ܢܽܘܼܗܪܳܐ ܕܪܽܘܼܚܳܐ. ܐܳܘ ܫܰܝܢܳܐ ܕܢܰܦܫܳܐ. ܐܳܘ ܚܶܟܡܳܐ ܕܗܰܘܢܳܐ. ܐܳܘ ܬܰܪܒܺܝܼܬܐ ܕܦܰܓܪܳܐ. ܐܳܘ ܨܰܘܒܳܐ ܕܟܺܐܢܽܘܼܬܐ ܘܚܺܐܪܽܘܼܬܳܐ.

«ܛܰܪ ܠܰܢ ܒܰܫܡܳܟ. ܘܨܽܘܼܒ ܒܰܢ ܫܪܳܪܳܟ. ܘܓܶܕ ܠܰܢ ܠܘܳܬܳܟ. ܘܚܰܕܶܬ ܠܘܳܬܰܢ ܐ̱ܪܳܙܳܐ ܕܨܰܠܡܳܟ ܘܰܒܛܺܝܼܠܘܼܬܳܟ. ܒܚܰܝ̈ܶܐ ܕܰܬܢܳܢ ܢܶܗܘܶܐ ܡܣܰܬܪ̈ܶܐ ܬܚܶܝܬ ܛܰܝܒܽܘܼܬܳܟ. ܘܡܳܐ ܕܫܰܢܺܝܼܢܰܢ ܡܢܺܝܼܢ ܒܰܚܕܽܘܼ̈ܓܶܐ ܕܗܿܳܝ ܡܶܫܬܽܘܼܬܳܟ.»

ܘܰܒܚܰܕܘܳܐ ܗܳܢܳܐ ܦܪܺܝܼܣܳܐ ܬܰܗ̈ܢܝܳܬܳܐ ܚܰܡܺܝܼ̈ܡܳܬܐ ܡܩܰܪܶܒ ܐ̱ܢܳܐ ܠܟܽܠܗܽܘܿܢ ܡܫܺܝܼ̈ܚܳܝܶܐ. ܘܰܡܦܺܝܼܣ ܐ̱ܢܳܐ ܕܫܰܢ̱ܬܳܐ ܚܕܰܬܳܐ ܕܬܶܗܘܶܐ ܡܰܠܝܳܐ ܚܽܘܼܠܡܳܢܳܐ ܘܚܰܕܘ̈ܳܬܳܐ ܘܒܽܘܼܪ̈ܟܳܬܐ ܘܫܽܘܼܘܫܳܛܐ ܠܒܢ̈ܝ ܥܰܡܰܢ ܟܽܠ ܟܰܪ ܕܚܳܐܝܢ ܘܰܦܪܺܝܼܫܳܐܝܼܬ ܠܥ̈ܰܠܳܠܢܶܐ ܥܺܕܬܳܢܳܝ̈ܶܐ ܘܰܡܕܰܒܪ̈ܳܢܶܐ ܐܽܘܡ̈ܬܳܢܳܝܶܐ ܘܰܠܟܽܠܗܽܘܢ ܛܰܣܪܳܪ̈ܶܐ ܠܶܫܳܢܳܝ̈ܶܐ ܘܡܰܪ̈ܕܽܘܼܬܳܢܳܝܶܐ ܘܥܰܡܽܘܼ̈ܠܬܳܢܶܐ ܝܽܘܼܕ̈ܳܥܳܝܶܐ…

ܒܣܰܒܪܳܐ ܕܬܶܣܰܦ ܢܽܘܼܪܳܐ ܟܣܺܝܼܳܬܐ ܕܚܽܘܼܒܳܐ ܫܰܦܝܳܐ «ܝܺܠܺܝܼܕܳܐ» ܟܰܪ ܕܡܶܬܒܰܥܝܳܐ ܐܰܝܟܰܢܳܐ ܕܬܰܘܩܶܕ ܝܰܥܪ̈ܶܐ ܘܟܽܘܼܒ̈ܶܐ ܡܼܶܢ ܚܽܘܼ̈ܫܳܒܶܐ….

ܥܰܡ ܚܽܘܼܒܳܐ ܘܰܫܠܳܡܳܐ ܘܒܽܘܼܪ̈ܳܟܶܐ ܠܶܒܳܢ̈ܳܝܶܐ ܘܚܰܡܺܝܼ̈ܡܶܐ ܠܟܽܠ.

23 ܟܢܘܢ ܩܕܝܡ 2025

ܝܰܘܣܶܦ ܒܶܓܬܰܫ

ܚܘܕܪܐ ܕܡܪܕܘܬܐ ܘܣܦܪܝܘܬܐ ܕܠܫܢܐ ܣܘܪܝܝܐ: ܡܪܕܝܢ