ܣܳܦܪܽܘܼܬܳܐ ܕܺܝܼܠܝ

ܣܳܦܪܽܘܼܬܳܐ ܕܺܝܼܠܝ

ܝܕܰܥܬܳܐ ܓܶܝܪ ܛܳܥܢܳܐ ܒܓܰܘܳܗܿ ܡܫܰܐܠܽܘܼܬܳܐ ܘܰܒܛܺܝܼܠܽܘܼܬܳܐ ܬܺܐܪܬܳܢܳܝܬܳܐ. ܘܠܳܐ ܡܶܬܗܰܒܒܳܐ ܐܶܠܳܐ ܒܥܰܦܪܳܐ ܕܦܽܘܼܪ̈ܫܳܢܶܐ ܘܶܒܫܶܡܫܳܐ ܕܚܽܘܼܡ̈ܣܳܢܶܐ. ܐܶܠܳܐ ܒܪܰܡ ܟܰܕ ܡܶܣܬܰܪܩܳܐ ܘܡܶܣܬܰܦܩܳܐ ܡܼܶܢ ܚܽܘܼ̈ܟܳܡܶܐ ܕܩܽܘܼܫܬܳܐ ܘܟܺܐܢܽܘܼܬܳܐ ܘܚܺܐܪܽܘܼܬܳܐ ܘܫܰܘܝܽܘܼܬܳܐ ܘܰܡܠܺܝܼܠܽܘܼܬܳܐ ܕܰܚܢܳܢܳܐ ܘܚܰܘܣܳܢܳܐ܆ ܡܶܫܬܰܚܠܦܳܐ ܠܐܢܳܢܳܝܽܘܼܬܳܐ ܘܰܨܢܺܝܼܥܽܘܼܬܳܐ ܘܝܰܥܢܽܘܼܬܳܐ ܚܕܳܐ ܕܡܶܫܬܰܒܠܳܐ ܡܼܶܢ ܩܨ̈ܳܨܶܐ ܓܰܘ̈ܳܝܶܐ ܘܕܺܝܼ̈ܢܶܐ ܩܰܕ̈ܡܶܐ. ܘܗܳܝܕܶܝܢ ܪܽܘܿܟ ܪܽܘܿܟ ܘܢܺܝܼܚ ܘܢܺܝܼܚ ܩܶܨܰܬ ܫܽܘܼܚܠܳܦܳܐ ܗܳܢܳܐ ܡܰܟܝܳܢܳܐ ܣܳܐܶܦ ܘܡܳܐܶܬ ܕܰܘܪܳܗܿ ܗܿܰܘ ܕܦܳܬܰܚ ܬܰܪ̈ܥܶܐ ܣܟܺܝܼܪ̈ܶܐ ܘܰܩܦܺܝܼ̈ܠܶܐ.

ܘܡܰܪܕܽܘܼܬܳܐ ܕܶܝܢ ܡܰܠܦܳܐ ܕܠܳܐ ܡܶܬܡܰܟܰܟ ܘܐܳܦܠܳܐ ܡܶܬܡܰܕܰܥ ܐܶܠܐ ܡܩܰܒܠܳܢܳܐ ܕܰܒܨܺܝܼܪܽܘܼܬܳܐ ܘܰܡܚܺܝܼܠܽܘܼܬܳܐ. ܒܰܕ ܠܰܝܬ ܬܚܶܝܬ ܪܩܺܝܼܥܳܐ ܒܽܘܼܝܳܢܳܐ ܕܰܡܢܰܟܪܰܝ ܡܼܶܢ ܨܰܘܼܪ̈ܳܢܶܐ. ܘܣܽܘܼܟܳܠܐ ܗܳܢܳܐ ܪܰܒܳܐ ܠܳܐ ܨܳܡܰܚ ܘܐܳܦܠܳܐ ܢܳܨܰܚ ܐܶܠܳܐ ܒܬܶܫܡܶܫܬܳܐ ܕܝܽܘܼܬܪܳܢܳܐ ܓܰܘܳܢܳܝܳܐ. ܡܶܟܳܐ ܟܰܕ ܨܠܺܝܬ ܠܐܘܼܪܰܚ ܩܶܪܝܳܢܳܐ ܘܗܽܘܼܓܳܝܳܐ ܘܣܳܦܪܽܘܼܬܳܐ ܡܰܪܕܽܘܼܬܳܢܳܝܬܳܐ ܠܐ ܥܳܕ ܒܳܥܶܐ ܐ̱ܢܳܐ ܕܐܰܦܪܶܐ ܘܐܶܟܬܽܘܿܒ ܡܶܕܶܡ ܕܠܰܝܬ ܒܶܗ ܣܘܼܟܳܠܐ ܘܝܽܘܼܬܪܳܢܳܐ ܚܰܕܬܳܐ ܘܫܽܘܼܘܫܳܛܳܐ ܐܰܟܝܼܦܳܐ ܡܶܛܠ ܒܰܪܢܳܫܳܐ ܘܓܰܘܳܐ. ܘܰܒܟܽܠܶܗ ܬܽܘܼܩܦܳܐ ܘܣܽܘܼܦܩܳܢܳܐ ܕܺܝܼܠܝ ܪܳܕܶܐ ܐ̱ܢܳܐ ܒܐܘܼܪܚܳܐ ܗܳܕܐ ܣܒܺܝܼܣܰܬ ܥܩܽܘܼ̈ܠܐ ܕܢܽܘܼܦܳܫܳܐ ܪܶܥܝܳܢܳܝܳܐ ܘܛܘܼܥܳܡܳܐ ܠܶܫܳܢܳܝܳܐ. ܡܶܛܠܗܳܕܶܐ ܗܳܐ ܡܼܶܢ ܫܢܰܝ̈ܐ ܢܰܦܺܝܼܩ ܐ̱ܢܳܐ ܒܰܒܥܳܬ ܣܽܘܼ̈ܟܳܠܐ ܓܢܺܝܼ̈ܒܶܐ ܘܐܰܒܺܝܼ̈ܕܶܐ ܐܰܝܟܰܢܳܐ ܕܐܶܦܽܘܼܚ ܢܽܘܼܗܪܳܐ ܘܫܽܘܼܦܪܳܐ ܓܰܘܳܝܳܐ ܕܣܽܘܼ̈ܟܳܠܳܝܳܬܐ. ܡܶܛܠܗܳܕܶܐ ܒܚܰܕܽܘܼܬܳܐ ܕܠܶܒܳܐ ܒܪܰܡ ܒܙܰܘܥܳܐ ܥܡܺܝܼܠܳܐ ܒܛܺܝܼܠܐܝܼܬ ܦܳܠܚ ܘܟܳܬܶܒ ܐ̱ܢܳܐ ܫܰܪܝܳܐܝܼܬ ܒܢܺܝܼܫܳܐ ܕܐܶܦܪܽܘܿܥ ܡܢܳܬܳܐ ܡܼܶܢ ܚܽܘܼ̈ܒܠܶܐ ܛܰܪ̈ܩܶܐ ܕܡܰܪܕܽܘܼܬܰܢ ܘܐܰܘܬܰܪ ܠܓܰܘܳܐ ܘܰܠܫܰܪ̈ܒܳܬܐ ܕܒܳܬܪܰܢ. ܘܗܺܝܼ ܗܳܕܶܐ ܥܳܒܶܕ ܐ̱ܢܳܐ ܕܺܝܼܠܳܢܳܐܝܼܬ ܠܕܽܘܼܪܳܫܳܐ ܘܗܽܘܼܓܳܝܳܐ ܘܚܽܘܼܕܳܬܳܐ ܕܟܿܠ ܡܿܰܢ ܕܒܳܥܶܐ ܕܢܶܩܪܶܐ ܘܢܶܪܢܶܐ ܣܽܘܼܪܝܳܐܝܼܬ. ܘܐܰܝܟܰܢܳܐ ܕܠܳܐ ܢܶܬܓܰܠܙܽܘܿܢ ܚܰܘ̈ܩܶܐ ܕܣܶܦܪܳܝܽܘܼܬܳܢ ܡܼܶܢ ܛܳܒ̈ܳܬܳܐ ܕܢܳܒ̈ܥܳܢ ܡܼܶܢ ܡܰܥܒ̈ܕܳܢܘܳܬܳܗܿ ܕܡܰܪܕܽܘܼܬܰܢ܆ ܟܰܕ ܡܥܰܙܶܙ ܐ̱ܢܳܐ ܚܢܳܢܳܐ ܘܚܰܘܣܳܢܳܐ. ܘܣܳܐܡ ܐ̱ܢܳܐ ܥܰܡܠܳܐ ܗܳܢܳܐ ܥܰܠ ܦܳܬܽܘܿܪܳܐ «ܕܥܽܘܼܪܦܳܢܳܐ» ܡܶܛܽܠ ܫܽܘܼܘܫܳܛܳܐ ܪܶܥܝܳܢܳܝܳܐ ܘܡܰܕܥܳܐ ܚܠܺܝܼܡܳܐ ܠܡܶܬܒܰܪ ܚܰܝܠܳܐ ܕܐܶܢܳܢܳܝܽܘܼܬܳܐ ܘܰܨܢܺܝܼܥܽܘܼܬܳܐ ܚܶܫܽܘܼܟܬܳܐ.

ܗܶܢܳܝܳܢܳܐ ܘܝܽܘܼܬܪܳܢܳܐ ܒܰܪܳܝܳܐ܆ ܠܳܐ ܡܰܨܝܳܐ ܕܢܶܗܘܶܐ ܙܥܽܘܼܪܳܐ ܘܰܒܨܺܝܼܪܳܐ܆ ܐܶܢ ܗܶܕܣܳܐ ܘܕܽܘܼܘܳܕܳܐ ܘܰܬܥܳܫܳܐ ܓܰܘܳܝܳܐ ܗܳܘܶܐ ܪܰܒܳܐ ܘܰܬܪܺܝܼܨܳܐ ܘܐܶܢܰܚܢܳܝܳܐ. ܘܗܶܢܝܳܢܳܐ ܘܝܽܘܼܬܪܳܢܳܐ ܒܰܪܳܝܳܐ܆ ܠܳܐ ܡܰܨܝܳܐ ܕܢܶܗܘܶܐ ܡܬܰܪܣܝܳܢܳܐ ܘܡܰܘܬܪܳܢܳܐ܆ ܐܶܢ ܗܶܕܣܳܐ ܘܕܽܘܼܘܳܕܳܐ ܘܰܬܥܳܫܳܐ ܓܰܘܳܝܳܐ ܗܳܘܶܐ ܙܥܽܘܼܪܳܐ ܘܙܺܐܦܳܢܳܐ ܘܐܶܢܳܢܳܝܳܐ. ܡܶܛܽܠܗܳܕܶܐ ܩܰܢܝܳܐ ܕܺܝܼܠܝ ܠܳܐ ܓܳܐܰܚ ܐܶܠܳܐ ܒܰܫܒܺܝܼܠܳܐ ܣܦܺܝܼܪܳܐ ܘܰܦܪܺܝܼܫܳܐ. ܘܚܘܼ̈ܫܳܒܰܝ ܠܳܐ ܡܶܫܬܰܦܟܺܝܼܢ ܘܡܶܬܓܰܫܡܺܝܼܢ ܠܦܽܘܼܬ ܚܰܘܪܳܐ ܘܩܰܘܡܳܐ ܘܓܰܘܚܳܐ ܕ«ܐܶܢܳܐ ܘܐܰܢ̱ܬ. ܘܗܳܢܳܐ ܘܗܿܰܘ». ܐܶܠܐ ܠܦܽܘܼܬ ܣܰܟܽܘܼܠܬܳܢܽܘܼܬܳܐ ܐܶܢܰܚܢܳܝܬܳܐ ܗܿܳܝ ܕܐܺܝܼܬܶܝܗܿ ܐܽܘܿܣܺܝܰܐ ܕܡܰܪܕܽܘܼܬܳܐ ܣܽܘܼܪܝܳܝܬܳܐ. ܒܰܕ ܡܗܰܝܡܶܢ ܐ̱ܢܳܐ ܕܙܰܪܥܳܐ ܐܰܠܗܳܝܳܐ ܛܡܺܝܼܪ ܒܥܰܦܪܳܐ ܕܠܶܒܳܐ. ܘܙܰܪܥܳܐ ܗܳܢܳܐ ܠܳܐ ܫܳܘܰܚ ܘܐܳܦܠܳܐ ܝܳܪܶܒ ܘܗܳܘܶܐ ܐܺܝܼܠܳܢܳܐ ܪܰܒܳܐ ܐܰܘ ܙܥܽܘܼܪܳܐ ܕܡܶܣܬܰܪܥܰܦ ܒܦܺܐܪ̈ܶܐ ܒܰܫܺܝܼ̈ܠܶܐ ܐܶܠܳܐ ܒܡܶܬܬܰܫܩܝܳܢܽܘܼܬܳܐ ܘܫܽܘܼܩܳܝܳܐ ܕܚܽܘܼ̈ܫܳܒܶܐ ܡܬܰܪ̈ܣܝܳܢܶܐ ܘܡܰܘܬܪ̈ܳܢܶܐ ܘܰܡܪ̈ܰܒܝܳܢܶܐ. ܒܕܐܳܡܰܪ ܡܰܬܠܳܐ: «ܗܿܰܘ ܕܠܳܐ ܡܚܰܪܰܪ ܢܰܦܫܶܗ ܡܼܶܢ ܛܰܡܽܐܘܼܬܳܐ ܕܢܰܦܫܶܗ ܠܐ ܡܶܬܚܰܪܰܪ ܡܼܶܢ ܛܰܡܽܐܘܼܬܳܐ ܕܰܐ̱ܚܪ̈ܳܢܶܐ.»

ܪ̈ܶܥܝܳܢܶܐ ܓܶܝܪ ܕܟܳܬܶܒ ܘܦܳܪܶܣ ܐ̱ܢܳܐ ܡܽܘܼܙܳܓܳܐ ܐܶܢܽܘܿܢ ܕܗܿܰܘ ܕܥܰܬܺܝܼܩ ܘܐܰܒܳܗܳܝ ܒܡܶܣܬܰܟܠܳܢܽܘܼܬܳܐ ܚܕܰܬܳܐ. ܘܚܽܘܼܠܛܳܢܳܐ ܐܶܢܽܘܿܢ ܕܬܽܘܼܪ̈ܣܳܝܶܐ ܝܽܘܼ̈ܠܦܳܢܳܝܶܐ ܕܰܦܪܺܝܼܣܺܝܼܢ ܗܳܪܟܳܐ ܘܬܰܡܳܢ ܒܣܶܦܪ̈ܶܐ ܕܳܪ̈ܳܢܳܝܶܐ. ܘܒܳܕܪܺܝܼܢ ܘܦܳܪܣܺܝܼܢ ܥܽܘܼܙܳܝܳܐ ܘܚܽܘܼܣܳܢܳܐ ܘܚܰܘܣܳܢܳܐ ܘܚܽܘܼܡܣܳܢܳܐ ܕܡܰܪܕܽܘܼܬܰܢ. ܘܦܳܠܚܺܝܼܢ ܘܟܳܪܒܺܝܼܢ  ܬܰܪܥܺܝܼܬܳܐ ܒܚܽܘܼ̈ܟܳܡܶܐ ܕܡܰܕܥܳܐ ܬܪܺܝܼܨܳܐ ܕܐܶܢܰܚܢܳܝܽܘܼܬܳܐ ܢܰܗܺܝܼܪܬܳܐ. ܘܠܰܘ ܒܰܠܚܽܘܿܕ ܗܳܕܶܐ ܐܶܠܳܐ ܐܳܦ ܕܳܚܩܺܝܼܢ ܘܛܳܪܕܺܝܢ ܐܶܢܳܢܳܝܽܘܼܬܳܐ ܚܶܫܽܘܼܟܬܳܐ. ܒܰܕ ܕܠܳܐ ܟܶܫܠܳܐ ܘܰܕܠܳܐ ܦܽܘܼܠܳܓܳܐ ܚܳܫܚܺܝܼܢ ܘܐܳܙܠܺܝܼܢ ܠܰܥܨܳܒܳܐ ܘܣܽܘܼܡܣܳܡܳܐ ܕܡܰܪ̈ܥܶܐ ܢܰܦܫ̈ܳܢܳܝܶܐ ܗܿܢܽܘܿܢ ܕܣܳܪܚܺܝܼܢ ܘܣܳܓܦܺܝܼܢ ܡܽܘܼܙܳܓܳܐ ܒܰܣܺܝܼܡܳܐ ܒܟܽܠ ܐܰܬܰܪ ܘܦܶܢ̈ܝܳܢ. ܘܡܼܶܢ ܓܰܒܳܐ ܬܰܪܣܺܝܼܬܳܢܳܝܳܐ ܘܰܡܕܰܒܪܳܬܽܘܼܢܳܝܳܐ ܡܠܽܘܼ̈ܐܶܐ ܐܶܢܽܘܿܢ ܙܽܘܼ̈ܡܳܝܶܐ ܕܢܳܣܟܺܝܼܢ ܘܫܳܦܥܺܝܼܢ ܚܰܝܠܐ ܡܨܰܝܒܳܢܐ ܘܰܡܫܰܒܠܳܢܳܐ ܒܕܰܪ̈ܓܶܐ ܥܺܕ̈ܬܳܢܳܝܶܐ ܘܐܰܩܡ̈ܶܐ ܥܳܠܡ̈ܳܝܶܐ: ܝܺܩܰܪ̈ܬܳܢܳܝܶܐ ܘܡܰܕܪ̈ܰܫܬܳܢܳܝܶܐ ܘܰܟܢܽܘܼ̈ܫܝܳܝܶܐ ܘܐܰܡ̈ܢܳܝܶܐ ܘܐܽܘܼ̈ܡܬܳܢܳܝܶܐ ܘܦܽܘܼ̈ܠܺܝܼܛܺܝܼܩܳܝܶܐ ܘܦܽܘܼ̈ܠܚܳܢܳܝܶܐ ܡܼܶܢ ܟܽܠ ܩܰܘ̈ܡܳܢ ܘܡܽܘܼ̈ܫܚܳܢ. ܘܰܬܢܳܢ ܡܰܘܕܰܥ ܐ̱ܢܳܐ ܕܠܰܡ ܬܽܘܼܩܦܳܐ ܥܰܙܺܝܼܙܳܐ ܡܰܠܒܫܺܝܼܢ ܥܛܽܘܼ̈ܦܝܶܐ[1] ܘܓܽܘܼܪ̈ܳܓܶܐ ܡܠܰܒ̈ܒܳܢܶܐ ܕܡܶܫܬܰܡܥܺܝܼܢ ܡܼܶܢ ܣܶܕܪ̈ܶܐ ܐܘܼ̈ܡܬܳܢܳܝܶܐ ܕܟܽܠܗܶܝܢ ܦܶܢܝ̈ܳܬܰܢ.

ܫܪܳܪܳܐ ܠܡܺܐܡܰܪ: ܡܼܶܢ ܝܰܡܳܐ ܪܰܒܳܐ ܠܳܐ ܦܳܫ ܠܰܢ ܐܶܠܰܐ ܫܰܪܟܳܢܳܐ ܙܥܽܘܿܪܳܐ. ܘܕܰܠܺܝܼ̈ܠܺܝܼܢ ܣܳܦܪ̈ܶܐ ܕܰܡܠܺܝܼܛܺܝܼܢ ܒܚܽܘܼ̈ܟܳܡܶܐ ܩܰܛܺܝܼ̈ܢܶܐ ܕܠܶܫܳܢܳܐ ܣܽܘܼܪܝܳܝܳܐ. ܡܶܛܽܠܗܳܕܶܐ ܚܰܘ̈ܩܶܐ ܕܣܶܦܪܳܝܽܘܼܬܰܢ ܓܠܺܝܼܙܺܝܼܢ ܡܼܶܢ ܟܪ̈ܽܘܼܒܝܶܐ ܠܶܫܳܢ̈ܝܶܐ. ܘܰܓܠܺܝܼܙܽܘܼܬܳܐ ܗܳܕܶܐ ܕܳܚܩܳܐ ܠܕܺܝܼܢܽܘܼܬ ܬܺܐܪܬܳܐ ܘܰܠܗ̈ܶܕܣܶܐ ܘܚܽܘܼ̈ܫܳܒܶܐ ܬܟܺܝܼ̈ܒܶܐ. ܘܐܠܘܼܠܳܐ ܕܽܘܼܘ̈ܳܕܶܐ ܠܶܫܳܢ̈ܳܝܶܐ ܘܦܽܘܼܪ̈ܫܳܢܶܐ ܘܦܽܘܼܪ̈ܥܳܢܶܐ ܛܰܪ̈ܩܶܐ ܕܣܶܦܪܳܝܽܘܼܬܰܢ ܗܳܢܳܐ ܟܿܽܠܶܗ ܠܳܐ ܡܶܬܓܰܪܰܓ ܗ̱ܘܺܝܬ ܠܡܶܟܬܰܒ ܣܽܘܼܪܝܳܐܝܼܬ. ܘܪܳܓܳܐ ܠܺܝܼ ܠܡܶܫܡܰܥ ܘܒܳܣܡܳܐ ܠܺܝܼ ܠܡܰܫܡܳܥܽܘܼ ܨܰܘܬܳܐ ܕܡܰܪܕܽܘܼܬܰܢ ܒܙܰܒܢܳܐ ܗܳܢܳܐ ܕܒܶܗ ܕܳܝܒܺܝܼܢ ܘܡܶܫܬܪܶܝܢ ܣܽܘܼ̈ܟܳܠܶܝܗܿ ܩܶܨܰܬ ܫܰܘ̈ܒܶܐ ܒܰܪ̈ܳܝܶܐ ܘܕܰܘ̈ܫܶܐ ܓܰܘ̈ܳܝܶܐ ܗܿܳܢܽܘܿܢ ܕܣܳܪܚܺܝܼܢ ܘܢܳܟܶܝܢ ܡܰܕܪܟܳܢܽܘܼܬܰܢ.

ܐܰܪܰܐ ܫܳܡܥܺܝܼܢܰܢ ܨܰܘܬܳܐ ܗܳܢܳܐ ܕܙܳܥܶܩ ܡܼܶܢ ܥܽܘܼܡܩܳܐ ܕܝܳܪܬܽܘܼܬܰܢ ܫܺܝܼܬܳܢܳܝܬܳܐ؟ ܐܰܪܰܐ ܟܰܝ ܕܳܪܟܺܝܼܢܰܢ ܓܰܘܳܝ̈ܳܬܳܗܿ؟ ܐܰܪܰܐ ܟܰܝ ܐܶܡܰܬܝ ܥܳܠܒܺܝܼܢ ܘܢܳܨܚܺܝܼܢ ܙܰܗܪܺܝܼܪ̈ܶܐ ܕܣܽܘܼ̈ܟܳܠܶܝܗܿ ܡܠܺܝܼ̈ܠܶܐ ܘܰܪ̈ܘܺܝܼܚܶܐ؟   

ܝܼܺܕܺܝܼܥܳܐ ܗ̱ܳܝ ܕܒܐܰܡܽܘܼ̈ܡܶܐ ܕܪ̈ܺܝܼܫܶܐ ܠܳܐ ܡܰܨܝܳܐ ܕܢܶܬܬܰܚܰܡ ܘܢܶܫܬܰܡܰܗ ܥܰܡܠܳܐ ܣܦܺܝܼܪܳܐ ܕܡܶܬܝܰܐܒ ܕܢܶܡܠܐ ܒܨܺܝܼܪ̈ܳܬܐ ܘܰܢܣܽܘܼܓ ܬܽܘܼܪ̈ܥܳܬܳܐ ܘܰܢܚܽܘܿܛ ܨܪ̈ܰܘܳܬܳܐ ܒܣܽܘܼ̈ܟܳܠܐ ܒܕܺܝܼܪ̈ܶܐ ܒܪܰܡ ܟܒܺܝܼ̈ܫܶܐ ܕܡܰܪܕܽܘܼܬܳܐ ܣܽܘܼܪܝܳܝܬܳܐ. ܡܶܛܠܗܳܕܶܐ ܡܼܶܢ ܙܒܰܢ ܠܰܙܒܰܢ ܢܳܦܶܠ ܐ̱ܢܳܐ ܒܩܽܘܼܛܳܥܳܐ ܘܪܳܓܶܫ ܐ̱ܢܳܐ ܐܰܟܡܰܢ ܕܰܒܡܰܕܒܪܳܐ ܫܰܗܝܳܐ ܩܳܐܡ ܐ̱ܢܳܐ ܘܥܰܠ ܦܰܪܙܠܳܐ ܩܰܪܺܝܼܪܳܐ ܢܳܩܶܫ ܐ̱ܢܳܐ ܟܕ ܡܰܬܚܰܦܰܛ ܐ̱ܢܳܐ ܕܐܶܗܘܶܐ ܡܰܦܽܘܼܚܳܐ ܠܢܽܘܼܗܪܳܐ ܓܰܘܳܝܳܐ ܘܡܰܦܽܘܼܚܳܢܳܐ ܕܣܽܘܼ̈ܟܳܠܝܳܬܳܐ.

ܫܽܘܼܘ̈ܕܳܥܶܐ ܦܪ̈ܺܝܼܣܶܐ ܘܰܩܪ̈ܺܝܼܚܶܐ ܡܚܰܘܶܝܢ ܕܠܰܡ ܣܽܘܼܓܐܳܐ ܕܩܶܛܪ̈ܶܐ ܘܒܽܘܼ̈ܠܒܳܠܐ ܘܕܽܘܼ̈ܘܳܕܶܐ ܦܽܘܼܪ̈ܢܳܣܳܝܶܐ ܘܕܽܘܼܒܳܪ̈ܳܝܶܐ ܕܡܳܚܶܝܢ ܫܰܝܢܳܐ ܓܰܘܳܝܳܐ ܘܒܰܪܳܝܳܐ ܠܰܝܬܰܝܗܽܘܿܢ ܐܶܠܳܐ ܝܰܠܕ̈ܶܐ ܕܗܰܝܡܳܢܽܘܼܬܳܐ ܐܰܠܺܝܼܠܬܳܐ ܘܦܽܘܼܪܣܳܢܳܝܬܳܐ ܗܿܳܝ ܕܠܳܐ ܝܳܨܦܳܐ ܘܐܳܦܠܳܐ ܣܳܥܪܳܐ ܕܝܽܘܼܬܪ̈ܳܢܶܐ ܪ̈ܰܒܶܐ ܐܶܠܳܐ ܕܗܶܢܝ̈ܳܢܶܐ ܙܥܽܘܼܪ̈ܶܐ.

ܫܽܘܼܐܳܠܐ ܗܳܢܰܘ: ܐܰܝܟܰܢ ܡܰܨܝܳܐ ܕܢܶܩܢܶܐ ܚܽܐܪܽܘܼܬܳܐ ܒܰܪܳܝܬܳܐ ܟܰܕ ܠܳܐ ܩܳܢܶܝܢܰܢ ܚܺܐܪܽܘܼܬܳܐ ܓܰܘܳܝܬܳܐ؟ ܐܰܝܟܰܢܳܐ ܪܳܘܝܳܐ ܘܫܳܡܢܳܐ ܐܶܫܟܳܪܰܢ ܟܰܕ ܬܰܪܥܺܝܼܬܳܢ ܪܳܣܡܳܐ ܚܽܘܼܫ̈ܳܒܶܐ ܣܢ̈ܰܝܳܐ ܕܣܶܢܶܐܬܳܐ ܘܐܰܟܬܳܐ ܘܥܶܬܳܐ ܘܦܽܘܼܠܳܓܳܐ؟ ܘܐܰܝܟܰܢܳܐ ܢܳܨܚܳܐ ܡܰܪܕܽܘܼܬܳܢ ܟܰܕ ܠܳܐ ܡܶܫܟܚܺܝܼܢܰܢ ܚܢܳܢܳܐ ܘܚܰܘܣܳܢܳܐ ܘܐܺܝܼܩܳܪܳܐ ܕܰܛܡܺܝܼܪ ܗ̱ܽܘܼ ܒܥܰܦܪܳܐ ܕܢܰܦܫܰܢ؟ ܐܰܝܟܰܢ ܙܳܟܶܝܢܰܢ ܫܽܘܼܥܠܳܝܳܐ ܘܩܳܢܶܝܢܰܢ ܕܽܘܼܒܳܪ̈ܶܐ ܕܫܽܘܼܡܠܳܝܳܐ ܟܰܕ ܠܳܐ ܡܳܙܓܺܝܼܢܰܢ ܣܽܘܼ̈ܟܳܠܐ ܕܡܶܠܬܳܐ ܒܗܳܠܶܝܢ ܕܠܰܚܡܳܐ؟ ܘܐܰܝܟܰܢ ܡܰܨܝܳܐ ܕܰܢܥܰܕܰܪ ܘܢܰܘܬܰܪ ܒܰܐܡܘܼ̈ܡܶܐ ܘܰܬܚܘܼ̈ܡܶܐ ܕܬܰܪܥܺܝܼܬܐ ܕܪܺܝܼܫܬܐ ܐܶܢ ܠܐ ܡܳܝܨܺܝܼܢܰܢ ܡܠܽܘܼ̈ܐܶܐ ܙܽܘܼ̈ܡܳܝܶܐ ܡܼܶܢ ܫܪܳܪܳܐ ܪܰܒܳܐ؟

ܐܰܪܰܐ ܐܰܝܟܰܢܳܝܽܘܼܬܳܐ ܗܳܫܳܝܬܳܐ ܕܠܳܗܿ ܓܪܺܝܼܦܺܝܼܢܰܢ ܠܰܝܬܶܝܗܿ ܢܶܩܦܳܝܳܐ ܕܬܰܪܥܺܝܼܬܳܐ ܗܿܳܝ ܕܪܺܝܼܫܬܳܐ؟ ܐܰܝܟܰܢ ܡܰܨܝܳܐ ܕܢܶܬܥܰܕܰܪ ܘܰܢܥܰܕܰܪ ܘܢܺܐܬܰܪ ܘܢܰܘܬܰܪ ܘܢܶܫܬܰܘܫܰܛ ܘܰܢܫܰܘܫܶܛ ܒܰܐܡܽܘܼ̈ܡܶܐ ܘܰܬܚܘܼ̈ܡܶܐ ܕܬܰܪܥܺܝܼܬܳܐ ܗܳܕܶܐ ܕܪܺܝܼܫܬܳܐ ܐܶܢ ܠܳܐ ܢܳܦܩܺܝܼܢܰܢ ܠܒܰܪ ܡܼܶܢܗܽܘܿܢ[2] ܟܕ ܡܳܝܨܺܝܼܢܰܢ ܡܠܽܘܼ̈ܐܶܐ ܙܘܼ̈ܡܳܝܶܐ ܡܼܶܢ ܣܽܘܼ̈ܟܳܠܐ ܪ̈ܰܒܶܐ ܕܡܰܪܕܽܘܼܬܰܢ ܗܿܳܝ ܕܠܳܐ ܨܳܒܝܳܐ ܒܺܝܕܰܥܬܳܐ ܡܰܚܣܪܳܢܺܝܼܬܳܐ ܘܰܥܪܺܝܼܡܽܘܼܬܳܐ ܦܽܘܼܪܣܳܢܳܝܬܳܐ؟ ܐܰܝܟܰܢܳܐ ܚܳܝܛܺܝܼܢܰܢ ܨܪ̈ܰܘܳܬܳܐ ܕܩܽܘܼܫܬܳܐ ܘܣܶܕ̈ܩܶܐ ܕܐܽܘܼܡܬܳܐ ܘܦܽܘܼ̈ܠܳܓܶܐ ܕܥܺܕܬܳܐ ܒܰܡܚܰܛܳܐ ܘܐܽܘܼܪܕܚܳܐ ܫܽܘܼܚܬܳܢܳܝܬܳܐ ܟܰܕ ܠܳܐ ܝܳܨܦܺܝܼܢܰܢ ܕܟܽܘܼܦܳܪܳܐ ܘܕܽܘܼܟܳܝܳܐ ܕܫܽܘܼܚܬܳܐ ܐܰܘ ܙܽܘܼܢܓܳܪܳܐ ܕܩܳܪܶܡ ܠܗܶܝܢ؟

ܪܽܘܼܚܳܐ ܡܿܰܢ ܠܐܳ ܥܳܪܝܳܐ ܒܰܬܚܽܘܼ̈ܡܶܐ ܪ̈ܫܺܝܼܡܶܐ. ܘܒܰܪܢܳܫܳܐ ܗܿܰܘ ܐܰܝܢܳܐ ܕܚܳܟܶܡ ܫܪܳܪܳܐ ܗܳܢܳܐ ܦܰܛܢܳܐܝܼܬ ܡܼܶܢܟܽܠܦܪܽܘܿܣ ܢܳܦܶܩ ܡܼܶܢ ܓܺܝܼܓܠܳܐ ܕܐܰܡܽܘܼ̈ܡܶܐ ܕܪ̈ܺܝܼܫܶܐ ܘܰܬܚܽܘܼ̈ܡܶܐ ܫܟܺܝܼ̈ܚܶܐ. ܡܶܟܳܐ ܣܳܦܪܽܘܼܬܳܢܳܐܝܼܬ ܢܳܬܶܦ ܐ̱ܢܳܐ ܙܽܘܼܗܳܪܳܐ ܠܢܽܘܼܗܪܳܐ ܓܰܘܳܝܳܐ ܟܒܺܝܼܫܳܐ ܘܰܠܛܽܘܼ̈ܠܫܶܐ ܕܒܶܣܪܳܐ ܡܶܛܽܠ ܫܽܘܼܪܳܪܳܐ ܘܪܽܘܼܒܳܝܳܐ ܬܽܩܢܳܐ «ܕܢܰܦܫܳܐ» ܟܰܕ ܩܳܛܶܦ ܐ̱ܢܳܐ ܝܕܰܥܬܳܐ ܘܣܽܘܼܟܳܠܳܐ ܡܼܶܢ ܫܪܳܪܳܐ ܪܰܒܳܐ. ܗܺܝܼ ܗܳܕܶܐ ܥܳܒܶܕ ܐ̱ܢܳܐ ܟܰܕ ܠܳܐ ܢܳܦܶܩ ܐ̱ܢܳܐ ܠܒܰܪ ܡܼܶܢ ܬܚܽܘܼ̈ܡܰܘܗܝ. ܒܰܕ ܡܗܰܝܡܶܢ ܐ̱ܢܳܐ ܐܶܠܘܼܠܳܐ ܩܛܽܘܼܦܝܳܐ ܗܳܢܳܐ܆ ܠܳܐ ܡܶܫܬܰܟܚܺܝܼܢ ܣܽܘܼ̈ܟܳܠܐ ܕܪܽܘܼܚܳܐ. ܘܠܳܐ ܡܶܫܬܰܦܶܐ ܥܰܪܡܳܐ ܘܥܰܣܩܳܐ. ܘܠܳܐ ܡܶܬܩܰܢܝܳܐ ܘܐܳܦܠܳܐ ܡܶܫܬܰܟܢܳܐ ܥܺܝܼܪܽܘܼܬܳܐ ܒܰܝܢܳܬ ܪܰܘܒܳܐ ܫܓܺܝܼܫܳܐ ܘܰܥܩܺܝܼܡܳܐ ܘܩܰܘܡܳܐ ܕܠܺܝܼܚܳܐ ܘܰܨܢܺܝܼܥܳܐ. ܘܐܠܘܼܠܳܐ ܝܕܰܥܬܳܐ ܗܳܕܶܐ܆ ܠܳܐ ܡܶܨܛܰܠܠܳܐ ܬܰܪܥܺܝܼܬܳܐ. ܘܐܳܦܠܳܐ ܡܶܬܡܰܪܩܳܐ ܡܰܚܙܺܝܼܬܳܗܿ ܒܰܚܢܳܢܳܐ ܘܚܰܘܣܳܢܳܐ ܕܠܶܒܳܐ ܒܰܣܺܝܼܡܳܐ. ܗܳܢܳܐ ܕܟܰܕ ܪܳܚܩܺܝܼܢܰܢ ܡܶܢܶܗ ܠܳܐ ܦܳܐܶܫ ܠܰܢ ܡܼܢ ܥܳܒܳܐ ܐܶܠܳܐ ܢܳܒܳܐ. ܘܗܺܝܼ ܗܳܕܶܐ ܓܶܕܫܰܬ ܒܕܰܥܒܰܪ. ܘܗܳܐ ܪܳܚܫܳܐ ܐܳܦ ܒܝܰܘ̈ܡܳܬܰܢ.

ܘܙܳܕܶܩ ܕܢܶܕܰܥ ܡܰܪܳܚܽܘܼܬܳܐ ܗ̱ܝ ܪܰܒܬܳܐ ܘܚܽܘܼܨܦܰܐ ܗ̱ܘ ܫܟܺܝܼܪܳܐ ܟܕ ܡܰܦܪܶܝܢܰܢ ܒܗܰܘ  ܡܳܐ ܕܥܳܒܰܪ ܚܺܝܼܠ ܡܶܣܬܰܟܠܳܢܘܼܬܰܢ ܘܝܼܕܰܥܬܰܢ ܠܶܫܳܢܳܝܬܐ. ܐܶܠܰܐ ܒܪܰܡ ܦܰܐܝܳܐ ܕܢܶܕܰܥ: ܠܳܐ ܥܳܬܪ̈ܳܢ ܡܰܘܗ̈ܒܳܬܳܐ ܡܶܬܩܰܢܝ̈ܳܢܝܳܬܳܐ ܐܶܢ ܠܳܐ ܡܶܬܬܰܦ̈ܠܚܳܢ ܗܿܳܢܶܝܢ ܝܼܗܺܝܼ̈ܒܳܬܳܐ. ܡܶܛܽܠܗܳܕܶܐ ܡܰܘܕܰܥ ܘܐܳܡܰܪ ܐ̱ܢܳܐ: ܠܰܝܬܰܝ ܣܳܦܪܳܐ ܐܶܠܐ ܟܳܬܒ ܐ̱ܢܳܐ ܫܰܪܒܳܐ ܕܚܘܼܒܳܐ. ܠܰܝܬܰܝ ܪܰܫܳܡܳܐ ܐܶܠܐ ܪܳܫܶܡ ܐ̱ܢܳܐ ܨܽܘܼܪܬܳܐ ܕܐ̱ܢܳܫܘܼܬܳܐ. ܠܰܝܬܰܝ ܐܳܡܘܿܪܐ ܐܶܠܐ ܬܳܢܶܐ ܐ̱ܢܳܐ ܡܺܐܡܪܳܐ ܕܠܶܫܳܢܳܐ ܣܘܼܪܝܳܝܳܐ. ܠܰܝܬܰܝ ܙܰܡܳܪܳܐ ܐܶܠܐ ܙܳܡܰܪ ܐ̱ܢܳܐ ܙܡܺܝܼܪܬܳܐ ܕܡܰܪܕܘܼܬܳܐ. ܠܰܝܬܰܝ ܪܰܩܳܕܳܐ ܐܶܠܐ ܕܳܐܨ ܐ̱ܢܳܐ ܒܪ̈ܶܩܕܶܐ ܕܬܶܫܡܶܫܬܳܐ ܡܠܝܼܠܬܳܐ. ܠܰܝܬܰܝ ܬܳܪܐܳܐ ܒܪܰܡ ܝܳܠܘܿܦܳܐ ܐܶܠܐ ܡܩܰܪܶܒ ܐ̱ܢܳܐ ܡܳܙܽܘܿܢܳܐ ܠܡܰܕܥܳܐ ܘܰܙܘ̈ܳܕܶܐ ܠܪܘܼܚܳܐ. ܠܰܝܬܰܝ ܡܗܰܕܝܳܢܳܐ ܒܪܰܡ ܬܰܠܡܝܼܕܳܐ ܐܶܠܐ ܡܨܰܝܶܒ ܐ̱ܢܳܐ ܠܨܘܿܒ ܩܶܪܝܳܢܐ ܘܗܘܼܓܳܝܳܐ. ܠܰܝܬܰܝ ܓܡܺܝܼܪܳܐ ܒܪܰܡ ܒܨܺܝܼܪܳܐ ܐܠܐ ܡܫܰܡܠܶܐ ܐ̱ܢܳܐ ܗܿܘ ܡܳܐ ܕܰܡܨܶܐ ܐ̱ܢܳܐ. ܡܶܛܽܠ ܐܺܝܼܩܳܪܳܐ ܘܫܰܝܢܳܐ ܬܰܩܢܳܐ ܘܫܽܘܼܘܫܳܛܳܐ ܘܩܽܘܼܝܳܡܳܐ ܕܐ̱ܢܳܫܽܘܼܬܰܢ ܘܢܶܨܚܳܢܳܐ ܕܣܶܦܪܳܝܽܘܼܬܰܢ ܘܡܰܪܕܽܘܼܬܰܢ.

ܠܳܐ ܟܰܣܝܳܐ ܕܠܰܡ ܦܬܺܝܼ̈ܟܺܝܼܢ ܘܰܦܪ̈ܺܝܼܫܽܝܼܢ ܐ̱ܪ̈ܳܙܶܝܗܿ ܕܡܶܠܬܳܐ. ܘܢܳܬܰܥ ܝܽܘܼܩܪܳܗܿ ܒܪ̈ܽܘܼܫܡܶܝܗܿ ܕܣܶܦܪܳܝܽܘܼܬܳܐ. ܐܶܠܳܐ ܟܰܕ ܦܰܘܕܳܐܝܼܬ ܡܶܬܪܰܫܡܳܐ ܐܰܘ ܡܶܬܦܰܫܩܳܐ܆ ܣܳܪܚܳܐ ܬܰܪܥܺܝܼܬܐ ܘܬܰܪܒܺܝܼܬܳܐ. ܒܰܕ ܠܶܫܳܢܳܐ܆ ܡܰܣܰܐܬܰܐ ܗ̱ܘ ܕܡܶܠܬܳܐ ܘܡܰܠܳܚܰܐ ܗ̱ܘ ܕܬܰܪܥܺܝܼܬܳܐ. ܘܰܟܪܽܘܼܡܶܗ܆ ܡܚܰܘܝܳܢܰܐ ܗ̱ܘ ܕܡܰܪܕܽܘܼܬܐ. ܘܣܽܘܼܠܓܳܣܶܗ܆ ܫܽܘܼܘܕܳܥܰܐ ܗ̱ܘ ܕܗܰܘܢܳܐ ܡܠܺܝܼܠܳܐ ܐܰܘ ܒܠܺܝܼܠܳܐ.

ܣܳܦܪܽܘܼܬܳܐ ܡܿܰܢ ܥܳܫܢܳܐ ܒܩܶܪܝܳܢܳܐ ܫܰܪܺܝܼܪܳܐ ܗܳܢܳܐ ܕܠܰܝܬܰܘܗܝ ܒܰܠܚܽܘܿܕ ܟܽܘܼܢܳܫܳܐ ܐܰܘ ܩܽܘܼܒܳܝܳܐ ܕܝܕܰܥܬܳܐ. ܐܶܠܳܐ ܐܳܦ ܙܰܘܥܳܐ ܘܕܽܘܼܪܳܫܳܐ ܘܡܽܘܼܙܳܪܳܐ ܗܰܘܢܳܢܳܝܳܐ. ܘܚܳܫܰܚ ܘܐܳܙܶܠ ܠܫܽܘܼܦܳܝܳܐ ܕܪܶܥܝܳܢܳܐ ܘܕܽܘܼܟܳܝܳܐ ܕܠܶܒܳܐ ܒܗܳܠܶܝܢ ܕܫܽܘܼܟܠܳܠܳܐ ܘܫܽܘܼܓܳܢܳܝܳܐ ܓܰܘܳܝܳܐ. ܡܶܟܳܐ ܟܽܠ ܚܰܘܩܳܐ ܐܰܘ ܦܳܣܽܘܿܩܳܐ ܕܡܶܬܩܪܶܐ ܡܰܨܝܳܐ ܕܢܶܒܢܶܐ ܐܰܘ ܕܢܶܗܘܶܐ ܠܶܒܢܳܐ ܚܕܰܬܳܐ ܒܬܽܘܼܩܳܢܳܐ ܕܬܰܪܥܺܝܼܬܳܐ ܨܠܺܝܼܠܬܳܐ.

ܐܶܠܽܘܼܠܳܐ ܗܶܕܣܳܐ ܬܟܺܝܼܒܳܐ ܘܥܰܡܠܳܐ ܫܚܺܝܼܩܐ ܕܩܳܪܽܘܿܝܳܐ܆ ܠܳܐ ܡܶܬܕܰܠܰܠ ܘܐܳܦܠܳܐ ܡܶܬܦܰܫܰܩ ܡܶܬܩܰܪܝܳܢܳܐ. ܗܿܳܢܳܐ ܕܡܶܬܝܰܬܰܪ ܘܡܶܬܝܰܩܰܪ܆ ܟܰܕ ܡܰܪܘܰܚ ܐܽܘܼܦ̈ܩܶܐ ܘܦܳܬܰܚ ܟܰܘ̈ܶܐ ܚܰܕ̈ܬܶܐ. ܘܐܶܠܳܐ܆ ܓܰܢܳܒܳܐ ܕܥܶܕܳܢܳܐ ܡܶܬܚܫܶܒ «ܡܶܬܩܰܪܝܳܢܳܐ» ܗܿܰܘ ܐܰܝܢܳܐ ܕܠܳܐ ܦܳܬܰܚ ܐܽܘܼ̈ܦܩܶܐ ܘܟܰܘ̈ܶܐ ܚܰܕ̈ܬܶܐ.

ܡܶܛܽܠܗܳܕܶܐ ܩܶܪܝܳܢܳܐ ܕܦܽܘܼܪܫܳܢܳܐ ܬܰܪܣܺܝܼܬܰܐ ܗ̱ܘ ܘܬܰܪܒܺܝܼܬܳܐ ܠܬܰܪܥܺܝܼܬܳܐ. ܘܠܳܐ ܡܢܺܝܼܚ ܒܪܰܡ ܡܥܺܝܼܪ. ܘܡܰܥܡܶܩ ܘܡܰܚܪܶܦ ܠܒܽܘܼܝܳܢܳܐ. ܘܐܶܢܗܽܘܼ ܕܕܳܚܶܩ ܘܫܳܒܶܩ ܕܢܶܣܬܰܩܒܰܠ ܒܰܪܢܳܫܳܐ ܥܰܡ ܢܰܦܫܶܗ ܘܢܶܫܬܰܝܰܢ ܥܰܡ ܪ̈ܶܓܫܰܘܗܝ܆ ܗܳܝܕܶܝܢ ܡܰܩܢܳܐ ܐܳܦ ܚܰܘܪܳܐ ܒܰܣܺܝܼܡܐ ܘܥܶܢܝܳܢܳܐ ܪܰܟܺܝܼܟܳܐ. ܡܶܟܳܐ ܩܳܪܽܘܿܝܳܐ ܕܦܽܘܼܪܫܳܢܳܐ ܠܰܘ ܒܰܠܚܽܘܿܕ ܡܶܬܒܰܩܶܐ ܘܡܶܙܕܗܰܪ ܒܪܽܘܼܚܳܐ ܘܠܶܫܳܢܳܐ ܕܡܶܬܩܰܪܝܳܢܳܐ܆ ܐܶܠܳܐ ܐܳܦ ܒܳܚܰܪ ܘܦܳܪܶܫ ܡܰܒܽܘܼ̈ܥܶܐ ܘܢܺܝܼ̈ܫܰܘܗܝ ܫܽܘܼܘ̈ܕܳܥܳܝܶܐ. ܒܰܕ ܠܳܐ ܡܰܨܝܳܐ ܕܢܰܩܶܠ ܝܽܘܼܩܪܳܐ ܐܶܠܳܐ ܪܶܥܝܳܢܳܐ ܚܠܺܝܼܡܳܐ ܕܢܳܦܰܚ ܣܽܘܼܟܳܠܳܐ ܡܩܰܘܝܳܢܳܐ ܒܬܰܪܥܺܝܼܬܳܐ. ܕܡܶܫܬܓܶܫ ܘܡܶܬܒܰܠܒܰܠ ܬܽܘܼܩܳܢܳܐ ܬܰܪܥܺܝܼܬܳܢܳܝܳܐ ܒܶܠܥܳܕ ܒܨܳܬܳܐ ܕܦܽܘܼܪܫܳܢܳܐ. ܘܗܿܰܘ ܕܩܳܪܶܐ ܒܶܠܥܳܕ ܣܽܘܼܟܳܠܐ ܘܦܽܘܼܫܳܩܳܐ ܠܳܐ ܟܳܢܶܫ ܐܶܠܳܐ ܥܡܺܝܼܪܳܐ ܕܐܶܓܳܪ̈ܶܐ. ܘܦܽܘܼܠܚܳܢܶܗ ܗܳܘܶܐ ܣܪܺܝܼܩܳܐ. ܘܥܰܡܠܶܗ ܦܳܐܶܫ ܕܠܳܐ ܝܽܘܼܬܪܳܢܳܐ. ܡܶܛܠܗܳܕܶܐ ܠܳܐ ܦܰܐܝܳܐ ܕܢܶܬܩܪܶܐ ܡܫܳܟܳܐܝܼܬ ܘܐܰܝܟ ܕܐܳܬܝܳܐ. ܒܰܕ ܥܰܡܠܳܐ ܕܐܰܝܟ ܗܳܢܳܐ ܠܳܐ ܡܰܩܢܶܐ ܐܠܐ ܫܚܽܘܼܩܝܳܐ ܘܰܛܪܽܘܼܦܝܳܐ. ܕܗܰܘܢܳܐ ܡܿܰܢ ܕܳܡܶܐ ܠܐܶܣܛܽܘܼܡܟܳܐ ܗܿܳܝ ܕܡܶܬܡܰܥܣܳܐ ܟܰܕ ܡܶܬܡܰܠܝܳܐ ܒܶܠܥܳܕ ܬܰܪܒܺܝܼܬܳܐ ܕܬܰܪܣܺܝܼܬܳܐ. ܡܶܟܳܐ ܡܰܦܩܳܢܳܐ «ܟܶܐܡܰܬ ܦܰܪܳܚܳܐ ܘܠܳܐ ܡܡܰܫܚܳܢܳܐ» ܡܶܬܚܫܶܒ ܩܳܪܽܘܿܝܳܐ ܗܿܰܘ ܐܰܝܢܳܐ ܕܠܳܐ ܦܳܪܶܫ ܘܓܳܒܶܐ ܦܰܛܢܳܐܝܼܬ ܠܡܶܬܩܰܪܝܳܢܳܐ…

 

ܝܰܘܣܶܦ ܒܶܓܬܰܫ

ܚܘܼܕܪܳܐ ܕܡܰܪܕܽܘܼܬܳܐ ܘܣܶܦܪܳܝܽܘܼܬܳܐ ܕܠܶܫܳܢܳܐ ܣܘܼܪܝܳܝܳܐ: ܡܪܕܝܢ

 

 

[1]  ܥܛܽܘܼܦܝܳܐ:  Geribildirim / Feedback

[2] ܛܳܒ ܥܰܡܺܝܩܳܐܝܬ ܘܰܥܪܺܝܼܡܳܐܝܬ ܡܶܬܦܰܫܰܩ ܣܽܘܟܳܠܐ ܗܳܢܳܐ ܒܠܶܥܙܳܐ ܕܣܽܘܪܰܝܬ ܡܰܥܪܒܳܝܳܐ ܕܛܽܘܼܪܥܰܒܕܺܝܢ. ܐܳܡܪܺܝܼܢ: «ܢܽܘܦܩܺܝܢܰܐ ܡܺܝ ܩܰܚܦܽܘܪܬܰܝܕܰܢ». ܟܶܐܡܰܬ «ܢܶܦܽܘܩ ܡܼܶܢ ܩܰܚܦܽܘܪܬܳܐ ܕܺܝܼܠܰܢ.»