ܡܨܰܠܬܳܐ ܕܗܰܘܢܳܐ ܘܐܰܩܢܳܐ ܕܢܺܝܼܫܳܐ

ܡܨܰܠܬܳܐ ܕܗܰܘܢܳܐ ܘܐܰܩܢܳܐ^[1] ܕܢܺܝܼܫܳܐ

ܗܰܘܢܳܐ ܙܗܺܝܼܪܳܐ ܘܰܚܦܺܝܼܛܳܐ ܐܰܡܺܝܼܢܳܐܝܼܬ ܣܳܕܰܪ ܕܰܪܳܐ ܚܰܣܺܝܢܼܳܐ ܒܫܰܪ̈ܒܶܐ ܬܪ̈ܥܺܝܼܬܳܢܳܝܶܐ. ܒܰܕ ܡܶܬܚܰܦܰܛ ܕܢܶܬܩܽܘܿܠ ܘܢܶܕܪܽܘܿܫ ܩܕܳܡ ܕܢܶܦܣܽܘܿܩ ܘܢܶܚܪܽܘܿܩ. ܡܶܛܠܗܳܕܶܐ ܬܩܽܘܼܠܝܳܐ ܗܰܘܢܳܢܳܝܳܐ ܡܫܰܒܠܳܢܰܐ ܗ̱ܘ ܪܰܒܳܐ ܒܰܚܙܽܘܼܩܝܳܐ ܕܫܽܘܘܼܫܳܛܳܐ ܪܽܘܼܚܳܢܳܝܳܐ ܘܣܽܘܼܟܳܠܳܝܳܐ. ܘܰܡܨܰܠܬܳܐ ܕܗܰܘܢܳܐ܆ ܠܳܐ ܡܶܬܬܰܗܝܳܐ ܘܐܳܦܠܳܐ ܡܶܬܬܰܗܡܝܳܐ ܒܬܶܫܡܶܫܬܳܐ ܘܰܬܩܽܘܼܠܝܳܐ ܕܫܰܪ̈ܒܶܐ ܬܰܪ̈ܥܺܝܼܬܳܢܳܝܶܐ…

ܡܶܬܚܰܦܶܐ ܩܽܘܼܫܬܳܐ ܘܡܶܬܓܢܶܙ ܒܳܬܰܪ ܘܺܐܠܐ ܟܰܕ ܗܿܰܘ ܡܳܐ ܕܡܶܫܬܡܰܥ ܡܬܩܰܒܰܠ ܒܶܠܥܳܕ ܒܽܘܼܨܳܝܳܐ ܘܒܽܘܼܩܳܪܳܐ. ܘܕܳܡܶܐ ܠܐܰܪܥܳܐ ܕܠܳܐ ܫܰܩܝܳܐ ܗܰܘ ܕܰܡܩܰܒܶܠ ܒܶܠܥܳܕ ܬܩܽܘܼܠܝܳܐ ܘܒܶܨܝܳܢܳܐ. ܘܟܰܕ ܠܐ ܒܳܨܶܐ ܘܐܳܦܠܳܐ ܬܳܩܶܠ ܠܳܐ ܡܶܬܬܰܪܣܶܐ ܡܼܶܢ ܦܨܺܝ̈ܕܶܐ ܨܠܺܝܼ̈ܠܶܐ ܕܩܽܘܼܫܬܳܐ ܡܰܚܝܳܢܳܐ. ܒܪܰܡ ܦܳܐܫ ܟܰܕ ܡܟܰܬܰܪ ܘܫܳܩܶܐ ܡܼܶܢ ܡܰܒܘܼ̈ܥܶܐ ܕܠܺܝܼ̈ܚܶܐ ܗܿܳܢܽܘܿܢ ܕܣܳܓܦܺܝܼܢ ܩܽܘܼܝܳܡܳܐ ܢܰܦܫܳܢܳܝܳܐ ܘܢܳܟܶܝܢ ܫܽܘܼܘܫܳܛܳܐ ܪܽܘܼܚܳܢܳܝܳܐ. ܡܶܛܠܗܳܕܶܐ ܗܿܰܘ ܡܳܐ ܕܡܶܬܩܰܒܰܠ ܙܳܕܶܩ ܩܰܕܡܳܐܝܼܬ ܕܢܶܨܛܰܠܰܠ ܒܰܡܨܰܠܬܳܐ ܕܗܰܘܢܳܐ ܘܒܳܬܰܪܟܶܢ ܢܶܫܬܰܕܰܪ ܠܚܽܘܼܫܳܚܳܐ ܕܠܶܒܳܐ.

ܐܠܐ ܒܪܰܡ ܥܰܡܗܳܕܶܐ܆ ܠܰܘ ܒܰܠܚܽܘܿܕ ܒܰܡܨܰܠܬܳܐ ܕܗܰܘܢܳܐ ܡܶܫܬܰܡܠܶܐ ܘܢܳܨܰܚ ܫܽܘܼܡܠܳܝܳܐ ܣܽܘܼܟܳܠܳܝܳܐ ܘܪܽܘܼܚܳܢܳܝܳܐ ܐܶܠܳܐ ܒܫܰܦܝܽܘܼܬܳܐ ܘܰܒܕܰܟܝܽܘܼܬܳܐ ܕܬܰܪܥܺܝܼܬܳܐ ܚܠܺܝܼܡܬܳܐ. ܒܰܕ ܕܽܘܼܒܳܪ̈ܶܐ ܫܰܪܺܝܼܪ̈ܶܐ ܕܩܽܘܼܫܬܳܐ ܛܡܺܝܼܪܺܝܼܢ ܒܢܶܒ̈ܗܶܐ ܘܢܺܝܼ̈ܫܶܐ ܓܰܘܳܝ̈ܶܐ ܘܠܰܘ ܒܙܰܘ̈ܥܶܐ ܘܪ̈ܰܘܒܶܐ ܒܰܪ̈ܳܝܶܐ. ܘܐܝܼܩܳܪܳܐ ܕܚܰܘܣܳܢܳܐ ܠܐ ܡܶܫܬܰܪܰܪ ܒܒܶܣܬܪܳܝܽܘܼܬܳܐ ܕܠܺܝܼܚܬܳܐ ܘܰܒܢܰܦܫܳܢܳܝܽܘܼܬܳܐ ܙܠܺܝܼܡܬܳܐ ܕܥܰܡ̈ܠܶܐ ܘܰܥܒ̈ܳܕܶܐ ܒܰܪ̈ܳܝܶܐ. ܐܶܠܳܐ ܡܶܬܓܠܶܐ ܩܪܺܝܼܚܳܐܝܼܬ ܒܚܽܘܼ̈ܬܚܳܬܶܐ ܘܓܽܘܼܪ̈ܳܓܶܐ ܙܳܩܽܘܼ̈ܬܳܐ ܕܒܶܣܬܪܳܝܽܘܼܬܳܐ ܨܠܺܝܼܠܬܳܐ ܕܪܶܓܫܳܐ ܘܢܺܝܼܫܳܐ ܘܥܰܡܠܳܐ. ܡܶܛܽܠܗܳܕܶܐ ܠܳܐ ܡܬܰܪܣܶܐ ܘܐܳܦܠܳܐ ܡܪܰܒܶܐ ܢܰܦܫܳܐ ܕܥܳܒܽܘܿܕܳܐ܆ ܐܶܢ ܢܺܝܼܫܳܐ ܕܚܰܘܣܳܢܳܐ ܗܳܘܶܐ ܡܶܛܽܠ ܛܳܒܬܳܐ ܕܝܽܘܼܬܪܳܢܳܐ ܦܰܪܨܽܘܼܦܳܝܳܐ ܐܰܘ ܗܶܢܝܳܢܳܐ ܕܺܝܼܠܳܢܳܝܳܐ. ܒܪܰܡ ܕܰܠܩܽܘܼܒܠܳܐ ܝܳܪܒܳܐ ܘܪܳܘܚܳܐ ܘܢܳܝܚܳܐ ܒܶܗ ܢܰܦܫܳܐ܆ ܐܶܢ ܢܺܝܼܫ ܚܰܘܣܳܢܳܐ ܗܳܘܐ ܡܶܛܽܠ ܥܽܘܼܙܳܙܳܐ ܕܢܽܘܼܗܪܳܗܿ ܕܛܳܒܽܘܼܬܳܐ ܘܡܰܩܠܳܢܽܘܼܬ[2] ܡܰܘܒܠܐ ܕܰܐ̱ܚܪ̈ܳܢܶܐ ܘܬܶܫܡܶܫܬܳܐ ܕܩܰܪܺܝܼܒܳܐ ܘܩܽܘܼܝܳܡܳܐ ܓܰܘܳܢܳܝܳܐ. ܡܰܥܒ̈ܕܳܢܘܳܬܐ ܓܰܘܳܝ̈ܳܬܳܐ ܕܕܽܘܼܒܳܪܳܐ ܗܳܢܳܐ ܙܥܽܘܿܪܳܐ ܐܰܘ ܒܨܺܝܼܪܳܐ܆ ܡܫܰܘ̈ܫܛܳܢ ܘܰܡܥܰܫ̈ܢܢ ܒܰܪܢܳܫܳܐ.

ܘܰܫܪܳܪܳܐ ܗܳܢܳܐ ܐܰܩܢܰܐ ܗ̱ܘ ܪܺܝܼܫܳܝܳܐ ܕܒܶܗ ܡܶܬܒܰܚܪܺܝܼܢ ܘܡܶܬܬܟܺܝܼܠܺܝܢ ܪ̈ܶܥܝܳܢܶܐ ܘܰܥܒ̈ܳܕܶܐ ܘܢܺܝܼ̈ܫܶܐ ܐ̱ܢܳܫ̈ܳܝܶܐ ܟܽܠܗܽܘܿܢ ܟܣ̈ܰܝܳܐ ܘܰܓܠܰܝ̈ܳܐ. ܘܰܒܣܽܘܼܟܳܠܳܐ ܗܳܢܳܐ܆ ܢܺܝܼܫܳܐ ܕܥܰܡܠܳܐ ܐܰܩܢܰܐ ܗ̱ܘ ܕܒܶܗ ܡܶܬܒܚܰܪ ܚܙܽܘܼܩܝܳܐ ܣܽܘܼܟܳܠܳܝܳܐ ܘܪܽܘܼܚܳܢܳܝܳܐ. ܟܰܕ ܠܳܐ ܡܰܨܝܳܐ ܕܢܶܫܬܰܕܠܘܢ ܘܢܶܫܬܰܘܫܽܘܢ ܢܳܡܘ̈ܣܶܐ ܐܠܗܳܝ̈ܶܐ܆ ܠܳܐ ܡܰܨܝܳܐ ܕܢܶܣܰܩ ܕܰܪ̈ܓܶܐ ܕܬܰܩܢܽܘܼܬ ܕܽܘܒܳܪ̈ܶܐ ܥܰܬܺܝܼܪܳܐ ܗܿܰܘ ܕܦܳܪܰܥ ܙܶܕܩܬܳܐ ܘܝܳܗܶܒ ܥܽܘܼܕܪܳܢܳܐ ܒܪܽܘܼܚܳܐ ܕܫܰܦܽܘܼܪܬܳܢܽܘܼܬܳܐ. ܒܪܰܡ ܩܳܢܶܐ ܕܰܪܓܳܐ ܥܳܗܢܳܝܳܐ ܟܢܺܝܼܟܳܐ ܒܡܰܣ̈ܩܳܢܶܐ ܕܫܽܘܼܘܫܳܛܳܐ ܣܽܘܼܟܳܠܳܝܳܐ ܠܶܒܳܐ ܗܿܰܘ ܕܦܳܪܰܥ ܘܝܳܗܶܒ ܦܨܺܝܼܚܳܐܝܼܬ ܘܫܦܺܝܼܥܳܐܝܼܬ. ܘܕܽܘܼܒܳܪܳܐ ܗܳܢܳܐ ܡܰܕܠܳܢܳܐ^[3] ܡܰܘܪܶܒ ܘܡܰܪܘܰܚ ܠܒܰܪܢܳܫܳܐ ܣܽܘܼܟܳܠܳܐܝܼܬ.

ܠܐ ܢܶܛܥܶܐ: ܩܽܘܼܝܳܡܳܐ ܪܽܘܼܚܳܢܳܝܐ ܘܫܽܘܼܘܫܳܛܳܐ ܣܽܘܼܟܳܠܳܝܳܐ ܠܳܐ ܡܶܬܬܟܺܝܼܠ ܘܐܳܦܠܳܐ ܡܶܬܡܫܰܚ ܒܕܽܘܼܒܳܪ̈ܶܐ ܒܠܺܝܼ̈ܠܶܐ ܘܒܰܠܒܽܘܼ̈ܫܶܐ ܘܒܪܰܒܽܘܼܬܳܐ ܕܐܰܩ̈ܡܶܐ ܘܙܰܘ̈ܥܶܐ ܒܰܪ̈ܳܝܶܐ ܡܶܬܚ̈ܰܙܝܳܢܶܐ ܐܶܠܳܐ ܒܰܥ̈ܒܳܕܶܐ ܬܰܩ̈ܢܶܐ ܘܟܢܺܝܼ̈ܟܶܐ ܘܡܰܟܺܝܼ̈ܟܶܐ. ܒܰܕ ܩܰܢܛܺܝܼܪܳܐ ܐܠܗܳܝܳܐ ܘܡܰܬܩܳܠܳܐ ܬܺܐܪܬܳܢܳܝܳܐ ܠܳܐ ܬܳܩܶܠ ܝܽܘܼܩܪܳܐ ܒܰܪܳܝܳܐ ܕܡܶܬܚܙܰܘܙܝܳܢܽܘܼܬܳܐ ܐܶܠܳܐ ܝܽܘܼܩܪܳܐ ܗܿܰܘ ܓܰܘܳܝܳܐ ܕܬܰܪܥܺܝܼܬܳܐ ܛܳܒܬܳܐ ܘܰܕܟܺܝܼܬܳܐ ܘܰܫܦܺܝܼܬܳܐ.    

ܝܰܘܣܶܦ ܒܶܓܬܰܫ

ܚܘܕܪܐ ܕܡܪܕܘܬܐ ܘܣܦܪܝܘܬܐ ܕܠܫܢܐ ܣܘܪܝܝܐ. ܡܪܕܝܢ

[1] ܐܰܩܢܳܐ: ܟܺܐܦܳܐ ܗ̱ܝ ܕܡܳܫܚܺܝܼܢ ܘܡܰܥܠܺܝܼܢ ܠܳܗܿ ܠܢܽܘܼܪܳܐ ܘܒܳܗܿ ܒܳܚܪܺܝܼܢ ܕܰܗܒܳܐ ܪܺܝܼܫܳܝܳܐ ܘܫܰܦܺܝܼܪܳܐ ܡܼܶܢ ܙܺܐܦܳܢܳܐ ܘܰܫܟܺܝܼܪܳܐ. Mihenk Taşı / Touchstone

[2]  ܡܰܩܠܳܢܽܘܼܬܳܐ: Hafifleştirme / Alleviation

[3]  ܡܰܕܠܳܢܳܐ: Kolaylaştıran / Facilitator

ܫܶܬܩܳܐ ܕܰܙܡܰܪܓܕܳܐ

ܫܶܬܩܳܐ ܕܰܙܡܰܪܓܕܳܐ

ܡܫܰܐܶܠ ܘܐܳܡܿܰܪ ܡܰܠܟܳܐ ܘܦܺܝܼܠܳܘܣܽܘܦܳܐ ܪܰܒܳܐ ܡܰܪܩܳܘܣ ܐܽܘܼܪܰܠܝܽܘܿܣ: «ܐܰܪܰܐ ܡܶܫܬܟܰܪ ܘܡܶܬܟܰܬܰܡ ܙܡܰܪܓܕܳܐ[1] ܟܰܕ ܠܳܐ ܡܶܬܩܰܠܰܣ؟»

ܫܽܘܼܐܳܠܳܐ ܗܳܢܳܐ ܠܳܐ ܪܳܡܶܙ ܒܰܠܚܽܘܿܕ ܠܟܺܐܦܳܐ ܝܰܩܺܝܼܪܬܳܐ܆ ܐܶܠܳܐ ܐܳܦ ܩܳܐܶܬ ܒܰܫܪܳܪܳܐ ܕܰܣܬܺܝܼܪ̈ܳܬܳܐ ܕܪܽܘܼܚܳܐ ܕܒܰܪܢܳܫܳܐ. ܒܰܕ ܚܢܰܢ ܒܢܰܝ̈ܢܳܫܳܐ «ܐܳܦܶܢ» ܛܳܥܢܺܝܼܢܰܢ ܒܓܰܘܰܢ ܝܰܩܪܳܐ[2] ܝܰܩܺܝܼܪܳܐ ܘܰܡܢܰܬܥܳܢܳܐ ܐܶܠܳܐ ܣܽܘܼܓܰܐܬ ܡܶܣܬܰܢܩܺܝܼܢܰܢ ܠܚܰܘܪܳܐ ܡܰܚܙܺܝܼܬܳܢܳܝܳܐ ܕܠܶܒܳܐ ܐ̱ܚܪܺܢܳܐ ܐܰܝܟܰܢܳܐ ܕܢܶܗܘܶܐ ܡܶܬܬܡܺܝܼܫܳܢܳܐ ܘܡܶܬܚܰܙܝܳܢܳܐ ܝܰܩܪܳܐ ܗܳܢܳܐ ܡܝܰܬܪܳܐ.

ܝܰܩܺܝܼܪ ܕܡܰܝ̈ܳܐ ܐܺܝܼܬܰܘܗܝ ܘܰܡܝܰܩܰܪ ܙܡܰܪܓܕܳܐ ܐܳܦ ܠܢܰܦܫܶܗ. ܒܪܡ ܝܰܬܺܝܼܪ ܢܳܛܰܚ ܘܨܳܡܰܚ ܟܰܕ ܦܳܓܥܳܐ ܘܓܳܫܦܳܐ ܒܶܗ ܥܰܝܢܳܐ ܦܽܪܽܘܿܫܬܳܐ.

ܗܺܝܼ ܗܳܟܘܳܬ ܐܳܦ ܒܰܪܢܳܫܳܐ ܣܽܘܼܓܳܐܐ ܕܙܰܒܢ̈ܺܝܼܢ ܗܽܘܼ ܠܝܳܬܶܗ ܒܰܠܚܽܘܿܕ ܏ܠܳܐ ܡܨܶܐ ܕܰܢܩܰܝܶܡ ܘܰܢܬܰܚܶܡ ܘܰܢܫܰܒܰܚ ܐܽܘܣܺܝܰܐ «ܡܰܪܓܳܢܺܝܼܬܳܐ» ܕܛܳܥܶܢ ܒܓܰܘܶܗ. ܡܶܟܰܐ ܡܶܬܒܰܥܝܳܐ ܕܢܶܚܙܶܐ ܐܰܘ ܢܶܫܟܰܚ ܢܰܦܫܶܗ. ܒܪܰܡ ܚܙܳܬܳܐ ܐܰܘ ܫܟܳܚܬܳܐ ܗܳܕܶܐ ܠܳܐ ܗܳܘܝܳܐ ܐܰܝܟ ܗܿܳܝ ܕܡܰܚܙܺܝܼܬܳܐ. ܙܳܕܶܩ ܕܬܶܥܽܘܼܠ ܡܼܶܢ ܠܶܒܳܐ ܠܠܶܒܳܐ ܐ̱ܚܪܺܢܳܐ ܡܶܬܝܰܩܪܳܢܳܐܝܼܬ. ܒܰܕ ܗܿܽܘܼ ܒܰܪܢܳܫܳܐ ܠܳܐ ܪܳܓܶܫ ܩܪܺܝܼܚܳܐܝܼܬ ܒܢܽܘܼܗܪܶܗ ܓܰܘܳܝܳܐ ܐܶܠܳܐ ܒܰܝܢܳܬ ܒܢܰܝ̈ܢܳܫܳܐ ܗܿܳܢܽܘܿܢ ܕܚܳܙܶܝܢ ܘܰܡܝܰܩܪܺܝܿܢ ܝܰܩܪܶܗ ܝܰܩܺܝܼܪܳܐ.

ܠܳܐ ܫܳܘܚܺܝܼܢ ܘܐܳܦܠܳܐ ܝܳܪܒܺܝܼܢ ܙܰܪ̈ܥܶܐ ܫܰܦܺܝܼܪ̈ܶܐ ܕܺܝܼܠܰܢ ܩܶܨܰܬ ܥܰܦܪܳܐ ܠܳܐ ܦܠܺܝܼܚܳܐ ܕܰܒܓܰܘܰܢ. ܡܶܟܳܐ ܒܰܙܒܰܢ ܠܳܐ ܣܳܦܩܳܐ ܕܢܶܗܘܶܐ ܙܰܪܥܳܐ. ܐܶܠܐ ܣܢܺܝܼܩܝܼܢܰܢ ܠܐܰܦܢܳܐ[3] ܟܶܐܡܰܬ ܠܐܰܪܥܳܐ ܕܰܦܠܺܝܼܚܳܐ ܘܰܟܪܺܝܼܒܳܐ ܘܫܽܘܼܚܠܳܦܳܐ ܛܳܒܳܐ ܘܰܠܚܘܼܡܣܳܢܳܐ ܕܐܝܼܕܳܐ ܚܰܝܽܘܼܣܬܳܢܺܝܼܬܳܐ. ܡܶܛܠܗܳܕܶܐ ܠܳܐ ܣܳܦܩܳܐ ܕܢܶܕܰܥ ܒܰܪܢܳܫܳܐ ܐܝܼܩܳܪܳܐ ܝܰܩܺܝܼܪܳܐ ܕܢܰܦܫܶܗ. ܐܶܠܳܐ ܙܳܕܶܩ ܕܢܶܬܬܚܶܕ ܘܢܶܬܶܐܣܰܪ ܐܳܦ ܒܫܶܪ̈ܫܶܐ ܡܫܰܘ̈ܚܳܢܶܐ ܘܰܒܥܶܩܳܪ̈ܶܐ ܡܰܦܪ̈ܥܳܢܶܐ ܕܣܽܘܼ̈ܟܳܠܐ ܡܩܰܘ̈ܝܳܢܶܐ. ܐ̱ܢܳܫ̈ܺܝܼܢ ܕܶܝܢ ܡܶܣܬܰܟܠܝܼܢ ܘܚܳܟܡܺܝܼܢ ܠܰܢ ܒܶܠܥܳܕ ܒܽܘܼܕܳܩܳܐ ܘܛܘܼܒܳܒܳܐ ܕܢܰܦܫܰܢ. ܘܐܝܼܬܽܘܼܬܳܐ ܫܰܬܺܝܼܩܬܳܐ ܕܝܳܕܘ̈ܥܶܐ ܘܚܰܟܺܝܼ̈ܡܶܐ ܗܳܠܶܝܢ ܡܰܨܝܳܐ ܕܬܶܗܘܶܐ ܥܶܠܰܬ ܒܘܼܕܳܩܳܐ ܘܛܘܼܒܳܒܳܐ ܕܚܰܝܠܰܢ ܓܰܘܳܝܳܐ.

ܘܩܽܘܼܠܳܣܳܐ ܗܳܢܳܐ ܒܰܙܒܰܢ ܠܳܐ ܡܟܰܬܰܪ ܒܡܶܠܬܳܐ ܒܰܠܚܽܘܿܕ. ܕܐܺܝܼܬ ܗ̱ܘ ܐ̱ܢܳܫ̈ܝܼܢ ܦܰܛ̈ܢܶܐ ܕܫܳܡܥܺܝܼܢ ܘܚܳܙܶܝܢ ܠܰܢ ܐܳܦ ܟܰܕ ܫܰܬܺܝܼܩܺܝܼܢܰܢ. ܘܡܶܬܠܰܘܶܝܢ ܘܡܶܬܚܰܒܪܺܝܼܢ ܠܰܡܫܰܘܚܕܽܘܼܬܰܢ. ܕܽܘܼܒܳܪܳܐ ܗܳܢܳܐ ܡܰܚܟܽܘܼܡܬܳܢܳܝܳܐ ܝܰܩܺܝܼܪ ܘܢܰܨܺܝܼܚ ܝܰܬܺܝܼܪ ܡܼܶܢ ܩܘܼܠܳܣܳܐ ܘܰܢܩܳܫ ܟܰܦ̈ܶܐ ܥܰܙܺܝܼ̈ܙܶܐ ܘܰܣܒܺܝܼ̈ܣܶܐ. ܒܰܕ ܐܺܝܼܩܳܪܳܐ ܘܝܰܩܪܳܐ ܫܰܪܺܝܼܪܳܐ ܠܳܐ ܬܳܩܶܢ ܒܩܽܘܼ̈ܠܳܣܶܐ ܡܶܫܬܰܦܪ̈ܳܢܶܐ «ܕܫܰܦܽܘܼܪܬܳܢܽܘܼܬܳܐ ܘܫܽܘܼܦܰܪܕܺܝܼܩܽܘܼܬܳܐ» ܐܶܠܳܐ ܒܡܶܬܚܰܙܝܳܢܽܘܼܬܳܐ ܕܰܒܗܺܝܼܠܽܘܼܬܳܐ ܘܰܒܡܶܣܬܰܟܠܳܢܽܘܼܬܳܐ ܕܫܰܬܺܝܼܩܽܘܼܬܳܐ.

ܚܰܝ̈ܶܐ ܡܿܰܢ ܐܽܘܿܪܚܳܐ ܐܶܢܽܘܢ ܕܠܳܐ ܦܰܐܝܳܐ ܕܢܶܬܗܰܠܟܽܘܿܢ ܠܚܽܘܿܕܳܐܝܼܬ. ܐܳܦܶܢ ܨܰܘܒܳܐ ܠܳܐ ܡܶܫܬܰܚܠܰܦ ܒܪܡ ܣܽܘܼܟܳܠܳܐ ܕܪܶܕܝܳܐ ܘܗܶܠܟܳܐ ܡܰܨܝܳܐ ܕܢܶܫܬܰܚܠܰܦ ܒܝܰܕ ܚܰܘܪܐ ܟܢܺܝܼܟܳܐ ܕܒܰܪ ܠܶܘܝܳܐ ܘܒܠܶܒܳܐ ܦܨܺܝܼܚܳܐ ܕܒܰܪ ܢܶܩܦܳܐ. ܘܡܶܬܚܰܦܝܳܐ ܡܰܪܓܳܢܺܝܼܬܳܐ ܗܳܝ ܨܰܡܽܘܼܚܬܳܐ ܒܬܰܘ̈ܳܢܶܐ ܚܶܫܽܘܼ̈ܟܳܝܶܐ. ܘܡܰܨܝܳܐ ܕܠܳܐ ܬܶܬܚܙܶܐ ܘܢܶܬܚܰܦܶܐ ܐܺܝܼܩܳܪܳܗܿ. ܒܪܰܡ ܡܶܬܚܰܙܝܳܢܝܼܬܳܐ ܗܳܘܝܳܐ ܟܰܪ ܕܡܰܡܠܶܟ ܢܽܘܼܗܪܳܐ ܫܰܪܺܝܼܪܳܐ ܐܳܦ ܒܰܝܢܳܬ ܨܰܘܪ̈ܳܢܶܐ ܕܚܽܘܼܒܝܳܐ ܘܥܰܡܛܳܢܳܐ. ܘܗܳܟܰܢܰܐ ܐܺܝܼܬܰܘܗܝ ܐܳܦ ܒܰܪܢܳܫܳܐ: ܐܺܝܼܬܝܳܐ ܕܡܶܬܚܰܦܰܛ ܠܡܶܫܟܳܚܽܘܼ ܥܰܝ̈ܢܶܐ ܦܳܪ̈ܽܘܿܫܳܬܳܐ ܕܡܳܝ̈ܫܳܢ ܘܚܳܙ̈ܝܳܢ ܢܽܘܼܗܪܶܗ ܘܨܶܡܚܶܗ ܘܝܰܩܪܶܗ ܛܳܒ ܡܼܶܢ ܗܿܳܝ ܕܢܶܟܪܽܘܿܟ ܘܢܶܒܥܶܐ ܘܢܶܚܙܶܐ ܢܽܘܼܗܪܐ ܕܰܛܡܺܝܼܪ ܗ̱ܽܘ ܒܢܰܦܫܶܗ.

ܐܝܢ: ܠܳܐ ܡܶܫܬܟܰܪ ܘܐܳܦܠܳܐ ܡܶܬܟܰܬܰܡ ܙܡܰܪܓܕܳܐ ܟܰܕ ܠܳܐ ܡܶܬܩܰܠܰܣ. ܒܪܰܡ ܫܳܦܪ ܘܢܳܨܰܚ܆ ܘܡܶܬܝܰܬܰܪ ܘܩܳܢܶܐ ܣܽܘܼܟܳܠܐ ܘܚܰܝܠܳܐ ܥܰܙܺܝܼܙܳܐ ܟܰܕ ܦܳܓܰܥ ܒܠܶܒܳܐ ܦܰܛܢܳܐ ܕܚܳܙܶܐ ܘܦܳܪܶܫ ܢܽܘܼܗܪܶܗ ܘܨܶܡܚܶܗ ܘܝܰܩܪܶܗ. ܘܗܺܝܼ ܗܳܟܘܳܬ ܐܦ ܗܽܘܼ ܒܰܪܢܳܫܳܐ ܠܳܐ ܡܰܨܝܳܐ ܕܢܶܫܟܰܚ ܪܽܘܼܚܳܐ ܘܣܽܘܼܟܳܠܐ ܕܢܺܝܼܫܶܗ ܘܢܶܒܢܶܐ ܥܰܡܠܳܐ ܘܰܛܢܳܢܳܐ ܕܦܽܘܼܠܚܳܢܶܗ ܐܶܠܳܐ ܒܐܽܘܼܪܰܚ ܦܶܓ̈ܥܶܐ ܘܣܽܘܼ̈ܩܒܳܠܐ ܗܳܠܶܝܢ.

ܝܰܘܣܶܦ ܒܶܓܬܰܫ

ܚܘܕܪܐ ܕܡܪܕܘܬܐ ܘܣܦܪܝܘܬܐ ܕܠܫܢܐ ܣܘܪܝܝܐ. ܡܪܕܝܢ

[1]  ܙܡܰܪܓܕܳܐ: Zümrüt / Emerald

[2]  ܝܰܩܪܳܐ: Kıymet / Değer / Value / Preciousness

[3]  ܐܰܦܢܳܐ: ܟܶܐܡܰܬ ܚܰܩܠܳܐ ܟܰܗܺܝܼܢܬܳܐ ܕܚܳܝܪܳܐ ܠܫܶܡܫܳܐ ܘܚܳܫܚܳܐ ܠܙܰܪܥܳܐ.

ܬܰܘܦܺܝܼܬܳܐ

ܬܰܘܦܺܝܼܬܳܐ [1]

ܠܰܝܬ ܠܳܗܿ ܚܽܘܼܣܪܳܢܳܐ ܘܣܽܘܼܪܚܳܢܳܐ ܘܦܽܘܼܪܫܳܢܳܐ ܠܬܰܘܦܺܝܼܬܳܐ.

ܒܰܕ ܐ̱ܪܳܙܳܐ ܐܺܝܼܬܶܝܗܿ ܕܐܳܚܶܕ ܒܺܐܝܼܕܳܐ ܕܚܽܘܼܒܳܐ ܒܰܣܦܳܪ̈ܶܐ ܕܙܰܒܢܳܐ.

ܠܐ ܛܳܠܶܩ ܫܽܘܼܢܳܩܳܗܿ ܡܼܶܢ ܠܶܒܰܘ̈ܳܬܳܐ܆ ܘܐܳܦܠܳܐ ܦܽܘܼܢܳܩܳܗܿ ܥܳܪܶܒ ܡܼܶܢ ܥܽܘܼ̈ܗܕܳܢܶܐ.

ܚܰܫܗܿ ܡܿܰܢ ܚܶܟܡܬܳܐ ܪܳܐܶܣ܆ ܘܚܰܕܘܗܿ ܕܶܝܢ ܢܽܘܼܗܪܳܐ ܣܳܐܺܡ ܒܢܰܦ̈ܫܳܬܳܐ.

ܬܰܘܦܺܝܼܬܳܐ ܠܰܝܬܶܝܗܿ ܚܰܒܠܳܐ ܦܣܺܝܼܩܳܐ.

قراءة المزيد

ܚܺܐܪܽܘܼܬܳܐ ܕܪܽܘܼܚܳܐ

ܚܺܐܪܽܘܼܬܳܐ ܕܪܽܘܼܚܳܐ

«ܐܰܣܺܝܼܪܝܼܢܰܢ ܘܰܡܢܳܚܺܝܼܢܰܢ. ܦܟܺܝܼܪܺܝܼܢܰܢ ܘܰܚܬܺܝܼܪܺܝܼܢܰܢ. ܫܰܠܺܝܼܛܳܐ ܗ̱ܝ ܚܺܐܪܽܘܼܬܰܢ ܕܐܰܣܽܘܼܪ̈ܶܝܗܿ ܬܶܦܣܽܘܿܩ ܡܶܢܳܗܿ. ܠܰܢ ܗ̱ܺܝ ܡܶܬܒܰܥܝܳܐ ܕܢܶܗܘܶܐ ܣܳܢ̈ܶܐܐ ܠܰܚܛܺܝܼܬܳܐ.

ܘܢܶܩܛܽܘܿܠ ܥܰܘܠܳܐ ܕܩܰܛܠܰܢ ܒܣܰܝܦܳܐ ܕܕܰܟܝܽܘܼܬ ܪܶܥܝܳܢܰܢ. ܘܢܶܫܕܶܐ ܡܶܢܰܢ ܟܽܠ ܝܽܘܼܩܪ̈ܺܝܢ ܡܛܰܒ̈ܥܳܢܶܐ ܕܫܰܦܺܝܼܪ̈ܳܬܳܐ. ܘܢܶܠܒܰܫ ܙܰܝܢܳܐ ܪܽܘܼܚܳܢܳܐ ܠܽܘܼܩܒܰܠ ܚܰܫ̈ܶܐ ܡܕܰܘ̈ܕܳܢܶܐ.»

ܩܕܝܫܐ ܡܪܝ ܐܦܪܝܡ (306-373)

ܟܕ ܡܶܬܟܰܒܠܳܐ ܪܽܘܼܚܳܐ ܒܚܽܘܼ̈ܫܳܒܶܐ ܕܥܰܘܠܳܐ ܘܡܶܬܟܰܡܕܳܐ ܒܰܥܒ̈ܳܕܶܐ ܕܚܰܘܒܳܐ܆ ܠܳܐ ܠܝܳܬܳܗܿ ܚܳܙܝܳܐ ܘܠܳܐ ܠܡܶܕܶܡ ܕܰܠܒܰܪ ܡܶܢܳܗܿ. ܡܶܛܠܗܳܕܶܐ ܠܳܐ ܩܳܢܝܳܐ ܨܶܒܝܳܢܗܿ ܚܺܐܪܳܐ ܐܶܠܳܐ ܒܡܰܕܥܳܐ ܕܰܡܚܰܪܰܪ ܡܼܶܢ ܚܢܽܘܼܩܝܳܐ ܕܚܘܼ̈ܫܳܒܶܐ ܣܢ̈ܰܝܳܐ ܘܚܰܘ̈ܒܶܐ ܕܥܰܘܠܳܐ ܘܰܒܬܰܪܕܺܝܼܬܳܐ ܕܢܰܦܫܳܐ ܘܰܒܬܰܪܒܺܝܼܬܳܐ ܕܦܰܓܪܳܐ.

قراءة المزيد

ܛܽܘܼܒܳܒܳܐ ܕܰܟܬܳܒܳܐ ܚܰܕܬܐ

ܛܽܘܼܒܳܒܳܐ ܕܰܟܬܳܒܳܐ ܚܰܕܬܐ

ܟܽܠ ܟܬܳܒܳܐ܆ ܒܥܳܬܳܐ ܐܺܝܼܬܰܘܗܝ ܕܥܰܡܠܳܐ ܪܰܒܳܐ ܕܠܳܐ ܨܳܒܶܐ ܒܚܳܫܽܘܿܫܽܘܼܬܳܐ ܐܶܠܳܐ ܒܥܳܒܽܘܿܕܽܘܼܬܳܐ. ܘܰܒܪܳܡܰܐ ܗ̱ܘ ܕܡܰܪ̈ܢܝܳܬܐ ܕܡܰܘܩ̈ܕܳܢ ܠܶܒܳܐ ܘܰܡܦܰܪ̈ܕܳܢ ܫܶܢܬܳܐ. ܘܕܽܘܼܥܬܰܐ ܗ̱ܘ ܕܪܽܘܼܚܳܐ ܘܰܫܚܳܩܳܐ ܕܗܰܘܢܳܐ. ܘܠܳܐ ܡܶܬܓܰܫܰܡ ܘܐܳܦܠܳܐ ܡܶܨܛܰܠܰܡ ܐܶܠܐ ܒܚܽܘܼܒܳܐ ܙܳܩܽܘܼܬܳܐ ܘܰܛܢܳܢܳܐ ܫܓܺܝܼܪܳܐ.

ܟܬܳܒܳܐ ܕܰܥܠܰܘܗܝ ܛܳܝܦܳܐ ܡܶܠܬܳܐ ܡܶܬܦܪܶܣ ܒܐܰܪܒܥܳܐ ܠܶܫ̈ܳܢܶܐ: ܣܽܘܼܪܝܳܐܝܼܬ ܘܥܰܪܒܳܐܝܼܬ ܘܬܽܘܼܪܟܳܐܝܼܬ ܘܐܶܢܓܠܺܝܼܫܳܐܝܼܬ. ܘܛܳܥܶܢ ܩܳܠܳܐ ܚܶܟܡܬܳܢܳܝܳܐ ܕܡܰܪܕܽܘܼܬܳܐ ܪܰܒܬܳܐ ܡܳܪܰܬ ܡܰܦ̈ܩܳܢܶܐ ܛܳܒ̈ܶܐ ܗܿܳܝ ܕܠܳܐ ܨܳܒܝܳܐ ܒܺܝܕܰܥܬܳܐ ܡܰܚܣܪܳܢܺܝܼܬܳܐ ܘܐܳܦܠܳܐ ܡܫܰܡܫܳܐ ܠܰܥܪܺܝܼܡܽܘܼܬܳܐ ܦܽܘܼܪܣܳܢܳܝܬܳܐ. ܡܶܛܠܗܳܕܶܐ ܫܰܡܺܝܼܬܶܗ «ܒܽܘܼܝܳܢܳܐ ܕܚܰܝ̈ܶܐ ܒܡܰܪܕܽܘܼܬܳܐ ܣܽܘܼܪܝܳܝܬܳܐ». ܒܰܕ ܥܙܺܝܼܠ ܗ̱ܘܼ ܘܰܙܩܺܝܼܪ ܒܗܰܘ ܡܳܐ ܕܥܰܬܺܝܼܩ ܘܐܰܒܳܗܳܝ ܒܪܰܡ ܒܣܽܘܼܠܓܳܣܳܐ ܕܡܶܣܬܰܟܠܳܢܽܘܼܬܳܐ ܚܕܰܬܳܐ.

قراءة المزيد

ܨܰܘܬܳܐ ܕܡܰܪܕܽܘܼܬܳܐ

ܨܰܘܬܳܐ ܕܡܰܪܕܽܘܼܬܳܐ

ܟܰܕ ܨܳܠܶܝܢܢ ܐܶܕܢܳܐ ܡܶܢܟܠܦܪܽܘܿܣ ܫܳܡܥܺܝܼܢܰܢ ܨܰܘ̈ܬܶܐ ܦܪ̈ܺܝܼܫܶܐ ܒܡܰܣܩܳܐ ܘܡܰܚܬܳܐ ܕܚܽܘܼ̈ܫܳܒܶܐ ܕܺܝܼܠܰܢ. ܡܶܢܗܽܘܿܢ ܡܿܰܢ ܕܨܰܘ̈ܬܶܐ ܗܳܘܶܝܢ ܡܟܰܢ̈ܫܳܢܶܐ ܘܰܡܒܰܕܪ̈ܳܢܶܐ. ܘܡܶܢܗܽܘܿܢ ܕܶܝܢ ܡܢܺܝܼ̈ܚܳܢܶܐ ܘܰܡܙܺܝܼ̈ܥܳܢܶܐ. ܘܡܶܢܗܽܘܿܢ ܬܽܘܿܒ ܠܳܐ ܡܶܫܬܰܡܥܺܝܼܢ ܐܶܠܳܐ ܒܰܙܗܺܝܼܪܘܼܬܳܐ ܪܰܒܬܳܐ ܕܠܶܒܳܐ ܬܪܺܝܼܨܳܐ.

ܟܬܺܝ̈ܒܳܬܐ ܦܪ̈ܺܝܼܫܳܬܳܐ ܕܡܼܶܢ ܙܒܰܢ ܠܰܙܒܰܢ ܟܳܬܶܒ ܘܦܳܪܶܣ ܐ̱ܢܳܐ ܚܽܘ̈ܫܳܒܶܐ ܐܶܢܶܝܢ ܓܫܺܝܼ̈ܡܶܐ ܕܗܶܕ̈ܣܶܐ ܣܒܺܝܼ̈ܣܶܐ. ܘܰܦܪܺܝܼܫܳܐܝܼܬ ܫܶܡܥܳܐ ܐܶܢܶܝܢ ܕܨܰܘܬܳܐ ܪܰܟܺܝܼܟܳܐ ܕܡܰܪܕܽܘܼܬܳܐ ܣܽܘܼܪܝܳܝܬܳܐ ܗܿܳܝ ܕܡܶܢܳܗܿ ܝܶܠܦܶܬ: «ܠܳܐ ܡܰܬܡܰܟܰܟ ܘܐܳܦܠܳܐ ܢܳܗܰܪ ܐܶܠܐ ܒܰܪܢܳܫܳܐ ܗܰܘ ܐܰܝܢܳܐ ܕܰܡܩܰܒܶܠ ܒܨܺܝܼܪܽܘܼܬܳܐ ܘܰܡܚܺܝܼܠܽܘܼܬܳܐ». ܨܰܘܬܳܐ ܗܳܢܳܐ ܛܳܥܶܢ ܩܳܠܳܐ ܚܶܟܡܬܳܢܳܝܳܐ ܕܡܰܪܕܽܘܼܬܳܐ ܪܰܒܬܳܐ ܡܳܪܰܬ ܡܰܦ̈ܩܳܢܶܐ ܛܳܒ̈ܶܐ. ܡܶܛܠܗܳܕܶܐ «ܨܰܘܬܳܐ ܕܡܰܪܕܽܘܼܬܳܐ» ܟܰܢܺܝܼܬܗܿ ܠܡܺܐܡܰܪܬܳܐ ܗܳܕܶܐ. ܒܰܕ ܥܙܺܝܼܠܐ ܘܰܙܩܺܝܼܪܳܐ ܒܗܰܘ ܡܳܐ ܕܥܰܬܺܝܼܩ ܘܐܰܒܳܗܳܝ ܒܪܰܡ ܒܣܽܘܼܠܓܳܣܳܐ ܕܡܶܣܬܰܟܠܳܢܽܘܼܬܳܐ ܚܕܰܬܳܐ ܕܙܰܒܢܰܢ ܢܰܗܺܝܼܪܳܐ.

قراءة المزيد

ܚܰܘܪܳܐ ܡܰܪܕܽܘܼܬܳܢܳܝܳܐ ܚܛܺܝܼܦܳܐ

ܚܰܘܪܳܐ ܡܰܪܕܽܘܼܬܳܢܳܝܳܐ ܚܛܺܝܼܦܳܐ

ܡܰܪܕܽܘܼܬܳܐ ܣܽܘܼܪܝܳܝܬܳܐ ܛܳܒ ܥܰܬܺܝܼܩܬܳܐ ܐܺܝܼܬܶܝܗ̇. ܘܥܰܡܺܝܼ̈ܩܺܝܼܢ ܘܰܪ̈ܘܺܝܼܚܺܝܼܢ ܣܘܼ̈ܟܳܠܶܝܗ̇. ܘܡܶܬܚܰܒܟܺܝܼܢ ܒܫܶܪ̈ܫܶܐ ܫܺܝܼ̈ܬܳܢܳܝܶܐ ܕܰܡܕܺܝܼܢܳܝܽܘܼܬܳܐ ܥܰܬܺܝܼܩܬܳܐ ܕܒܶܝܬܢܰܗܪܺܝܢ. ܒܪܰܡ ܡܳܝܨܺܝܼܢ ܚܰܠܒܳܐ ܡܬܰܪܣܝܳܢܳܐ ܡܼܶܢ ܝܽܘܼܠܦܳܢܳܐ ܡܰܚܝܳܢܳܐ ܕܰܡܫܺܝܼܚܳܐ. ܘܝܰܘܡܳܢܳܐ ܐܳܦܶܢ ܟܡܺܝܼܪ ܙܺܝܼܘܳܗܿ ܘܰܟܡܺܝܕ ܨܶܡܚܳܗܿ ܡܰܦܪܓܳܢܳܐ܆ ܐܶܠܳܐ ܪܶܥܝܳܢܳܐܝܼܬ ܒܰܕܡܽܘܼܬ ܕܪܳܫܳܐ ܕܳܪܳܢܳܝܳܐ ܐܺܝܼܬܶܝܗܿ ܒܰܐܦ̈ܰܝ ܗܽܘܼ̈ܦܳܟܶܐ ܘܕܽܘܼܒܳܪ̈ܶܐ ܝܰܨܪ̈ܳܢܳܝܶܐ ܒܠܺܝܼ̈ܠܶܐ. ܘܓܳܠܝܳܐ ܐ̱ܪ̈ܳܙܶܐ ܘܝܰܕܥ̈ܳܬܳܐ ܘܚܶܟ̈ܡܳܬܳܐ ܕܕܳܪ̈ܶܐ ܘܝܽܘܼܒ̈ܠܐ ܥܒܺܝܼܪ̈ܶܐ ܠܡܰܕ̈ܥܶܐ ܦܳܪ̈ܽܘܿܫܶܐ ܗܿܳܢܽܘܢ ܕܚܳܙܶܝܢ ܝܽܘܼܩܪܳܗܿ ܡܢܰܬܥܳܢܳܐ ܒܫܽܘܼܘܫܳܛܳܐ ܐ̱ܢܳܫܳܝܳܐ. ܘܩܳܠܳܗܿ ܚܢܺܝܼܓ ܘܰܪܟܺܝܼܢ ܐܶܠܳܐ ܒܪܰܡ ܚܳܫܰܚ ܕܢܶܥܨܽܘܿܒ ܟܺܐܒ̈ܶܐ ܢܰܦܫ̈ܳܢܳܝܶܐ ܘܢܶܣܡܽܘܿܟ ܡܰܪܥܽܘܼܬܳܐ ܪܶܥܝܳܢܳܝܬܳܐ ܕܰܫܟܺܝܼܚܳܐ ܗܳܪܟܳܐ ܘܬܰܡܳܢ ܒܰܝܢܳܬ ܓܰܘܳܐ. ܘܩܳܠܳܐ ܗܳܢܳܐ ܚܢܺܝܼܓܳܐ ܒܳܥܶܐ ܡܶܢܰܢ ܕܢܶܬܒܰܩܶܐ ܒܡܰܚܙܺܝܼܬ ܢܰܦܫܰܢ ܠܡܶܫܟܳܚܽܘܼ ܚܽܘܼܒܳܐ ܘܰܚܢܳܢܳܐ ܘܚܰܘܣܳܢܳܐ ܘܐܺܝܼܩܳܪܳܐ ܒܓܰܘܰܢ ܡܛܽܠ ܢܰܘܚܳܐ ܕܡܰܪܕܺܝܼܬܰܢ ܥܳܠܡܳܢܳܝܬܳܐ.

قراءة المزيد

ܐܳܘ ܒܰܪ ܘܒܰܪܬ ܡܰܪܕܺܝܼܬܳܐ! 

ܐܳܘ ܒܰܪ ܘܒܰܪܬ ܡܰܪܕܺܝܼܬܳܐ! 

ܐܶܢܳܐ ܡܰܢ ܠܐ ܒܳܥܶܐ ܐ̱ܢܳܐ ܘܐܳܦܠܐ ܨܳܒܶܐ ܐ̱ܢܳܐ ܒܬܰܪܥܺܝܼܬܳܐ ܢܰܫܺܝܼܫܬܳܐ ܕܫܽܘܼܥܠܳܝܳܐ.

ܬܰܪܥܺܝܼܬܳܐ ܕܫܽܘܼܥܠܳܝܳܐ ܡܿܰܢ ܣܳܚܦܳܐ ܘܩܳܛܠܳܐ. ܘܬܰܪܥܺܝܼܬܳܐ ܕܫܽܘܼܡܠܳܝܳܐ ܕܶܝܢ ܒܳܢܝܳܐ ܘܡܰܚܝܳܐ.

ܠܐ ܡܶܫܬܰܪܰܪ ܬܽܘܼܪܳܨܳܐ ܘܐܳܦܠܳܐ ܓܳܡܰܪ ܫܽܘܼܡܠܳܝܳܐ  ܐܶܠܳܐ ܒܚܽܘܼܒܳܐ ܘܢܽܘܼܗܪܳܐ ܕܩܽܘܼܫܬܳܐ.

ܒܰܕ ܙܥܽܘܼܪ ܗ̱ܘܼ ܫܪܳܪܳܐ ܕܺܝܼܠܝ ܘܕܺܝܼܠܳܟ. ܘܰܒܨܺܝܼܪ ܗ̱ܘܼ ܪܶܥܝܳܢܳܐ ܕܺܝܼܠܝ ܘܕܺܝܼܠܳܟ. ܘܒܰܙܒܰܢ ܕܶܝܢ ܐܶܢܳܢܳܝ ܥܕܰܡܳܐ ܠܗܿܳܝ ܕܢܶܙܕܠܶܡ ܘܢܶܬܥܰܩܰܡ. ܡܳܕܶܝܢ ܐܰܝܟܰܢܳܐ ܒܳܗܠܺܝܼܢܰܢ ܘܬܳܩܢܺܝܼܢܰܢ ܟܰܕ ܪܶܥܝܳܢܳܐ ܘܕܽܘܼܒܳܪܳܐ ܕܺܝܼܠܝ ܘܕܺܝܼܠܳܟ ܠܐ ܡܶܬܬܰܪܣܶܐ ܡܼܶܢ ܚܽܘܼܒܳܐ ܘܢܽܘܼܗܪܳܐ ܕܩܽܘܼܫܬܳܐ ܟܶܐܡܰܬ ܫܪܳܪܳܐ ܪܰܒܳܐ؟

ܕܩܽܘܼܫܬܳܐ ܡܿܰܢ ܐܰܩܢܰܐ ܗ̱ܘ ܚܰܬܺܝܼܬܳܐ ܘܟܰܝܠܳܐ ܗ̱ܘ ܬܪܺܝܼܨܳܐ ܕܟܽܠܗܽܘܿܢ ܙܢ̈ܰܝ ܨܰܘ̈ܒܶܐ ܘܰܚܢܳܝ̈ܶܐ ܘܪ̈ܶܥܝܳܢܶܐ ܘܕܽܘܼܒܳܪ̈ܶܐ.

ܐܳܡܰܪ ܒܫܰܪܒܳܐ ܗܳܢܳܐ ܩܰܕܺܝܼܫܳܐ ܡܳܪܝ ܐܰܦܪܶܝܡ ܣܘܼܪܝܳܝܳܐ (306-373): «ܠܳܐ ܗ̱ܘܳܐ ܓܶܝܪ ܟܽܠܡܶܕܶܡ ܕܚܰܟܺܝܼܡ ܗ̇ܘ ܗ̱ܘܼ ܫܰܪܺܝܼܪ. ܐܶܠܳܐ ܡܶܕܶܡ ܕܫܰܪܺܝܼܪ ܗ̇ܘ ܗ̱ܘܼ ܚܰܟܺܝܼܡ. ܘܠܳܐ ܗ̱ܘܳܐ ܡܶܕܶܡ ܕܡܶܬܕܪܶܫ ܗ̇ܰܘ ܗ̱ܘܼ ܥܰܡܺܝܼܩ. ܐܶܠܳܐ ܡܶܕܶܡ ܕܡܶܬܐܶܡܰܪ ܡܼܶܢ ܐܠܗܳܐ ܟܰܕ ܢܶܬܗܰܝܡܰܢ ܗ̇ܰܘ ܗ̱ܘܼ ܩܰܛܺܝܼܢ.»

ܘܥܳܢܶܐ ܘܡܦܰܢܶܐ ܩܰܕܺܝܼܫܳܐ ܡܳܪܝ ܐܺܝܼܣܚܳܩ ܕܐܰܢܛܝܽܘܿܟ ( + 491) : «ܡܳܐ ܕܰܫܠܺܝ ܫܶܥܝܳܐ ܣܪܺܝܩܳܐ. ܘܰܦܛܰܪ ܘܟܶܢܫ̈ܶܐ ܐܶܬܦܰܪܣܺܝܘ. ܕܫܳܠܚܺܝܢ ܫܳܕܶܝܢ ܦܰܪ̈ܨܽܘܦܶܐ. ܫܐܺܝ̈ܠܶܐ ܕܰܠܒܶܫܘ ܠܰܚܙܳܬܳܐ. ܗܳܟܰܢ ܒܥܳܠܡܳܐ ܫܰܪܺܝܪܳܐ. ܫܳܠܚܺܝܢ ܐ̱ܢܳܫ̈ܳܐ ܠܰܫܡܳܗ̈ܶܐ. ܘܡܶܬܓܠܶܝܢ ܥܒܴ̈ܕܶܐ ܚܰܬܺܝ̈ܬܶܐ. ܙܺܐܦܳܢ̈ܶܐ ܐܳܦ ܫܰܪܺܝܪ̈ܶܐ. ܐܰܝܢܳܐ ܕܺܐܝܬܰܘܗܝ ܕܰܢܚܳܫܳܐ ܘܰܩܪܺܝܡ ܕܰܗܒܳܐ ܠܒܰܪ ܡܶܢܶܗ. ܡܛܰܠܩܳܐ ܢܽܘܪܳܐ ܬܰܚܦܺܝܬܶܗ. ܘܰܡܚܰܘܝܳܐ ܠܶܗ ܐܰܝܟ ܕܺܐܝܬܰܘܗܝ.»

ܦܽܘܼܫܳܩܳܐ:

ܐܰܩܢܳܐ: ܟܺܐܦܳܐ ܗ̱ܝ ܕܡܳܫܚܺܝܼܢ ܘܡܰܥܠܺܝܼܢ ܠܳܗܿ ܠܢܽܘܼܪܳܐ ܘܒܳܚܪܺܝܼܢ ܒܳܗܿ ܕܰܗܒܳܐ ܪܺܝܼܫܳܝܳܐ ܘܫܰܦܺܝܼܪܳܐ ܡܼܶܢ ܙܺܐܦܳܢܳܐ ܘܰܫܟܺܝܼܪܳܐ. معيار او حجر المحك. Mihenk Taşı / Touchstone

ܩܶܪܝܳܢܳܐ ܘܗܶܕܣܳܐ ܒܰܣܺܝܼܡܳܐ ܠܟܽܠ.

ܝܘܣܦ ܒܓܬܫ

ܚܘܕܪܐ ܕܡܪܕܘܬܐ ܘܫܦܪܝܘܬܐ ܕܠܫܢܐ ܣܘܪܝܝܐ. ܡܪܕܝܢ