ܥܛܽܘܼ̈ܦܝܶܐ ܕܰܩܝܳܡܬܳܐ

ܥܛܽܘܼ̈ܦܝܶܐ ܕܰܩܝܳܡܬܳܐ

ܒܰܪܢܳܫܳܐ ܡܿܰܢ ܒܰܙܒܰܢ ܡܶܬܬܥܺܝܼܪ ܘܗܳܦܶܟ ܠܢܰܦܫܶܗ ܘܒܳܥܶܐ ܕܢܶܬܥܰܫܰܢ ܘܢܶܬܗܰܕܰܪ ܐܰܝܟܳܢܳܐ ܕܰܢܫܰܚܠܶܦ ܚܰܝܰܘ̈ܗܝ ܐܰܘ ܕܰܢܛܰܟܶܣ ܐܶܢܽܘܢ ܝܰܬܺܝܼܪ ܬܰܩܢܳܐܝܼܬ. ܐܶܠܳܐ ܣܽܘܼܓܳܐܐ ܕܙܰܒܢ̈ܺܝܼܢ ܗܶܕܪܳܐ ܓܰܘܳܝܳܐ ܠܡܶܬܕܰܟܝܳܢܽܘܼܬܳܐ ܣܢܺܝܼܩ ܝܰܬܺܝܼܪ ܡܼܶܢ ܡܶܬܥܰܫܢܳܢܽܘܼܬܳܐ. ܒܰܕ ܥܰܫܺܝܼܢܽܘܼܬܳܐ ܠܳܐ ܐܳܬܝܳܐ ܐܶܠܳܐ ܒܰܬܰܪ ܬܰܨܒܺܝܼ̈ܬܶܐ ܕܕܰܟܝܽܘܼܬܳܐ.

ܘܰܬܢܳܢ ܦܰܐܝܳܐ ܕܢܶܕܰܥ ܕܠܰܡ ܒܰܪܢܳܫܳܐ ܓܰܘܳܝܳܐ ܕܳܡܶܐ ܠܡܰܚܙܺܝܼܬܳܐ ܗܿܝ ܕܡܰܗܦܟܳܐ ܘܡܰܥܬܦܳܐ ܨܰܘܒܳܐ ܘܚܰܘܪܳܐ ܘܩܰܘܡܳܐ ܕܒܰܪ ܢܶܩܦܳܐܿ. ܒܰܕ ܟܰܪ ܕܚܳܐܰܪ ܘܨܳܐܶܒ ܘܩܳܐܶܡ ܗܿܰܘ ܗ̱ܽܘܼ ܗܳܦܶܟ ܘܥܳܛܶܦ ܥܠܰܘܗܝ. ܘܟܰܕ ܪܰܒܰܬ ܡܰܨܶܕ ܘܡܰܩܶܬ ܚܰܘܪܑܳܐ ܒܚܽܘܼ̈ܬܚܳܬܶܐ ܕܰܪ̈ܓܺܝܼܓܳܬܳܐ ܘܰܒܨܺܝܼܪ̈ܳܬܳܐ ܘܫܽܘ̈ܕܳܠܶܐ ܒܺܝܼ̈ܫܶܐ ܘܡܰܟܝ̈ܳܢܶܐ܆ ܡܶܬܬܒܳܪܘ ܡܶܬܬܒܰܪ ܘܡܶܬܒܰܕܰܪܘ ܡܶܬܒܰܕܰܪ ܢܽܘܼܗܪܶܗ ܐܠܗܳܝܳܐ. ܘܡܶܟܳܐ ܡܰܚܙܺܝܼܬܳܐ ܗܿܳܝ ܓܰܘܳܝܬܳܐ ܩܳܪܡܳܐ ܐܰܒܩܳܐ ܘܒܰܙܒܰܢ ܡܶܨܛܰܥܠܳܐ ܒܛܺܝܼܢܳܐ. ܘܡܶܬܚܰܒܰܠ ܚܶܙܘܳܗܿ ܘܡܶܫܬܰܚܡܳܐ ܕܡܽܘܼܬܳܗܿ. ܗܳܝܕܶܝܢ ܡܶܫܬܰܘܰܫ ܒܰܪܢܳܫܳܐ ܓܰܘܳܝܳܐ ܘܦܳܗܶܐ ܒܬܰܘܫܳܐ. ܘܪܳܚܶܩ ܡܼܶܢ ܢܰܦܫܶܗ ܚܽܘܼܒܳܢܳܝܬܳܐ. ܘܠܳܐ ܡܶܫܟܰܚ ܢܽܘܼܗܪܶܗ ܓܰܘܳܝܰܐ ܩܶܨܰܬ ܐܰܒܩܳܐ ܘܛܺܝܼܢܳܐ. ܘܫܳܪܰܥ ܘܢܳܦܶܠ ܒܰܚܛܺܝܼܬܳܐ. ܘܡܶܟܳܐ ܒܳܥܶܐ ܢܽܘܼܗܪܶܗ ܒܥܳܠܡܳܐ ܒܰܪܳܝܳܐ. ܘܬܰܡܳܢ ܒܰܝܢܳܬ ܕܠܽܘܼ̈ܚܝܶܐ ܐܰܪ̈ܥܳܢܳܝܶܐ ܘܥܰܪ̈ܝܶܐ ܗܽܘܼ̈ܠܳܢܳܝܶܐ ܟܳܪܶܟ ܥܠܰܘܗܝ. ܘܒܳܥܶܐ ܕܢܶܫܟܚܺܝܼܘܗܝ!

ܘܒܰܟܪܽܘܼܟܝܳܐ ܗܳܢܳܐ ܠܶܒܳܐ ܕܳܡܶܐ ܠܟܳܣܳܐ ܕܢܳܛܰܪ ܬܽܘܼܩܦܳܐ ܕܚܰܝ̈ܶܐ ܘܐܝܼܩܳܪܳܐ ܘܣܽܘܼ̈ܟܳܠܐ ܕܪܽܘܼܚܳܐ. ܐܶܠܳܐ ܒܪܰܡ ܟܰܕ ܡܨܰܥܨܰܥ ܘܠܳܐ ܡܶܬܕܰܟܶܐ ܐܰܟܡܳܐ ܕܘܳܠܝܳܐ܆ ܡܶܫܬܰܚܠܰܦ ܠܟܳܣܳܐ ܪܥܺܝܼܥܳܐ ܕܠܳܐ ܩܳܒܶܐ ܡܶܕܶܡ ܡܬܰܩܦܳܢܳܐ ܩܶܨܰܬ ܬܒܺܝܼܪܽܘܼܬܶܗ ܘܰܪܥܺܝܼܥܽܘܼܬܶܗ ܘܰܨܠܺܝܼܚܽܘܼܬܶܗ. ܘܟܰܕ ܠܳܐ ܪܓܺܝܼܫ ܠܳܐ ܪܳܣܟܳܐ ܒܶܗ ܬܰܘܕܺܝܼܬܳܐ ܘܒܽܘܼܪܟܬܳܐ ܘܩܽܘܼܒܳܠܛܰܝܒܽܘܼܬܳܐ. ܘܫܳܚܠܺܝܼܢ ܘܢܳܛܦܺܝܼܢ ܡܶܢܶܗ ܫܰܝܢܳܐ ܘܰܫܠܳܡܳܐ ܘܪ̈ܰܚܡܶܐ ܘܰܚܢܳܢܳܐ ܘܚܰܘܣܳܢܳܐ. ܡܶܛܠܗܳܕܶܐ ܣܢܺܝܼܩܽܘܼܬܳܐ ܪܰܒܬܳܐ ܠܰܝܬܶܝܗܿ ܐܶܠܳܐ ܕܗܽܘܼ ܒܰܪܢܳܫܳܐ ܢܶܬܒܰܩܶܐ ܒܢܰܦܫܶܗ ܘܢܶܦܪܽܘܿܫ ܘܢܶܕܒܽܘܿܩ ܪ̈ܥܺܝܼܥܳܬܳܐ ܘܰܬܒܺܝܼܪ̈ܳܬܳܐ ܘܰܨܠܺܝܼܚ̈ܳܬܳܐ ܕܟܳܣܳܐ ܕܠܶܒܶܗ ܒܣܽܘܼ̈ܟܳܠܶܐ ܡܰܚ̈ܝܳܢܶܐ ܕܰܩܝܳܡܬܳܐ ܗܿܳܝ ܕܡܶܬܦܰܫܩܳܐ ܡܫܰܚܢܳܢܽܘܼܬܳܐ ܘܰܡܢܰܚܡܳܢܽܘܼܬܳܐ ܕܡܺܝܼܬܽܘܼܬܳܐ. ܟܶܐܡܰܬ ܫܽܘܼܚܳܢܳܐ ܘܢܽܘܼܚܳܡܳܐ ܕܰܚܢܳܢܳܐ ܘܚܰܘܣܳܢܐ ܓܰܘܳܝܳܐ. ܕܰܡܫܺܝܼܚܳܐ ܡܰܢ ܐܳܣܝܰܐ ܗ̱ܘ ܡܫܰܡܠܝܳܢܳܐ. ܘܡܰܕܠܳܢܰܐ ܗ̱ܘ ܕܐܽܘܼܪܚܳܐ. ܘܡܰܩܠܳܢܰܐ ܗ̱ܘ ܕܡܰܘܒܠܳܐ. ܘܠܳܐ ܒܳܥܶܐ ܕܢܺܐܒܰܕ ܒܰܪܢܳܫܳܐ ܐܶܠܳܐ ܕܢܶܗܦܽܘܿܟ ܠܰܓܒܺܝܼܠܬܶܗ ܩܰܕܡܳܝܬܳܐ ܘܠܰܟܝܳܢܶܗ ܫܰܪܺܝܼܪܳܐ ܚܽܘܼܒܳܢܳܝܳܐ. ܘܠܳܐ ܨܳܒܶܐ ܕܢܶܬܒܽܘܿܪ ܘܢܶܦܠܽܘܿܓ ܡܰܚܙܺܝܼܬܳܐ ܠܰܡ̈ܢܰܘܳܬܳܐ܆ ܐܶܠܳܐ ܕܢܶܡܪܩܺܝܼܗܿ ܘܰܢܕܰܒܩܺܝܼܗܿ ܘܢܰܫܦܪܺܝܼܗܿ. ܘܐܳܦܠܳܐ ܒܳܥܶܐ ܕܢܶܫܕܶܐ ܟܳܣܳܐ܆ ܐܶܠܳܐ ܕܰܢܒܰܕܩܺܝܼܘܗܝ ܘܰܢܚܰܠܠܺܝܼܘܗܝ ܘܰܢܚܰܕܬܺܝܼܘܗܝ. ܕܐܰܡܺܝܼܪܳܐ ܗ̱ܝ: «ܚܢܰܢ ܕܶܝܢ ܟܽܠܰܢ ܒܰܐܦ̈ܐ ܓܰܠܝ̈ܳܬܳܐ ܬܶܫܒܽܘܼܚܬܶܗ ܕܡܳܪܝܳܐ ܐܰܝܟ ܕܰܒܡܰܚܙܺܝܼܬܐ ܚܳܙܶܝܢܰܢ. ܘܠܳܗܿ ܠܰܕܡܽܘܼܬܳܐ ܡܶܫܬܰܚܠܦܺܝܼܢܰܢ܆ ܘܡܼܶܢ ܫܽܘܼܒܚܳܐ ܠܫܽܘܼܒܚܳܐ܇ ܐܰܝܟ ܕܡܼܶܢ ܡܳܪܝܳܐ ܪܽܘܼܚܳܐ» (ܒ. ܩܘܪ̈ܝܢܬܝܐ 3: 18).

ܘܠܳܐ ܟܰܣܝܳܐ ܕܠܰܡ ܒܰܪܢܳܫܳܐ ܓܰܘܳܝܳܐ ܡܶܬܕܰܡܶܐ ܘܡܶܫܬܰܓܢܶܐ ܠܗܿܰܘ ܡܳܐ ܕܪܰܒܰܬ ܡܰܩܶܬ ܒܶܗ. ܘܡܶܨܛܒܰܥ ܒܓܰܘ̈ܢܶܐ ܕܬܰܪܥܺܝܼܬܐ ܕܡܰܩܬܳܢܽܘܼܬܶܗ. ܘܡܶܣܬܰܟܰܡ ܠܦܽܘܼܬ ܚܢܳܝ̈ܶܐ ܕܡܰܨܕܳܢܽܘܼܬܶܗ. ܡܶܛܠܗܳܕܶܐ ܡܰܩܬܳܢܽܘܼܬܰܢ ܘܡܰܨܕܳܢܽܘܼܬܰܢ ܐܰܡܺܝܼܢܳܐܝܼܬ ܙܳܕܶܩ ܬܶܗܘܶܐ ܬܰܠܝܳܐ ܒܣܽܘܼ̈ܟܳܠܐ ܕܰܩܝܳܡܬܳܐ ܦܳܪܽܘܿܩܳܝܬܳܐ. ܒܕ ܢܽܘܼܗܪܳܐ ܡܰܚܝܳܢܳܐ ܡܶܬܶܡܠܐ ܒܰܪܢܳܫܳܐ ܗܿܰܘ ܐܰܝܢܳܐ ܕܗܳܦܶܟ ܠܡܰܒܽܘܼܥܳܐ ܗܳܢܳܐ ܪܰܒܳܐ ܘܪܺܝܼܫܳܝܳܐ. ܒܪܰܡ ܠܳܐ ܡܰܨܝܳܐ ܕܢܶܡܬܽܘܿܩ ܘܢܶܙܠܽܘܿܚ ܡܼܶܢܶܗ ܐܶܠܳܐ ܟܰܕ ܢܶܬܕܟܶܐ ܡܼܶܢ ܐܰܒܩܳܐ ܘܛܺܝܼܢܳܐ. ܘܰܒܛܶܠܠܳܐ ܕܚܰܫܳܐ ܘܟܰܪܝܽܘܼܬܳܐ ܩܳܐܶܡ ܘܠܳܐ ܡܳܛܶܐ ܠܡܰܒܽܘܼܥܳܐ ܫܰܦܝܳܐ ܟܽܠ ܟܡܳܐ ܕܠܳܐ ܡܶܬܕܰܟܶܐ ܘܡܶܬܢܰܩܰܕ ܡܼܶܢ ܛܺܝܢܳܐ: ܟܶܐܡܰܬ ܪ̈ܶܥܝܳܢܶܐ ܕܠܺܝܼ̈ܚܳܐ ܘܚܳܢܽܘܼ̈ܩܶܐ ܕܗܽܘܼܠܳܐ.

ܡܶܛܠܗܳܕܶܐ ܩܕܳܡ ܕܢܶܥܕܽܘܿܠ ܠܒܰܪ̈ܳܝܳܬܳܐ ܘܰܠܗܳܢܳܐ ܘܗܰܘ ܠܽܘܼܩܕܰܡ ܦܩܺܝܼܕܝܼܢܰܢ ܘܰܙܡܺܝܼܢܝܼܢܰܢ ܠܬܘܼܪܳܨܳܐ ܘܬܘܼܩܳܢܳܐ ܘܛܘܼܟܳܣܳܐ ܕܓܰܘ̈ܳܝܳܬܰܢ ܒܨܰܘܒܳܐ ܦܰܐܝܳܐ ܘܫܰܦܺܝܼܪܳܐ. ܒܰܕ ܐܰܝܟ ܕܐܰܡܺܝܼܪܳܐ: «ܒܥܰܘ ܕܶܝܢ ܠܽܘܼܩܕܰܡ ܡܰܠܟܽܘܼܬܶܗ ܕܰܐܠܗܳܐ ܘܙܰܕܺܝܼܩܽܘܼܬܶܗ ܘܟܽܠܗܶܝܢ ܗܳܠܶܝܢ ܡܶܬܬܰܘ̈ܣܦܳܢ ܠܟܘܢ» (ܡܬܝ 6: 13).

ܘܰܩܪܺܝܼܚܳܐ ܗ̱ܝ ܕܠܰܡ ܫܽܘܼܚܠܳܦܳܐ ܘܫܽܘܼܓܢܳܝܳܐ ܫܰܪܺܝܼܪܳܐ ܠܳܐ ܡܶܫܬܰܪܰܪ ܘܐܳܦܠܳܐ ܡܶܫܬܰܡܠܶܐ ܐܶܠܳܐ ܕܗܽܘܼ ܒܢܰܦܫܶܗ ܒܰܪܢܳܫܐ ܢܶܡܪܽܘܿܩ ܡܰܚܙܺܝܼܬܶܗ ܓܰܘܳܝܬܳܐ. ܘܒܽܘܼܕܳܩܳܐ ܘܚܽܘܼܕܳܬܳܐ ܫܰܪܺܝܼܪܳܐ ܠܳܐ ܡܶܫܬܰܪܰܪ ܘܐܳܦܠܳܐ ܡܶܫܬܰܡܠܶܐ ܐܶܠܳܐ ܕܗܽܘܼ ܒܢܰܦܫܶܗ ܒܰܪܢܳܫܳܐ ܢܶܚܙܶܐ ܘܰܢܫܽܘܼܥ ܘܰܢܬܰܩܶܢ ܪ̈ܥܺܝܼܥܳܬܳܐ ܘܰܨܠܺܝܼܚ̈ܳܬܳܐ ܕܟܳܣܳܐ ܕܠܶܒܶܗ.

ܐܺܝܼܢ: ܢܽܘܼܗܪܳܐ ܕܩܰܒܪܳܐ ܕܰܡܫܺܝܼܚܳܐ ܐܰܡܺܝܼܢܳܐܝܼܬ ܩܳܪܶܐ ܠܰܢ ܫܠܳܡܳܐ. ܘܟܽܠ ܫܢܳܐ ܒܰܫܢܳܐ ܨܳܡܰܚ ܥܠܰܝܢ ܚܰܕܘܶܗ ܐܰܝܟܢܐ ܕܢܶܬܶܠ ܠܰܢ ܚܰܝܠܳܐ ܕܢܽܘܼܗܪܳܐ ܗܳܢܳܐ ܓܰܘܳܝܳܐ: ܣܳܦܩܳܐ ܘܡܶܬܒܰܥܝܳܢܳܐ.

ܫܘܼܐܳܠܐ ܗܳܢܰܘ: ܡܳܢܰܘ ܕܰܪܓܳܐ ܕܢܽܘܼܗܪܳܐ ܗܳܢܳܐ ܒܩܽܘܼܝܳܡܳܐ ܕܰܡܕܰܒܪܳܢܽܘܼܬܢ؟ ܐܰܝܟܳܐ ܬܰܠܝܳܐ ܡܰܩܬܳܢܽܘܼܬܰܢ ܘܡܰܨܕܳܢܽܘܼܬܰܢ؟ ܐܰܪܰܐ ܠܽܘܼܩܕܰܡ ܒܳܥܶܝܢܰܢ ܡܰܠܟܽܘܼܬܶܗ ܘܙܰܕܺܝܼܩܽܘܼܬܶܗ ܕܐܠܗܐ؟ ܐܪܐ ܡܩܰܕܫܺܝܼܢܰܢ ܨܶܒܝܳܢܰܢ ܘܪܶܥܝܳܢܰܢ ܘܕܽܘܼܒܰܪܰܢ ܘܫܰܪܟܳܐ ܕܬܽܘܼܩܳܢܰܢ ܓܰܘܳܝܳܐ ܒܫܽܘܼܦܪ̈ܶܐ ܕܢܘܗܪܐ ܗܢܐ؟ ܐܰܪܰܐ ܚܢܰܢ ܪܳܓܫܺܝܼܢܢ ܪܽܘܼܚܳܢܳܐܝܼܬ ܘܡܶܬܥܰܙܙܺܝܼܢܰܢ ܒܨܶܡ̈ܚܶܐ ܕܢܽܘܼܗܪܳܐ ܗܳܢܳܐ ܐܰܘ ܡܰܗܦܳܟܽܘܼ ܡܰܗܦܟܺܝܼܢܰܢ ܡܶܢܶܗ ܚܰܘܪܰܢ ܘܨܰܘܒܰܢ ܘܩܰܘܡܰܢ؟

ܗܳܟܶܢ ܟܳܬܶܒ ܘܐܳܡܿܰܪ ܒܫܰܪܒܳܐ ܗܳܢܳܐ ܚܰܕ ܡܼܶܢ ܡܦܰܫ̈ܩܳܢܶܐ ܡܰܚ̈ܒܳܢܰܝ ܣܽܘܼܟܳܠܐ: «ܐܰܝܟܳܐ ܕܰܬܪܶܝܢ ܐܰܘ ܬܠܳܬܳܐ ܟܢܺܝܼܫܺܝܼܢ ܒܫܶܡܝ ܒܰܝܢܳܬܗܽܘܿܢ ܐ̱ܢܳܐ. ܟܰܕ ܐܳܦ ܘܰܒܗܳܕܶܐ ܥܰܠ ܩܢܽܘܼܡ ܚܰܕ ܒܰܪܢܳܫܳܐ ܪܳܡܶܙ. ܕܰܡܪܰܟܰܒ ܡܼܶܢ ܬܠܳܬ ܡܢܰܘ̈ܳܬܳܐ: ܕܦܰܓܪܳܢܽܘܼܬܳܐ ܘܢܰܦܫܳܢܽܘܼܬܳܐ ܘܪܽܘܼܚܳܢܽܘܼܬܐ. ܕܐܶܡܰܬܝ ܕܢܶܬܟܰܢܫܽܘܿܢ ܘܢܶܫܠܡܽܘܢ ܠܰܚܕܳܐ ܐܰܘܝܽܘܼܬܳܐ ܒܰܫܡܶܗ ܠܡܶܓܡܰܪ ܨܶܒܝܳܢܶܗ. ܟܰܕ ܠܳܐ ܬܶܗܘܶܐ ܕܰܠܩܽܘܼܒܠܳܝܽܘܼܬܳܐ ܒܶܝܬ ܦܰܓܪܳܐ ܠܢܰܦܫܳܐ ܘܰܠܪܽܘܼܚܳܐ. ܬܰܡܳܢ ܗܳܘܶܐ ܥܳܡܰܪ ܒܚܽܘܼܒܳܐ. ܘܬܽܘܼܒ ܕܶܝܢ ܡܿܰܢ ܕܪܳܚܶܡ ܠܝܼ ܡܶܠܰܬܝ ܢܳܛܰܪ. ܘܐܳܒܝ ܢܶܪܚܡܺܝܼܘܗܝ. ܘܰܠܘܳܬܶܗ ܐܳܬܶܝܢܰܢ. ܘܰܠܘܳܬܶܗ ܐܰܘܳܢܳܐ ܥܳܒܕܺܝܼܢܰܢ ܐܶܡܰܪ ܡܳܪܰܢ.»

ܘܡܰܩܶܦ ܘܐܳܡܰܪ: «ܡܰܠܟܽܘܼܬܶܗ ܓܶܝܪ ܕܰܐܠܗܳܐ ܠܓܰܘ ܡܶܢܟܽܘܿܢ ܗ̱ܺܝ. ܘܬܽܘܼܒ ܘܰܒܡܰܢ ܐܶܥܡܰܪ؟ ܐܶܠܳܐ ܒܢܺܝܼܚܳܐ ܘܰܒܡܰܟܺܝܼܟ ܪܽܘܼܚܳܐ.»

ܣܽܘܼܟܳܠܳܐ ܠܳܐ ܡܰܩܢܶܐ ܣܽܘܼܟܳܠܳܐ ܐܶܠܳܐ ܠܰܕܚܳܟܶܡ ܣܽܘܼܟܳܠܳܐ ܘܗܳܪܶܓ ܒܣܽܘܼܟܳܠܳܐ. ܢܳܝܚܺܝܼܢܰܢ ܘܒܳܣܡܺܝܼܢܰܢ ܘܢܳܨܚܺܝܼܢܰܢ ܟܰܕ ܢܳܗܪܺܝܼܢܰܢ ܒܣܽܘܼ̈ܟܳܠܶܐ ܕܰܩܝܳܡܬܳܐ. ܒܪܺܝܼܟ ܩܝܳܡܬܶܗ ܕܡܳܪܰܢ.

ܥܰܡ ܚܽܘܼܒܳܐ ܘܐܺܝܼܩܪܳܐ ܘܥܽܘܼ̈ܥܳܕܶܐ ܒܪ̈ܺܝܼܟܶܐ.

ܝܰܘܣܶܦ ܒܶܓܬܰܫ

ܚܘܕܪܐ ܕܡܪܕܘܬܐ ܘܣܦܪܝܘܬܐ ܕܠܫܢܐ ܣܘܪܝܝܐ: ܡܪܕܝܢ