ܥܺܝܼܪܽܘܼܬܳܐ

ܥܺܝܼܪܽܘܼܬܳܐ

ܡܶܢܟܽܠܦܪܽܘܿܣ ܡܶܬܟܰܪܗܺܝܼܢ ܘܡܶܬܡܰܪܥܺܝܼܢ ܢܽܘܼ̈ܢܶܐ ܕܣܺܝܼܡܺܝܼܢ ܒܡܰܩܪܳܐ ܕܰܕܠܺܝܼܚܺܝܼܢ ܘܨܰܥܠܺܝܼܢ ܡ̈ܰܘܗܝ. ܘܰܒܙܰܒܢܳܐ ܗܳܢܳܐ ܕܒܶܗ ܟܒܺܝܼܫ ܗ̱ܽܘܼ ܒܰܪܢܳܫܳܐ ܒܕܰܘ̈ܫܶܐ ܕܪܽܘܼܫܳܢܳܐ[1] ܘܫܘܼܽܒܗܳܪܳܐ ܗܺܝܼ ܥܺܝܼܪܽܘܼܬܳܐ ܕܰܪܡܳܢܳܐ ܡܶܬܒܰܥܝܳܢܳܐ ܐܺܝܼܬܶܝܗܿ ܠܟܽܠܗܽܘܿܢ ܡܰܪ̈ܥܶܐ ܘܟܽܘܼܪ̈ܗܳܢܶܐ ܐ̱ܢܳܫ̈ܳܝܶܐ. ܕܓܳܫܪܳܐ ܘܐܳܣܪܳܐ ܥܳܒܽܘܿܕܳܐ ܘܚܳܫܽܘܿܫܳܐ ܘܐ̱ܢܳܫܽܘܼܬܳܐ ܒܰܚ̈ܕܳܕܶܐ.

ܒܪܰܡ ܐܰܟܡܳܐ ܕܫܳܪܐ ܡܼܶܢ ܩܽܘܼܫܬܳܐ ܦܪܺܝܼܣܳܐ ܣܘܼܓܳܐܐ ܪܰܒܳܐ ܕܰܒܢܰܝ̈ܢܳܫܳܐ ܠܳܐ ܨܳܒܶܝܢ ܒܥܺܝܼܪܽܘܼܬܳܐ ܪܽܘܼܚܳܢܳܝܬܐ. ܒܰܕ ܒܳܥܝܳܐ ܝܺܕܰܥܬܳܐ ܘܦܳܪܽܘܿܫܽܘܼܬܐ ܘܬܰܪܒܺܝܼܬܳܐ ܘܰܛܢܳܢܳܐ ܚܠܺܝܼܨܳܐ ܘܰܠܒܺܝܼܒܘܼܬܐ ܘܰܒܨܳܬܳܐ ܘܒܽܘܼܩܝܳܐ ܘܣܽܘܼܩܒܳܠܐ ܓܰܘܳܝܳܐ[2] ܒܦܰܘ̈ܕܶܐ ܘܒܽܘܼܨܳܪ̈ܶܐ ܘܣܶܛܝ̈ܳܢܶܐ ܘܚܶܛܝ̈ܳܢܶܐ. ܡܶܛܠܗܳܕܶܐ ܠܳܐ ܒܳܥܶܝܢ ܕܬܶܥܡܰܪ ܥܰܡܗܽܘܿܢ ܘܰܬܒܽܘܼܬ ܠܘܳܬܗܽܘܿܢ. ܘܒܳܣܡܳܐ ܠܗܽܘܿܢ ܕܢܶܥܪܩܽܘܿܢ ܡܼܶܢ ܨܰܘܒܳܗܿ ܝܰܨܪܳܢܳܐܝܬ. ܕܝܳܕܥܺܝܼܢ ܢܽܘܼܗܪܳܗܿ ܩܳܦܶܠ ܚܶܫܟܳܐ ܓܰܘܳܝܳܐ. ܘܰܡܦܳܣܺܝܼܢ ܕܠܳܐ ܡܰܠܒܫܳܐ ܐܶܠܐ ܝܘܼܩܪܳܐ ܕܰܡܫܰܐܠܘܼܬܳܐ ܘܝܰܨܽܘܦܬܳܢܽܘܼܬܳܐ. ܘܡܶܟܳܐ ܒܳܥܶܝܢ ܕܰܢܩܘܘܢ ܒܕܺܝܼܠܗܽܘܿܢ ܘܢܶܥܪܩܽܘܿܢ ܡܶܢܳܗܿ ܐܰܝܟܰܢܳܐ ܕܠܳܐ ܢܶܫܬܩܶܠ ܡܶܢܗܽܘܿܢ ܢܰܘܚܗܽܘܿܢ ܣܒܺܝܼܪܳܐ ܘܰܒܣܳܡܗܽܘܿܢ ܫܐܺܝܼܠܳܐ. ܘܦܘܼܪܥܳܢܳܗܿ ܗܳܘܶܐ ܠܦܽܘܼܬ ܪܰܒܽܘܼܬܳܐ ܕܪܶܫܡܳܐ[3] ܘܢܺܝܼܫܳܐ. ܘܪܶܫܡܳܐ ܗܳܘܶܐ ܠܦܽܘܼܬ ܛܢܳܢܳܐ ܪܶܓܫܳܢܳܝܳܐ ܘܥܰܡܠܳܐ ܦܰܓܪܳܢܳܝܳܐ. ܟܶܐܡܰܬ ܪܶܫܡܳܐ ܕܺܝܼܠܝ ܗܳܘܶܐ ܠܦܽܘܼܬ ܪܶܓܫܳܐ ܕܺܝܼܠܝ. ܘܪܶܫܡܳܟ ܗܳܘܶܐ ܠܦܽܘܼܬ ܪܶܓܫܳܟ. ܘܪܶܫܡܳܐ ܕܺܝܼܠܶܗ ܗܳܘܶܐ ܠܦܽܘܼܬ ܪܶܓܫܳܐ ܕܺܝܼܠܶܗ. ܘܪܶܫܡܳܐ ܕܺܝܼܠܰܢ ܗܳܘܶܐ ܠܦܽܘܼܬ ܪܶܓܫܳܐ ܕܺܝܼܠܰܢ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܚܟܽܘܿܡ ܚܶܟܼܡܰܬ «ܐܶܢܳܐ ܐ̱ܢܳܐ ܐܘܼܪܚܳܐ ܘܰܫܪܳܪܳܐ ܘܚܰܝ̈ܐ» (ܝܘܚܢܢ: ܝܕ. ܘ) ܡܶܛܽܠ ܡܶܬܒܰܕܩܳܢܽܘܼܬܳܐ ܛܳܒܬܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܥܘܼܽܠ ܒܢܽܘܼܗܪܳܐ ܠܐ ܡܶܣܬܰܕܩܳܢܳܐ ܕܰܫܪܳܪܳܐ ܪܰܒܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܕܰܥ ܛܽܘܼܟܳܣܳܐ ܬܰܩܢܳܐ ܕܰܟܝܳܢܳܐ ܗܳܢܳܐ ܡܠܺܝܼܠܐ ܘܠܳܐ ܡܠܺܝܼܠܳܐ ܐܺܝܼܬܽܘܼܬܳܢܳܐܝܼܬ ܩܳܐܶܡ ܘܡܶܫܬܰܡܠܐ ܒܚܽܘܼܒܳܐ ܘܰܚܢܳܢܳܐ ܘܚܰܘܣܳܢܳܐ ܐܠܗܳܝܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܣܬܰܟܰܠ ܠܶܫܳܢܳܐ ܕܛܘܼܟܳܣܳܐ ܗܳܢܳܐ ܣܢܺܝܼܩܳܐ ܡܕܰܒܪܳܢܳܐ ܕܟܽܠ ܒܶܪ̈ܝܳܢ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܦܪܽܘܿܫ ܚܰܘ̈ܒܶܐ ܫܟܺܝܪ̈ܶܐ ܕܐܶܢܳܢܳܝܽܘܼܬܳܐ ܘܢܶܐܚܽܘܿܕ ܒܩܰܘ̈ܡܶܐ ܗܕܺܝܼܪ̈ܶܐ ܕܐܶܢܰܚܢܳܝܘܼܬܳܐ[4].

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܕܰܥ ܗܳܝ ܕܠܳܐ ܝܳܕܰܥ ܘܢܶܦܽܘܿܩ ܒܰܒܥܳܬ ܝܕܰܥܬܳܐ ܒܶܠܥܳܕ ܪܶܛܢܳܐ ܘܒܽܘܼܓܳܢܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܐܶܠܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܬܡܰܕܰܥ ܒܣܽܘܼ̈ܟܳܠܐ ܕܦܳܪܽܘܿܫܽܘܼܬܳܐ ܕܚܰܘܣܳܢܳܐ[5].

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܬܡܰܟܰܟ ܒܣܽܘܼ̈ܟܳܠܐ ܕܰܚܢܳܢܳܐ ܘܚܰܘܣܳܢܳܐ ܘܐܺܝܼܩܳܪܳܐ ܘܒܶܗ ܒܗܳܢܳܐ ܠܶܫܳܢܳܐ ܕܛܽܘܼܟܳܣܳܐ ܣܢܺܝܼܩܳܐ ܢܶܬܗܰܦܰܟ ܥܰܡ ܢܰܦܫܶܗ ܘܥܰܡ ܒܢ̈ܰܝ ܒܶܣܪܶܗ ܘܓܶܢܣܶܗ ܘܥܰܡ ܟܽܠܶܗ ܟܝܳܢܳܐ ܡܠܺܝܼܠܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܬܡܰܕܰܥ ܒܗܿܳܝ ܕܠܰܝܬ ܣܰܒܥܳܐ ܐܶܠܐ ܛܰܥܡܳܐ ܘܣܽܘܼܟܳܠܐ ܒܫܽܘܼܡܠܳܝܳܐ ܕܛܽܘܼܟܳܣܳܐ ܣܢܺܝܼܩܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܦܪܽܘܿܫ ܒܰܝܢܳܬ ܢܺܝܼܫܳܐ ܘܡܶܨܥܳܝܳܐ. ܘܠܳܐ ܢܣܺܝܼܡ ܡܶܨܥܳܝܳܐ ܕܽܘܼܟܰܬ ܢܺܝܼܫܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܪܕܶܐ ܒܐܘܼܪܰܚ ܬܰܪܥܽܘܼܬܳܐ ܨܶܒܝܳܢܳܝܬܳܐ ܕܣܳܒܠܐ ܠܘܳܬ ܫܘܼܝܳܢܳܐ ܘܚܘܼܝܳܕܳܐ ܕܣܰܩܽܘܼܒܠܳܝܽܘܼܬܳܐ ܓܰܘܳܝܬܳܐ ܒܢܽܘܼܗܪܳܐ ܕܪܽܘܼܚܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܰܢܦܽܘܼܫ ܘܰܢܟܰܬܰܪ ܒܰܢܗܽܘܿܪ ܡܰܠܟܽܘܼܬܳܐ ܕܪܽܘܼܚܳܐ ܒܡܽܘܼܠܳܝܳܐ ܕܫܶܕܬܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܫܟܰܚ ܚܽܘܼܒܶܗ ܘܐܺܝܼܩܳܪܶܗ ܘܫܽܘܼܒܚܶܗ ܓܰܘܳܝܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܕܰܥ ܢܰܦܫܶܗ ܘܰܬܚܽܘܼ̈ܡܰܘܗܝ ܘܟܰܟܪ̈ܰܘܗܝ ܘܰܢܝܰܩܰܪ ܫܰܝܳܐ[6] (ܐܝܼܩܳܪܳܐ ܪܰܒܳܐ) ܕܒܰܪܢܳܫܳܐ ܘܦܽܘܼܪ̈ܫܳܢܶܐ ܐ̱ܢܳܫ̈ܳܝܶܐ ܒܶܠܥܳܕ ܣܘܼ̈ܟܳܝܶܐ ܬܰܢܘ̈ܳܝܶܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܚܟܼܽܘܿܡ ܒܨܺܝܼܪܽܘܼܬܶܗ ܘܰܣܢܺܝܼܩܽܘܼܬܶܗ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܐܶܠܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܫܬܰܡܠܶܐ ܒܗܰܘ ܡܳܐ ܕܘܳܠܶܐ ܡܶܛܠ ܪܘܼܒܳܝܳܐ ܕܢܰܦܫܶܗ ܘܬܽܘܼܪܣܳܝܳܐ ܕܦܰܓܪܶܗ ܘܝܘܼܬܪܳܢܳܐ ܓܰܘܳܢܳܝܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܰܘܪܒ ܡܫܰܐܠܘܼܬܶܗ ܘܰܢܫܰܘܫܶܛ ܗܿܰܘ ܡܳܐ ܕܡܰܫܠܰܡ ܠܰܒܛܺܝܼܠܘܼܬܶܗ ܟܰܕ ܠܳܐ ܡܶܫܬܰܥܠܐ ܘܐܳܦܠܳܐ ܡܶܫܬܰܩܰܠ ܒܗܰܘ ܡܳܐ ܕܺܝܼܗܺܝܼܒ ܠܶܗ ܡܶܢ ܦܽܘܼܪ̈ܫܳܢܶܐ ܘܟܰܟܪ̈ܐ ܕܐܰܝܟ ܐܰܩܡܳܐ ܘܛܽܘܼܗܡܳܐ ܘܫܰܪܒܬܳܐ ܘܗܺܝܼܝܽܘܼܬܳܐ ܘܰܦܢܺܝܼܬܳܐ ܘܰܐܬܪܳܐ ܘܥܘܼܬܪܳܐ ܘܝܺܕܰܥܬܳܐ….

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܰܦܠܰܚ ܪܰܚܝܶܗ ܕܠܐ ܢܶܣܬܰܦܰܩ ܡܶܢ ܛܚܽܘܼܢܳܐ ܘܩܰܡܚܳܐ ܘܠܰܚܡܳܐ ܕܝܘܼܬܪܳܢܳܐ ܡܫܰܘܬܦܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܐܚܽܘܿܕ ܐܘܼܪܚܳܐ ܕܚܽܘܼܠܳܐ ܘܢܶܪܚܽܘܿܩ ܡܼܶܢ ܗܿܳܝ ܠܳܐ ܢܳܡܽܘܿܣܳܝܬܳܐ ܕܚܶܪܡܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܐܶܠܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܒܕܽܘܿܩ ܚܺܐܪܽܘܼܬܳܐ ܕܫܳܪܝܳܐ ܥܝ̈ܳܕܶܐ ܫܟܺܝܼܪ̈ܶܐ ܕܥܰܪܝܽܘܼܬܳܐ[7].

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܐܶܠܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܪܕܽܘܿܦ ܫܶܢܬܳܐ ܕܡܰܐܝܼܢܽܘܼܬܳܐ ܘܡܰܗܡܝܳܢܽܘܼܬܳܐ ܘܫܽܘܼܕܳܠܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܶܣܬܰܟܰܠ ܕܰܘܪܳܐ ܕܓܽܘܼܪܳܓܳܐ ܕܗܰܘܢܳܐ ܘܠܽܘܼܒܳܒܳܐ ܕܠܶܒܳܐ ܒܗܳܠܶܝܢ ܕܬܽܘܼܪܳܨܳܐ ܘܬܽܘܼܩܳܢܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܺܐܠܰܦ ܐܰܝܟܰܢܳܐ ܬܳܒܰܪ ܘܫܳܚܶܩ ܚܰܝܠܳܐ ܦܰܛܥܳܐ ܕܚܽܘܼ̈ܫܳܒܶܐ ܒܠܺܝ̈ܠܐ ܗܿܳܢܽܘܢ ܕܙܳܓܪܺܝܼܢ ܐܘܼܪܰܚ ܛܘܼܘܳܪܳܐ ܘܫܽܘܼܘܫܳܛܐ ܓܰܘܳܝܳܐ ܘܒܰܪܳܝܳܐ.

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܢܺܐܨܰܦ ܕܪܽܘܼܚܳܢܳܝܽܘܼܬܳܐ ܫܰܪܺܝܼܪܬܳܐ ܗܿܳܝ ܕܠܐ ܪܳܥܝܳܐ ܐܶܠܐ  ܒܩܽܘܼܝܳܡܳܐ ܘܬܽܘܼܪܳܨܳܐ ܘܬܽܘܼܩܳܢܳܐ ܪܣܺܝܼܟܳܐ ܕܒܰܪܢܳܫܳܐ ܘܓܰܘܳܐ…

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ (ܕܰܪܓܳܝܳܐ ܥܺܕܬܳܢܝܐ ܘܰܡܕܺܝܼܢܳܝܳܐ ܘܦܽܘܿܠܺܝܼܛܺܝܼܩܳܝܳܐ) ܘܢܶܬܝܰܬܰܪ ܘܢܶܬܗܰܕܰܪ ܒܰܠܒܽܘܼ̈ܟܝܶܐ ܡܰܟܺܝܼ̈ܟܶܐ ܕܚܽܘܼ̈ܟܳܡܶܐ ܡܕܰܒܪ̈ܳܢܽܘܼܬܳܢܳܝܶܐ «ܕܪܳܥܝܳܐ ܛܳܒܳܐ».

ܥܺܝܼܪܽܘܼܬܳܐ ܠܰܝܬܶܝܗܿ ܐܶܠܳܐ ܕܢܶܬܬܥܺܝܼܪ ܒܰܪܢܳܫܳܐ ܘܰܢܝܰܩܰܪ ܘܰܢܫܰܡܶܫ ܠܐܘܼܡܬܶܗ ܘܡܰܪܕܽܘܼܬܶܗ ܘܠܶܫܳܢܶܗ ܘܝܳܪܬܘܼܬܶܗ ܚܰܢܺܝܼܢܳܐܝܬ ܘܰܒܛܺܝܼܠܐܝܼܬ ܘܣܽܘܼܥܪܳܢܳܐܝܼܬ.

ܐܳܘ ܒܰܪ ܘܒܰܪܬ ܡܰܪܕܽܘܼܬܳܐ ܘܣܶܦܪܳܝܘܼܬܳܐ ܕܠܶܫܳܢܳܐ ܣܘܼܪܝܳܝܳܐ!

ܣܳܒܰܪ ܐ̱ܢܳܐ ܠܦܽܘܼܬ ܫܪܳܪܳܐ ܢܰܗܺܝܼܪܳܐ ܡܰܘܬܪܳܢܝܳܐ ܕܢܰܝܬܶܐ ܠܒܳܠܐ ܕܠܰܡ ܡܰܪܕܽܘܼܬܳܐ ܡܚܺܝܼܠܬܳܐ ܡܰܒܽܘܼܥܳܐ ܐܺܝܬܶܝܗܿ ܕܣܰܢܝ̈ܳܬܳܐ. ܘܫܽܘܼܘܕܳܝܰܐ ܗ̱ܘ ܕܰܓܳܠܐ ܫܽܘܼܒܗܳܪܳܐ ܗܿܰܘ ܐܰܝܢܳܐ ܕܰܓܠܺܝܼܙ ܗ̱ܘ ܡܼܶܢ ܡܶܣܬܰܟܠܳܢܽܘܼܬܳܐ. ܘܰܬܪ̈ܰܝܗܽܘܿܢ ܕܳܡܶܝܢ ܠܰܥ̈ܢܳܢܶܐ ܕܠܰܝܬ ܒܗܶܝܢ ܡܶܛܪܳܐ.

ܡܳܕܶܝܢ ܓܶܕ ܢܰܠܒܶܫ ܫܽܘܼܒܗܳܪܰܢ (ܝܳܪܬܽܘܼܬܳܢܳܝܳܐ ܘܡܰܪܕܽܘܼܬܳܢܳܝܳܐ ܘܐܽܘܼܡܬܳܢܳܝܳܐ) ܡܶܣܬܰܟܠܳܢܽܘܼܬܳܐ ܘܰܥܪܺܝܼܡܽܘܼܬܳܐ.

ܘܬܰܘ ܢܶܦܽܘܼܨ ܡܼܶܢܰܢ ܪ̈ܶܥܝܳܢܶܐ ܣܪ̈ܺܝܼܚܶܐ ܘܢܶܐܚܘܼܕ ܒܪ̈ܶܥܝܳܢܶܐ ܪ̈ܡܺܝܼܣܶܐ ܗܿܳܢܽܘܿܢ ܕܰܡܝܰܬܪܺܝܼܢ ܡܰܗܒܳܐ ܩܕܳܡ ܡܰܣܒܳܐ.

ܘܬܰܘ ܢܶܫܽܘܿܩ ܘܢܶܨܪܶܐ ܚܶܫܟܳܐ ܟܪܺܝܼܟܳܐ -(ܕܕܽܘܪ̈ܟܳܢܶܐ ܙܠܺܝ̈ܡܶܐ ܘܰܒܠܺܝ̈ܠܐ)- ܠܡܶܚܙܳܐ ܚ̈ܕܳܕܶܐ ܒܥܰܝܢܳܐ ܕܠܶܒܳܐ ܘܢܶܬܗܰܦܰܟ ܥܰܡܚ̈ܕܳܕܶܐ ܒܢܽܘܼܗܪܳܐ ܕܪܽܘܼܚܳܐ.

ܘܬܰܘ ܢܫܺܝܼܓ ܚܘܼܫܳܒܰܢ ܒܡܰܝ̈ܳܐ ܕܰܚܢܳܢܳܐ ܘܰܢܚܰܠܶܠ ܨܶܒܝܳܢܰܢ ܒܐܽܘܼܚܠܳܐ[8] ܕܚܰܘܣܳܢܳܐ ܐܰܝܟܰܢܳܐ ܕܢܶܩܪܽܘܿܒ ܠܢܰܦܫܰܢ ܘܢܶܗܦܽܘܿܟ ܠܰܟܝܳܢܰܢ.

ܘܬܰܘ ܢܶܡܙܽܘܿܓ ܩܰܘܡܰܢ ܘܚܰܘܪܰܢ ܘܕܰܘܪܰܢ ܘܬܰܪܥܺܝܼܬܰܢ ܒܰܚܢܳܢܳܐ ܘܚܰܘܣܳܢܳܐ ܘܰܒܦܽܘܼܪ̈ܓܳܠܐ ܕܝܽܘܼܠܦܳܢܳܐ ܡܠܺܝܼܠܽܐ.

ܬܰܘ ܢܺܐܨܰܦ ܐܰܟܚܰܕ ܠܰܡܢܰܚܳܡܽܘܼ ܒܰܢ ܚܰܝܠܐ ܕܣܽܘܼ̈ܟܳܠܐ ܟܺܐܢ̈ܶܐ ܕܰܬܪܺܝܼܨܽܘܼܬ ܢܰܦܫܳܐ ܗܿܳܝ ܕܪܳܕܦܳܐ ܢܶܒ̈ܗܶܐ ܣܢܰܝ̈ܳܐ ܕܫܽܘܼܥܠܳܝܳܐ.

ܘܬܰܘ ܟܽܠܰܢ ܫܘܳܬ ܢܶܬܚܰܦܰܛ ܠܡܶܫܕܳܐ ܡܶܢܰܢ ܟܽܠܗܶܝܢ ܙܠܺܝܼ̈ܡܳܬܶܗ ܕܡܰܕܥܳܐ ܥܕܺܝܼܠܐ ܘܢܶܣܒܽܘܿܟ ܒܰܬܪ̈ܺܝܼܨܳܬܳܐ ܕܫܽܘܼܡܠܳܝܳܐ…

ܘܬܰܘ ܟܽܠܰܢ ܫܘܳܬ ܢܶܠܒܰܫ ܡܰܕܥܳܐ ܡܫܰܝܢܳܐ ܡܗܰܕܝܳܢܐ ܕܟܺܐܢܽܘܼܬܳܐ ܘܰܡܚܰܝܠܳܢܳܐ ܕܚܺܐܪܽܘܼܬܳܐ.

ܘܬܰܘ ܟܽܠܰܢ ܥܰܡ ܟܽܠܰܢ ܫܘܳܬ ܢܕܽܘܼܫ ܥܽܘܼܩ̈ܣܶܐ ܕܳܒܽܘܿܨ̈ܶܐ ܕܰܥܫܽܘܼܡܝܳܐ ܘܰܛܠܽܘܼܡܝܳܐ ܘܰܪܕܽܘܼܦܝܳܐ ܒܚܰܘ̈ܩܶܐ ܦܪ̈ܺܝܼܫܶܐ ܕܬܶܫܡܶܫܬܳܐ ܕܡܕܰܒܪܳܢܽܘܼܬܰܢ.

ܘܬܘ ܢܶܦܽܘܼܨ ܝܰܩܽܘܼܪ̈ܳܬܰܢ ܩܕܳܡ ܕܢܶܥܢܰܕ ܫܶܡܫܳܐ ܕܐܝܼܬܘܼܬܰܢ ܘܚܽܘܼܒܳܐ ܕܣܰܟܽܘܼܠܬܳܢܽܘܼܬܰܢ.

ܘܬܰܘ ܢܶܚܕܶܐ ܘܢܶܬܒܰܣܰܡ ܥܰܡ ܚܕ̈ܳܕܶܐ ܐܰܝܟܰܢܳܐ ܕܢܶܨܡܰܚ ܢܘܼܗܪܳܐ ܕܡܰܪܕܽܘܼܬܰܢ ܘܢܶܫܬܰܦ̈ܝܳܢ ܥܰܪ̈ܡܳܬܰܢ.

ܘܬܰܘ ܢܶܛܡܽܘܿܫ ܘܢܶܡܫܽܘܿܚ ܦܬܺܝܼܠܬܰܢ ܒܡܶܫܚܳܐ ܕܣܽܘܼܟܳܠܐ ܘܐܺܝܼܩܳܪܳܐ ܐܰܝܟܰܢܳܐ ܕܠܐ ܢܶܬܩܰܒܪ̈ܳܢ ܚܶܟ̈ܡܳܬܰܢ ܘܢܶܣܬܰܪ̈ܚܳܢ ܣܳܚܪ̈ܳܬܰܢ ܒܥܳܪ̈ܘܿܨܳܬܳܐ ܕܛܳܪ̈ܝܳܢ ܘܐܳܬܝ̈ܳܢ..

ܗܺܝܼ ܗܳܕܶܐ ܙܳܕܶܩ ܕܢܶܥܒܶܕ ܡܶܛܠ ܕܶܠܩܳܐ ܦܰܐܝܳܐ ܕܰܫܪܳܓܳܐ ܕܐܺܝܼܬܽܘܼܬܰܢ ܘܗܰܝܡܳܢܽܘܼܬܰܢ ܘܡܰܪܕܽܘܼܬܰܢ ܘܠܶܫܳܢܰܢ ܒܟܽܠܗܶܝܢ ܦܶܢܝ̈ܳܬܰܢ.

ܠܳܐ ܢܶܛܥܶܐ: ܠܰܝܬ ܟܘܼܫܳܪܳܐ ܘܢܶܨܚܳܢܳܐ ܟܰܪ ܕܠܰܝܬ ܥܰܡܠܳܐ ܘܰܛܢܳܢܳܐ. ܘܛܰܝܒܽܘܼܬܐ ܕܫܽܘ̈ܟܳܢܶܐ ܪ̈ܰܒܶܐ ܠܐ ܐܳܬܝܳܐ ܐܶܠܳܐ ܒܳܬܰܪ ܡܰܟܺܝܼܟܽܘܼܬܳܐ ܘܟܰܫܺܝܪܽܘܬܳܐ. ܘܐܺܝܼܩܳܪܳܐ ܠܐ ܡܶܬܩܰܕܶܐ ܐܶܠܳܐ ܒܝܰܕ ܬܰܪܒܺܝܼܬܳܐ ܟܢܺܝܼܟܬܳܐ ܘܰܒܝܰܕ ܣܽܘܼܥܪ̈ܳܢܶܐ ܡܰܘܬܪ̈ܳܢܶܐ ܘܰܡܩܰܘ̈ܝܳܢܶܐ.

ܬܰܘܕܺܝ ܡܳܕܶܝܢ ܠܥܺܝܼܪܽܘܬܳܐ ܘܬܰܪܒܺܝܼܬܳܐ ܦܳܪܽܘܿܫܬܳܐ ܕܥܳܒܽܘܿܕܳܐ ܡܝܰܩܪܳܢܳܐ ܘܰܡܓܰܡܪܳܢܳܐ!

 

ܝܘܣܦ ܒܓܬܫ

ܚܘܕܪܐ ܕܡܪܕܘܬܐ ܘܣܦܪܝܘܬܐ ܕܠܫܢܐ ܣܘܪܝܝܐ. ܡܪܕܝܢ

 

 

[1]   ܪܘܼܫܳܢܳܐ: İktidar / Authority

[2]  ܣܽܘܼܩܒܳܠܐ ܓܰܘܳܝܳܐ: İçsel Yüzleşme / İnner Confrontation

 [3]  ܪܼܶܫܡܳܐ: Hisse / Share

[4] ܐܶܢܰܚܢܳܝܼܘܬܳܐ: Diğergamlık / Altruism

[5]  ܦܦܳܪܘܿܫܽܘܼܬܳܐ ܕܚܰܘܣܳܢܳܐ: Merhametli Farkındalık / Compassionate Awareness

[6]  ܫܰܝܳܐ: Haysiyet / Dignity

[7] ܥܰܪܝܽܘܬܳܐ: Bağımlılık / Addiction

[8] ܐܽܘܼܚܠܐ: Sıvı Sabun / Liquid Soap