ܚܺܐܪܽܘܼܬܳܐ ܕܪܽܘܼܚܳܐ

ܚܺܐܪܽܘܼܬܳܐ ܕܪܽܘܼܚܳܐ

«ܐܰܣܺܝܼܪܝܼܢܰܢ ܘܰܡܢܳܚܺܝܼܢܰܢ. ܦܟܺܝܼܪܺܝܼܢܰܢ ܘܰܚܬܺܝܼܪܺܝܼܢܰܢ. ܫܰܠܺܝܼܛܳܐ ܗ̱ܝ ܚܺܐܪܽܘܼܬܰܢ ܕܐܰܣܽܘܼܪ̈ܶܝܗܿ ܬܶܦܣܽܘܿܩ ܡܶܢܳܗܿ. ܠܰܢ ܗ̱ܺܝ ܡܶܬܒܰܥܝܳܐ ܕܢܶܗܘܶܐ ܣܳܢ̈ܶܐܐ ܠܰܚܛܺܝܼܬܳܐ.

ܘܢܶܩܛܽܘܿܠ ܥܰܘܠܳܐ ܕܩܰܛܠܰܢ ܒܣܰܝܦܳܐ ܕܕܰܟܝܽܘܼܬ ܪܶܥܝܳܢܰܢ. ܘܢܶܫܕܶܐ ܡܶܢܰܢ ܟܽܠ ܝܽܘܼܩܪ̈ܺܝܢ ܡܛܰܒ̈ܥܳܢܶܐ ܕܫܰܦܺܝܼܪ̈ܳܬܳܐ. ܘܢܶܠܒܰܫ ܙܰܝܢܳܐ ܪܽܘܼܚܳܢܳܐ ܠܽܘܼܩܒܰܠ ܚܰܫ̈ܶܐ ܡܕܰܘ̈ܕܳܢܶܐ.»

ܩܕܝܫܐ ܡܪܝ ܐܦܪܝܡ (306-373)

ܟܕ ܡܶܬܟܰܒܠܳܐ ܪܽܘܼܚܳܐ ܒܚܽܘܼ̈ܫܳܒܶܐ ܕܥܰܘܠܳܐ ܘܡܶܬܟܰܡܕܳܐ ܒܰܥܒ̈ܳܕܶܐ ܕܚܰܘܒܳܐ܆ ܠܳܐ ܠܝܳܬܳܗܿ ܚܳܙܝܳܐ ܘܠܳܐ ܠܡܶܕܶܡ ܕܰܠܒܰܪ ܡܶܢܳܗܿ. ܡܶܛܠܗܳܕܶܐ ܠܳܐ ܩܳܢܝܳܐ ܨܶܒܝܳܢܗܿ ܚܺܐܪܳܐ ܐܶܠܳܐ ܒܡܰܕܥܳܐ ܕܰܡܚܰܪܰܪ ܡܼܶܢ ܚܢܽܘܼܩܝܳܐ ܕܚܘܼ̈ܫܳܒܶܐ ܣܢ̈ܰܝܳܐ ܘܚܰܘ̈ܒܶܐ ܕܥܰܘܠܳܐ ܘܰܒܬܰܪܕܺܝܼܬܳܐ ܕܢܰܦܫܳܐ ܘܰܒܬܰܪܒܺܝܼܬܳܐ ܕܦܰܓܪܳܐ.

ܬܰܪܕܺܝܼܬܐ[1]  ܐܺܝܼܬܶܝܗܿ ܬܰܪܒܺܝܼܬܳܐ ܕܰܨܠܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܨܰܘܡܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܪܶܚܡܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܐܺܝܼܩܳܪܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܰܚܢܳܢܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܚܰܘܣܳܢܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܰܡܫܰܐܠܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܰܬܪܺܝܼܨܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܫܰܪܺܝܼܪܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܟܺܐܢܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܩܽܘܼܒܳܠܛܰܝܒܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܡܰܘܕܝܳܢܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܫܽܘܼܒܳܚܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܫܽܘܼܒܩܳܢܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܬܰܪܣܺܝܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܬܰܟܣܺܝܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܥܶܢܝܳܢܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܪܳܚܡܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܚܰܒܪܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܕܽܘܼܒܳܪ̈ܶܐ ܫܰܦܺܝܼܪ̈ܶܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܐܶܣܳܪ̈ܶܐ ܡܒܰܢܝ̈ܳܢܶܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܫܰܘܬܳܦܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܝܽܘܼܠܦܳܢܳܐ. ܘܒܶܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܝܕܰܥܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܩܶܪܝܳܢܶܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܗܽܘܼܓܳܝܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܗܶܪܓܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܥܰܡܠܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܦܽܘܼܠܚܳܢܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܫܽܘܼܠܚܳܢܳܐ[2]. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܢܶܣܝܳܢܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܚܽܘܼܡܣܳܢܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܥܽܘܼܙܳܝܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܰܡܟܺܝܼܟܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܒܰܣܺܝܼܡܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܡܰܛܶܐܒܳܢܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܡܰܘܬܪܳܢܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܡܰܪܬܝܳܢܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܡܰܫܦܳܢܽܘܼܬܳܐ[3]. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܡܰܕܠܳܢܽܘܼܬܳܐ[4]. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܡܰܩܠܳܢܽܘܼܬܳܐ[5]. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܰܡܣܰܝܒܪܳܢܽܘܼܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܢܰܓܺܝܼܪܽܘܼܬ ܪܽܘܼܚܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܢܰܘܦܳܐ[6]. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܡܽܘܼܢܳܥܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܙܰܘܥܐ ܐܰܡܺܝܼܢܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܨܰܕܘܳܐ[7] ܡܛܰܟܣܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܬܰܪܕܺܝܼܬܳܐ ܐܺܝܼܬܶܝܗܿ ܬܰܪܒܺܝܼܬܳܐ ܕܫܶܢܬܳܐ. ܘܒܳܗܿ ܡܶܬܚܰܪܪܳܐ ܪܽܘܼܚܳܐ.

ܝܘܣܦ ܒܓܬܫ

ܚܘܕܪܐ ܕܡܪܕܘܬܐ ܘܣܦܪܝܘܬܐ ܕܠܫܢܐ ܣܘܪܝܝܐ. ܡܪܕܝܢ

[1]  ܬܰܪܕܺܝܼܬܳܐ: ܚܫܰܠܬܳܗܿ ܠܡܶܬܰܠ ܣܽܘܼܟܳܠ: Disiplin / Discipline

[2]  ܫܽܘܼܠܚܳܢܳܐ: Misyon / Misison

[3]  ܡܰܫܦܳܢܽܘܼܬܳܐ: Tolerans / Tolerance

[4]  ܡܰܕܠܳܢܽܘܼܬܳܐ: Kolaylaştırma / Facilitation

[5]  ܡܰܩܠܳܢܽܘܼܬܳܐ: Hafifleştirme / Alleviation

[6]  ܢܰܘܦܳܐ: Hedef / Goal

[7]  ܨܰܕܘܳܐ: Spor /Sport

ܛܽܘܼܒܳܒܳܐ ܕܰܟܬܳܒܳܐ ܚܰܕܬܐ

ܛܽܘܼܒܳܒܳܐ ܕܰܟܬܳܒܳܐ ܚܰܕܬܐ

ܟܽܠ ܟܬܳܒܳܐ܆ ܒܥܳܬܳܐ ܐܺܝܼܬܰܘܗܝ ܕܥܰܡܠܳܐ ܪܰܒܳܐ ܕܠܳܐ ܨܳܒܶܐ ܒܚܳܫܽܘܿܫܽܘܼܬܳܐ ܐܶܠܳܐ ܒܥܳܒܽܘܿܕܽܘܼܬܳܐ. ܘܰܒܪܳܡܰܐ ܗ̱ܘ ܕܡܰܪ̈ܢܝܳܬܐ ܕܡܰܘܩ̈ܕܳܢ ܠܶܒܳܐ ܘܰܡܦܰܪ̈ܕܳܢ ܫܶܢܬܳܐ. ܘܕܽܘܼܥܬܰܐ ܗ̱ܘ ܕܪܽܘܼܚܳܐ ܘܰܫܚܳܩܳܐ ܕܗܰܘܢܳܐ. ܘܠܳܐ ܡܶܬܓܰܫܰܡ ܘܐܳܦܠܳܐ ܡܶܨܛܰܠܰܡ ܐܶܠܐ ܒܚܽܘܼܒܳܐ ܙܳܩܽܘܼܬܳܐ ܘܰܛܢܳܢܳܐ ܫܓܺܝܼܪܳܐ.

ܟܬܳܒܳܐ ܕܰܥܠܰܘܗܝ ܛܳܝܦܳܐ ܡܶܠܬܳܐ ܡܶܬܦܪܶܣ ܒܐܰܪܒܥܳܐ ܠܶܫ̈ܳܢܶܐ: ܣܽܘܼܪܝܳܐܝܼܬ ܘܥܰܪܒܳܐܝܼܬ ܘܬܽܘܼܪܟܳܐܝܼܬ ܘܐܶܢܓܠܺܝܼܫܳܐܝܼܬ. ܘܛܳܥܶܢ ܩܳܠܳܐ ܚܶܟܡܬܳܢܳܝܳܐ ܕܡܰܪܕܽܘܼܬܳܐ ܪܰܒܬܳܐ ܡܳܪܰܬ ܡܰܦ̈ܩܳܢܶܐ ܛܳܒ̈ܶܐ ܗܿܳܝ ܕܠܳܐ ܨܳܒܝܳܐ ܒܺܝܕܰܥܬܳܐ ܡܰܚܣܪܳܢܺܝܼܬܳܐ ܘܐܳܦܠܳܐ ܡܫܰܡܫܳܐ ܠܰܥܪܺܝܼܡܽܘܼܬܳܐ ܦܽܘܼܪܣܳܢܳܝܬܳܐ. ܡܶܛܠܗܳܕܶܐ ܫܰܡܺܝܼܬܶܗ «ܒܽܘܼܝܳܢܳܐ ܕܚܰܝ̈ܶܐ ܒܡܰܪܕܽܘܼܬܳܐ ܣܽܘܼܪܝܳܝܬܳܐ». ܒܰܕ ܥܙܺܝܼܠ ܗ̱ܘܼ ܘܰܙܩܺܝܼܪ ܒܗܰܘ ܡܳܐ ܕܥܰܬܺܝܼܩ ܘܐܰܒܳܗܳܝ ܒܪܰܡ ܒܣܽܘܼܠܓܳܣܳܐ ܕܡܶܣܬܰܟܠܳܢܽܘܼܬܳܐ ܚܕܰܬܳܐ. ܘܰܟܬܳܒܰܐ ܗ̱ܘ ܕܡܰܚܶܡ ܩܘܼܪ̈ܫܶܐ ܕܪܘܼܚܳܐ ܘܡܰܩܶܠ ܝܘܼܩܪܳܐ ܕܡܰܪܕܺܝܼܬܳܐ ܒܙܰܒܢܳܐ ܗܳܢܳܐ ܕܒܶܗ ܕܳܝܒܺܝܼܢ ܘܡܶܫܬܪܶܝܢ ܣܽܘܼ̈ܟܳܠܶܐ ܕܡܰܪܕܽܘܼܬܰܢ. ܘܐܳܙܶܠ ܠܕܰܟܝܽܘܼܬ ܠܶܒܳܐ ܘܚܳܫܰܚ ܠܢܺܝܼܚܽܘܼܬ ܗܰܘܢܳܐ ܟܰܣܝܳܐ. ܒܰܕ ܡܳܠܐ ܣܦܺܝܼ̈ܩܳܬܳܐ ܘܥܳܨܶܒ ܟܪ̈ܺܝܼܗܳܬܳܐ ܕܡܶܨܛܰܒܝ̈ܳܢܐ. ܘܡܶܬܩܰܪܰܒ ܠܡܰܚ̈ܒܳܢܶܐ ܕܡܰܪܕܘܼܬܳܢ ܗܿܳܢܘܿܢ ܕܠܐ ܡܶܬܪܰܥܶܝܢ ܒܡܘܼܙܳܓܳܐ ܕܠܺܝܼܚܳܐ ܕܫܽܘܼܥܠܳܝܳܐ ܐܶܠܐ ܨܳܒܶܝܢ ܒܫܽܘܼܓܢܳܝܳܐ ܪܡܺܝܼܣܳܐ ܕܫܽܘܼܡܠܳܝܳܐ.

ܘܛܶܢܶܬ ܘܛܰܝܒܶܬܗ ܡܶܛܽܠ ܛܰܒܥܳܐ ܘܰܦܪܳܣܳܐ ܒܓܽܘܼܪܳܓܳܐ ܡܪܰܥܝܳܢܳܐ ܕܪܺܝܼܫ ܡܰܘܬܒܳܐ ܕܥܺܕ̈ܳܬܳܐ ܕܡܶܕܝܰܕ ܡܝܰܩܪܳܐ ܝܰܘܣܶܦ ܬܽܘܼܪܟܰܪ ܗܿܳܢܳܐ ܕܡܶܢ ܡܶܬܚܳܐ ܕܬܠܳܬܺܝܼܢ ܘܚܰܡܶܫ ܫܢܺܝܼ̈ܢ ܗܘܳܐ ܠܶܗ ܕܰܡܫܰܡܶܫ ܘܰܡܕܰܒܰܪ ܙܪܺܝܼܙܳܐܝܼܬ ܒܥܽܘܼ̈ܣܳܩܶܐ ܘܛܽܘܼܪ̈ܳܦܶܐ ܐܰܬܪ̈ܳܢܳܝܶܐ. ܘܗܺܝܼ ܗܳܕܶܐ ܫܰܡܠܺܝܼܬ ܒܛܳܒܽܘܼܬ ܨܶܒܝܳܢܳܐ ܐܰܝܟ ܕܰܠܦܽܘܼܪܥܳܢ ܩܽܘܼܒܳܠܛܰܝܒܘܼ ܘܐܺܝܼܩܳܪܳܐ ܠܚܽܘܼܡܣܳܢܶܗ ܡܳܬܳܢܳܝܳܐ ܚܠܺܝܼܨܳܐ ܘܠܰܛܢܳܢܶܗ ܠܒܺܝܼܒܳܐ ܘܰܠܛܳܒܬܳܐ ܘܦܽܘܼܪܢܳܣܳܐ ܕܝܽܘܼܬܪܳܢܳܐ ܓܰܘܳܢܳܝܳܐ. ܒܰܕ ܡܗܰܝܡܶܢ ܐ̱ܢܳܐ ܕܡܰܪܕܽܘܼܬܰܢ ܢܳܨܚܳܐ ܒܥܽܘܼܬܩܳܐ ܢܳܬܽܘܿܦܳܐ ܕܥܺܕ̈ܳܬܳܐ ܘܕܰܝܪ̈ܳܬܳܐ ܕܐܰܬܪܰܢ. ܐܶܠܳܐ ܒܪܰܡ ܣܳܒܰܪ ܐ̱ܢܳܐ ܚܓܺܝܼܪܳܐ ܦܳܐܶܫ ܢܶܨܚܳܢܳܐ ܗܳܢܳܐ ܡܶܛܽܠ ܓܰܘܳܝ̈ܶܐ ܘܒܰܪ̈ܳܝܶܐ ܐܶܢ ܠܳܐ ܡܶܬܡܰܙܓܳܐ ܢܳܬܽܘܿܦܽܘܼܬܳܐ ܗܳܕܶܐ ܒܣܽܘܼ̈ܟܳܠܐ ܡܨܰܝ̈ܒܳܢܶܐ ܕܡܰܪܕܽܘܼܬܰܢ. ܡܳܕܶܝܢ ܫܠܳܡܳܐ ܘܫܰܝܢܳܐ ܘܚܰܝܠܳܐ ܘܚܽܘܼܠܡܳܢܳܐ ܢܶܬܠܰܘܽܘܿܢ ܠܟܽܠܡܰܢ ܕܰܚܙܺܝܼܩ ܘܡܶܬܚܰܙܰܩ ܒܢܽܘܼܛܳܪܐ ܕܡܰܪܕܽܘܼܬܳܢ ܗܿܳܝ ܕܡܶܢܳܗܿ ܝܶܠܦܶܬ: «ܠܳܐ ܡܰܬܡܰܟܰܟ ܘܐܳܦܠܳܐ ܢܳܗܰܪ ܐܶܠܐ ܒܰܪܢܳܫܳܐ ܗܰܘ ܐܰܝܢܳܐ ܕܰܡܩܰܒܶܠ ܒܨܺܝܼܪܽܘܼܬܳܐ ܘܰܡܚܺܝܼܠܽܘܼܬܳܐ».

ܐܶܢܰܐ ܡܿܰܢ ܪܰܒܰܬ ܣܳܘܰܚ ܐ̱ܢܳܐ ܠܰܦܠܘܼܚܝܳܐ ܘܰܟܪܽܘܼܒܝܳܐ ܕܠܶܫܳܢܰܢ ܣܽܘܼܪܝܳܝܳܐ ܒܰܝܢܳܬ ܪܰܘܒܳܐ ܕܠܺܝܼܚܳܐ ܘܪܶܕܝܳܐ ܫܓܺܝܼܫܳܐ ܕܥܽܘܼ̈ܣܳܩܶܐ ܐܰܬܪ̈ܢܳܝܶܐ. ܡܶܛܠܗܳܕܶܐ ܒܛܺܝܼܠܳܐܝܼܬ ܥܳܡܶܠ ܘܟܳܬܶܒ ܘܦܳܪܶܣ ܐ̱ܢܳܐ ܐܰܝܟܰܢܳܐ ܕܠܳܐ ܢܶܬܓܰܠܙܽܘܿܢ ܚܰܘ̈ܩܰܘܗܝ ܡܼܶܢ ܛܳܒ̈ܳܬܳܐ ܕܢܳܒ̈ܥܳܢ ܡܼܶܢ ܡܰܥܒ̈ܕܳܢܘܳܬܳܗܿ ܕܣܶܦܪܳܝܽܘܼܬܳܐ. ܒܰܕ ܢܺܝܼܫܳܐ ܕܣܽܘܼ̈ܟܳܠܐ ܡܩܰܘ̈ܝܳܢܶܐ ܘܰܡܠܺܝܼ̈ܠܶܐ ܠܰܝܬܰܘܗܝ ܐܶܠܳܐ ܕܗܽܘܼ ܒܰܪܢܳܫܳܐ ܢܰܦܠܰܚ ܘܢܰܘܪܶܒ ܟܰܟܪܳܐ ܕܡܰܘܗܰܒܬܶܗ ܠܬܶܫܡܶܫܬܳܐ ܕܰܒܢ̈ܰܝ ܓܶܢܣܶܗ ܘܰܒܢ̈ܰܝ ܒܶܣܪܶܗ ܒܐܝܼܩܳܪܳܐ ܘܰܚܢܳܢܳܐ ܘܚܰܘܣܳܢܳܐ.

ܘܪܺܝܼܫܽܘܼܬܳܐ ܗܳܕܶܐ ܐܳܣܪܳܐ ܘܟܳܕܢܳܐ ܠܟܽܠܰܢ ܘܟܽܠ ܕܰܪܓܳܝܳܐ ܬܚܽܘܿܬ ܢܺܝܼܪܳܗܿ ܠܳܐ ܡܶܬܦܰܠܥܳܢܳܐ ܒܕܽܘܼܪ̈ܳܓܶܐ ܕܫܽܘܼܡܠܳܝܳܐ ܘܰܒܡܰܣ̈ܩܳܢܐ ܕܩܽܘܼܝܳܡܳܐ ܘܫܽܘܼܘܫܳܛܳܐ…

ܠܳܐ ܢܶܛܥܶܐ: ܠܳܐ ܡܶܬܟܰܢܰܟ ܒܰܪܢܳܫܳܐ ܓܰܘܳܝܳܐ ܒܶܠܥܰܕ ܥܦܽܘܼܩܝܳܐ ܕܪܽܘܼܚܳܦܳܐ ܚܽܘܼܒܳܢܳܝܳܐ ܘܬܰܪܒܺܝܼܬܳܢܳܝܳܐ ܕܰܚܢܳܢܳܐ ܘܚܰܘܣܳܢܳܐ. ܒܰܕ ܒܨܺܝܼܪ ܗ̱ܽܘ ܚܽܘܼܒܳܐ ܕܪܰܚܺܝܼܩ ܡܼܶܢ ܫܪܳܪܳܐ. ܘܚܶܫܟܳܐ ܗ̱ܝ ܝܕܰܥܬܳܐ ܒܶܠܥܳܕ ܚܰܘܣܳܢܳܐ. ܘܫܽܘܼܚܢܳܐ ܗ̱ܝ ܡܶܠܬܳܐ ܕܠܰܝܬ ܒܳܗܿ ܚܢܳܢܳܐ.

ܝܰܘܡܳܐ ܒܰܣܺܝܼܡܳܐ ܥܰܡ ܫܠܳܡܳܐ ܒܗܺܝܼܠܳܐ ܠܟܽܠ.

ܝܘܣܦ ܒܓܬܫ

ܚܘܕܪܐ ܕܡܪܕܘܬܐ ܘܣܦܪܝܘܬܐ ܕܠܫܢܐ ܣܘܪܝܝܐ. ܡܪܕܝܢ

ܨܰܘܬܳܐ ܕܡܰܪܕܽܘܼܬܳܐ

ܨܰܘܬܳܐ ܕܡܰܪܕܽܘܼܬܳܐ

ܟܰܕ ܨܳܠܶܝܢܢ ܐܶܕܢܳܐ ܡܶܢܟܠܦܪܽܘܿܣ ܫܳܡܥܺܝܼܢܰܢ ܨܰܘ̈ܬܶܐ ܦܪ̈ܺܝܼܫܶܐ ܒܡܰܣܩܳܐ ܘܡܰܚܬܳܐ ܕܚܽܘܼ̈ܫܳܒܶܐ ܕܺܝܼܠܰܢ. ܡܶܢܗܽܘܿܢ ܡܿܰܢ ܕܨܰܘ̈ܬܶܐ ܗܳܘܶܝܢ ܡܟܰܢ̈ܫܳܢܶܐ ܘܰܡܒܰܕܪ̈ܳܢܶܐ. ܘܡܶܢܗܽܘܿܢ ܕܶܝܢ ܡܢܺܝܼ̈ܚܳܢܶܐ ܘܰܡܙܺܝܼ̈ܥܳܢܶܐ. ܘܡܶܢܗܽܘܿܢ ܬܽܘܿܒ ܠܳܐ ܡܶܫܬܰܡܥܺܝܼܢ ܐܶܠܳܐ ܒܰܙܗܺܝܼܪܘܼܬܳܐ ܪܰܒܬܳܐ ܕܠܶܒܳܐ ܬܪܺܝܼܨܳܐ.

ܟܬܺܝ̈ܒܳܬܐ ܦܪ̈ܺܝܼܫܳܬܳܐ ܕܡܼܶܢ ܙܒܰܢ ܠܰܙܒܰܢ ܟܳܬܶܒ ܘܦܳܪܶܣ ܐ̱ܢܳܐ ܚܽܘ̈ܫܳܒܶܐ ܐܶܢܶܝܢ ܓܫܺܝܼ̈ܡܶܐ ܕܗܶܕ̈ܣܶܐ ܣܒܺܝܼ̈ܣܶܐ. ܘܰܦܪܺܝܼܫܳܐܝܼܬ ܫܶܡܥܳܐ ܐܶܢܶܝܢ ܕܨܰܘܬܳܐ ܪܰܟܺܝܼܟܳܐ ܕܡܰܪܕܽܘܼܬܳܐ ܣܽܘܼܪܝܳܝܬܳܐ ܗܿܳܝ ܕܡܶܢܳܗܿ ܝܶܠܦܶܬ: «ܠܳܐ ܡܰܬܡܰܟܰܟ ܘܐܳܦܠܳܐ ܢܳܗܰܪ ܐܶܠܐ ܒܰܪܢܳܫܳܐ ܗܰܘ ܐܰܝܢܳܐ ܕܰܡܩܰܒܶܠ ܒܨܺܝܼܪܽܘܼܬܳܐ ܘܰܡܚܺܝܼܠܽܘܼܬܳܐ». ܨܰܘܬܳܐ ܗܳܢܳܐ ܛܳܥܶܢ ܩܳܠܳܐ ܚܶܟܡܬܳܢܳܝܳܐ ܕܡܰܪܕܽܘܼܬܳܐ ܪܰܒܬܳܐ ܡܳܪܰܬ ܡܰܦ̈ܩܳܢܶܐ ܛܳܒ̈ܶܐ. ܡܶܛܠܗܳܕܶܐ «ܨܰܘܬܳܐ ܕܡܰܪܕܽܘܼܬܳܐ» ܟܰܢܺܝܼܬܗܿ ܠܡܺܐܡܰܪܬܳܐ ܗܳܕܶܐ. ܒܰܕ ܥܙܺܝܼܠܐ ܘܰܙܩܺܝܼܪܳܐ ܒܗܰܘ ܡܳܐ ܕܥܰܬܺܝܼܩ ܘܐܰܒܳܗܳܝ ܒܪܰܡ ܒܣܽܘܼܠܓܳܣܳܐ ܕܡܶܣܬܰܟܠܳܢܽܘܼܬܳܐ ܚܕܰܬܳܐ ܕܙܰܒܢܰܢ ܢܰܗܺܝܼܪܳܐ.

ܫܪܳܪܳܐ ܠܡܺܐܡܰܪ: ܪܳܓܳܐ ܠܺܝܼ ܠܡܶܫܡܰܥ ܨܰܘܬܳܐ ܕܡܰܪܕܽܘܼܬܰܢ. ܕܒܰܣܺܝܼܡ ܨܰܘܬܳܗܿ ܠܐܰܝܢܳܐ ܕܡܶܬܒܰܝܰܢ ܪܽܘܼܚܳܐ ܕܪ̈ܶܟܢܶܝܗܿ. ܒܪܰܡ ܠܳܐ ܝܳܕܰܥ ܐ̱ܢܳܐ ܐܰܝܟܰܢܳܐ ܐܶܒܰܕܶܩ ܘܐܶܦܰܫܶܩ ܡܐܺܡܪ̈ܶܐ ܕܨܰܘܬܳܗܿ. ܒܰܕ ܚܳܐܶܒ ܩܰܢܝܺܝܼ ܘܪܰܒܰܬ ܒܨܺܝܼܪ ܘܰܡܚܺܝܼܠ ܒܬܽܘܼܚܳܡܳܐ ܕܫܰܪܒܳܐ ܗܳܢܳܐ. ܚܕܳܐ ܐܺܝܼܬ ܠܺܝ ܒܰܠܚܽܘܿܕ ܠܡܺܐܡܰܪ: ܥܺܕ̈ܳܬܰܢ ܘܕܰܝܪ̈ܳܬܰܢ ܘܰܣܚܺܝܼ̈ܦܳܬܐ ܘܚܰܪ̈ܒܳܬܳܐ ܕܐܰܬܪܰܢ ܘܰܣܝ̈ܳܡܶܐ ܐܰܒܳܗ̈ܳܝܶܐ ܕܡܰܠܦ̈ܳܢܰܝܢ ܣܦܺܝܼܪ̈ܶܐ ܕܰܟܫܶܝܢ ܘܗܳܪܟܳܐ ܘܬܰܡܳܢ ܒܒ̈ܳܬܰܝ ܐܰܪ̈ܟܳܐ ܕܥܳܡܰܪܬܳܐ ܙܳܥ̈ܩܳܢ ܡܐܺܡܪ̈ܶܐ ܕܨܰܘܬܳܗܿ ܒܰܣܺܝܼܡܳܐ ܒܐܶܕ̈ܢܶܐ ܕܫܳܡ̈ܥܳܢ..

ܐܰܪܰܐ ܫܳܡܥܺܝܼܢܰܢ ܨܰܘܬܳܐ ܗܳܢܳܐ ܕܙܳܥܶܩ ܡܼܶܢ ܥܽܘܼܡܩܳܐ ܕܝܳܪܬܽܘܼܬܰܢ ܫܺܝܼܬܳܢܳܝܬܳܐ؟ ܐܰܪܰܐ ܕܳܪܟܺܝܼܢܰܢ ܓܰܘܳܝ̈ܳܬܶܗܿ ܕܝܳܪܬܽܘܼܬܰܢ ܣܶܦܪܳܝܬܳܐ؟

ܐܶܢܳܐ ܡܿܰܢ ܒܳܣܡܳܐ ܬܰܪܥܺܝܼܬܝ ܒܫܶܡܥܳܐ ܕܡܰܫ̈ܒܶܐ ܦܰܝܘ̈ܚܶܐ ܕܨܰܘܬܳܐ ܗܳܢܳܐ ܕܛܳܥܶܢ ܪ̈ܶܟܢܶܐ ܚܶܟܡ̈ܬܳܢܳܝܶܐ ܕܐܽܘܪܗܳܝ ܘܰܢܨܺܝܼܒܺܝܼܢ ܘܰܕܫܰܪܟܳܐ ܕܡܰܕܪ̈ܫܳܬܳܐ ܥܰܬܺܝܼ̈ܩܳܬܳܐ ܕܒܶܝܬܢܰܗܪܺܝܢ. ܒܕ ܡܼܶܢ ܪܰܟܺܝܼܟܽܘܼܬ ܛܶܦܪ̈ܰܝ ܫܰܪܺܝܼܬ ܕܐܶܦܠܽܘܿܚ ܚܰܘ̈ܩܰܘܗܝ ܠܡܶܣܬܰܟܳܠܽܘܼ ܪܘܼܚܳܐ ܕܨܰܘܬܳܐ ܗܳܢܳܐ. ܘܰܟܡܳܐ ܕܚܶܦܪܶܬ ܝܰܬܺܝܼܪ ܢܳܚܰܬ ܒܶܗ ܬܰܪܥܺܝܬܝ. ܘܰܟܡܳܐ ܕܥܶܡܩܶܬ ܝܰܬܺܝܼܪ ܒܣܶܡ ܪܶܕܝܳܐ ܕܡܶܠܰܘ̈ܗܝ. ܘܰܟܡܳܐ ܕܰܒܩܺܝܼܬ ܝܰܬܺܝܼܪ ܙܰܡ ܨܰܘܬܶܗ ܒܡܰܚܫܰܒܬܝ. ܘܰܟܡܳܐ ܕܰܒܨܺܝܼܬ ܝܰܬܺܝܼܪ ܨܰܚ ܥܰܡܠܶܗ ܟܰܣܝܳܐ ܘܕܰܘܪܶܗ ܛܰܫܝܳܐ.

ܘܰܬܢܰܢ ܡܰܩܪܰܚ ܐ̱ܢܳܐ ܕܠܳܐ ܡܰܨܝܳܐ ܗ̱ܘܳܬ ܕܐܶܟܬܽܘܿܒ ܚܽܘܼ̈ܩܶܐ ܘܚܰܘ̈ܩܶܐ ܗܳܠܶܝܢ ܐܶܢ ܠܳܐ ܡܶܬܪܟܶܢ ܗ̱ܘܺܝܬ ܠܡܶܫܡܰܥ ܪ̈ܶܟܢܶܐ ܚܶܟܡ̈ܬܳܢܳܝܶܐ ܕܨܰܘܬܳܐ ܗܿܳܢܳܐ ܕܢܳܩܶܫ ܒܰܬܪܰܥ ܡܰܫܡܰܥܬܳܐ ܕܟܽܠܰܢ. ܡܶܛܠܗܳܕܐ ܟܰܕ ܫܰܪܺܝܼܬ ܠܡܶܣܬܰܟܳܠܘܼ ܪܽܘܼܚܳܐ ܕܨܰܘܬܳܐ ܗܳܢܳܐ ܠܳܐ ܥܳܕ ܒܳܥܶܐ ܐ̱ܢܳܐ ܕܐܰܦܪܶܐ ܘܐܶܟܬܽܘܿܒ ܡܶܕܶܡ ܕܠܰܝܬ ܒܶܗ ܣܘܼܟܳܠܐ ܘܝܘܼܬܪܳܢܳܐ ܘܫܽܘܼܘܫܳܛܐ ܐܰܟܝܼܦܳܐ ܡܶܛܠ ܒܰܪܢܳܫܳܐ ܘܓܰܘܳܐ. ܒܰܕ ܡܶܢܶܗ ܕܨܰܘܬܳܐ ܗܳܢܳܐ ܐܶܣܬܰܟܠܶܬ: ܠܳܐ ܢܳܨܰܚ ܣܽܘܼܟܳܠܐ ܘܐܳܦܠܳܐ ܨܳܡܰܚ ܫܪܳܪܳܐ ܐܶܠܳܐ ܒܪܶܥܝܳܢܳܐ ܐܰܘ ܥܽܘܼܕܪܳܢܳܐ ܕܡܶܬܩܰܪܰܒ ܡܶܛܽܠ ܬܽܘܼܩܳܢܳܐ ܓܰܘܢܳܝܳܐ. ܡܶܟܳܐ ܒܰܙܒܰܢ ܣܽܘܼܦܩܳܢܝ ܡܶܬܚܰܦܰܛ ܐ̱ܢܳܐ ܠܡܰܫܡܳܥܘܼ ܨܰܘܬܳܐ ܗܳܢܳܐ ܪܘܺܝܼܚ ܣܽܘܼ̈ܟܳܠܐ ܡܶܛܽܠ ܢܘܼܦܳܫܳܐ ܪܶܥܝܳܢܳܝܳܐ ܘܛܘܼܥܳܡܳܐ ܠܶܫܳܢܳܝܳܐ.

ܐܝܢ: ܝܳܕܥ ܐ̱ܢܳܐ ܡܶܬܥܰܣܰܩ ܬܽܘܼܚܳܡܳܐ ܣܽܘܼܟܳܠܳܝܳܐ ܕܗܿܰܘ ܐܰܝܢܳܐ ܕܒܳܥܶܐ ܕܢܶܡܠܐ ܒܨܺܝܼܪ̈ܳܬܐ ܘܰܢܣܽܘܼܓ ܬܽܘܼܪ̈ܥܳܬܳܐ ܒܰܢܗܽܘܿܪ ܫܽܘܼܡܠܳܝܳܐ: «ܐܘܼܪܚܳܐ ܘܰܫܪܳܪܐ ܘܚܰܝ̈ܐ» ܕܰܡܫܺܝܼܚܳܐ. ܘܕܺܝܼܠܳܢܳܐܝܼܬ ܟܰܕ ܟܪܽܘܼܡܳܐ ܕܪܽܘܼܟܳܒܳܐ ܘܣܽܘܼܟܳܠܐ ܣܽܘܼܠܓܳܣܳܐܝܼܬ ܫܳܢܶܙ ܘܣܳܛܶܐ ܡܼܶܢ ܐܽܘܼܪܚܳܐ ܥܝܳܕܳܝܬܐ ܘܰܕܪܺܝܼܫܬܳܐ. 

ܫܘܼܐܳܠܐ ܗܳܢܰܘ: ܐܰܪܰܐ ܐܰܝܟܰܢܳܝܽܘܼܬܳܐ ܗܳܫܳܝܬܳܐ ܠܰܝܬܶܝܗܿ ܢܶܩܦܳܝܳܐ ܕܐܽܘܼܪܚܳܐ ܗܿܳܝ ܕܪܺܝܼܫܬܳܐ؟ ܐܰܝܟܰܢ ܡܰܨܝܳܐ ܕܰܢܥܰܕܰܪ ܘܢܰܘܬܰܪ ܘܰܢܫܰܘܫܶܛ ܒܰܐܡܘܼ̈ܡܶܐ ܘܰܬܚܘܼ̈ܡܶܐ ܕܐܽܘܼܪܚܳܐ ܗܳܕܶܐ ܕܪܺܝܼܫܬܳܐ ܐܶܢ ܠܐ ܢܳܦܩܺܝܼܢܰܢ ܠܒܰܪ ܡܼܶܢܗܽܘܿܢ ܟܕ ܡܳܝܨܺܝܼܢܰܢ ܡܠܽܘܼ̈ܐܶܐ ܙܘܼ̈ܡܳܝܶܐ ܡܼܶܢ ܣܽܘܼ̈ܟܳܠܐ ܕܫܪܳܪܳܐ ܪܰܒܳܐ  ܕܡܰܪܕܽܘܼܬܰܢ؟

ܐܶܢܰܐ ܡܿܰܢ ܟܳܬܶܒ ܐ̱ܢܳܐ ܡܶܛܽܠ ܫܽܘܼ̈ܘܕܳܥ̈ܐ ܩܪ̈ܺܝܼܚܶܐ ܕܪܽܘܼܒܳܝܳܐ ܘܬܽܘܼܩܳܢܳܐ «ܕܢܰܦܫܳܐ» ܟܰܕ ܩܳܛܶܦ ܐ̱ܢܳܐ ܝܕܰܥܬܳܐ ܘܣܽܘܼܟܳܠܳܐ ܡܼܶܢ ܫܪܳܪܳܐ ܪܰܒܳܐ. ܒܰܕ ܡܗܰܝܡܶܢ ܐ̱ܢܳܐ ܕܐܠܘܼܠܳܐ ܩܛܽܘܼܦܝܳܐ ܗܳܢܳܐ܆ ܠܳܐ ܡܶܫܬܰܟܚܺܝܼܢ ܣܽܘܼ̈ܟܳܠܐ ܕܪܽܘܼܚܳܐ܆ ܘܠܳܐ ܡܶܫܬܰܦܶܝܢ ܥܰܪܡܳܐ ܘܥܰܣܩܳܐ. ܘܐܳܦܠܳܐ ܡܶܫܬܰܟܢܳܐ ܥܺܝܼܪܽܘܼܬܳܐ ܒܰܝܢܳܬ ܪܰܘܒܳܐ ܫܓܺܝܼܫܳܐ ܘܩܰܘܡܳܐ ܕܠܺܝܼܚܳܐ ܕܰܒܠܺܝܼܠܽܘܼܬܳܐ. ܘܐܠܘܼܠܳܐ ܝܕܰܥܬܳܐ ܗܳܕܶܐ܆ ܠܳܐ ܡܶܨܛܰܠܠܳܐ ܬܰܪܥܺܝܼܬܳܐ. ܘܐܳܦܠܳܐ ܡܶܬܡܰܪܩܳܐ ܡܰܚܙܺܝܼܬܳܗܿ ܒܰܚܢܳܢܳܐ ܘܚܰܘܣܳܢܳܐ ܕܠܶܒܳܐ ܒܰܣܺܝܼܡܳܐ. 

ܘܐܰܟܡܳܐ ܕܺܝܼܕܝܼܥܳܐ ܒܥܳܠܡܳܐ ܢܰܗܺܝܼܪܳܐ ܡܿܰܢ ܠܰܝܬ ܘܳܠܺܝܼܬܳܐ ܕܠܳܐ ܙܶܕܩܳܐ. ܘܐܳܦܠܳܐ ܙܶܕܩܳܐ ܕܠܳܐ ܘܳܠܺܝܼܬܳܐ. ܘܠܰܝܬ ܡܶܕܶܡ ܕܰܦܫܺܝܼܩ ܘܰܕܠܺܝܼܠ. ܘܝܕܰܥܬܳܐ ܐܰܝܕܳܐ ܕܗܺܝܼ ܠܳܐ ܡܶܬܓܰܫܡܳܐ ܘܐܳܦܠܳܐ ܡܶܨܛܰܠܡܳܐ ܐܶܠܐ ܒܥܰܡܠܳܐ ܪܰܒܳܐ ܕܚܽܘܼܒܳܐ ܙܳܩܽܘܼܬܳܐ ܘܰܛܢܳܢܳܐ ܫܓܺܝܼܪܳܐ.

ܒܪܰܡ ܗܿܰܘ ܡܳܐ ܕܟܳܬܶܒ ܐ̱ܢܳܐ ܠܰܝܬܰܘܗܝ ܐܶܠܳܐ ܦܽܘܼܢܳܩܳܐ ܘܕܽܘܼܢܳܩܳܐ ܕܐܰܓܽܘܿܢܝ ܗܳܐ ܡܼܶܢ ܫܘܼܪܳܝܳܐ ܕܬܶܫܡܶܫܬܝ ܡܰܪܕܽܘܼܬܳܢܳܝܬܳܐ. ܘܰܒܥܳܬܳܐ ܘܰܒܨܳܬܳܐ ܐܺܝܼܬܰܘܗܝ ܕܥܰܡܠܳܐ ܡܦܰܪܕܳܢܳܐ ܕܫܶܢܬܳܐ. ܘܰܒܪܳܡܳܐ ܕܡܰܪ̈ܢܝܳܬܐ ܕܡܰܘܩ̈ܕܳܢ ܠܶܒܳܐ. ܘܡܰܟܣܳܪܳܐ ܕܕܽܘܼܥܬܳܐ ܕܪܽܘܼܚܳܐ ܘܰܫܚܳܩܳܐ ܕܗܰܘܢܳܐ ܕܠܳܐ ܨܳܒܶܐ ܘܐܳܦܠܳܐ ܒܳܥܶܐ ܕܢܺܚܶܐ ܒܐܰܙܓ̈ܶܝܗܿ ܕܣܶܦܪܳܝܽܘܼܬܳܐ ܐܶܠܳܐ ܒܰܐܘ̈ܳܢܶܐ ܕܐܳܦܕ̈ܢܶܝܗܿ ܒܰܣܺܝܼ̈ܡܶܐ. ܕܪܰܒܰܬ ܣܳܘܰܚ ܘܡܶܬܝܰܐܒ ܐ̱ܢܳܐ ܠܰܦܠܘܼܚܝܳܐ ܘܰܟܪܽܘܼܒܝܳܐ ܕܠܶܫܳܢܳܐ.

ܡܶܛܠܗܳܕܶܐ ܗܳܐ ܡܼܶܢ ܫܢܰܝ̈ܐ ܒܛܺܝܼܠܳܐܝܼܬ ܥܳܡܶܠ ܘܟܳܬܶܒ ܐ̱ܢܳܐ ܐܰܝܟܰܢܳܐ ܕܠܳܐ ܢܶܬܓܰܠܙܽܘܿܢ ܚܰܘ̈ܩܶܐ ܕܣܶܦܪܳܝܽܘܼܬܳܢ ܡܼܶܢ ܛܳܒ̈ܳܬܳܐ ܕܢܳܒ̈ܥܳܢ ܡܼܶܢ ܡܰܥܒ̈ܕܳܢܘܳܬܳܗܿ. ܟܕ ܣܳܐܡ ܐ̱ܢܳܐ ܠܐܶܘܬܐ ܕܥܰܡܠܝ ܥܰܠ ܦܳܬܽܘܿܪܳܐ ܕܥܽܘܼܪܦܳܢܳܐ ܡܶܛܽܠ ܢܘܼܛܳܪܳܐ ܘܥܽܘܼܙܳܝܳܐ ܘܚܽܘܼܡܣܳܢܳܐ. ܒܙܰܒܢܳܐ ܕܒܶܗ ܣܘܼܓܦܳܢܳܐ ܣܳܠܶܩ ܡܼܶܢ ܚܰܣܺܝܪ̈ܶܐ ܘܚܽܘܼܣܪܳܢܳܐ ܡܼܶܢ ܥܰܬܺܝܼܪ̈ܶܐ. ܘܠܰܝܬ ܠܺܝܼ ܢܺܝܼܫܳܐ ܡܶܕܶܡ ܣܛܰܪ ܡܼܶܢ ܛܳܒܬܳܐ ܕܢܰܦܫ̈ܳܬܳܐ. ܘܡܰܕܪܟܳܢܽܘܼܬܳܐ ܘܡܶܣܬܰܟܠܳܢܽܘܼܬܐ ܘܡܶܬܡܰܕܥܳܢܽܘܼܬܐ ܚܕܰܬܳܐ. ܘܡܰܘܠܳܕܳܐ ܬܪܰܝܳܢܳܐ. ܘܥܺܝܼܪܽܘܼܬܳܐ ܦܳܪܽܘܿܫܬܳܐ ܘܬܽܘܼܩܳܢܳܐ ܕܰܒܠܺܝܼ̈ܠܳܬܳܐ…

ܒܶܗ ܒܢܺܝܼܫܳܐ ܗܳܢܳܐ ܘܰܒܢܺܝܼܫ ܦܽܘܼܪܥܳܢ ܡܢܳܬܳܐ ܡܼܶܢ ܚܽܘܼ̈ܒܠܶܐ ܛܰܪ̈ܩܶܐ ܕܡܰܪܕܽܘܼܬܰܢ܆ ܘܰܒܣܰܒܪܳܐ ܕܐܰܘܬܰܪ ܠܓܰܘܳܐ ܘܰܠܫܰܪ̈ܒܳܬܐ ܕܒܳܬܪܰܢ܆ ܒܚܰܕܘܼܬܳܐ ܕܠܶܒܳܐ ܒܪܰܡ ܒܙܰܘܥܳܐ ܥܡܺܝܼܠܳܐ ܟܳܬܶܒ ܐ̱ܢܳܐ ܫܰܪܝܳܐܝܼܬ ܐܰܝܟ ܕܰܠܕܘܼܪܳܫܳܐ ܘܒܽܘܼܕܳܩܳܐ ܕܡܰܚ̈ܒܳܢܰܘܗܝ ܕܠܶܫܳܢܳܐ ܣܽܘܼܪܝܳܝܳܐ ܘܰܕܟܽܠܗܽܘܿܢ ܐܰܝܠܶܝܢ ܕܒܳܥܶܝܢ ܕܢܶܩܪܽܘܿܢ ܘܢܶܬܗܰܓܽܘܿܢ ܦܳܪܽܘܿܫܳܐܝܼܬ. ܘܒܶܣܬܪܳܝܘܼܬܐ ܕܟܽܠ «ܡܺܐܡܰܪܬܳܐ» ܦܪܺܝܼܫܳܐ ܡܼܶܢ ܕܰܐ̱ܚܪܺܬܳܐ. ܘܛܳܥܢܳܐ ܫܰܪܒܳܐ ܦܪܺܝܼܫܳܐ ܕܰܡܫܰܡܠܐ ܠܰܚܒܰܪܬܳܗܿ. ܘܣܽܘܼܓܳܐܐ ܕܙܰܒܢ̈ܺܝܼܢ ܟܳܬܶܒ ܐ̱ܢܳܐ ܒܪܰܘܒܳܐ ܕܠܺܝܼܚܳܐ ܘܪܶܕܝܳܐ ܫܓܺܝܼܫܳܐ ܕܥܽܘܼ̈ܣܳܩܶܐ ܬܰܪ̈ܥܺܝܼܬܳܢܳܝܶܐ ܘܛܽܘܼܪ̈ܳܦܶܐ ܐܰܬܪ̈ܢܳܝܶܐ. ܒܰܕ ܡܗܰܝܡܶܢ ܐ̱ܢܳܐ ܕܠܰܡ ܢܺܝܼܫܳܐ ܕܣܽܘܼ̈ܟܳܠܐ ܡܩܰܘ̈ܝܳܢܶܐ ܘܰܡܠܺܝܼ̈ܠܶܐ ܠܰܝܬܰܘܗܝ ܐܶܠܳܐ ܕܗܽܘܼ ܒܰܪܢܳܫܳܐ ܢܰܦܠܰܚ ܘܢܰܘܪܶܒ ܟܰܟܪܳܐ ܡܶܫܬܰܟܚܳܢܺܝܼܬܳܐ ܕܡܰܘܗܰܒܬܶܗ ܠܬܶܫܡܶܫܬܳܐ ܕܰܒܢ̈ܰܝ ܓܶܢܣܶܗ ܘܰܒܢ̈ܰܝ ܒܶܣܪܶܗ ܒܐܝܼܩܳܪܳܐ ܘܰܚܢܳܢܳܐ ܘܚܰܘܣܳܢܳܐ. ܘܪܺܝܼܫܽܘܼܬܳܐ ܗܳܕܶܐ ܐܳܣܪܳܐ ܘܟܳܕܢܳܐ ܠܟܽܠܰܢ ܘܟܽܠ ܕܰܪܓܳܝܳܐ ܬܚܽܘܿܬ ܢܺܝܼܪܳܗܿ ܘܥܰܡܠܳܗܿ ܠܳܐ ܡܶܬܦܰܠܥܳܢܳܐ ܒܕܽܘܼܪ̈ܳܓܶܐ ܕܫܽܘܼܡܠܳܝܳܐ ܘܰܒܡܰܣ̈ܩܳܢܐ ܕܩܽܘܼܝܳܡܳܐ ܘܫܽܘܼܘܫܳܛܳܐ…

ܠܐ ܟܰܣܝܳܐ ܕܠܰܡ ܢܰܘܚܳܐ ܡܰܕܥܳܢܳܝܳܐ ܘܪܰܘܚܳܐ ܢܰܦܫܳܢܳܝܳܐ ܐܰܓܪܰܐ ܗ̱ܘ ܪܰܒܳܐ ܕܥܰܡ̈ܠܐ ܪ̈ܶܥܝܳܢܳܝܶܐ. ܘܦܽܘܼܪܥܳܢܰܐ ܗ̱ܘ ܕܫܰܗܪ̈ܶܐ ܣܦܺܝܼܪ̈ܶܐ ܒܙܰܒܢܳܐ ܕܒܽܘܼܝܳܪ̈ܶܐ. ܘܟܰܕ ܪܳܘܰܚ ܘܢܳܐܰܚ ܩܰܘܡܳܐ ܓܰܘܳܝܳܐ܆ ܒܳܣܶܡ ܘܢܳܨܰܚ ܐܳܦ ܦܰܘܫܳܐ ܒܰܪܳܝܳܐ. ܘܰܒܣܽܘܼܟܳܠܐ ܗܳܢܳܐ܆ ܪܶܥܝܳܢܳܐ ܕܢܳܒܰܥ ܘܐܳܬܶܐ ܡܼܶܢ ܗܰܘܢܳܐ ܕܪܽܘܼܚܳܐ܆ ܡܣܰܝܥܳܢܰܐ ܗ̱ܘ ܐܰܝܟ ܥܽܘܼܕܪܳܢܳܐ ܗܰܘ ܕܚܰܝܬܳܐ ܡܰܘܠܕܳܢܺܝܼܬܳܐ..

ܘܬܢܢ ܦܰܐܝܳܐ ܕܢܰܕܟܰܪ: ܚܽܘܼܨܦܳܐ ܐܺܝܼܬܰܘܗܝ ܫܟܺܝܼܪܳܐ ܟܬܽܘܼܒܝܳܐ ܕܫܰܪܒܳܐ ܡܶܕܶܡ ܐܰܝܢܳܐ ܕܥܳܒܰܪ ܚܺܝܠ ܡܶܣܬܰܟܠܳܢܽܘܼܬܳܐ ܘܝܼܕܰܥܬܳܐ ܠܶܫܳܢܳܝܬܐ ܕܒܰܪܢܳܫܳܐ. ܒܰܕ ܣܽܘܼ̈ܟܳܠܐ ܡܩܰܘ̈ܝܳܢܶܐ ܘܰܡܠܺܝܼ̈ܠܐ ܠܐ ܡܶܫܬܰܟܚܺܝܼܢ ܘܐܳܦܠܳܐ ܡܶܫܬܰܟܢܺܝܼܢ ܐܶܠܳܐ ܕܗܽܘܼ ܒܰܪܢܳܫܳܐ ܢܶܫܟܰܚ ܟܰܟܪܳܐ ܕܡܶܬܡܰܨܝܳܢܽܘܼܬܶܗ ܒܥܳܠܡܶܗ ܓܰܘܳܝܳܐ.

ܒܣܰܒܪܳܐ ܐܺܝܼܬܰܝ ܕܪ̈ܶܥܝܳܢܶܐ ܕܡܶܬܦܰܪܣܺܝܼܢ ܢܦܰܝܓܽܘܢ ܠܨܰܗܝܽܘܼܬܳܐ ܘܢܺܐܙܠܽܘܢ ܠܛܳܒܬܳܐ ܕܢܰܦܫ̈ܳܬܳܐ ܒܡܶܫܬܰܟܚܳܢܽܘܼܬ ܟܰܟܪܳܐ ܕܡܶܬܡܰܨܝܳܢܽܘܼܬܐ ܒܙܰܒܢܳܐ ܗܳܢܳܐ ܕܒܶܗ ܩܳܐܰܪ ܪܶܬܚܳܐ ܕܡܰܪܕܽܘܼܬܢ..

ܘܬܰܘܕܺܝ ܠܛܳܒܽܘܼܬ ܬܰܪܥܺܝܼܬܳܐ ܕܩܳܪ̈ܽܘܿܝܶܐ ܕܦܽܘܼܪܫܳܢܳܐ ܘܰܦܪܺܝܼܫܳܐܝܬ ܠܡܶܣ̈ܬܰܟܠܳܢܶܐ ܘܰܡܓܰܡܪ̈ܢܶܐ….!

ܝܘܣܦ ܒܓܬܫ

ܚܘܕܪܐ ܕܡܪܕܘܬܐ ܘܣܦܪܝܘܬܐ ܕܠܫܢܐ ܣܘܪܝܝܐ. ܡܪܕܝܢ

ܚܰܘܪܳܐ ܡܰܪܕܽܘܼܬܳܢܳܝܳܐ ܚܛܺܝܼܦܳܐ

ܚܰܘܪܳܐ ܡܰܪܕܽܘܼܬܳܢܳܝܳܐ ܚܛܺܝܼܦܳܐ

ܡܰܪܕܽܘܼܬܳܐ ܣܽܘܼܪܝܳܝܬܳܐ ܛܳܒ ܥܰܬܺܝܼܩܬܳܐ ܐܺܝܼܬܶܝܗ̇. ܘܥܰܡܺܝܼ̈ܩܺܝܼܢ ܘܰܪ̈ܘܺܝܼܚܺܝܼܢ ܣܘܼ̈ܟܳܠܶܝܗ̇. ܘܡܶܬܚܰܒܟܺܝܼܢ ܒܫܶܪ̈ܫܶܐ ܫܺܝܼ̈ܬܳܢܳܝܶܐ ܕܰܡܕܺܝܼܢܳܝܽܘܼܬܳܐ ܥܰܬܺܝܼܩܬܳܐ ܕܒܶܝܬܢܰܗܪܺܝܢ. ܒܪܰܡ ܡܳܝܨܺܝܼܢ ܚܰܠܒܳܐ ܡܬܰܪܣܝܳܢܳܐ ܡܼܶܢ ܝܽܘܼܠܦܳܢܳܐ ܡܰܚܝܳܢܳܐ ܕܰܡܫܺܝܼܚܳܐ. ܘܝܰܘܡܳܢܳܐ ܐܳܦܶܢ ܟܡܺܝܼܪ ܙܺܝܼܘܳܗܿ ܘܰܟܡܺܝܕ ܨܶܡܚܳܗܿ ܡܰܦܪܓܳܢܳܐ܆ ܐܶܠܳܐ ܪܶܥܝܳܢܳܐܝܼܬ ܒܰܕܡܽܘܼܬ ܕܪܳܫܳܐ ܕܳܪܳܢܳܝܳܐ ܐܺܝܼܬܶܝܗܿ ܒܰܐܦ̈ܰܝ ܗܽܘܼ̈ܦܳܟܶܐ ܘܕܽܘܼܒܳܪ̈ܶܐ ܝܰܨܪ̈ܳܢܳܝܶܐ ܒܠܺܝܼ̈ܠܶܐ. ܘܓܳܠܝܳܐ ܐ̱ܪ̈ܳܙܶܐ ܘܝܰܕܥ̈ܳܬܳܐ ܘܚܶܟ̈ܡܳܬܳܐ ܕܕܳܪ̈ܶܐ ܘܝܽܘܼܒ̈ܠܐ ܥܒܺܝܼܪ̈ܶܐ ܠܡܰܕ̈ܥܶܐ ܦܳܪ̈ܽܘܿܫܶܐ ܗܿܳܢܽܘܢ ܕܚܳܙܶܝܢ ܝܽܘܼܩܪܳܗܿ ܡܢܰܬܥܳܢܳܐ ܒܫܽܘܼܘܫܳܛܳܐ ܐ̱ܢܳܫܳܝܳܐ. ܘܩܳܠܳܗܿ ܚܢܺܝܼܓ ܘܰܪܟܺܝܼܢ ܐܶܠܳܐ ܒܪܰܡ ܚܳܫܰܚ ܕܢܶܥܨܽܘܿܒ ܟܺܐܒ̈ܶܐ ܢܰܦܫ̈ܳܢܳܝܶܐ ܘܢܶܣܡܽܘܿܟ ܡܰܪܥܽܘܼܬܳܐ ܪܶܥܝܳܢܳܝܬܳܐ ܕܰܫܟܺܝܼܚܳܐ ܗܳܪܟܳܐ ܘܬܰܡܳܢ ܒܰܝܢܳܬ ܓܰܘܳܐ. ܘܩܳܠܳܐ ܗܳܢܳܐ ܚܢܺܝܼܓܳܐ ܒܳܥܶܐ ܡܶܢܰܢ ܕܢܶܬܒܰܩܶܐ ܒܡܰܚܙܺܝܼܬ ܢܰܦܫܰܢ ܠܡܶܫܟܳܚܽܘܼ ܚܽܘܼܒܳܐ ܘܰܚܢܳܢܳܐ ܘܚܰܘܣܳܢܳܐ ܘܐܺܝܼܩܳܪܳܐ ܒܓܰܘܰܢ ܡܛܽܠ ܢܰܘܚܳܐ ܕܡܰܪܕܺܝܼܬܰܢ ܥܳܠܡܳܢܳܝܬܳܐ.

ܒܳܣܡܳܐ ܬܰܪܥܺܝܼܬܝ ܒܫܶܡܥܳܐ ܕܡܰܫ̈ܒܶܐ ܦܰܝܘ̈ܚܶܐ ܕܩܳܠܐ ܗܳܢܳܐ ܕܛܳܥܶܢ ܪ̈ܶܟܢܶܐ ܡܰܪ̈ܕܽܘܼܬܳܢܳܝܶܐ ܕܐܽܘܪܗܳܝ ܘܰܢܨܺܝܼܒܺܝܼܢ ܘܰܕܫܰܪܟܳܐ ܕܡܰܕܪ̈ܫܳܬܳܐ ܥܰܬܺܝܼ̈ܩܳܬܳܐ ܕܒܶܝܬܢܰܗܪܺܝܢ. ܒܕ ܡܼܶܢ ܪܰܟܺܝܼܟܽܘܼܬ ܛܶܦܪ̈ܰܝ ܫܰܪܺܝܼܬ ܕܐܶܦܠܽܘܿܚ ܚܰܘ̈ܩܳܐ ܕܡܰܪܕܽܘܼܬܰܢ ܠܡܶܣܬܰܟܳܠܽܘܼ ܪܘܼܚܳܐ ܕܩܳܠܳܐ ܗܳܢܳܐ. ܘܰܟܡܳܐ ܕܚܶܦܪܶܬ ܝܰܬܺܝܼܪ ܢܳܚܰܬ ܒܶܗ ܬܰܪܥܺܝܬܝ. ܘܰܟܡܳܐ ܕܥܶܡܩܶܬ ܝܰܬܺܝܼܪ ܒܣܶܡ ܪܶܕܝܳܐ ܕܡܶܠܰܘ̈ܗܝ. ܘܰܟܡܳܐ ܕܰܒܩܺܝܼܬ ܝܰܬܺܝܼܪ ܙܰܡ ܨܰܘܬܶܗ ܒܡܰܚܫܰܒܬܝ. ܘܰܟܡܳܐ ܕܰܒܨܺܝܼܬ ܝܰܬܺܝܼܪ ܨܰܚ ܥܰܡܠܶܗ ܟܰܣܝܳܐ ܘܕܰܘܪܶܗ ܛܰܫܝܳܐ.

ܒܰܕ ܩܳܠܐ ܒܰܪܳܝܳܐ ܠܰܝܬܰܘܗܝ ܐܶܠܐ ܨܰܘܬܳܐ ܕܗܿܰܘ ܓܰܘܳܝܳܐ. ܘܠܳܐ ܪܳܚܶܡ ܘܐܳܦܠܳܐ ܝܳܨܶܦ ܐܶܠܳܐ ܗܿܰܘ ܕܡܶܣܬܰܟܰܠ ܘܝܳܕܥ. ܘܠܰܝܬ ܢܰܘܚܳܐ ܐܶܠܳܐ ܒܰܗܦܳܟܬܳܐ ܠܡܰܒܽܘܼ̈ܥܶܐ ܡܠܺܝܼ̈ܠܶܐ ܕܢܰܦܫܳܐ ܪܰܒܬܳܐ. ܕܠܳܐ ܡܳܛܶܐ ܠܢܺܝܼܫܳܐ ܐܶܠܳܐ ܗܿܰܘ ܕܠܺܝܫ ܘܰܓܒܺܝܼܠ ܒܰܚܡܺܝܼܪܳܗܿ. ܘܥܶܠܰܬ ܥܽܘܼܪ̈ܩܳܠܐ ܘܥܽܘܼܪ̈ܙܳܠܐ ܠܰܝܬܰܘܗܝ ܐܶܠܐ ܫܒܽܘܼܩܝܳܐ ܕܬܰܪܒܺܝܼܬܳܗܿ. ܘܰܡܚܰܛܳܐ ܫܽܘܼܚܬܳܢܺܝܼܬܳܐ ܠܳܐ ܚܳܝܛܳܐ ܦܶܪ̈ܩܶܐ. ܘܒܶܣܬܰܪ ܣܽܘܼ̈ܟܳܠܐ܆ ܐܺܝܼܬ ܗ̱ܽܘ ܡܰܢ ܕܢܳܦܰܚ ܚܰܝܠܳܐ ܒܙܰܘܥܳܐ ܘܪܶܗܛܳܐ ܕܗܳܢܳܐ ܟܽܠ. ܘܟܰܕ ܡܶܬܓܰܠܓܳܐ ܬܰܚܦܺܝܼܬܐ ܕܣܽܘܼ̈ܟܳܠܐ܆ ܗܳܝܕܶܝܟ ܕܰܪܓܳܐ ܘܐܰܩܡܳܐ ܘܫܰܗܪܳܐ܆ ܠܐ ܨܳܒܶܝܢ ܐܶܠܳܐ ܒܙܰܗܪ̈ܶܐ ܘܐܰܡ̈ܢܶܐ ܡܰܪ̈ܕܽܘܼܬܳܢܳܝܶܐ ܡܶܛܽܠ ܡܰܝܬܝܽܘܼܬ ܦܺܐܪ̈ܶܐ ܡܰܘܬܪ̈ܳܢܶܐ.

ܡܳܕܶܝܢ ܫܠܳܡܳܐ ܘܫܰܝܢܳܐ ܘܚܰܝܠܳܐ ܘܚܽܘܼܠܡܳܢܳܐ ܢܶܬܠܰܘܽܘܿܢ ܠܟܽܠܡܰܢ ܕܰܚܙܺܝܼܩ ܘܡܶܬܚܰܙܰܩ ܒܢܽܘܼܛܳܪܐ ܕܡܰܪܕܽܘܼܬܰܢ: ܗܿܳܝ ܕܫܰܪܝܰܬ ܠܡܰܘܩܳܕܽܘܼ ܦܬܺܝܼܠܬܳܗܿ. ܐܶܠܳܐ ܒܪܰܡ ܪ̈ܽܘܼܫܡܶܝܗܿ ܠܳܐ ܫܳܬܩܺܝܼܢ ܡܼܶܢ ܗܿܳܝ ܕܢܺܐܡܪܽܘܿܢ: ܒܨܺܝܼܪ ܗ̱ܽܘ ܚܽܘܼܒܳܐ ܕܪܰܚܺܝܼܩ ܡܼܶܢ ܫܪܳܪܳܐ. ܘܚܶܫܟܳܐ ܗ̱ܝ ܝܕܰܥܬܳܐ ܒܶܠܥܳܕ ܚܰܘܣܳܢܳܐ. ܘܫܽܘܼܚܢܳܐ ܗ̱ܝ ܡܶܠܬܳܐ ܕܠܰܝܬ ܒܳܗܿ ܚܢܳܢܳܐ. ܘܰܠܦܽܘܼܬ ܛܽܘܼܟܳܣܳܐ ܣܢܺܝܼܩܳܐ ܟܰܟܪܳܐ ܕܡܶܬܛܰܡܪܳܐ ܒܳܨܪܳܐ ܘܠܳܐ ܡܶܬܬܰܓܪܳܐ. ܘܛܰܝܒܽܘܼܬܳܐ ܕܡܶܬܟܰܫܝܳܐ ܚܳܣܪܳܐ ܘܠܳܐ ܡܶܬܩܰܢܝܳܐ. ܘܐܰܡܺܝܼܢܳܐܝܼܬ ܚܳܨܕܺܝܼܢܰܢ ܗܿܰܘ ܡܳܐ ܕܙܳܪܥܺܝܼܢܰܢ. ܘܰܒܚܰܪܬܶܗ ܕܝܰܘܡܳܐ ܡܶܬܩܰܒܪܺܝܼܢܰܢ ܒܥܰܦܪܳܐ ܕܬܺܐܪܬܰܢ!

ܒܣܰܒܪܳܐ ܕܬܶܬܥܰܠܰܡ ܣܰܝܒܽܘܼܬܳܗܿ ܕܡܰܪܕܽܘܼܬܰܢ. ܘܠܳܐ ܢܶܚܙܽܘܿܩ ܚܽܘܒܳܗܿ ܡܼܶܢ ܠܶܒܰܘ̈ܳܬܰܢ. ܘܠܳܐ ܢܚܽܘܼܒ ܣܰܒܪܰܢ ܐܰܝܟܰܢܳܐ ܕܰܬܟܰܬܰܪ ܦܰܩܽܘܼܚܽܘܼܬܳܗܿ ܒܰܝܢܳܬ ܫܰܪ̈ܒܳܬܰܢ.

ܒܪܰܡ ܦܰܐܝܳܐ ܕܢܶܕܰܥ: ܡܶܬܝܰܕܥܳܐ ܡܰܪܕܽܘܼܬܰܢ ܠܦܽܘܼܬ ܡܫܽܘܼܚܬܳܐ ܕܦܳܪܽܘܿܫܽܘܼܬܰܢ. ܘܡܶܬܦܰܪܣܳܐ ܠܦܽܘܼܬ ܡܫܽܘܼܚܬܳܐ ܕܥܺܝܼܪܽܘܼܬܰܢ. ܘܡܶܬܢܰܨܚܳܐ ܠܦܽܘܼܬ ܡܫܽܘܼܚܬܳܐ ܕܰܥܪܺܝܼܡܽܘܼܬܰܢ.

ܘܬܰܘܕܺܝ ܠܛܳܒܳܐ ܕܣܳܡ ܢܘܼܗܪܳܐ ܕܡܰܪܕܽܘܼܬܳܐ ܒܢܰܦܫܳܐ ܕܐ̱ܢܳܫܽܘܬܰܢ!

ܝܘܣܦ ܒܓܬܫ

ܚܘܕܪܐ ܕܡܪܕܘܬܐ ܘܣܦܪܘܝܬܐ ܕܠܫܢܐ ܣܘܪܝܝܐ. ܡܪܕܝܢ

ܐܳܘ ܒܰܪ ܘܒܰܪܬ ܡܰܪܕܺܝܼܬܳܐ! 

ܐܳܘ ܒܰܪ ܘܒܰܪܬ ܡܰܪܕܺܝܼܬܳܐ! 

ܐܶܢܳܐ ܡܰܢ ܠܐ ܒܳܥܶܐ ܐ̱ܢܳܐ ܘܐܳܦܠܐ ܨܳܒܶܐ ܐ̱ܢܳܐ ܒܬܰܪܥܺܝܼܬܳܐ ܢܰܫܺܝܼܫܬܳܐ ܕܫܽܘܼܥܠܳܝܳܐ.

ܬܰܪܥܺܝܼܬܳܐ ܕܫܽܘܼܥܠܳܝܳܐ ܡܿܰܢ ܣܳܚܦܳܐ ܘܩܳܛܠܳܐ. ܘܬܰܪܥܺܝܼܬܳܐ ܕܫܽܘܼܡܠܳܝܳܐ ܕܶܝܢ ܒܳܢܝܳܐ ܘܡܰܚܝܳܐ.

ܠܐ ܡܶܫܬܰܪܰܪ ܬܽܘܼܪܳܨܳܐ ܘܐܳܦܠܳܐ ܓܳܡܰܪ ܫܽܘܼܡܠܳܝܳܐ  ܐܶܠܳܐ ܒܚܽܘܼܒܳܐ ܘܢܽܘܼܗܪܳܐ ܕܩܽܘܼܫܬܳܐ.

ܒܰܕ ܙܥܽܘܼܪ ܗ̱ܘܼ ܫܪܳܪܳܐ ܕܺܝܼܠܝ ܘܕܺܝܼܠܳܟ. ܘܰܒܨܺܝܼܪ ܗ̱ܘܼ ܪܶܥܝܳܢܳܐ ܕܺܝܼܠܝ ܘܕܺܝܼܠܳܟ. ܘܒܰܙܒܰܢ ܕܶܝܢ ܐܶܢܳܢܳܝ ܥܕܰܡܳܐ ܠܗܿܳܝ ܕܢܶܙܕܠܶܡ ܘܢܶܬܥܰܩܰܡ. ܡܳܕܶܝܢ ܐܰܝܟܰܢܳܐ ܒܳܗܠܺܝܼܢܰܢ ܘܬܳܩܢܺܝܼܢܰܢ ܟܰܕ ܪܶܥܝܳܢܳܐ ܘܕܽܘܼܒܳܪܳܐ ܕܺܝܼܠܝ ܘܕܺܝܼܠܳܟ ܠܐ ܡܶܬܬܰܪܣܶܐ ܡܼܶܢ ܚܽܘܼܒܳܐ ܘܢܽܘܼܗܪܳܐ ܕܩܽܘܼܫܬܳܐ ܟܶܐܡܰܬ ܫܪܳܪܳܐ ܪܰܒܳܐ؟

ܕܩܽܘܼܫܬܳܐ ܡܿܰܢ ܐܰܩܢܰܐ ܗ̱ܘ ܚܰܬܺܝܼܬܳܐ ܘܟܰܝܠܳܐ ܗ̱ܘ ܬܪܺܝܼܨܳܐ ܕܟܽܠܗܽܘܿܢ ܙܢ̈ܰܝ ܨܰܘ̈ܒܶܐ ܘܰܚܢܳܝ̈ܶܐ ܘܪ̈ܶܥܝܳܢܶܐ ܘܕܽܘܼܒܳܪ̈ܶܐ.

ܐܳܡܰܪ ܒܫܰܪܒܳܐ ܗܳܢܳܐ ܩܰܕܺܝܼܫܳܐ ܡܳܪܝ ܐܰܦܪܶܝܡ ܣܘܼܪܝܳܝܳܐ (306-373): «ܠܳܐ ܗ̱ܘܳܐ ܓܶܝܪ ܟܽܠܡܶܕܶܡ ܕܚܰܟܺܝܼܡ ܗ̇ܘ ܗ̱ܘܼ ܫܰܪܺܝܼܪ. ܐܶܠܳܐ ܡܶܕܶܡ ܕܫܰܪܺܝܼܪ ܗ̇ܘ ܗ̱ܘܼ ܚܰܟܺܝܼܡ. ܘܠܳܐ ܗ̱ܘܳܐ ܡܶܕܶܡ ܕܡܶܬܕܪܶܫ ܗ̇ܰܘ ܗ̱ܘܼ ܥܰܡܺܝܼܩ. ܐܶܠܳܐ ܡܶܕܶܡ ܕܡܶܬܐܶܡܰܪ ܡܼܶܢ ܐܠܗܳܐ ܟܰܕ ܢܶܬܗܰܝܡܰܢ ܗ̇ܰܘ ܗ̱ܘܼ ܩܰܛܺܝܼܢ.»

ܘܥܳܢܶܐ ܘܡܦܰܢܶܐ ܩܰܕܺܝܼܫܳܐ ܡܳܪܝ ܐܺܝܼܣܚܳܩ ܕܐܰܢܛܝܽܘܿܟ ( + 491) : «ܡܳܐ ܕܰܫܠܺܝ ܫܶܥܝܳܐ ܣܪܺܝܩܳܐ. ܘܰܦܛܰܪ ܘܟܶܢܫ̈ܶܐ ܐܶܬܦܰܪܣܺܝܘ. ܕܫܳܠܚܺܝܢ ܫܳܕܶܝܢ ܦܰܪ̈ܨܽܘܦܶܐ. ܫܐܺܝ̈ܠܶܐ ܕܰܠܒܶܫܘ ܠܰܚܙܳܬܳܐ. ܗܳܟܰܢ ܒܥܳܠܡܳܐ ܫܰܪܺܝܪܳܐ. ܫܳܠܚܺܝܢ ܐ̱ܢܳܫ̈ܳܐ ܠܰܫܡܳܗ̈ܶܐ. ܘܡܶܬܓܠܶܝܢ ܥܒܴ̈ܕܶܐ ܚܰܬܺܝ̈ܬܶܐ. ܙܺܐܦܳܢ̈ܶܐ ܐܳܦ ܫܰܪܺܝܪ̈ܶܐ. ܐܰܝܢܳܐ ܕܺܐܝܬܰܘܗܝ ܕܰܢܚܳܫܳܐ ܘܰܩܪܺܝܡ ܕܰܗܒܳܐ ܠܒܰܪ ܡܶܢܶܗ. ܡܛܰܠܩܳܐ ܢܽܘܪܳܐ ܬܰܚܦܺܝܬܶܗ. ܘܰܡܚܰܘܝܳܐ ܠܶܗ ܐܰܝܟ ܕܺܐܝܬܰܘܗܝ.»

ܦܽܘܼܫܳܩܳܐ:

ܐܰܩܢܳܐ: ܟܺܐܦܳܐ ܗ̱ܝ ܕܡܳܫܚܺܝܼܢ ܘܡܰܥܠܺܝܼܢ ܠܳܗܿ ܠܢܽܘܼܪܳܐ ܘܒܳܚܪܺܝܼܢ ܒܳܗܿ ܕܰܗܒܳܐ ܪܺܝܼܫܳܝܳܐ ܘܫܰܦܺܝܼܪܳܐ ܡܼܶܢ ܙܺܐܦܳܢܳܐ ܘܰܫܟܺܝܼܪܳܐ. معيار او حجر المحك. Mihenk Taşı / Touchstone

ܩܶܪܝܳܢܳܐ ܘܗܶܕܣܳܐ ܒܰܣܺܝܼܡܳܐ ܠܟܽܠ.

ܝܘܣܦ ܒܓܬܫ

ܚܘܕܪܐ ܕܡܪܕܘܬܐ ܘܫܦܪܝܘܬܐ ܕܠܫܢܐ ܣܘܪܝܝܐ. ܡܪܕܝܢ

ܡܰܪܕܽܘܼܬܳܐ

ܡܰܪܕܽܘܼܬܳܐ

ܠܶܫܳܢܳܐܝܼܬ ܡܿܰܢ ܒܰܪܬ ܩܳܠ «ܡܰܪܕܽܘܼܬܳܐ» ܩܰܢܝܳܐ ܣܽܘܿܟܳܠ ܡܗܰܕܝܳܢܽܘܼܬܳܐ ܘܰܡܫܰܒܠܳܢܽܘܼܬܐ ܘܰܡܚܰܟܿܡܳܢܽܘܼܬܳܐ ܘܡܶܬܝܰܠܦܳܢܽܘܼܬܳܐ ܒܰܫܒܺܝܼܠܐ ܘܬܰܪܒܺܝܼܬܳܐ ܘܬܰܪܕܺܝܼܬܳܐ[1] ܕܕܽܘܼܒܳܪ̈ܶܐ ܐܺܝܼܬܺܝܼ̈ܩܳܝܶܐ ܝܕܰܥܬܳܢܳܐܝܬ. ܘܰܡܣܳܡ ܒܪܺܝܼܫܳܐ ܕܡܶܬܦܪܰܥ ܩܶܨܰܬ ܣܰܟܠܽܘܼܬܳܐ ܘܰܣܪܺܝܼܚܽܘܼܬܳܐ. ܘܡܶܬܬܰܒܥܳܢܽܘܼܬܳܐ ܕܣܘܼܪܚܳܢܳܐ ܡܶܕܶܡ ܡܰܟܝܳܢܳܐ ܒܢܺܝܼܫ ܬܽܘܼܪܳܨܳܐ ܬܰܪܕܺܝܼܬܳܢܳܝܳܐ ܘܬܰܪܒܺܝܼܬܳܢܳܝܳܐ. ܒܰܕ ܣܽܘܼܟܳܠܳܐܝܼܬ ܡܶܬܝܰܒܠܐ ܡܼܶܢ ܡܶܠܰܬ «ܪܕܳܐ» ܗܿܳܝ ܕܝܳܗܒܳܐ ܣܽܘܼܟܳܠ: ܝܺܠܶܦ ܘܚܰܟܶܡ ܘܕܰܪܶܫ ܘܗܰܠܶܟ ܘܰܚܙܰܩ ܘܣܳܡ ܒܪܺܝܼܫܳܐ. ܘܐܶܙܰܠ ܒܳܬܰܪ ܡܶܕܶܡ ܐܰܘ ܐܶܬܕܰܡܺܝ ܒܡܶܕܶܡ. ܘܐܶܬܥܢܺܝܼ ܘܐܶܬܕܪܶܫ ܘܐܶܬܢܰܣܺܝܼ ܘܐܶܬܪܰܒܺܝܼ ܘܐܶܬܗܰܕܺܝܼ ܒܡܶܕܶܡ ܢܰܟܦܳܐܝܼܬ ܘܛܳܒܳܐܝܼܬ.

ܡܶܛܠܗܳܕܶܐ ܡܰܪܕܽܘܼܬܳܐ ܡܶܬܬܰܚܡܳܐ ܘܳܠܺܝܼܬܳܐ ܓܰܘܳܢܳܝܬܳܐ ܕܐܳܣܪܳܐ ܒܰܪܢܳܫܳܐ ܒܐܰܣܽܘܼܪܳܐ ܓܰܘܳܝܳܐ ܠܡܶܥܒܰܕ ܐܰܘ ܠܡܶܫܒܰܩ ܡܶܕܶܡ ܒܫܳܠܡܽܘܼܬܳܐ ܕܨܶܒܝܳܢܳܐ ܛܳܒܳܐ ܘܰܒܬܰܨܒܺܝܼ̈ܬܶܐ ܡܗܰܕ̈ܝܳܢܶܐ ܕܐܣܟܺܝܼ̈ܡܶܐ ܐܰܡ̈ܢܳܝܶܐ ܘܐܳܕ̈ܫܶܐ ܝܕܰܥ̈ܬܳܢܳܝܶܐ. ܘܩܰܢܝܳܐ ܚܰܝܠܳܐ ܥܳܒܽܘܿܕܳܐ ܒܰܚܙܽܘܼܩܝܳܐ ܕܩܽܘܼܝܳܡܳܐ ܘܗܽܘܼܒܳܒܳܐ ܐ̱ܢܳܫܳܝܳܐ. ܕܓܳܠܝܳܐ ܘܒܳܨܝܳܐ ܙܰܘ̈ܥܶܐ ܢܰܦܫܳܢ̈ܳܝܶܐ ܘܕܽܘܼܒܳܪ̈ܶܐ ܐ̱ܢܳܫ̈ܳܝܶܐ. ܘܦܳܠܚܳܐ ܐܰܪܥܳܐ ܕܗܰܘܢܳܐ ܠܡܶܥܫܰܦ ܡܶܢܶܗ ܠܙܺܝܼܙ̈ܢܶܐ ܘܨܳܪܝܳܐ ܐܰܪܥܳܐ ܕܠܶܒܳܐ ܠܡܶܫܩܰܠ ܡܶܢܶܗ ܠܣܽܘܼܪ̈ܚܳܢܶܐ. ܘܥܳܩܪܳܐ ܨܠܳܝ̈ܶܐ ܟܣ̈ܰܝܳܐ ܘܚܽܘܼ̈ܫܳܒܶܐ ܙܠܺܝܼ̈ܡܶܐ ܘܙܳܪܥܳܐ ܢܺܝܼ̈ܫܶܐ ܬܪ̈ܺܝܼܨܶܐ ܘܰܡܠܺܝܼ̈ܠܶܐ. ܘܠܰܝܬܶܝܗܿ ܒܰܠܚܽܘܿܕ ܡܶܬܝܰܠܦܳܢܽܘܼܬܳܐ ܘܩܰܢܳܝܽܘܼܬ ܝܕܰܥܬܳܐ ܘܙܰܘ̈ܥܶܐ ܛܳܒ̈ܶܐ. ܐܶܠܳܐ ܐܳܦ ܡܬܰܪܨܳܢܺܝܼܬܐ ܘܰܡܬܰܩܢܳܢܺܝܼܬܳܐ ܕܓܰܘ̈ܳܝܳܬܐ ܘܒܰܪ̈ܳܝܳܬܳܐ ܒܬܰܪܒܺܝܼܬܳܐ ܐܺܝܼܬܺܝܩܳܝܬܳܐ ܝܕܰܥܬܳܢܳܐܝܼܬ. ܘܰܓܠܽܘܼܠܽܘܼܬܳܐ[2] ܐܺܝܼܬܶܝܗܿ ܐܠܨܳܝܬܳܐ ܕܰܡܨܰܝܒܳܐ ܒܰܪܢܳܫܳܐ ܠܰܐܦ̈ܰܝ ܬܰܩܢܽܘܼܬܐ ܕܕܽܘܼܒܳܪ̈ܶܐ ܛܳܒ̈ܶܐ ܒܐܽܘܼܪܰܚ ܢܰܦܫܳܐ ܪܰܒܬܳܐ. ܘܒܰܓܠܺܝܼܙܽܘܼܬܳܗܿ ܡܶܫܬܰܘܫܺܝܼܢ ܡܶܨ̈ܥܳܝܶܐ ܘܰܒܚܰܣܺܝܼܪܽܘܼܬܳܗܿ ܡܶܬܡܰܚܠܺܝܼܢ ܫܒܺܝ̈ܠܐ ܡܣܰܝ̈ܥܳܢܶܐ. ܘܐܰܝܟܰܢܳܝܽܘܼܬܳܐ ܗܳܕܶܐ ܡܶܬܛܰܦܣܳܐ ܒܩܽܘܿܩܬܳܐ ܢܩܺܝܼܒܬܳܐ ܕܠܳܐ ܩܳܒܝܳܐ ܡܰܝ̈ܳܐ ܕܐܳܙܠܺܝܼܢ ܠܫܼܶܩܝܳܐ.

ܘܢܰܦܫܳܐ ܪܰܒܬܳܐ ܠܳܐ ܟܳܝܢܳܐ ܐܶܠܳܐ ܒܚܽܘܼ̈ܟܳܡܶܐ ܕܡܰܪܕܽܘܼܬܳܐ ܗܿܳܝ ܕܡܶܬܥܰܫܢܳܐ ܒܚܽܘܼܕܳܬܳܐ ܘܫܽܘܼܘܫܳܛܳܐ ܕܠܶܫܳܢܳܐ ܘܪܶܥܝܳܢܳܐ. ܘܫܽܘܼܘܫܳܛܳܗܿ ܡܰܘܪܶܒ ܫܘܳܬ: ܒܰܪܢܳܫܳܐ ܘܓܰܘܳܐ. ܘܫܽܘܼܘܚܳܪܳܗܿ ܡܰܘܠܶܕ ܬܒܺܝܼܪܽܘܼܬܳܐ ܒܚܰܘ̈ܩܶܐ ܕܦܽܘܼܪ̈ܢܳܣܶܐ ܐ̱ܢܳܫ̈ܳܝܶܐ. ܘܒܰܪܢܳܫܳܐ ܗܿܰܘ ܐܰܝܢܳܐ ܕܚܳܟܶܡ ܕܺܝܼܠܳܝ̈ܳܬܳܗܿ܆ ܡܶܬܚܫܶܒ ܝܰܠܕܳܗܿ ܘܰܡܝܰܒܠܳܢܳܗܿ. ܘܬܰܪܥܺܝܼܬܶܗ ܡܶܨܛܰܒܥܳܐ ܒܓܰܘ̈ܢܶܝܗܿ ܫܰܦܺܝܼܪ̈ܶܐ. ܡܶܟܳܐ ܛܳܒ ܡܰܘܬܪܳܢܝܳܐ ܕܢܶܬܝܰܕܥܽܘܿܢ ܓܰܘ̈ܢܶܐ ܪ̈ܶܥܝܳܢܳܝܶܐ ܕܡܰܪܕܽܘܼܬܰܢ ܗܿܳܝ ܕܕܳܡܝܳܐ ܠܪܰܕܳܝܬܳܐ ܫܰܦܺܝܼܪܰܬ ܬܽܘܼܩܳܢܳܐ. ܘܢܺܝܼܚܰܬ ܡܰܪܕܺܝܼܬܳܐ. ܐܶܠܳܐ ܚܢܰܢ ܒܰܪܓܶܠ ܐܰܘ ܚܶܦܝܳܐܝܼܬ ܪܳܕܶܝܢܢ ܟܰܪ ܕܚܳܐܝܢܰܢ: ܐܶܢ ܒܰܐܬܪܳܐ ܘܐܶܢ ܒܓܳܠܽܘܼܬܐ.

ܐܰܟܡܳܐ ܕܝܼܺܕܝܼܥܳܐ܆ ܣܦܺܝܼܩܽܘܼܬܳܐ ܐܝܼܺܬܽܘܼܬܳܢܳܝܬܳܐ ܘܣܽܘܼܟܳܠܳܝܬܳܐ ܩܒܺܝܼܥܳܐ ܒܰܒܪܺܝܼܬܳܐ ܕܒܰܪܢܳܫܳܐ. ܘܗܺܝܼ ܗܳܕܶܐ ܒܳܪܝܳܐ ܚܶܪܝܳܢܳܐ ܓܰܘܳܝܳܐ ܘܫܳܒܩܳܐ ܕܢܶܣܓܽܘܿܢ ܒܽܘܼ̈ܠܒܳܠܶܐ ܘܢܶܫܬܰܪܫܽܘܢ ܡܽܘܼ̈ܡܶܐ ܪ̈ܰܒܶܐ ܘܰܙܥܽܘܼܪ̈ܶܐ. ܘܠܰܝܬ ܡܶܕܶܡ ܕܗܳܟܰܢܳܐ ܥܰܙܺܝܼܙ ܘܰܫܚܺܝܼܩ ܐܰܝܟ ܚܶܪܝܳܢܳܐ ܓܰܘܳܝܳܐ ܕܗܳܘܶܐ ܩܶܨܰܬ ܣܦܺܝܼܩܽܘܼܬܳܐ ܗܳܕܶܐ ܕܠܳܐ ܡܶܬܡܰܠܝܳܐ ܒܨܰܘ̈ܒܶܐ ܘܙܰܘ̈ܚܶܐ ܒܰܪ̈ܳܝܶܐ ܐܶܠܳܐ ܒܙܰܘ̈ܥܶܐ ܘܩܰܘ̈ܡܶܐ ܕܣܽܘܼ̈ܟܳܠܐ ܡܩܰܘ̈ܝܳܢܶܐ. ܘܐܰܝܟ ܫܰܪܟܳܐ ܕܰܐ̱ܚܪ̈ܳܢܶܐ ܐܳܦ ܡܰܪܥܳܐ ܗܳܢܳܐ ܣܢܺܝܼܩ ܗ̱ܽܘ ܠܰܥܨܳܒܳܐ ܐܰܝܟܰܢܳܐ ܕܬܶܬܚܠܶܡ ܘܢܰܦܫܳܐ ܘܬܶܬܡܪܶܩ ܘܬܶܬܩܰܝܰܡ ܒܦܽܘܼܪ̈ܫܳܢܶܐ ܗܰܝܡܳܢܽܘܼ̈ܬܳܢܳܝܶܐ ܘܡܰܕ̈ܥܳܢܳܝܶܐ. ܒܪܰܡ ܠܳܐ ܕܳܥܶܟ ܚܶܪܝܳܢܳܐ ܗܳܢܳܐ ܐܶܠܳܐ ܕܢܶܬܢܰܗܪ̈ܳܢ ܚܶܫܽܘܼ̈ܟܳܬܳܐ ܚܘܼܽܫܳܒܳܝ̈ܳܬܳܐ ܒܨܶܡ̈ܚܶܐ ܡܰܪ̈ܕܽܘܼܬܳܢܳܝܶܐ. ܘܐܶܠܘܼܠܐ ܚܰܝܠܐ ܕܢܽܘܼܗܪܳܐ ܗܳܢܳܐ܆ ܠܳܐ ܡܳܐܢܳܐ ܠܶܗ ܒܰܪܢܳܫܳܐ ܡܼܶܢ ܗܿܰܘ ܡܳܐ ܕܙܳܕܩ ܕܢܶܬܒܛܶܠ ܠܶܗ ܥܠܰܘܗܝ. ܘܐܳܦܠܐ ܡܶܬܬܙܺܝܼܥ ܒܦܽܘܼܪ̈ܣܶܐ ܐܽܘܼܟ̈ܦܳܢܳܝܶܐ ܕܐܳܙܠܺܝܼܢ ܠܫܽܘܼܡܠܳܝܳܐ.

ܦܰܓܪܳܐ ܡܿܰܢ ܫܳܡܶܢ ܒܬܽܘܼܪ̈ܣܳܝܶܐ ܠܰܚ̈ܡܳܢܳܝܶܐ ܐܶܠܐ ܢܰܦܫܳܐ ܒܗܿܢܽܘܿܢ ܡܶܠܬܳܢ̈ܳܝܶܐ. ܡܶܛܽܠܗܳܕܶܐ ܐܰܡܺܝܼܪܳܐ ܗܿܳܝ ܕܐܰܡܺܝܼܪܳܐ: «ܕܠܐ ܗ̱ܘܳܐ ܒܠܰܚܡܳܐ ܒܰܠܚܽܘܿܕ ܚܳܝܶܐ ܒܰܪܢܳܫܳܐ. ܐܶܠܳܐ ܒܟܽܠ ܡܶܠܳܐ ܕܢܳܦܩܳܐ ܡܼܶܢ ܦܽܘܼܡܶܗ ܕܰܐܠܗܳܐ» (ܡܬܝ 4: 4). ܘܡܶܠܬܳܐ ܬܢܳܢ ܡܫܰܘܕܥܳܐ ܣܽܘܼ̈ܢܩܳܢܶܐ ܕܥܳܠܡܳܐ ܣܽܘܼܟܳܠܳܝܳܐ «ܕܪܽܘܼܚܳܐ». ܘܠܰܚܡܳܐ ܣܽܘܼ̈ܢܩܳܢܶܐ ܕܥܳܠܡܳܐ ܗܽܘܼܠܳܢܳܝܳܐ «ܕܦܰܓܪܳܐ». ܘܠܳܐ ܓܳܡܪܳܐ ܛܽܘܼܒܬܳܢܳܝܽܘܼܬܳܐ ܕܒܰܪܢܳܫܳܐ ܐܶܠܳܐ ܒܝܰܕ ܫܰܘܝܽܘܼܬ ܬܰܪܣܺܝܼܬܳܐ ܘܬܰܪܒܺܝܼܬܐ ܕܰܬܪ̈ܰܝܗܘܢ ܥܳܠܡ̈ܶܐ. ܒܕ ܒܰܪܢܳܫܳܐ ܐܺܝܼܬܝܰܐ ܗ̱ܘ ܪܽܘܼܚܳܢܝܳܐ ܘܒܶܣܪܳܢܳܝܳܐ ܕܡܶܬܟܰܝܰܢ ܡܼܶܢ ܥܳܠܡܳܐ ܒܰܪܳܝܳܐ ܕܦܰܓܪܳܐ ܘܗܽܘܼ̈ܠܳܢܳܝܳܬܐ. ܘܡܼܶܢ ܥܳܠܡܳܐ ܓܰܘܳܝܳܐ ܕܪܽܘܼܚܳܐ ܘܣܽܘܼܟ̈ܠܳܝܳܬܳܐ. ܘܐ̱ܢܳܫܽܘܼܬܶܗ ܠܳܐ ܨܳܡܚܳܐ ܐܶܠܳܐ ܒܬܽܘܼܩܳܢܳܐ ܫܰܘܝܳܐ ܕܰܬܪ̈ܰܝܗܽܘܿܢ ܥܳܠܡ̈ܶܐ ܒܝܰܕ ܚܽܘܼ̈ܟܳܡܶܐ ܕܪܽܘܼܚܳܐ. ܘܐܰܟܡܳܐ ܕܡܶܬܬܡܺܝܼܫܳܐ܆ ܪܳܘܶܙ ܘܕܳܐܶܨ ܒܰܪܢܳܫܳܐ ܒܰܫܟܳܚܬܳܐ ܕܫܽܘܼܦܪܳܐ ܒܰܪܳܝܳܐ܆ ܒܪܰܡ ܐܰܝܟ ܕܒܣܽܘܿܓܳܐܐ ܡܰܗܡܰܝ ܫܽܘܼܦܪܳܐ ܓܰܘܳܝܳܐ. ܘܠܰܝܬ ܨܶܦܬܳܐ ܠܰܫܟܳܚܬܶܗ ܐܰܝܟ ܕܙܳܕܩܳܐ. ܡܶܟܳܐ ܠܳܐ ܡܶܫܬܰܟܚܳܐ ܢܰܦܫܳܐ ܪܰܒܬܳܐ ܒܰܝܢܳܬ ܒܠܺܝܼܠܽܘܼܬܳܐ ܓܰܘܳܝܬܳܐ «ܕܰܩܪܺܝܼܡܳܐ ܒܗܶܕܝܽܘܼܛܽܘܼܬܐ ܘܐܶܢܳܢܳܝܽܘܼܬܐ ܘܣܶܢܶܐܬܳܐ ܘܚܰܣܳܡܽܘܼܬܐ ܘܐܰܟܬܳܐ ܘܪܳܡܽܘܼܬܳܐ ܘܝܰܥܢܽܘܼܬܳܐ ܘܠܰܥܒܽܘܼܬܳܐ ܘܪܶܓܬܳܐ ܘܚܶܡܬܳܐ». ܘܟܰܕ ܠܳܐ ܡܶܬܛܰܟܣܳܐ ܒܠܺܝܼܠܽܘܼܬܳܐ ܗܳܕܶܐ܆ ܠܳܐ ܢܳܨܚܺܝܼܢ ܚܽܘܒܳܐ ܘܰܚܢܳܢܳܐ ܘܚܰܘܣܳܢܳܐ. ܘܡܶܟܳܐ ܣܳܓܶܝܢ ܡܽܘܼ̈ܡܶܐ ܘܒܽܘܼܨܳܪ̈ܶܐ ܘܥܳܫܢܳܐ ܫܚܺܝܼܡܽܘܼܬܳܐ ܘܰܚܓܺܝܼܪܽܘܼܬܳܐ. ܘܗܳܝܕܶܝܟ ܠܳܐ ܡܰܨܝܳܐ ܕܢܶܬܓܕܶܡ ܘܢܶܬܦܠܶܩ ܚܰܝܠܳܐ ܩܰܫܝܳܐ ܕܚܰܫ̈ܶܐ ܓܰܘܳܝ̈ܶܐ ܩܳܛ̈ܠܰܝ ܢܰܦܫܳܐ ܪܰܒܬܳܐ. ܐܰܝܟ ܕܐܰܡܺܝܼܪܳܐ: «ܠܰܝܬ ܡܶܕܶܡ ܕܰܠܒܰܪ ܡܼܶܢ ܒܰܪܢܳܫܰܐ ܗ̱ܘ. ܘܥܳܐܶܠ ܠܶܗ ܕܡܶܫܟܰܚ ܡܣܰܝܶܒ ܠܶܗ. ܐܶܠܐ ܡܶܕܶܡ ܕܢܳܦܶܩ ܡܶܢܶܗ ܗܿܰܘ ܗ̱ܽܘܼ ܡܣܰܝܶܒ ܠܒܰܪܢܳܫܳܐ» (ܡܪܩܘܣ 7: 15).

ܘܣܳܟܳܐ ܠܡܺܐܡܰܪ: ܩܘܼܒܳܠܛܰܝܒܘܼ ܦܳܪܰܥ ܐ̱ܢܳܐ ܠܡܳܪܝܳܐ ܕܢܳܦܰܚ ܚܰܝܠܐ ܒܰܡܚ̈ܺܝܼܠܶܐ ܘܰܒܨܺܝܼܪ̈ܶܐ. ܘܪܰܒܰܬ ܡܰܘܕܶܐ ܐ̱ܢܳܐ ܠܛܳܒܽܘܼܬ ܬܰܪܥܺܝܼܬܳܐ ܕܡܶܣ̈ܬܰܟܠܳܢܶܐ ܘܰܡܚܰܦ̈ܛܳܢܐ ܘܡܣܰܝ̈ܥܳܢܐ. ܘܡܰܘܕܰܥ ܐ̱ܢܳܐ ܕܠܰܡ ܒܳܣܡܳܐ ܪܽܘܼܚܝ ܐܶܢ ܣܝܳܡܳܐ ܗܳܢܳܐ ܐܳܦܶܢ ܒܰܙܥܽܘܿܪ ܢܺܐܙܰܠ ܠܡܶܣܬܰܟܠܳܢܽܘܬܳܐ ܕܡܰܪܕܽܘܼܬܐ ܘܢܰܘܬܰܪ ܠܛܳܒܬܳܐ ܕܢܰܦܫ̈ܳܬܳܐ. ܘܐܶܢ ܫܶܪܰܬ܆ ܚܳܫܶܒ ܐܢܐ ܗܳܕܶܐ ܐܰܝܟ ܐܰܓܪܳܐ ܪܰܒܳܐ ܠܥܰܡ̈ܠܰܝ ܣܳܦܪ̈ܳܝܶܐ ܘܦܽܘܼܪܥܳܢܳܐ ܠܫܰܗܪ̈ܰܝ ܬܰܘ̈ܓܳܢܳܝܶܐ. ܥܰܡ ܐܺܝܼܩܳܪ̈ܰܝ ܟܢܺܝܼ̈ܟܶܐ.

ܘܚܰܕܘܳܐ ܦܨܺܝܼܚܳܐ ܘܚܰܝ̈ܐ ܒܰܣܺܝܼ̈ܡܶܐ ܠܟܽܠ.

ܝܰܘܣܶܦ ܒܶܓܬܰܫ

ܚܘܕܪܐ ܕܡܪܕܘܬܐ ܘܣܦܪܝܘܬܐ ܕܠܫܢܐ ܣܘܪܝܝܐ. ܡܪܕܝܢ

 [1]  ܬܰܪܕܺܝܼܬܳܐ: ܚܫܰܠܬܗܿ ܠܡܶܬܰܠ ܣܽܘܼܟܳܠ  Disiplin / Discipline

[2]  ܓܠܽܘܼܠܽܘܼܬܳܐ   Pusula / Compass

ܩܶܪܝܳܢܳܐ ܫܰܪܺܝܼܪܳܐ

ܩܶܪܝܳܢܳܐ ܫܰܪܺܝܼܪܳܐ

ܩܶܪܝܳܢܳܐ ܫܰܪܺܝܼܪܳܐ ܗܿܰܘ ܗ̱ܽܘܼ ܕܕܳܚܶܩ ܠܰܚܙܽܘܼܩܝܳܐ ܓܰܘܳܝܳܐ ܘܰܡܒܰܕܰܪ ܚܽܘܼ̈ܫܳܒܶܐ ܒܺܝܼ̈ܫܶܐ ܒܰܢܗܘܿܪ ܒܽܘܼܝܳܢܳܐ ܥܰܡܺܝܼܩܳܐ ܘܰܪܘܺܝܼܚܳܐ ܒܺܝܕܰܥܬܳܐ ܚܕܰܬܳܐ.

ܐܰܪܰܐ ܡܰܨܝܳܐ ܟܰܝ ܕܢܺܐܪܰܒ ܘܢܶܪܘܰܚ ܘܢܶܥܡܰܩ ܒܽܘܼܝܳܢܳܐ ܒܶܠܥܰܕ ܩܶܪܝܳܢܳܐ ܫܰܪܺܝܼܪܳܐ ܘܝܕܰܥܬܳܐ ܬܪܺܝܼܨܬܳܐ ؟

ܐܰܪܰܐ ܐܺܝܼܬ ܠܰܢ ܨܶܦܬܳܐ ܒܰܒܥܳܬܐ ܗܳܕܶܐ؟

ܐܰܪܰܐ ܒܳܥܶܝܢܰܢ ܩܶܪܝܳܢܳܐ ܫܰܪܺܝܼܪܳܐ ܕܢܳܩܶܠ ܐܽܘܼܪܰܚ ܡܶܣܬܰܟܠܳܢܽܘܼܬܳܐ؟

ܐܰܪܳܐ ܝܳܕܥܺܝܼܢܰܢ ܕܩܶܪܝܳܢܳܐ ܫܰܪܺܝܼܪܳܐ ܠܳܐ ܡܶܫܬܰܡܠܶܐ ܒܰܩܦܳܣܳܐ ܘܰܚܡܳܠܐ  ܕܺܝܕܰܥܬܳܐ ܒܰܠܚܽܘܿܕ؟

 ܐܰܪܰܐ ܨܳܒܶܝܢܰܢ ܕܢܶܦܽܘܼܩ ܡܼܶܢ ܩܶܠܳܝܬܳܐ ܕܨܰܘܬܰܢ ܘܢܶܗܦܽܘܟ ܠܢܰܦܫܰܢ ܫܰܪܺܝܼܪܬܳܐ ܐܰܝܟܰܢܳܐ ܕܢܶܬܦܠܰܚ ܘܢܶܬܬܰܫܩܶܐ ܘܢܶܣܬܰܝܒܰܪ ܘܢܶܬܥܰܡܰܩ ܘܢܶܫܬܰܓܢܶܐ ܘܢܶܫܬܰܟܠܰܠ ܒܰܪܢܳܫܰܢ ܓܰܘܳܝܳܐ ܒܺܝܼܕܰܥܬܳܐ ܗܿܳܝ ܕܩܳܦܶܠ ܘܡܳܐܶܨ ܘܡܳܬܶܩ ܡܼܶܢ ܩܶܪܝܳܢܳܐ ܫܰܪܺܝܼܪܳܐ…؟

ܐܰܪܰܐ ܟܡܳܐ ܙܰܒܢ̈ܺܝܼܢ ܫܬܶܩܢܰܢ ܒܶܝܬ ܠܰܢ ܘܰܠܢܰܦܫܰܢ ܒܫܶܡܥܳܐ ܕܩܳܠ ܫܪܳܪܳܐ ܘܩܽܘܼܫܬܳܐ ܒܰܝܢܳܬ ܚܰܘ̈ܩܶܐ ܕܣܶܦܪ̈ܶܐ ܘܰܟ̈ܬܳܒܶܐ؟

ܐܰܪܰܐ ܟܡܳܐ ܙܰܒܢܺܝܼ̈ܢ ܦܰܢܺܝܼܢܰܢ ܘܐܶܡܰܪܢܰܢ «ܠܳܐ ܝܳܕܥܺܝܼܢܰܢ» ܢܰܨܺܝܼܚܳܐܝܼܬ ܒܶܠܥܰܕ ܒܶܗܬܬܳܐ ܘܟܽܘܼܚܳܕܳܐ؟

ܘܚܰܫܺܝܼܫ ܐ̱ܢܳܐ ܠܡܺܐܡܰܪ: ܒܰܨܒܽܘܼܬܳܐ ܗܳܕܶܐ ܡܰܪܫܽܘܼܬܳܐ ܪܰܒܬܳܐ ܨܳܝܒܳܐ ܘܩܳܝܡܳܐ ܠܘܳܬܰܢ.

ܒܰܕ ܩܶܪܝܳܢܳܐ ܫܰܪܝܼܪܳܐ ܠܰܝܬܰܘܗܝ ܐܰܩܡܳܐ ܐܰܘ ܕܰܪܓܳܐ ܪܰܒܳܐ. ܐܶܠܳܐ ܨܰܘܬܳܐ ܓܰܘܳܝܳܐ ܕܙܳܐܶܡ ܒܗܳܠܶܝܢ ܕܰܡܫܰܐܠܽܘܼܬܳܐ ܘܰܒܛܺܝܼܠܽܘܼܬܳܐ ܕܒܰܪܢܳܫܳܐ.

ܐܰܪܳܐ ܫܟܺܝܼܚ ܗ̱ܽܘܼ ܥܰܠ ܐܰܦ̈ܰܝ ܐܰܪܥܳܐ ܕܰܪܓܳܐ ܡܶܕܶܡ ܐܰܘ ܕܰܪܓܳܝܳܐ ܐ̱ܢܳܫ ܕܠܳܐ ܣܢܺܝܼܩ ܠܨܰܘܬܳܐ ܕܰܚܙܽܘܼܩܝܳܐ ܗܳܢܳܐ…؟

ܐܰܪܰܐ ܐܰܝܟܰܢ ܡܶܫܬܰܡܠܶܝܢ ܒܽܘܼܨܳܪ̈ܶܐ ܘܐܰܝܟܰܢ ܡܶܬܚܰܝܕܺܝܼܢ ܦܽܘܼ̈ܠܳܓܶܐ ܘܐܰܝܟܰܢ ܡܶܬܬܚܺܝܼܛܺܝܼܢ ܣܶܕ̈ܩܶܐ ܪ̈ܶܥܝܳܢܳܝܶܐ ܕܗܿܰܘ ܐܰܝܢܳܐ ܕܠܳܐ ܢܳܦܶܩ ܨܶܒܝܳܢܳܐܝܼܬ ܠܰܚܙܽܘܼܩܝܳܐ ܗܳܢܳܐ؟

ܐܰܪܰܐ ܣܳܦܩܳܐ ܕܢܶܩܢܶܐ ܫܶܡ ܡܦܰܪܢܣܳܢܳܐ … ܡܕܰܒܪܳܢܳܐ… ܘܡܰܠܦܳܢܳܐ…

ܟܰܕ ܚܢܰܢ ܠܰܝܬ ܠܰܢ ܢܰܚ̈ܬܶܐ ܕܝܕܰܥܬܳܐ ܘܐܳܦܠܳܐ ܡܦܳܣܺܝܼܢܰܢ ܒܣܽܘܼܟܳܠܳܐ ܪܰܒܳܐ ܕܡܰܠܳܚܽܘܼܬܳܐ ܘܡܳܠܽܘܿܟܽܘܼܬܳܐ ܕܬܶܫܡܶܫܬܰܢ: ܬܶܐܓܽܘܼܪܬܳܢܳܝܬܳܐ ܘܐܰܡܢܳܝܬܳܐ ܘܣܶܦܪܳܝܬܳܐ ܘܰܟܢܽܘܼܫܝܳܝܬܳܐ ܘܦܽܘܿܠܺܝܼܛܺܝܩܳܝܬܳܐ ܘܥܺܕܬܳܢܳܝܬܳܐ ܘܰܡܕܺܝܼܢܳܝܬܳܐ؟

ܦܰܐܝܳܐ ܕܢܶܕܰܥ: ܩܶܪܝܳܢܳܐ ܫܰܪܺܝܼܪܳܐ ܠܳܐ ܚܳܢܶܐ ܠܢܺܝܼܫܳܐ ܐܶܠܳܐ ܒܡܶܣܬܰܟܠܳܢܽܘܼܬܳܐ ܗܿܳܝ ܕܪܳܚܩܳܐ ܡܼܶܢ ܕܽܘܼܒܳܪ̈ܰܝ ܫܽܘܼܥܠܳܝܳܐ. ܕܐܰܝܟ ܫܽܘܼܦܰܪܕܺܝܼܩܽܘܼܬܳܐ ܘܫܰܦܽܘܼܪܬܳܢܽܘܼܬܳܐ ܘܡܶܬܚܙܰܘܙܝܳܢܽܘܼܬܳܐ ܘܰܣܛܰܪ…

ܘܡܶܬܥܰܪܩܰܠ ܒܰܙܒܰܢ ܩܳܪܽܘܿܝܳܐ ܕܦܽܘܼܪܫܳܢܳܐ ܘܡܶܬܕܒܶܩ ܒܛܶܟܢܳܐ ܐܰܘ ܦܶܬܓܳܡܳܐ ܡܶܕܶܡ ܕܢܳܬܶܦ ܡܰܕܥܳܐ. ܘܰܡܙܺܝܼܥ ܘܢܳܦܶܨ ܡܰܚܫܰܒܬܳܐ. ܘܰܟܡܳܐ ܕܡܶܬܬܙܺܝܼܥ ܘܡܶܬܢܰܦܰܨ ܝܰܬܝܪ ܫܳܠܶܐ ܘܫܳܟܶܬ ܘܒܳܗܶܠ ܘܫܳܬܶܩ ܩܳܪܽܘܿܝܳܐ ܕܦܽܘܼܪܫܳܢܳܐ. ܒܰܕ ܡܶܢܗܽܘܿܢ ܕܣܽܘܼ̈ܟܳܠܐ ܐܰܘ ܟܬܳܒ̈ܐ ܝܰܬܺܝܼܪ ܡܼܶܢ ܡܰܡܠܠܳܐ ܓܳܪܦܺܝܢ ܠܫܶܬܩܳܐ. ܘܕܳܚܩܺܝܼܢ ܠܗܶܕܣܳܐ ܥܰܡܺܝܼܩܳܐ. ܘܡܶܢܗܽܘܿܢ ܕܣܶܪ̈ܛܶܐ ܘܦܶܬܓ̈ܳܡܶܐ ܘܚܰܘ̈ܩܶܐ ܡܥܰܙܙܺܝܼܢ ܘܰܡܠܰܒܒܺܝܼܢ ܘܡܳܠܶܝܢ ܠܶܒܳܐ ܘܥܰܝܢܳܐ ܕܡܰܚܫܰܒܬܳܐ. ܒܪܰܡ ܣܽܘܼܓܐܳܐ ܕܙܰܒܢ̈ܺܝܼܢ ܐܰܝܟ ܕܰܠܨܶܒܬܳܐ ܡܪܰܥܝܳܢܳܐ ܘܡܶܐܚܰܕ ܥܰܝܢܳܐ ܡܶܬܬܣܺܝܼܡܺܝܼܢ ܘܡܶܣܬܰܕܪܺܝܼܢ ܣܶܦܪ̈ܶܐ ܘܰܟ̈ܬܒܶܐ ܒܪ̈ܰܦܶܐ ܕܦܰܪ̈ܕܺܝܼܣܩܶܐ.

ܒܰܕ ܛܰܥܝܳܐ ܘܐܰܒܺܝܼܕܳܐ ܗܿܳܝ ܕܐܳܡܪܳܐ: ܩܶܪܝܳܢܳܐ ܫܰܪܺܝܼܪܳܐ ܠܰܝܬܰܘܗܝ ܐܶܠܳܐ ܫܰܗܪܳܐ ܕܡܶܫܬܰܡܠܶܐ ܒܥܽܘܼܙܳܝܳܐ ܕܫܶܬܩܳܐ ܘܚܽܘܼܡܣܳܢܳܐ ܕܬܰܡܺܝܼܡܽܘܼܬܳܐ ܘܰܬܪܺܝܼܨܽܘܼܬܳܐ ܘܡܰܟܺܝܼܟܽܘܼܬܳܐ ܡܶܛܽܠ ܬܰܩܢܽܘܼܬ ܣܽܘܟܳܠܐ ܘܝܕܰܥܬܳܐ ܕܽܘܼܒܳܪܳܝܬܳܐ.

ܐܰܪܰܐ ܟܡܳܐ ܣܶܦܪ̈ܶܐ ܦܰܠܺܝܼܢܰܢ ܐܰܝܟܰܢܳܐ ܕܢܶܦܨܽܘܢ ܡܼܶܢܰܢ ܐܰܒܩܳܐ ܕܡܰܗܡܝܳܢܽܘܼܬܳܐ ܘܝܽܘܼܩܪܳܐ ܕܡܰܕܫܳܢܽܘܼܬܐ؟

ܘܐܰܪܰܐ ܟܡܳܐ ܟܬܳܒ̈ܶܐ ܩܪܰܝܢܰܢ ܒܢܺܝܼܫ ܫܽܘܼܚܠܳܦܳܐ ܘܬܽܘܼܪܳܨܳܐ ܘܬܽܘܼܩܳܢܳܐ ܘܫܽܘܼܓܢܳܝܳܐ ܕܒܰܪܢܳܫܰܢ ܓܰܘܳܝܳܐ؟

ܠܰܝܬ ܐ̱ܢܳܫ ܕܰܡܢܰܟܪܰܝ ܡܼܶܢ ܨܰܘܪ̈ܳܢܶܐ. ܘܠܰܝܬ ܒܽܘܼܝܳܢܳܐ ܕܠܐ ܚܰܣܺܝܼܪ ܘܰܒܨܺܝܼܪ.

ܐܰܪܰܐ ܠܒܰܪ ܡܼܶܢ ܓܺܝܓܠܳܐ ܗܳܕܶܐ ܐܺܝܼܬܰܝܢ ܚܢܰܢ ܗܿܳܢܽܘܢ ܕܛܳܥܢܺܝܼܢܢ ܕܰܪܓܳܐ ܘܐܺܝܼܩܳܪܳܐ ܒܰܝܢܳܬ ܓܰܘܳܐ؟

 ܐܰܪܰܐ ܒܶܠܥܳܕ ܡܽܘܼ̈ܡܶܐ ܒܽܘܼܨܳܪ̈ܶܐ ܚܳܫܒܺܝܼܢܰܢ ܢܰܦܫܰܢ؟

ܘܶܐܢ ܠܳܐ܆ ܐܰܪܰܐ ܟܡܳܐ ܘܰܪ̈ܩܶܐ ܘܰܟܡܳܐ ܕܰܦ̈ܶܐ ܕܰܚܩܽܘܿܢ ܠܣܽܘܼܩܒܳܠܐ ܘܓܽܘܼܢܳܝܳܐ ܝܳܬܳܢܳܝܳܐ ܘܩܽܘܼܒܳܠܐ ܡܰܟܺܝܼܟܳܐ ܕܡܰܘܕܶܐ ܒܒܽܘܼܨܳܪ̈ܐ ܘܡܽܘܼ̈ܡܶܐ ܡܶܛܽܠ ܒܰܩܝܽܘܼܬܳܐ ܬܺܐܪܬܳܢܳܝܬܳܐ ܘܫܽܘܼܘܫܳܛܳܐ ܦܰܪܨܽܘܼܦܳܝܳܐ ܘܓܰܘܳܢܳܝܳܐ؟

ܐܰܪܰܐ ܟܡܳܐ ܟܬܳܒ̈ܶܐ ܓܫܰܦܘ ܒܬܰܪܥܺܝܼܬܰܢ ܟܰܕ ܓܳܪܦܺܝܼܢ ܠܰܢ ܠܫܶܬܩܳܐ ܒܰܣܺܝܼܡܳܐ ܕܡܶܬܒܰܩܝܳܢܘܼܬܳܐ ܪܽܘܼܚܳܢܳܝܬܳܐ؟

ܗܳܢܰܘ ܟܰܝܠܳܐ ܩܰܕܡܳܝܳܐ ܘܡܰܬܩܳܠܐ ܪܺܝܼܫܳܝܳܐ ܕܩܶܪܝܳܢܳܐ ܘܣܽܘܼܟܳܠܳܐ ܫܰܪܺܝܼܪܳܐ. ܗܳܢܳܐ ܕܕܳܚܶܩ ܘܪܳܕܶܦ ܠܫܽܘܼܥܠܳܝܳܐ ܘܡܰܫܩܶܐ ܘܡܰܘܪܶܒ ܠܫܽܘܼܡܠܳܝܳܐ ܒܬܰܨܒܺܝ̈ܬܶܐ ܕܬܰܪܥܺܝܼܬܳܐ ܡܰܟܺܝܼܟܬܳܐ. ܒܰܕ ܟܡܳܐ ܕܩܳܪܶܐ ܘܰܟܡܳܐ ܕܝܳܠܶܦ ܒܰܪܢܳܫܳܐ ܠܐ ܚܳܟܶܡ ܐܶܠܳܐ ܠܗܳܝ «ܕܠܳܐ ܝܳܕܰܥ ܡܶܕܶܡ.»

ܘܟܽܠܡܰܢ ܕܡܶܬܬܠܺܝܼܫ ܘܚܳܡܰܥ ܒܰܚܡܺܝܼܪܳܐ ܕܫܪܳܪܳܐ ܗܳܢܳܐ܆ ܠܳܐ ܡܶܬܪܰܘܪܒ ܘܐܳܦܠܐ ܡܶܫܬܰܥܠܐ. ܒܰܕ ܡܦܳܣ ܕܟܽܠܡܶܕܶܡ ܕܺܝܼܗܺܝܼܒ ܠܶܗ (ܝܕܰܥܬܳܐ ܘܕܰܪܓܳܐ ܘܡܳܡܽܘܼܢܳܐ ܘܰܣܛܰܪ) ܠܰܝܬܰܘܗܝ ܐܶܠܳܐ ܓܽܘܼܥܠܳܢܳܐ ܕܒܶܗ ܢܺܚܶܐ ܘܢܰܚܶܐ ܠܐܚܪ̈ܳܢܶܐ ܚܶܟܼܡܳܬܢܳܐܝܼܬ ܡܶܛܽܠ ܩܽܘܼܝܳܡܳܐ ܘܬܽܘܼܩܳܢܳܐ.  

ܗܿܝ ܓܝܪ ܕܠܳܐ ܢܶܕܰܥ ܒܰܪܢܳܫܳܐ ܟܝܳܢܳܝܬܳܐ ܗ̱ܳܝ. ܒܪܰܡ ܡܶܣܬܟܰܪ ܬܪܰܥ ܝܕܰܥܬܳܐ ܟܰܕ ܠܳܐ ܥܳܡܶܩ ܘܰܡܟܰܬܰܪ ܒܰܪܢܳܫܳܐ ܒܦܰܘܫܳܐ ܕܛܰܝܽܘܼܦܽܘܼܬܐ.

ܠܳܐ ܡܶܣܬܰܟܠܳܢܽܘܼܬܳܐ ܡܿܰܢ ܠܰܝܬܶܝܗܿ ܒܨܺܝܪܽܘܼܬܳܐ. ܒܪܰܡ ܡܰܛܥܝܳܢܽܘܼܬܐ ܘܰܡܫܰܕܠܳܢܽܘܼܬܳܐ ܡܶܬܚܫܶܒ ܗܽܘܼܦܳܟܳܐ ܕܒܰܪܢܳܫܳܐ ܗܿܰܘ ܐܰܝܢܳܐ ܕܐܶܣܟܺܡܬܳܢܳܐܝܼܬ ܡܶܬܗܰܦܰܟ ܐܰܝܟ ܡܶܣܬܰܟܠܳܢܳܐ..

ܡܶܟܐ ܚܰܩܠܳܐ ܣܢܺܝܼܩܳܐ ܠܣܽܘܼܥܪܳܢܳܐ ܕܦܰܪ̈ܨܽܘܼܦܶܐ ܥܰܡܽܘܼ̈ܠܬܳܢܶܐ ܗܿܳܢܽܘܢ ܕܰܪܘܺܝܼܚܳܐܝܼܬ ܪܳܢܶܝܢ ܘܥܳܡܠܺܝܼܢ… ܝܰܬܺܝܼܪ ܡܼܶܢ ܡܰܡܠܠܳܐ ܕܫܽܘܼܩܳܐ.

ܡܶܛܠܗܳܕܶܐ ܙܳܕܶܩ ܕܢܶܩܪܶܐ ܘܢܺܐܠܰܦ. ܐܰܝܟܰܢܳܐ ܕܢܶܬܡܰܕܰܥ ܝܰܬܺܝܼܪ… ܘܝܰܬܺܝܼܪ… ܘܢܶܫܬܰܚܠܦܰ ܘܢܶܫܬܰܘܫܰܛ ܘܢܶܬܥܰܡܰܩ…

ܡܳܕܶܝܢ ܓܶܕ ܢܶܩܪܶܐ ܣܶܦܪ̈ܶܐ ܘܰܟܬܳܒ̈ܐ ܕܬܳܒܪܺܝܼܢ ܓܠܺܝܼܕܳܐ ܕܰܒܓܰܘܰܢ. ܘܢܶܒܥܶܐ ܫܽܘܼܓܢܳܝܳܐ ܘܬܽܘܼܩܳܢܳܐ ܐܺܝܼܬܺܝܼܩܳܝܳܐ. ܒܕ ܠܰܝܬ ܐܘܼܪܚܳܐ ܐ̱ܚܪܺܬܳܐ ܣܛܰܪ ܡܼܶܢ ܗܿܳܕܐ ܕܒܳܥܝܳܐ ܕܢܶܩܪܶܐ ܘܢܺܐܠܰܦ ܒܪܽܘܼܚܳܐ ܘܒܰܫܪܳܪܳܐ. ܘܢܶܬܥܢܶܐ ܘܰܢܡܰܠܶܠ ܬܰܡܺܝܼܡܳܐܝܼܬ ܘܡܰܟܺܝܼܟܳܐܝܼܬ ܘܢܶܬܒܰܩܶܐ ܘܢܶܬܚܰܫܰܒ ܪܘܺܝܼܚܳܐܝܼܬ. ܐܰܝܟܰܢܳܐ ܕܢܶܩܢܶܐ ܚܰܝܠܳܐ ܝܕܰܥܬܳܢܳܝܳܐ ܣܳܦܩܳܐ ܠܰܡܕܰܒܳܪܘܼ ܪ̈ܶܓܫܶܐ ܒܠܺܝ̈ܠܶܐ ܘܰܠܡܶܦܓܰܕ ܚܰܫ̈ܶܐ ܫܓܺܝܼ̈ܫܶܐ ܪܰܕܝܳܐܝܼܬ. ܗܺܝܼ ܗܳܕܶܐ ܙܳܕܶܩ ܕܢܶܥܒܶܕ ܡܶܛܽܠ ܡܶܣܬܰܟܠܳܢܽܘܼܬܳܐ ܘܠܰܘ ܠܡܶܬܚܙܰܘܙܝܳܢܽܘܼܬܳܐ.  

ܕܐܳܡܰܪ ܡܰܠܦܳܢܰܢ ܪܰܒܳܐ ܡܳܪܝ ܝܰܥܩܽܘܒ ܕܰܣܪܽܘܓ (451-521): «ܐܳܘ ܦܳܪܘܿܫܳܐ ܠܦܰܓܪܳܐ ܗܰܒ ܠܶܗ ܡܰܝ̈ܳܐ ܢܶܫܬܶܐ. ܘܗܰܒ ܠܳܗܿ ܠܢܰܦܫܳܐ ܟܬܳܒܳܐ ܕܬܶܩܪܶܐ ܘܬܶܬܒܰܣܰܡ ܒܶܗ. ܢܰܦܫܳܐ ܨܗܺܝܼܬܳܐ ܥܰܠ ܡܰܒܘܼܥܳܐ ܕܐܺܝܼܬ ܒܰܟܬܳܒ̈ܐ. ܣܳܝܡܳܐ ܦܽܘܼܡܳܗܿ ܘܫܳܬܝܳܐ ܡܶܢܗܽܘܿܢ ܚܰܝ̈ܶܐ ܟܽܠ ܝܽܘܿܡ.»

ܝܘܣܦ ܒܓܬܫ

ܚܘܕܪܐ ܕܡܪܕܘܬܐ ܘܣܦܪܝܘܬܐ ܕܠܫܢܐ ܣܘܪܝܝܐ. ܡܪܕܝܢ

ܪܶܚܡܰܬ ܩܽܘܼܫܬܳܐ ܘܒܰܪܢܳܫܳܐ ܓܰܘܳܝܳܐ

ܪܶܚܡܰܬ ܩܽܘܼܫܬܳܐ ܘܒܰܪܢܳܫܳܐ ܓܰܘܳܝܳܐ

ܡܼܶܢ ܕܰܪܓܳܐ ܫܪܳܪܳܐ ܥܶܠܳܝ ܘܰܛܢܳܢܳܐ ܡܼܶܢ ܫܽܘܼܠܛܳܢܳܐ.

ܩܰܫܺܝܼܫܳܐ ܗ̱ܝ ܐܳܦ ܟܺܐܢܽܘܼܬܳܐ ܡܼܶܢ ܛܶܟܣܐ ܘܡܼܶܢ ܢܳܡܽܘ̈ܣܶܐ.

ܡܳܪܝ ܐܝܼܣܚܳܩ ܕܐܰܢܛܝܽܘܿܟ (490+ )

ܐܶܠܘܼܠܳܐ ܡܰܕܥܳܐ ܕܩܽܘܼܫܬܳܐ܆ ܠܳܐ ܡܶܬܩܰܠܦܺܝܼܢ ܩܠܳܦ̈ܶܐ ܕܩܳܪܡܺܝܼܢ ܢܽܘܼܗܪܳܐ ܘܬܽܘܼܩܦܳܐ ܕܪܽܘܼܚܳܐ. ܘܐܳܦܠܳܐ ܡܶܬܓ̈ܰܠܓܳܢ ܬܰܚܦ̈ܝܳܬܳܐ ܓܰܘ̈ܳܝܳܬܳܐ ܕܒܰܪܢܳܫܳܐ. ܒܰܕ ܩܽܘܼܫܬܳܐ܆ ܣܘܼܟܳܠܐ ܗ̱ܘ ܪܰܒܳܐ ܕܢܳܛܰܪ ܕܽܘܼܒܳܪ̈ܶܐ ܐ̱ܢܳܫ̈ܳܝܶܐ ܟܰܕ ܚܠܺܝܼܡܺܝܼܢ: ܒܡܰܟܺܝܼܟܽܘܼܬܳܐ ܘܫܰܪܺܝܼܪܽܘܼܬܳܐ ܘܰܟܢܺܝܼܟܽܘܼܬܳܐ ܘܰܦܫܺܝܼܛܘܼܬܳܐ ܘܰܚܠܺܝܼܨܽܘܬܳܐ ܕܬܐܺܪܬܳܐ ܘܟܺܐܢܽܘܼܬܐ ܘܚܺܐܪܽܘܼܬܳܐ. ܘܐܰܩܢܳܐ[1] ܐܺܝܼܬܰܘܗ̱ܝ ܪܺܝܼܫܳܝܳܐ ܕܒܶܗ ܡܶܬܒܰܚܪܺܝܼܢ ܘܡܶܬܬܟܺܝܼܠܺܝܢ ܪ̈ܶܥܝܳܢܶܐ ܘܰܥܒ̈ܳܕܶܐ ܘܢܺܝܼ̈ܫܶܐ ܐ̱ܢܳܫ̈ܳܝܶܐ ܟܣ̈ܰܝܳܐ ܘܰܓܠܰܝ̈ܳܐ. ܘܠܰܝܬ ܪܰܒܘܼܬܳܐ ܥܰܫܺܝܼܢܬܳܐ ܐܰܝܟ ܪܰܒܽܘܼܬܳܐ ܗܳܝ ܕܢܳܗܪܳܐ ܘܨܳܡܚܳܐ ܒܚܽܘܼ̈ܟܳܡܶܐ ܕܩܽܘܼܫܬܳܐ: ܬܳܓܰܐ ܙܰܟܳܝܳܐ ܘܰܟܠܺܝܼܠܐ ܙܰܗܝܳܐ ܕܣܽܘܼ̈ܟܳܠܐ ܗܳܠܶܝܢ. ܡܶܛܠܗܳܕܶܐ ܓܠܺܝܼܙܽܘܼܬ ܡܰܕܥܶܗ ܡܰܘܠܶܕ ܡܥܽܘܼܣܝܳܐ ܡܛܰܪܦܳܢܳܐ ܒܥܳܠܡܳܐ ܓܰܘܳܝܳܐ. ܟܒܰܪ ܚܰܝܠܶܗ ܠܳܐ ܐܰܒܺܝܼܕ ܒܪܰܡ ܐܰܟܡܳܐ ܕܡܶܬܬܡܺܝܼܫܳܐ ܥܰܡܽܘܼܛ ܘܰܚܫܺܝܼܟ ܒܽܘܼܝܳܢܶܗ ܘܩܰܗܝܳܐ ܡܰܥܒܕܳܢܽܘܼܬܶܗ ܒܰܝܢܳܬ ܐ̱ܢܳܫܽܘܼܬܰܢ. ܘܥܰܝܢܳܐ ܓܰܘܳܝܬܐ «ܥܰܝܢܳܐ ܕܠܶܒܳܐ ܘܥܰܝܢܳܐ ܕܪܽܘܼܚܐ» ܠܐ ܕܳܝܩܳܐ ܫܪܳܪܳܐ ܪܰܒܳܐ.

قراءة المزيد

ܡܰܕܥܳܐ ܚܠܺܝܼܡܳܐ

ܡܰܕܥܳܐ ܚܠܺܝܼܡܳܐ

ܗܰܘܢܳܐ ܚܠܺܝܼܡܳܐ ܘܡܰܕܥܳܐ ܬܪܺܝܼܨܳܐ܆ ܫܽܘܼܘܕܳܥܰܐ ܗ̱ܘ ܩܪܺܝܼܚܳܐ ܕܩܽܘܼܝܳܡܳܐ ܘܪܽܘܼܒܳܝܳܐ ܘܫܘܼܘܫܳܛܳܐ ܬܰܩܢܳܐ. ܘܐܠܘܼܠܳܐ ܚܰܝܠܐ ܗܳܢܳܐ܆ ܠܳܐ ܡܶܫܬܰܟܚܺܝܼܢ ܣܽܘܼ̈ܟܳܠܐ ܕܪܽܘܼܚܳܐ܆ ܘܐܳܦܠܳܐ ܡܶܫܬܰܟܢܳܐ ܥܺܝܼܪܽܘܼܬܳܐ ܒܰܝܢܳܬ ܕܠܽܘܼܚܝܳܐ ܕܰܒܠܺܝܼܠܽܘܼܬܳܐ. ܘܐܠܘܼܠܳܐ ܝܕܰܥܬܳܐ ܗܳܕܶܐ܆ ܠܳܐ ܡܶܫܬܰܦܝܳܐ ܬܰܪܥܺܝܼܬܳܐ. ܘܐܳܦܠܳܐ ܡܶܬܡܰܪܩܳܐ ܡܰܚܙܺܝܼܬܳܗܿ ܒܰܚܢܳܢܳܐ ܘܚܰܘܣܳܢܳܐ ܕܠܶܒܳܐ ܒܰܣܺܝܼܡܳܐ. 

ܠܰܝܬ ܡܶܕܶܡ ܕܰܦܫܺܝܼܩ ܘܰܕܠܺܝܼܠ. ܘܝܕܰܥܬܳܐ ܐܰܝܕܳܐ ܕܗܺܝܼ ܠܳܐ ܡܶܬܓܰܫܡܳܐ ܒܰܟܬܺܝܼܒܬܳܐ ܐܶܠܐ ܒܚܽܘܼܒܳܐ ܙܳܩܽܘܼܬܳܐ ܘܰܛܢܳܢܳܐ ܫܓܺܝܼܪܳܐ ܕܐܺܝܼܬܰܘܗܝ ܟܰܣܝܳܐ ܒܢܺܝܼܫܳܐ ܘܥܰܡܠܳܐ ܪܰܒܳܐ..

قراءة المزيد