ܐܶܢ ܡܫܰܐܶܠ ܐܢܬ؟

ܐܶܢ ܡܫܰܐܶܠ ܐܢܬ؟

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܡܫܺܝܼܚܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܥܺܕܬܳܐ ܘܗܰܝܡܳܢܘܼܬܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܐܽܘܼܡܬܳܐ ܘܠܶܫܳܢܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܚܽܘܒܼܳܐ ܘܐ̱ܢܳܫܽܘܼܬܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܫܰܝܢܳܐ ܘܰܫܠܳܡܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ. 

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܩܘܼܝܳܡܳܐ ܘܫܽܘܼܘܫܳܛܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܡܫܰܐܠܽܘܼܬܳܐ ܘܡܰܟܺܝܼܟܽܘܼܬܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ. 

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܐܰܘܝܽܘܬܳܐ ܘܰܚܕܳܝܘܼܬܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܡܰܪܕܽܘܼܬܳܐ ܘܝܽܘܠܦܳܢܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܥܬܺܝܼܕܘܼܬܳܐ ܢܰܗܺܝܼܪܬܳܐ ܘܒܰܗܽܘܼܪܬܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܡܕܰܒܪܳܢܽܘܼܬܳܐ ܒܰܣܺܝܼܡܬܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ. 

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܚܝ̈ܐ ܢܺܝܼ̈ܚܶܐ ܘܰܒܗܺܝ̈ܠܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܩܶܪܝܳܢܳܐ ܘܣܶܦܪܳܝܘܼܬܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܝܺܩܰܪܬܳܐ ܢܰܨܝܼܚܬܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܥܘܼܬܪܳܐ ܗܘܼܠܳܢܳܝܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܫܰܘܝܘܼܬܳܐ ܘܚܺܐܪܽܘܼܬܳܐ ܘܟܺܐܢܽܘܼܬܳܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܶܢ ܡܫܰܐܶܠ ܐܰܢ̱ܬ ܠܶܗ ܪܳܚܶܡ ܘܒܳܥܶܐ ܦܘܼܪܦܳܥܳܐ ܕܛܘܼܒܬܳܢܽܘܼܬܐ.

ܐܶܠܳܐ ܒܳܥܶܛ ܣܽܘܼܣܝܶܗ ܝܰܨܪܳܢܳܐܝܬ ܒܶܠܥܳܕ ܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܝܰܨܘܼܦܬܳܢܳܘܼܬܐ.

ܐܰܟܡܳܐ ܕܫܳܪܳܐ ܡܼܶܢ ܗܦܽܘܼ̈ܟܝܶܐ ܕܣܽܘܼ̈ܟܳܠܐ ܗܳܠܶܝܢ ܕܰܦܪܺܝܼܣܺܝܼܢ ܩܕܳܡ ܡܰܕܥܳܐ ܕܦܳܪ̈ܘܿܫܶܐ ܒܐܰܝܟܰܢܳܝܘܼܬܳܐ ܗܳܕܶܐ ܕܠܳܗܿ ܓܪܺܝܼܦܺܝܼܢܰܢ ܠܐ ܡܰܨܝܳܐ ܕܢܶܫܟܰܚ ܢܽܘܼܗܪܳܐ ܕܫܽܘܼܘܫܳܛܳܐ ܘܛܘܼܟܳܣܳܐ ܡܶܬܒܰܥܝܳܢܳܐ. ܘܥܰܣܩܳܐ ܕܢܶܡܛܶܐ ܠܬܰܩܢܽܘܼܬܐ ܕܪܳܗܛܝܼܢܰܢ ܒܳܬܪܳܗܿ ܒܐܘܼܪܚܳܐ ܗܳܕܶܐ ܕܒܳܗܿ ܪܳܕܶܝܢܰܢ ܒܶܠܥܳܕ ܬܪܺܝܼܨܽܘܼܬ ܢܰܦܫܳܐ ܗܿܳܝ ܕܡܶܬܦܰܫܩܳܐ: ܡܶܣܬܰܟܠܳܢܽܘܼܬܳܐ ܕܡܶܬܡܰܟܟܳܢܽܘܼܬܐ ܘܰܡܝܰܩܪܳܢܽܘܼܬܳܐ ܘܡܶܬܢܰܚܬܳܢܽܘܼܬܳܐ ܘܡܶܬܪܰܟܢܳܢܽܘܼܬܐ ܘܡܶܬܪܰܡܝܳܢܽܘܼܬܐ ܘܝܰܨܘܼܦܬܳܢܳܘܼܬܐ ܘܡܰܕܠܳܢܘܼܬܳܐ. ܒܰܕ ܡܝܰܬܪ̈ܳܬܐ ܘܚܶܟܡܬܳܐ ܕܣܽܘܼ̈ܟܳܠܰܝܗܶܝܢ ܠܐ ܡܶܫܬܰܟ̈ܚܳܢ ܐܶܠܐ ܒܚܰܝܠܐ ܡܠܺܝܼܠܐ ܗܳܢܳܐ ܕܰܩܒܺܝܼܥ ܒܢܰܦܫܳܐ ܕܟܽܠܚܰܕ ܚܰܕ ܡܶܢܰܢ….

ܡܳܕܶܝܢ ܐܶܢ ܨܳܒܶܝܢܰܢ ܠܡܶܣܬܰܟܳܠܘܼ ܠܳܗܿ ܠܰܨܒܘܼܬܳܐ ܗܳܕܶܐ ܡܫܰܚܩܳܢܝܼܬܳܐ ܘܒܳܥܶܝܢܰܢ ܕܢܶܫܬܰܘܕܰܥ ܥܶܠܰܬ ܒܠܺܝܼܠܘܼܬܰܢ ܘܰܬܒܺܝܼܪܘܬܰܢ ܙܳܕܶܩ ܕܢܶܥܡܰܕ ܐܰܟܚܰܕ ܒܥܽܘܼܡܩܳܐ ܕܡܰܪܕܘܼܬܰܢ ܠܡܶܗܪܰܓ ܘܰܠܡܶܗܕܰܣ ܗܿܰܘ ܡܳܐ ܕܟܳܬܒܺܝܼܢ ܐܰܒܳܗ̈ܬܰܢ ܡܰܠܦ̈ܢܶܐ ܣܦܺܝܼܪ̈ܶܐ. ܘܰܦܪܺܝܼܫܳܐܝܬ ܗܿܰܘ ܡܳܐ ܕܟܳܬܶܒ ܡܰܚܟܘܼܡܬܳܐ ܪܰܒܳܐ ܒܰܪܥܶܒܪܳܝܳܐ ܒܰܟܬܳܒܳܐ ܕܚܶܐܘܰܬ ܚܶܟܡܬܳܐ ܒܫܰܪܒܳܐ ܕܢܰܦܫܳܐ ܐ̱ܢܳܫܳܝܬܳܐ ܘܰܡܝܰܬܪ̈ܬܐ ܢܰܦܫ̈ܢܳܝܳܬܐ. ܘܒܺܝܼ̈ܫܳܬܐ ܕܩܰܢܝܳܐ. «ܩܰܕܡܳܝܬܐ ܕܰܬܠܳܬܐ ܐܶܢܽܘܢ ܚܰܝ̈ܠܰܝ ܢܰܦܫܳܐ ܐ̱ܢܳܫܳܝܬܐ ܘܟܽܠܡܳܐ ܕܚܰܕ ܡܶܢܗܽܘܢ ܥܳܫܶܢ ܗܳܢܽܘܢ ܐ̱ܚܪ̈ܳܢܶܐ ܬܳܚܒܺܝܼܢ. ܒܰܟܬܳܒܳܐ ܕܢܰܦܫܳܐ ܐܶܬܚܰܘܺܝ. ܘܚܰܝܠܐ ܡܠܺܝܼܠܐ ܡܰܢ ܢܰܦܫܳܐ ܡܰܠܐܟܳܝܬܐ ܡܶܬܩܪܶܐ. ܘܒܶܗ ܒܰܪܢܳܫܳܐ ܠܗܳܠܶܝܢ ܕܐܺܝܬܰܝܗܘܢ ܝܳܕܰܥ. ܚܰܝܠܐ ܚܶܡܬܳܢܳܐ ܕܶܝܢ ܢܰܦܫܳܐ ܚܰܝܘܼܬܢܳܝܬܐ ܡܶܬܩܪܶܐ. ܘܒܶܗ ܒܰܪܢܳܫܳܐ ܥܰܠ ܩܺܝܢܕܘ̈ܢܘ ܡܒܰܣܰܪ. ܘܙܳܟܽܘܼܬܳܐ ܘܐܝܼܩܳܪܳܐ ܘܫܽܘܼܒܚܳܐ ܣܪܺܝܼܩܳܐ ܒܳܥܶܐ. ܘܚܰܝܠܐ ܪܶܓܬܳܢܳܐ ܢܰܦܫܳܐ ܒܥܺܝܼܪܳܝܬܐ ܡܶܬܩܪܶܐ. ܘܗܽܘܼܝܽܘܼ ܥܶܠܬܳܐ ܕܝܽܘܼܐܳܒ ܒܰܪܢܳܫܳܐ ܠܦܽܘܼܪܦܳܥܳܐ ܘܦܽܘܼܢܳܩܳܐ. ܒܡܶܐܟܠܐ ܘܡܰܫܬܝܳܐ ܘܰܚܟܘܼܡܝܳܐ. ܒܡܶܢܝܳܢ ܚܰܝ̈ܠܐ ܗܳܠܶܝܢ ܡܳܕܶܝܢ ܡܶܢܝܳܢܳܐ ܕܰܡܝܰܬܪ̈ܳܬܐ ܐ̱ܢܳܫ̈ܳܝܳܬܐ ܘܳܠܐ ܠܡܶܗܘܳܐ.»

ܐܶܢ ܡܰܨܝܳܐ ܐܰܫܦܶܘ ܟܰܬܦܳܐ ܕܐܶܒܨܶܐ ܘܐܶܒܩܽܘܿܪ ܗܿܰܘ ܡܳܐ ܕܒܳܥܝܳܐ ܡܰܩܪܚܳܢܘܼܬܳܐ ܘܡܶܣܬܰܟܠܳܢܘܼܬܐ ܠܡܶܩܦܰܠ ܚܶܫܟܳܐ ܕܝܰܨܪܳܐ ܗܳܢܳܐ ܕܚܳܒܶܩ ܐܶܢܳܢܳܝܽܘܼܬܐ ܘܕܳܚܶܩ ܝܘܼܬܪܳܢܳܐ ܡܫܰܘܬܦܳܐ؟ ܒܰܕ ܒܰܝܢܳܬ ܚܶܫܟܳܐ ܘܨܰܘܪ̈ܳܢܶܐ ܕܝܰܨܪܳܐ ܠܳܐ ܢܳܗܰܪ ܘܐܳܦܠܳܐ ܨܳܡܰܚ ܣܽܘܼܟܳܠܐ ܕܐܳܡܰܪ ܡܫܺܝܼܚܳܐ: «ܕܰܟܡܳܐ ܕܰܥܒܰܕܬܽܘܿܢ ܠܚܰܕ ܡܼܶܢ ܗܳܠܶܝܢ ܐܰܚ̈ܰܝ ܙܥܽܘܿܪ̈ܐ ܠܺܝܼ ܗ̱ܘ ܥܒܰܕܬܘܢ!» (ܡܬܝ. 25: 40).

ܐܰܪܰܐ ܟܰܝ ܐܰܝܢܰܐ ܗ̱ܘ ܚܰܝܠܐ ܕܟܺܝܼܪܳܐ ܕܰܡܕܰܒܰܪ ܘܰܡܦܰܪܢܶܣ ܡܰܠܳܚܳܐ ܕܺܝܼܠܰܢ ܓܰܘܳܝܳܐ؟

ܐܰܪܰܐ ܟܰܝ ܐܰܝܢܰܐ ܗ̱ܘ ܚܰܝܠܐ ܕܟܺܝܼܪܳܐ ܕܰܡܨܰܝܶܒ ܚܘܼ̈ܫܳܒܶܐ ܕܺܝܠܝ ܘܕܺܝܼܠܳܟ. ܘܰܕܟܽܠܢ ܪ̈ܰܒܶܐ ܘܰܙܥܘܿܪ̈ܐ؟

ܚܰܝܠܐ ܡܠܺܝܼܠܐ ܗܳܢܳܐ ܕܡܶܬܩܪܶܐ ܢܰܦܫܳܐ ܡܰܠܐܟܳܝܬܐ؟

ܐܰܘ ܚܰܝܠܐ ܚܶܡܬܳܢܳܐ ܗܳܢܳܐ ܕܡܶܬܩܪܶܐ ܢܰܦܫܳܐ ܚܰܝܘܼܬܳܢܳܝܬܐ؟

ܐܰܘ ܚܰܝܠܐ ܪܶܓܬܳܢܳܐ ܗܳܢܳܐ ܕܡܶܬܩܪܶܐ ܢܰܦܫܳܐ ܒܥܺܝܼܪܳܝܬܳܐ؟

ܟܰܪܝܳܐܝܬ ܡܰܢ ܗܳܟܰܢ ܟܳܬܶܒ ܘܐܳܡܰܪ ܚܰܕ ܡܼܶܢ ܪ̈ܰܒܳܢܶܐ ܨܰܥ̈ܢܶܐ ܕܡܰܪܕܽܘܼܬܳܐ ܣܽܘܼܪܝܳܝܬܐ ܒܫܰܪܒܳܐ ܗܳܢܳܐ ܕܰܥܠܰܘܗܝ ܛܳܝܦܳܐ ܡܶܠܬܳܐ: «ܡܰܟܺܝܼܟܽܘܼܬܐ ܚܳܫܚܳܐ ܠܰܥܨܳܒܳܐ ܕܣܰܢ̈ܝܳܬܳܐ. ܘܗܳܟܘܳܬ ܡܢܰܛܪܳܢܺܝܼܬܐ ܗ̱ܝ ܡܗܰܝܡܰܢܬܐ ܕܢܰܟܦܽܘܼܬܐ ܘܕܰܟܝܘܼܬ ܠܶܒܳܐ. ܘܰܡܫܰܟܢܳܢܺܝܼܬܳܐ ܗ̱ܝ ܕܣܽܘܼܓܐܐ ܕܥܽܘܼܕܪ̈ܢܶܐ ܠܐܰܝܠܶܝܢ ܕܪܳܓܺܝܼܢ ܠܳܗܿ. ܘܰܠܡܰܟܺܝ̈ܟܶܐ ܝܳܗܶܒ ܛܰܝܒܽܘܼܬܳܐ ܡܰܙܥܶܩ ܝܰܥܩܽܘܒ ܫܠܺܝܼܚܳܐ (ܝܥܩܘܒ. ܕ: ܗ). ܩܰܦ ܒܶܪܝ ܡܶܟܺܝܠ ܠܡܰܟܺܝܼܟܽܘܼܬܳܐ. ܘܐܶܬܬܠܐ ܒܟܽܠܙܒܰܢ ܒܰܫܦܽܘ̈ܠܶܝܗܿ ܐܶܡܗ̈ܳܝܶܐ. ܘܗܺܝܼ ܬܶܫܗܰܪ ܥܠܰܝܟ ܘܰܬܢܰܛܰܪ ܠܳܟ ܡܼܶܢ ܪ̈ܶܗܛܶܐ ܠܳܐ ܡܰܘܬܪ̈ܳܢܶܐ. ܥܪܽܘܼܩ ܡܼܶܢ ܫܘܼܥܠܳܝܳܐ ܩܳܛܘܿܠܳܐ ܕܢܰܦܫܳܐ. ܗܘܺܝܼ ܢܺܝܼܚܳܐ ܘܡܰܟܺܝܼܟܳܐ. ܘܬܶܫܟܰܚ ܢܝܳܚܳܐ ܠܢܰܦܫܳܟ. ܐܶܙܕܰܗܰܪ ܡܼܶܢ ܪܳܡܽܘܿܬܳܐ ܣܳܢܝܰܬ ܠܰܡܫܺܝܼܚܳܐ. ܗܰܒ ܬܶܫܒܽܘܼܚܬܳܐ ܠܐܠܳܗܳܐ ܒܟܿܠܗܽܘܢ ܥܒܳܕ̈ܰܝܟ.»

ܡܶܟܳܐ ܫܳܪܳܐ ܕܠܰܡ ܡܰܟܺܝܼܟܺܘܼܬܳܐ ܐܺܝܼܬܶܝܗܿ ܕܢܳܛܪܳܐ ܘܦܳܪܥܳܐ ܪܰܒܽܘܼܬܐ ܘܬܰܩܢܽܘܼܬܳܐ ܕܟܽܠ ܒܰܪܢܳܫܳܐ ܘܟܽܠ  ܕܰܪܓܳܝܳܐ. ܡܶܛܠܗܳܕܶܐ ܠܳܐ ܣܳܥܰܪ ܘܐܳܦܠܳܐ ܫܳܪܶܐ ܢܽܘܼܗܪܳܐ ܕܫܘܼܘܫܳܛܳܐ ܘܛܘܼܟܳܣܳܐ ܟܰܪ ܕܐܺܝܼܬ ܐܶܢܳܢܳܝܘܼܬܳܐ ܘܡܰܗܡܝܳܢܘܼܬܳܐ ܘܰܡܫܳܟܽܘܼܬܳܐ ܘܦܘܼܠܳܓܳܐ ܘܪܽܘܼܓܙܳܐ ܘܦܶܬܢܳܐ ܘܐܰܟܬܳܐ ܘܰܚܣܳܡܳܐ ܘܚܶܪܝܳܢܳܐ ܘܗܶܪܬܳܐ ܘܣܶܢܶܐܬܐ ܘܫܘܼܒܗܳܪܳܐ ܘܫܘܼܥܠܳܝܳܐ ܘܩܰܘܡܳܐ ܘܕܽܘܼܒܳܪܳܐ ܙܩܺܝܼܦܳܐ ܕܪܺܝܼܫܳܢܘܼܬܳܐ ܘܰܡܕܰܒܪܳܢܽܘܬܳܐ…..

ܘܐܶܢ ܠܳܐ ܩܪܺܝܼܚ ܣܽܘܼܟܳܠܳܐ ܘܰܫܓܺܝܼܫ ܪܶܥܝܳܢܳܐ ܠܰܝܬ ܗܶܢܝܳܢܳܐ ܘܫܶܪܝܳܢܳܐ ܩܰܪܺܝܼܒܳܐ ܣܛܰܪ ܡܼܶܢ ܗܿܳܝ ܕܟܽܠܢܳܫ ܢܶܒܩܶܐ ܢܰܦܫܶܗ ܘܢܶܬܪܽܘܿܨ ܡܰܪܕܺܝܼܬܶܗ: ܟܰܕ ܡܫܺܝܼܓ ܡܶܠܬܶܗ ܘܰܡܨܰܠܶܠ ܨܶܒܝܳܢܶܗ. ܒܰܕ ܗܿܰܘ ܡܳܐ ܕܪܳܗܛܺܝܼܢܰܢ ܒܳܬܪܶܗ ܒܳܥܶܐ ܡܶܢܰܢ ܬܪܺܝܼܨܽܘܼܬ ܢܰܦܫܳܐ ܥܰܡ ܢܰܦܫܰܢ ܘܥܰܡ ܡܠܺܝ̈ܠܐ ܟܽܠܗܽܘܿܢ ܗܿܳܢܽܘܢ ܕܰܡܣܰܟܶܝܢ ܦܺܐܪ̈ܶܐ ܕܡܶܠܬܰܢ ܘܛܰܥܡܳܐ ܕܡܶܠܚܰܢ ܘܢܽܘܼܗܪܳܐ ܕܪܰܕܝܘܼܬܰܢ. 

ܐܰܪܰܐ ܟܰܝ ܡܶܬܚܰܫܒܳܐ ܦܰܟܳܢܽܘܼܬܐ ܐܶܢܗܽܘܼ ܕܐܰܘܕܰܥ ܕܠܰܡ ܦܽܘܼܢܳܝܳܐ ܩܪܺܝܼܚܳܐ ܕܫܽܘܼܐܠܐ ܢܳܨܽܘܿܦܳܐ ܕܰܠܥܶܠ ܬܰܠܝܰܐ ܗ̱ܘ ܒܦܳܘܼܢܳܝܐ ܘܕܽܘܼܒܳܪܳܐ ܕܺܝܠܺܝ ܘܕܺܝܠܳܟ ܘܰܕܟܽܠܰܢ ܒܶܠܥܳܕ ܦܘܼܪܫܳܢܳܐ ܕܗܳܢܳܐ ܘܰܕܗܰܘ؟

ܘܐܰܝܟ ܢܶܩܦܳܝܳܐ ܠܗܳܠܶܝܢ ܟܽܠܗܶܝܢ ܬܢܳܢ ܡܝܰܬܰܪ ܐ̱ܢܳܐ ܕܐܶܩܦܽܘܿܣ ܘܐܶܫܒܽܘܿܩ ܡܶܠܬܳܐ ܠܚܰܕ ܡܼܶܢ ܡܰܠܦ̈ܢܰܝܢ ܣܦܺܝܼܪ̈ܶܐ ܗܳܢܳܐ ܕܡܰܠܝܳܐܝܬ ܟܳܬܶܒ ܘܐܳܡܰܪ: «ܡܶܛܠ ܕܐܰܡܺܝܼܪ ܘܰܦܩܺܝܼܕ. ܘܟܽܠܗܽܘܿܢ ܥܰܡ̱̈ܡܶܐ ܣܳܗܕܺܝܼܢ ܕܫܰܪܝܼܪܳܐ ܗ̱ܝ ܡܶܠܬܳܐ ܗܳܕܶܐ ܕܐܺܝܼܬܶܝܗܿ: ܐܰܟܡܳܐ ܕܨܳܒܶܝܢ ܐܰܢ̱ܬܽܘܢ ܕܢܶܥܒܕܽܘܢ ܠܟܽܘܿܢ ܒܢܰܝ̈ܢܳܫܳܐ ܐ̱ܚܪ̈ܳܢܶܐ. ܥܒܶܕܘܢ ܐܰܢ̱ܬܽܘܢ ܠܐܚܪ̈ܳܢܶܐ. ܘܡܶܕܶܡ ܕܰܣܢܶܐ ܥܠܰܝܟܽܘܢ ܠܐܚܪ̈ܳܢܶܐ ܠܐ ܬܶܥܒܕܽܘܢ. ܘܐܰܟܡܳܐ ܕܪܳܓܺܝܢ ܐܰܢ̱ܬܽܘܢ ܘܨܳܒܶܝܢ ܐ̱ܢܬܽܘܢ ܕܢܶܥܒܶܕ ܠܟܽܘܿܢ ܒܳܪܽܘܿܝܳܐ܆ ܥܒܶܕܽܘܢ ܐܳܦ ܐܰܢ̱ܬܽܘܢ ܒܐܰܝܠܶܝܢ ܕܰܡܨܶܝܢ ܐܰܢ̱ܬܽܘܢ ܠܟܽܠܳܗܿ ܒܪܺܝܼܬܳܐ.»

ܒܣܰܒܪܳܐ ܕܠܐ ܢܚܽܘܼܒ ܣܰܒܪܳܐ. ܘܕܶܡ̈ܥܶܐ ܫܚܺܝܼ̈ܩܶܐ ܘܕܽܘܼ݁̈ܥܬܶܐ ܬܥܺܝܼ̈ܫܶܐ ܕܗܳܪܟܳܐ ܘܬܰܡܳܢ ܢܰܫܩܽܘܢ ܢܰܪܘܽܘܿܢ ܚܰܘ̈ܩܶܐ ܘܰܟܪ̈ܳܒܶܐ ܕܰܥܬܺܝܼܕܘܼܬܰܢ!

2025 ܬܶܗܘܶܐ ܒܪܺܝܼܟܬܳܐ ܘܡܰܠܝܰܬ ܫܰܝܢܳܐ ܒܗܺܝܼܠܐ ܘܰܫܠܳܡܳܐ ܬܰܩܢܳܐ ܠܥܳܠܡܳܐ ܘܰܠܦܶܢ̈ܝܳܬܳܐ ܕܐܰܬܪܰܢ.

ܝܘܣܦ ܒܓܬܫ

ܚܘܼܕܪܳܐ ܕܡܰܪܕܽܘܼܬܳܐ ܘܣܶܦܪܳܝܘܼܬܐ ܕܠܶܫܳܢܳܐ ܣܘܼܪܝܳܝܐ: ܡܶܪܕܺܝܢ

ܐܰܝܟܰܢ؟

ܐܰܝܟܰܢ؟

ܐܶܢ ܡܫܰܐܶܠ ܐ̱ܰܢܬ ܠܺܝܼ ܐܰܝܟܰܢ ܡܰܨܝܳܐ ܕܐܰܚܶܒ؟

ܐܳܡܰܪ ܐ̱ܢܳܐ ܠܳܟ: ܬܩܽܘܿܠ ܘܰܬܪܽܘܿܨ ܡܶܠ̈ܰܝܟ. ܘܒܩܺܝܼ ܘܪܕܺܝܼ  ܡܰܡܠܠܳܟ.

ܐܶܢ ܡܫܰܐܶܠ ܐ̱ܰܢܬ ܠܺܝܼ ܐܰܝܟܰܢ ܡܰܨܝܳܐ ܕܐܰܟܫܰܪ؟

ܐܳܡܰܪ ܐ̱ܢܳܐ ܠܳܟ: ܬܩܽܘܿܠ ܘܰܬܪܽܘܿܨ ܡܶܠ̈ܰܝܟ. ܘܒܩܺܝܼ ܘܪܕܺܝܼ ܡܰܡܠܠܳܟ.

ܐܶܢ ܡܫܰܐܶܠ ܐ̱ܰܢܬ ܠܺܝܼ ܐܰܝܟܰܢ ܡܰܨܝܳܐ ܕܐܶܗܘܶܐ ܛܳܒܳܐ ܘܰܟܢܺܝܼܟܳܐ ܘܰܡܝܰܬܪܳܐ؟

ܐܳܡܰܪ ܐ̱ܢܳܐ ܠܳܟ: ܬܩܽܘܿܠ ܘܰܬܪܽܘܿܨ ܡܶܠ̈ܰܝܟ. ܘܒܩܺܝ ܘܪܕܺܝܼ ܡܰܡܠܠܳܟ.

ܐܶܢ ܡܫܰܐܶܠ ܐ̱ܰܢܬ ܠܺܝܼ ܐܰܝܟܰܢ ܡܰܨܝܳܐ ܕܐܶܝܰܩܰܪ ܘܐܶܬܝܰܩܰܪ؟

ܐܳܡܰܪ ܐ̱ܢܳܐ ܠܳܟ: ܬܩܽܘܿܠ ܘܰܬܪܽܘܿܨ ܡܶܠ̈ܰܝܟ. ܘܒܩܺܝܼ ܘܪܕܺܝܼ ܡܰܡܠܠܳܟ.

ܐܶܢ ܡܫܰܐܶܠ ܐ̱ܰܢܬ ܠܺܝܼ ܐܰܝܟܰܢ ܡܨܝܐ ܕܐܶܬܶܠ ܘܐܶܣܰܒ؟

قراءة المزيد

ܒܰܪܢܳܫܳܐ ܢܰܗܺܝܼܪܳܐ

ܒܰܪܢܳܫܳܐ ܢܰܗܺܝܼܪܳܐ

ܢܽܘܼܗܪܳܐ ܦܰܐܝܳܐ ܡܿܰܢ ܬܘܼܩܦܰܐ ܗ̱ܘ ܕܫܰܬܺܝܼܩ ܘܥܰܫܺܝܼܢ. ܘܒܰܪܢܳܫܳܐ ܢܰܗܺܝܼܪܳܐ ܗܿܰܘ ܗ̱ܘܼ ܕܕܰܠܺܝܼܩ ܒܢܽܘܼܗܪܳܐ ܠܐ ܡܶܣܬܰܕܩܳܢܳܐ ܕܰܫܪܳܪܳܐ ܪܰܒܳܐ. ܘܗܿܰܘ ܗ̱ܘܼ ܕܡܶܬܚܰܦܰܛ ܠܰܡܫܰܘܫܳܛܘܼ ܢܰܦܫܶܗ ܒܚܶܟܡܰܬ ܕܶܠܩܶܐ ܕܺܝܼܕܰܥܬܳܐ ܘܝܽܘܼܠܦܳܢܳܐ. ܘܡܶܢܶܗ ܘܠܶܗ ܝܳܨܦ ܘܦܳܠܰܚ ܘܟܳܪܶܒ ܘܬܳܢܶܐ ܠܡܰܢܗܳܪܘ ܚܶܫܘܼ̈ܟܳܬܐ ܡܶܛܽܠ ܥܠܰܠܬܳܐ ܛܳܒܬܳܐ ܟܰܕ ܠܳܚܶܫ ܫܰܝܢܳܐ ܒܗܺܝܼܠܐ ܘܦܳܪܶܣ ܒܣܳܡܳܐ ܘܬܽܘܼܟܠܳܢܳܐ. ܥܕܰܡܳܐ ܠܗܳܝ ܕܢܰܪܓܶܫ ܒܰܪܢܳܫܳܐ ܥܰܡܶܗ ܘܒܺܐܝܼܬܽܘܼܬܶܗ ܒܢܰܘܚܳܐ ܡܢܺܝܼܚܳܢܳܐ ܐܰܝܟ ܗܿܰܘ ܕܒܰܝܬܶܗ. ܘܢܳܬܦܳܐ ܚܰܘܪܳܐ ܐܽܘܼܪܚܳܐ ܕܒܳܗܿ ܦܳܪܶܣ ܢܰܗܺܝܼܪܳܐ ܢܽܘܼܗܪܶܗ ܒܶܠܥܳܕ ܣܘܼܟܳܝܳܐ ܘܚܽܘܒܳܐ ܩܨܺܝܼܨܳܐ ܘܐܶܢܳܢܳܝܳܐ. ܒܰܕ ܠܰܝܬ ܠܶܗ ܢܺܝܼܫܳܐ ܡܶܕܶܡ ܟܰܣܝܳܐ ܣܛܰܪ ܡܼܶܢ ܗܿܳܝ ܕܢܶܬܒܰܣܰܡ ܒܐܺܝܼܬܘܼܬܶܗ ܘܢܰܥܬܪ ܠܝܳܪܬܽܘܼܬܶܗ ܟܰܕ ܡܶܬܬܰܓܰܪ ܟܰܟܪ̈ܰܘܗܝ ܠܡܰܘܬܳܪܽܘܼ ܒܗܶܝܢ ܠܐܰܚܪ̈ܳܢܶܐ ܘܠܐܢܳܫܽܘܼܬܳܐ.

قراءة المزيد

ܕܶܐܢ ܫܰܪܺܝܪ ܘܡܰܘܬܰܪ ܘܚܳܫܰܚ ܟܬܳܒܳܐ ܘܣܶܦܪܳܐ ܕܶܐܬܟܬܶܒ ܒܥܳܠܡܳܐ

ܕܶܐܢ ܫܰܪܺܝܪ ܘܡܰܘܬܰܪ ܘܚܳܫܰܚ ܟܬܳܒܳܐ ܘܣܶܦܪܳܐ ܕܶܐܬܟܬܶܒ ܒܥܳܠܡܳܐ

ܒܪܺܝܟ ܐܰܢ̱ܬ ܡܰܠܦܳܢܰܢ ܚܰܟܺܝܡܳܐ. ܘܰܡܫܰܒܰܚ ܫܡܳܟ ܐܰܠܳܗܳܐ ܛܳܒܳܐ ܘܰܡܪܰܚܡܳܢܳܐ ܘܣܰܓܺܝ ܛܰܝ̈ܒܘܳܬܳܐ. ܡܰܘܕܶܝܢܰܢ ܠܡܳܪܽܘܬܳܟ. ܣܳܓܕܺܝܢܰܢ ܠܰܐܠܳܗܽܘܬ̥ܳܟ. ܡܪܰܡܪܡܺܝܢܰܢ ܠܺܐܝܬܽܘܬܳܟ. ܡܩܰܠܣܺܝܢܰܢ ܠܰܡܪܰܚܡܳܢܽܘܬܳܟ. ܡܰܟܪܙܺܝܢܰܢ ܠܰܫܦܺܝܥܽܘܬ ܚܽܘܒܳܟ. ܘܪܶܚܡܬܳܟ ܕܰܠܘܳܬ ܫܺܝܛܽܘܬܰܢ. ܕܰܟܡܳܐ ܐܰܘܪܶܒܬ̊ ܘܝܰܩܰܪܬ̊ ܠܰܟܝܳܢܰܢ. ܟܡܳܐ ܐܰܥܬܰܪܬ̊ ܡܶܣܟܺܢܽܘܬܰܢ. ܟܡܳܐ ܚܰܟܶܡܬ̊ ܗܶܕܝܽܘܛܽܘܬܰܢ. ܥܕܰܡܳܐ ܠܰܐܝܟܳܐ ܕܰܐܝܟ ܣܳܦܪܳܐ ܡܰܠܶܦ ܛܠܳܝ̈ܶܐ ܘܪܳܕܶܐ ܫܰܒܪ̈ܶܐ ܐܶܬ̊ܬܰܚܬܺܝܬ̊ ܘܶܐܬܒܛܶܠ ܠܳܟ ܥܰܠ ܝܰܨܺܝܦܽܘܬܳܐ ܕܬܰܪܒܺܝܬܰܢ. ܘܒܳܬܰܪ ܕܰܒܪܰܝܬ̊ ܠܰܟܝܳܢܰܢ ܘܰܐܥܬܰܪܬܳܝܗܝ ܒܫܽܘ̈ܘܟܳܢܰܝܟ ܐܰܠܳܗܳܝ̈ܶܐ ܘܡܰܘܗ̈ܒܳܬܳܐ ܠܳܐ ܡܶܬܡܰܣ̈ܟܢܳܢܝܳܬܳܐ ܕܛܰܝܒܽܘܬܳܟ.

قراءة المزيد

ܥܰܠܗܳܝ ܕܡܳܢܰܘ ܟܝܳܢܶܗ ܕܒܰܪ ܐ̱ܢܳܫܐ؟

ܥܰܠܗܳܝ ܕܡܳܢܰܘ ܟܝܳܢܶܗ ܕܒܰܪ ܐ̱ܢܳܫܐ؟

ܡܶܛܽܠ ܕܣܰܓܺܝ ܪܰܒ ܘܰܫܒܺܝܚ ܘܰܬܡܺܝܗ ܥܳܒܽܘܕܳܐ ܚܰܟܺܝܡ ܒܟܽܠ. ܘܠܳܐ ܡܶܬܕܪܶܟ ܠܗܰܘ̈ܢܶܐ ܥܒܺܝ̈ܕܶܐ ܘܠܳܐ ܡܶܬܡܰܫܰܚ ܘܠܳܐ ܡܶܣܬܰܝܰܟ̥. ܘܠܰܝܬ ܠܰܟܝܳܢ̈ܶܐ ܪ̈ܒܝܐ[1] ܕܰܢܩܽܘܡܽܘܢ ܥܰܠ ܝܺܕܥܬܳܐ ܕܰܥܠܰܘܗܝ܉ ܗܳܟܰܢܳܐ ܐܳܦ ܟܽܠܳܗ̇ ܒܪܺܝܬܶܗ ܪܰܒܳܐ ܘܰܫܒܺܝܚܳܐ ܘܰܬܡܺܝܗܳܐ ܘܠܳܐ ܡܶܬܕܰܪܟܳܐ. ܒܗܳܝ ܕܺܐܝܬ ܒܳܗ̇ ܦܽܘܪ̈ܫܳܢܶܐ ܣܰܓܺܝ̈ܶܐܐ ܘܫܽܘܚ̈ܠܳܦܶܐ ܘܓܶܢ̈ܣܶܐ ܘܳܐܕ̈ܫܶܐ ܘܰܩܢܽܘ̈ܡܶܐ ܕܠܳܐ ܡܶܣܬܰܝܟ̥ܺܝܢ ܐܰܘ ܡܶܬܕܰܪܟܺܝܢ. ܡܰܢܽܘ ܡܶܢ ܒܢܰܝ̈ܢܳܫܳܐ ܥܒܰܝ̈ܳܐ ܘܗܽܘܠܳܢܳܝ̈ܶܐ ܡܢܰܬܥܱ̈ܝ ܥܰܡ ܒܶܣܪܳܐ ܟܢܳܬܗܽܘܢ. ܘܪ̈ܳܫܦܰܝ ܒܰܐܪܥܳܐ ܐܶܡܗܽܘܢ܇ ܕܰܡܨܶܐ ܕܢܰܕܪܶܟ ܘܢܰܘܕܰܥ ܘܢܺܐܠܰܦ ܥܰܠ ܒܶܪ̈ܝܳܬܳܐ ܬܗܺܝܪ̈ܳܬܳܐ ܘܠܳܐ ܡܶܬܕܰܪ̈ܟܳܢܝܬܐ ܘܡܰܠ̈ܝܳܬ̥ ܚܶܟܡܬܳܐ ܪܰܒܬܳܐ ܕܰܒ̣ܪܳܐ ܘܰܐܬܩܶܢ ܒܳܪܽܘܝܳܐ ܚܰܟܺܝܡܳܐ. ܐܶܠܳܐ ܕܢܶܗܘܶܐ ܡܰܢ ܕܰܐܪܚܶܩ ܡܶܢ ܕܠܽܘܚܝܶܗ ܕܥܳܠܡܳܐ. ܘܰܐܒܥܶܕ ܘܶܐܙܰܠ ܫܟܶܢ ܘܰܫܪܳܐ ܒܫܶܠܝܳܐ. ܘܰܫܬܶܩ ܘܶܐܬܟܰܢܰܫ ܒܗܰܘܢܳܐ ܘܚܽܘܫܳܒܳܐ܇ ܘܕܰܝܶܒ ܦܰܓܪܶܗ ܒܥܳܢܘܳܝܽܘܬܳܐ.

قراءة المزيد

ܕܰܐܝܟܰܢ ܡܶܬܺܝܕܰܥ ܫܪܳܪܳܐ ܚܰܬ̊ܺܝܬ̥ܳܐܺܝܬ̥

ܕܰܐܝܟܰܢ ܡܶܬܺܝܕܰܥ ܫܪܳܪܳܐ ܚܰܬ̊ܺܝܬ̥ܳܐܺܝܬ̥

ܒܳܬܰܪ ܗܳܟܺܝܠ ܕܚܰܘܺܝܢܰܢ ܕܡܳܢܳܐ ܙܳܕܶܩ ܠܒܰܪ ܐ̱ܢܳܫܳܐ ܕܢܶܕܰܥ ܘܢܺܐܠܰܦ ܩܰܕܡܳܐܺܝܬ̥. ܗܳܢܰܘ ܕܶܝܢ܆ ܕܰܢܥܰܩܶܒ ܚܰܬ̊ܺܝܬ̥ܳܐܺܝܬ̥ ܥܰܠ ܫܪܳܪܳܐ ܘܢܶܦܪܫܺܝܘܗܝ ܡܶܢ ܕܰܓܳܠܽܘܬܳܐ. ܬܽܘܒ ܐܳܡܪܺܝܢܰܢ ܗܳܫܳܐ ܕܰܐܝܟܰܢܳܐ ܡܰܨܝܳܐ ܕܢܶܬܺܝܕܰܥ ܠܶܗ ܫܪܳܪܳܐ ܠܗܰܘ ܕܰܡܥܰܩܶܒ ܥܠܰܘܗܝ ܚܰܬ̊ܺܝܬ̥ܳܐܺܝܬ̥.

ܩܰܕܡܳܐܺܝܬ̥ ܐܳܡܪܺܝܢܰܢ ܕܰܟܬܳܒܳܐ ܗܳܢܳܐ ܕܰܩܕܳܡܰܝܢ. ܒܢܺܝܫܳܐ ܛܳܒܳܐ ܕܚܽܘܒܳܐ ܫܰܪܺܝܪܳܐ ܘܰܐܠܳܗܳܝܳܐ ܐܶܟܬܰܒ ܠܟܽܠܗܽܘܢ ܥܰܡܡ̈ܶܐ ܓܰܘܳܢܳܐܝܬ̥. ܠܝܽܘܬܪܳܢܳܐ ܪܰܒܳܐ ܕܢܰܦܫܳܐ ܘܰܢܛܺܝܪܽܘܬ̥ ܦܰܓܪܳܐ. ܕܗܳܢܽܘܢ ܕܰܥܬܺܝܕܺܝܢ ܕܢܶܫܡܥܽܘܢܳܝܗܝ. ܘܰܠܥܽܘܗܕܳܢܳܐ ܛܳܒܳܐ ܕܟܳܬܽܘܒܳܐ ܡܚܺܝܠܳܐ ܘܰܣܢܺܝܩܳܐ. ܠܬܶܫܒܽܘܚܬܳܐ ܕܶܝܢ ܘܺܐܝܩܳܪܳܐ ܕܚܰܕ ܡܳܪܳܐ ܕܟܽܠܳܐ. ܥܳܒܽܘܕܳܐ ܒܳܪܽܘܝܳܐ ܘܰܡܦܰܪܢܣܳܢܳܐ ܚܰܟܺܝܡܳܐ. ܗܰܘ ܕܡܶܢܶܗ ܗܺܝ ܟܽܠ ܛܳܒܬܳܐ ܡܫܰܡܠܰܝܬܳܐ. ܘܗܽܘ ܝܳܗܶܒ ܡܶܠܬܳܐ ܕܺܝܕܰܥܬܳܐ ܫܰܪܺܝܪܬܳܐ ܠܳܐܡܽܘܪܳܐ. ܘܣܽܘܟܳܠܳܐ ܘܒܽܘܝܳܢܳܐ ܚܰܬ̊ܺܝܬ̥ܳܐ ܠܫܳܡܽܘܥܳܐ. ܐܶܢ ܟܺܝܬ ܘܰܬܪ̈ܰܝܗܽܘܢ ܒܢܺܝܫܳܐ ܕܚܽܘܒܳܐ ܘܡܰܟܺܝܟܽܘܬܳܐ ܘܕܶܚܠܰܬ̥ ܐܰܠܳܗܳܐ ܡܶܬܚܰܫܚܺܝܢ. ܣܛܰܪ ܡܶܢ ܟܽܠ ܚܰܫܳܐ ܣܰܢܝܳܐ ܕܰܚܣܳܡܳܐ. ܘܙܺܐܦܳܐ ܕܒܺܝܫܽܘܬܳܐ ܘܫܽܘܒܚܳܐ ܣܪܺܝܩܳܐ ܢܕܺܝܕ ܥܰܠ ܐܰܠܳܗܳܐ. ܘܪܳܡܽܘܬ̥ܳܐ ܛܰܡܰܐܬܳܐ ܢܳܨܝܰܬ̥ ܥܰܡ ܐܰܠܳܗܳܐ.

قراءة المزيد

ܕܡܳܢܳܐ ܐܺܝܬܰܘܗܝ ܫܪܳܪܳܐ. ܘܡܳܢܳܐ ܐܺܝܬܶܝܗ̇ ܕܰܓܳܠܽܘܬܳܐ

ܕܡܳܢܳܐ ܐܺܝܬܰܘܗܝ ܫܪܳܪܳܐ. ܘܡܳܢܳܐ ܐܺܝܬܶܝܗ̇ ܕܰܓܳܠܽܘܬܳܐ

ܕܡܳܢܳܐ ܘܳܠܶܐ ܠܒܰܪܢܳܫܳܐ ܠܡܶܕܰܥ ܘܰܕܢܺܐܠܰܦ. ܗܳܢܰܘ ܕܶܝܢ ܕܰܢܥܰܩܶܒ ܚܰܬ̊ܺܝܬ̥ܳܐܝܬ̥ ܥܰܠ ܫܪܳܪܳܐ. ܘܢܶܦܪܫܺܝܘܗܝ ܡܶܢ ܕܰܓܳܠܽܘܬܳܐ. ܘܕܰܐܝܟܰܢ ܡܶܬ̥ܺܝܕܰܥ ܫܪܳܪܳܐ ܚܰܬ̊ܺܝܬ̥ܳܐܝܬ̥. ܕܺܐܝܬܰܘܗܝ ܫܰܦܝܽܘܬ̥ܳܗ̇ ܕܢܰܦܫܳܐ ܕܒܳܗ̇ ܚܳܝܪܳܐ ܒܰܟܝܳܢܳܐ ܚܰܬ̊ܺܝܬ̥ܳܐܝܬ̥. ܘܡܶܫܟܚܳܐ ܠܰܫܪܳܪܳܐ. ܢܺܐܡܰܪ ܗܳܫܳܐ ܕܡܳܢܳܐ ܐܺܝܬܰܘܗܝ ܗܽܘ ܫܪܳܪܳܐ. ܘܡܳܢܳܐ ܐܺܝܬܶܝܗ̇ ܕܰܓܳܠܽܘܬܳܐ.

ܘܳܐܡܪܺܝܢܰܢ: ܕܰܫܪܳܪܳܐ ܐܺܝܬܰܘܗܝ ܡܶܕܶܡ ܕܺܐܝܬܰܘܗܝ. ܘܕܰܓܳܠܽܘܬܳܐ ܐܺܝܬܶܝܗ̇ ܡܶܕܶܡ ܕܠܰܝܬܰܘܗܝ. ܘܰܫܪܳܪܳܐ ܩܳܐܶܡ ܠܢܰܦܫܶܗ. ܘܰܡܫܰܪܰܪ ܗܽܘ ܥܠܰܘܗܝ ܒܗܳܝ ܕܺܐܝܬܰܘܗܝ. ܕܰܓܳܠܽܘܬܳܐ ܕܶܝܢ ܠܳܐ ܩܳܝܡܳܐ ܠܢܰܦܫܳܗ̇ ܒܗܳܝ ܕܠܰܝܬܶܝܗ̇. ܘܰܐܟܙܢܳܐ ܕܚܶܫܟܳܐ ܓܠܺܝܙܽܘܬܶܗ ܕܢܽܘܗܪܳܐ ܐܺܝܬܰܘܗܝ. ܘܒܺܝܫܬܳܐ ܓܠܺܝܙܽܘܬܳܗ̇ ܕܛܳܒܬܳܐ. ܗܳܟܘܳܬ̥ ܘܕܰܓܳܠܽܘܬܳܐ ܓܠܺܝܙܽܘܬ̥ܶܗ ܕܰܫܪܳܪܳܐ. ܘܢܽܘܗܪܳܐ ܘܛܳܒܬܳܐ ܐܺܝܬܰܝܗܽܘܢ. ܚܶܫܟܳܐ ܕܶܝܢ ܘܒܺܝܫܬܳܐ ܠܰܝܬ ܐܶܢܽܘܢ. ܐܶܠܳܐ ܓܠܺܝܙܽܘܬܳܐ ܕܗܳܠܶܝܢ ܡܶܬ̥ܰܐܡܪܺܝܢ. ܫܪܳܪܳܐ ܕܶܝܢ ܝܰܬܺܝܪ ܚܰܝܠܬ̥ܳܢ ܡܶܢ ܗܳܠܶܝܢ. ܒܗܳܝ ܕܺܐܝܬܰܘܗܝ ܐܰܡܺܝܢܳܐܝܬ̥ ܘܩܳܐܶܡ ܠܢܰܦܫܶܗ. ܘܰܐܝܟܳܐ ܕܰܫܪܳܪܳܐ ܐܺܝܬ ܐܰܡܺܝܢܳܐܝܬ̥܆ ܕܰܓܳܠܽܘܬܳܐ ܣܳܟ ܠܳܐ ܡܰܨܝܳܐ ܕܬܶܗܘܶܐ ܐܺܝܬܶܝܗ̇. ܒܗܳܝ ܕܠܰܝܬ ܐܶܡܰܬܝ ܕܠܰܝܬ ܫܪܳܪܳܐ. ܗܳܐ ܐܶܬܚܰܘܝܰܬ̥ ܕܣܳܟ ܟܽܘܠܳܢܳܐܝܬ̥ ܠܰܝܬ ܕܰܓܳܠܽܘܬܳܐ. ܘܫܰܪܺܝܪܳܐ ܐܺܝܬ ܚܰܬ̊ܺܝܬ̥ܳܐܝܬ̥. ܘܗܳܢܰܘ ܕܽܘܡܳܪܳܐ. ܕܰܐܝܟܰܢ ܡܶܕܶܡ ܕܠܰܝܬܰܘܗܝ ܣܳܟ. ܗܳܘܶܐ ܡܶܬ̥ܶܐܡܰܪ ܘܺܐܝܬ ܠܶܗ ܫܡܳܐ. ܗܳܢܳܐ ܕܶܝܢ ܗܳܘܶܐ ܠܘܳܬ ܡܰܢ ܕܰܓܠܺܝܙ ܡܶܢ ܫܪܳܪܳܐ. ܘܶܐܢ ܠܳܐ ܥܳܣܩܳܐ ܗ̱ܘܳܬ̥ ܡܶܠܬܳܐ ܥܰܠ ܫܳܡܽܘ̈ܥܶܐ. ܐܳܡܰܪ ܗ̱ܘܺܝܬ̥ ܕܣܽܘܓܶܐܗ ܕܥܳܠܡܳܐ ܠܒܰܪ ܡܶܢ ܫܪܳܪܳܐ ܐܺܝܬܰܝܗܽܘܢ. ܘܰܕܠܺܝ̈ܠܶܐ ܐܶܢܽܘܢ ܕܶܐܫܟܰܚܘ ܠܰܫܪܳܪܳܐ. ܘܰܐܝܠܶܝܢ ܕܶܐܫܟܰܚܘ ܠܰܫܪܳܪܳܐ ܒܶܗ ܐܶܬܚܰܝܰܕܘ ܘܶܐܬܢܰܗܰܪܘ. ܘܰܐܡܠܶܟܘ ܒܰܐܪܥܳܐ ܘܒܰܫܡܰܝܳܐ. ܘܣܳܟ ܒܥܶܠܕܒܳܒܳܐ ܠܰܝܬ ܠܶܗ. ܘܠܳܐ ܣܰܩܽܘܒܠܳܐ ܘܠܳܐ ܣܳܢܳܐܐ ܘܠܳܐ ܥܽܘܟܳܪܳܐ. ܒܗܳܝ ܕܕܰܓܳܠܽܘܬܳܐ ܠܳܐ ܓܢܰܒܬ̥ܶܗ ܘܠܳܐ ܫܶܠܛܰܬ̥ ܒܶܗ. ܒܗܳܝ ܕܰܒܢܽܘܗܪܰܐ ܗ̱ܘ ܐܰܡܺܝܢܳܐܝܬ̥. ܘܗܳܢܳܐ ܐܶܬ̊ܕܰܡܺܝ ܠܒܳܪܽܘܝܶܗ ܘܫܰܪܰܪ ܠܰܒܪܺܝܬܶܗ ܘܰܠܡܶܠܬܳܐ ܗܳܝ ܕܰܐܡܺܝܪܳܐ. ܕܰܒܨܰܠܡܶܗ ܕܒܳܪܽܘܝܳܐ ܐܺܝܬܰܘܗܝ ܒܰܪܝܳܐ. ܘܗܳܢܳܐ ܐ̱ܪܳܙܳܐ ܪܰܒ ܗ̱ܘ̣. ܘܗܳܫܳܐ ܠܳܐ ܡܰܨܝܳܐ ܕܢܶܬܦܰܫܰܩ. ܒܗܳܝ ܕܫܽܘܪܳܝܶܗ ܕܰܟܬܳܒܳܐ ܕܳܡܶܐ ܠܚܰܠܒܳܐ ܕܝܰܠܽܘ̈ܕܶܐ. ܘܰܟܡܳܐ ܕܡܶܬܥܰܠܰܡ ܝܰܠܽܘܕܳܐ܆ ܐܳܦ ܡܶܐܟ̈ܠܳܬ̥ܶܗ. ܥܕܰܡܳܐ ܕܗܳܘܶܐ ܓܡܺܝܪܳܐ ܒܩܰܘܡܬܳܐ ܡܫܰܡܠܰܝܬܳܐ ܕܟܽܠ ܐܳܕ̈ܫܺܝܢ.

قراءة المزيد

ܥܰܠ ܗܳܝ ܕܡܳܢܳܐ ܘܳܠܶܐ ܠܒܰܪܢܳܫܳܐ ܠܡܶܕܰܥ ܘܰܠܡܺܐܠܰܦ

ܥܰܠ ܗܳܝ ܕܡܳܢܳܐ ܘܳܠܶܐ ܠܒܰܪܢܳܫܳܐ ܠܡܶܕܰܥ ܘܰܠܡܺܐܠܰܦ

ܒܰܪܢܳܫܳܐ ܡܰܢ ܗܰܟܺܝܠ ܐܺܝܬܰܘܗܝ ܚܰܝܳܐ ܡܠܺܝܠܳܐ ܡܳܝܽܘܬ̥ܳܐ. ܕܰܡܪܰܟܰܒ ܡܶܢ ܢܰܦܫܳܐ ܚܰܝܬܳܐ ܘܰܡܠܺܝܠܬܳܐ ܕܒܰܟܝܳܢܳܗ̇ ܫܰܦܝܳܐ ܘܢܰܗܺܝܪܳܐ. ܘܥܰܠ ܗܳܝ ܐܺܝܬܶܝܗ̇ ܡܩܰܒܠܳܢܺܝܬܳܐ ܕܗܰܘܢܳܐ ܘܕܺܝܕܰܥܬܳܐ ܐܰܡܺܝܢܳܐܝܬ̥ ܘܰܕܠܳܐ ܣܳܟ̥ܐ. ܘܡܶܢ ܦܰܓܪܳܐ ܗܽܘܠܳܢܳܝܳܐ ܘܝܰܩܺܝܪܳܐ. ܕܰܡܩܰܝܰܡ ܡܶܢ ܐܰܪܒܥܳܐ ܐܶܣܛܽܘܟ̈ܣܶܐ. ܕܡܶܢܗܽܘܢ ܡܩܰܝܰܡ ܘܰܡܛܰܟܰܣ ܥܳܠܡܳܐ ܗܳܢܳܐ ܟܽܠܶܗ ܡܶܬܚܰܙܝܳܢܳܐ. ܘܡܶܛܽܠ ܕܠܳܐ ܐܺܝܬܰܘܗܝ ܐܰܝܟ ܚܰܝ̈ܘܳܬܳܐ ܐ̱ܚܪ̈ܳܢܝܳܬܳܐ ܕܠܳܐ ܡܶܠܬܳܐ. ܐܶܠܳܐ ܡܫܰܘܬܰܦ ܒܡܶܠܬܳܐ ܕܺܝܕܰܥܬܳܐ ܘܺܐܝܬ ܒܶܗ ܟܝܳܢܳܐ ܕܰܡܩܰܒܶܠ ܝܺܕܰܥܬܳܐ ܟܡܳܐ ܕܡܶܬܝܰܗܒܳܐ ܠܶܗ ܚܶܟܡܬܳܐ. ܘܰܡܨܶܐ ܣܳܠܶܩ ܘܡܶܬܥܰܠܶܐ ܒܺܝܕܰܥܬܶܗ ܘܗܰܘܢܶܗ ܥܕܰܡܳܐ ܠܪ̈ܰܘܡܶܐ ܠܳܐ ܡܶܬܡܰܫ̈ܚܳܢܶܐ ܘܠܳܐ ܡܶܣܬܰܝܟܳܢ̈ܶܐ. ܐܰܝܠܶܝܢ ܕܠܰܘ ܡܶܢ ܟܬܳܒܳܐ. ܘܠܳܐ ܡܶܢ ܫܶܡܥܳܐ ܝܳܠܶܦ ܘܝܳܕܰܥ ܠܗܶܝܢ. ܐܶܠܳܐ ܡܶܢ ܛܶܟܣܳܐ ܫܒܺܝܚܳܐ ܕܕܽܘܒܳܪ̈ܶܐ ܡܝܰܬܪ̈ܶܐ ܕܰܡܚܰܘܶܐ ܒܰܩܢܽܘܡܶܗ. ܙܳܕܶܩ ܠܶܗ ܕܢܶܒܥܶܐ ܘܰܢܥܰܩܶܒ ܘܢܺܐܠܰܦ ܐܰܡܺܝܢܳܐܝܬ.

ܕܡܳܢܳܐ ܟܰܝ ܐܺܝܬܰܘܗܝ ܗܽܘ ܟܝܳܢܶܗ ܕܺܝܠܶܗ ܕܒܰܪ ܐ̱ܢܳܫܳܐ؟ ܘܰܠܡܳܢܳܐ ܐܺܝܬܰܘܗܝ؟ ܘܡܶܛܽܠ ܡܳܢܳܐ؟ ܘܡܶܛܽܠ ܕܛܶܟܣܳܐ ܐܺܝܬ ܠܟܽܠ ܡܶܕܶܡ. ܘܳܐܦ ܠܶܗ ܙܳܕܶܩ ܕܰܒܛܶܟܣܳܐ ܢܶܬܚܰܫܰܚ. ܘܢܶܕܰܥ ܕܡܳܢܳܐ ܘܳܠܶܐ ܠܶܗ ܩܰܕܡܳܐܝܬ̥ ܕܢܺܐܠܰܦ ܘܢܶܕܰܥ. ܘܡܶܢ ܐܰܝܟܳܐ ܢܫܰܪܶܐ ܒܝܽܘܠܦܳܢܳܐ ܕܺܝܕܰܥܬܶܗ ܕܰܫܪܳܪܳܐ. ܘܰܐܝ̇ܕܳܐ ܗ̱ܝ ܫܶܬܶܐܣܬܳܐ ܩܰܕܡܳܝܬܳܐ ܕܙܳܕܶܩ ܕܢܰܪܡܶܐ. ܘܕܰܐܝܟ ܐܰܝܠܶܝܢ ܒܶܢ̈ܝܳܢܶܐ ܐܺܝܬ ܠܶܗ ܕܢܶܒܢܶܐ ܥܠܶܝܗ̇. ܘܕܰܥܕܰܡܳܐ ܠܰܐܝܟܳܐ ܢܶܣܰܩ ܘܢܶܬܥܰܠܶܐ ܒܶܢܝܳܢܶܗ. ܘܰܕܡܶܢ ܐܰܝܟܳܐ ܢܫܰܪܶܐ ܒܽܐܘܪܚܳܐ ܗܳܕܶܐ ܕܺܝܕܰܥܬܳܐ ܕܰܫܪܳܪܳܐ. ܕܦܳܪܫܳܐ ܫܪܳܪܳܐ ܡܶܢ ܕܰܓܳܠܽܘܬܳܐ. ܘܢܽܘܗܪܳܐ ܡܶܢ ܚܶܫܽܘܟܳܐ. ܘܩܽܘܫܬܳܐ ܡܶܢ ܫܽܘܩܪܳܐ. ܘܺܝܕܰܥܬܳܐ ܡܶܢ ܛܳܥܝܽܘܬ̥ܳܐ.

ܡܶܛܽܠ ܕܟܽܠ ܕܰܡܗܰܠܶܟ ܒܢܽܘܗܪܳܐ ܠܳܐ ܛܳܥܶܐ ܘܠܳܐ ܡܶܬܬܘܰܗ. ܐܶܠܳܐ ܝܳܕܰܥ ܐܰܝܟܰܢܳܐ ܡܗܰܠܶܟ ܘܠܳܐܝܟܳܐ ܐܳܙܶܠ. ܘܡܳܛܶܐ ܠܰܐܝܟܳܐ ܕܨܳܒܶܐ. ܘܡܶܫܬܰܡܠܶܐ ܢܺܝܫܳܐ ܕܣܺܝܡ ܒܪܶܥܝܳܢܶܗ. ܡܩܰܒܶܠ ܣܽܘܟܳܝܶܗ ܘܗܳܘܶܐ ܠܶܗ ܫܽܘܠܳܡܳܐ ܛܳܒܳܐ ܠܣܽܘܥܪܳܢܶܗ. ܘܚܰܪܬܳܐ ܫܰܦܺܝܪܬܳܐ ܠܟܽܠܶܗ ܕܽܘܒܳܪܶܗ. ܡܰܢ ܕܶܝܢ ܕܪܳܕܶܐ ܒܚܶܫܽܘܟܳܐ ܠܳܐ ܝܳܕܰܥ ܐܰܝܟܰܢܳܐ ܡܗܰܠܶܟ. ܘܠܳܐ ܠܰܐܝܟܳܐ ܐܳܙܶܠ. ܘܠܳܐ ܢܳܣܒܳܐ ܫܽܘܠܳܡܳܐ ܛܳܒܳܐ ܡܰܪܕܺܝܬܶܗ. ܐܶܠܳܐ ܛܳܥܶܐ ܒܬܰܘܫܳܐ. ܘܠܰܐܒܕܳܢܳܐ ܫܳܪܟܳܐ ܚܰܪܬܶܗ.

ܗܳܟܰܢ ܐܺܝܬܶܝܗ̇ ܠܳܐ ܝܺܕܰܥܬܳܐ ܕܰܫܪܳܪܳܐ. ܘܗܳܠܶܝܢ ܦܽܘܪ̈ܫܳܢܶܐ ܐܺܝܬ ܒܰܝܢܳܬ̥ ܫܪܳܪܳܐ ܠܕܰܓܳܠܽܘܬܳܐ. ܘܒܶܝܬ ܛܳܒܬܐ ܠܒܺܝܫܬܳܐ. ܘܒܶܝܬ ܢܽܘܗܪܳܐ ܠܚܶܫܽܘܟܳܐ. ܡܶܛܽܠ ܕܰܫܪܳܪܳܐ ܘܛܳܒܬܳܐ ܢܽܘܗܪܳܐ ܐܺܝܬܰܝܗܽܘܢ. ܘܰܩܢܽܘ̈ܡܶܐ ܡܩܰܝ̈ܡܶܐ ܐܶܢܽܘܢ. ܘܺܐܝܬ ܠܗܽܘܢ ܫܽܘܪܳܝܳܐ ܐܰܘܟܺܝܬ ܪܺܝܫܺܝܬܳܐ. ܘܺܐܝܬܽܘܬܳܐ. ܕܰܓܳܠܽܘܬܳܐ ܕܶܝܢ ܘܒܺܝܫܬܳܐ ܘܚܶܫܽܘܟܳܐ ܠܰܝܬ ܐܶܢܽܘܢ. ܘܠܳܐ ܩܢܽܘܡ̈ܶܐ ܐܺܝܬ ܠܗܽܘܢ ܐܳܦܠܳܐ ܐܺܝܬܽܘܬܳܐ. ܐܶܠܐ ܓܠܺܝܙܽܘܬܐ ܕܡܶܢ ܡܶܕܶܡ ܐܺܝܬܰܝܗܽܘܢ. ܐܰܘܟܺܝܬ ܡܶܬܬܪܺܝܡܳܢܽܘܬܳܐ. ܐܰܝܟ ܗܳܝ ܕܢܺܐܡܰܪ ܐ̱ܢܳܫ܆ ܢܰܗܺܝܪ ܐܺܝܡܡܳܐ. ܗܳܕܶܐ ܐܺܝܬܶܝܗ̇ ܘܫܰܪܺܝܪܳܐ. ܘܶܐܢ ܢܺܐܡܰܪ ܕܠܳܐ ܢܰܗܺܝܪ ܐܺܝܡܳܡܳܐ. ܗܳܕܶܐ ܘܠܳܐ ܡܶܕܶܡ ܐܺܝܬܶܝܗ̇. ܘܠܳܐ ܫܰܪܺܝܪܳܐ. ܒܠܺܠܝܳܐ ܕܶܝܢ ܕܡܶܬܓܠܶܙ ܥܳܠܡܳܐ ܡܶܢ ܫܶܡܫܳܐ ܘܡܶܬܬܪܺܝܡܺܝܢ ܙܰܠܺܝ̈ܩܰܘܗܝ ܡܶܢ ܐܰܪܥܳܐ ܗܳܘܶܐ ܚܶܫܽܘܟܳܐ. ܟܰܕ ܠܰܝܬܰܘܗܝ ܒܰܩܢܽܘܡܶܗ ܡܶܕܶܡ ܗܽܘ ܚܶܫܽܘܟܳܐ. ܐܶܠܳܐ ܓܠܺܝܙܽܘܬܳܐ ܕܡܶܢ ܢܽܘܗܪܳܐ. ܗܳܟܘܳܬ̥ ܘܕܰܓܳܠܽܘܬܳܐ ܐܺܝܬܶܝܗ̇ ܓܠܺܝܙܽܘܬܐ ܕܡܶܢ ܫܪܳܪܳܐ. ܘܒܺܝܫܬܳܐ ܬܽܘܒ ܓܠܺܝܙܽܘܬܳܐ ܕܡܶܢ ܛܳܒܬܳܐ.

ܘܗܳܠܶܝܢ ܐܺܝܬܰܝܗܽܘܢ ܓܶܕ̈ܫܶܐ ܥܳܠܽܘ̈ܠܶܐ ܕܠܳܐ ܩܢܽܘܡܳܐ. ܘܠܰܘ ܓܶܕ̈ܫܶܐ ܡܟܰܬܪ̈ܳܢܶܐ ܒܰܟܝܳܢܳܐ ܐܰܝܟ ܢܽܘܗܪܳܐ ܒܶܐܣܦܺܝܪܶܗ ܕܫܶܡܫܳܐ. ܘܚܶܘܳܪܽܘܬܳܐ ܒܬܰܠܓܳܐ. ܘܽܐܘܟܳܡܽܘܬܳܐ ܒܥܽܘܪܒܳܐ. ܘܡܶܛܽܠ ܕܠܰܝܬ ܠܗܽܘܢ ܩܢܽܘܡܳܐ ܘܺܐܝܬܽܘܬܳܐ ܠܚܶܫܟܳܐ ܘܰܠܕܰܓܳܠܽܘܬܳܐ ܘܰܠܒܺܝܫܬܐ. ܐܳܦܠܳܐ ܚܰܝܠܬܳܢܽܘܬܳܐ ܩܢܶܝܢ ܐܶܠܳܐ ܡܚܺܝܠܽܘܬܳܐ. ܘܰܕܠܺܝ̈ܠܰܝ ܠܡܶܙܕܰܟܝܳܢܽܘܬܳܐ. ܒܰܠܚܽܘܕ ܨܶܒܝܳܢܳܐ ܢܶܨܛܒܶܐ ܘܢܶܓܒܶܐ ܒܚܺܐܪܽܘܬܳܐ ܡܫܰܠܰܛܬܳܐ ܡܕܰܡܝܰܬ̥ ܒܰܐܠܳܗܳܐ. ܕܶܐܬܝܰܗܒܰܬ ܠܶܗ ܠܳܐ ܚܰܣܳܡܳܐܝܬ̥ ܠܛܳܒܬܳܐ ܘܢܰܣܠܶܐ ܠܒܺܝܫܬܳܐ. ܘܗܳܝܕܶܝܢ ܫܰܪܺܝܪܳܐ ܚܺܐܪܽܘܬ̥ܶܗ ܘܫܰܦܺܝܪ ܨܶܒܝܳܢܶܗ. ܘܕܳܡܶܐ ܠܥܳܒܽܘܕܶܗ ܘܰܡܩܰܘܶܐ ܒܰܟܝܳܢܶܗ. ܐܶܢܕܶܝܢ ܡܰܗܡܶܐ ܡܶܢ ܛܳܒܬܳܐ܆ ܘܠܳܐ ܨܳܒܶܐ ܒܳܗ̇܆ ܥܳܐܠܳܐ ܥܠܰܘܗܝ ܓܶܕܫܳܢܳܐܝܬ̥ ܒܺܝܫܬܳܐ. ܗܳܝܕܶܝܢ ܡܶܬܥܰܒܕܰܕ ܠܒܺܝܫܬܳܐ ܕܰܐܡܠܟܰܬ̥ ܥܠܰܘܗܝ ܒܨܶܒܝܳܢܶܗ. ܘܡܰܘܒܶܕ ܚܺܐܪܽܘܬ̥ܶܗ ܘܠܳܐ ܡܩܰܘܶܐ ܒܰܟܝܳܢܶܗ. ܐܳܦܠܳܐ ܕܳܡܶܐ ܠܥܳܒܽܘܕܶܗ. ܘܡܰܢ ܕܗܳܟܰܢܰܐ ܗ̱ܘ ܘܠܳܐ ܩܳܡ ܒܰܫܪܳܪ ܟܝܳܢܶܗ ܘܰܒܪܺܝܬܶܗ܆ ܕܰܓܳܠܰܐ ܗ̱ܘ ܘܰܒܚܶܫܟܳܐ ܪܳܕܶܐ ܘܠܰܐܒܕܳܢܳܐ ܫܳܪܶܟ̥.

ܘܥܰܠ ܗܳܠܶܝܢ ܠܳܐ ܣܢܺܝܩܺܝܢܰܢ ܣܰܓܺܝ̈ܳܐܬܳܐ ܠܡܺܐܡܰܪ ܘܠܰܡܚܰܘܳܝܽܘ ܒܝܰܕ ܡܷ̈ܠܶܐ ܘܬܰܚܘ̈ܝܳܬܳܐ. ܡܶܛܽܠ ܕܰܠܣܰܓܺܝ̈ܶܐܐ ܢܰܗܺܝܪ̈ܳܢ ܘܓܰܠ̈ܝܳܢ ܘܺܝܕܺܝ̈ܥܳܢ. ܬܽܘܒ ܡܶܢ ܟܝܳܢܳܐ ܘܬܽܘܒ ܡܶܢ ܝܽܘܠܦܳܢܳܐ. ܗܳܫܳܐ ܗܳܟܺܝܠ ܕܺܝܕܺܝܥܳܐ ܘܓܰܠܝܳܐ ܠܟܽܠ ܐ̱ܢܳܫ ܕܰܫܪܳܪܐ ܢܽܘܗܪܳܐ ܐܺܝܬܰܘܗܝ ܘܛܳܒܬܳܐ. ܘܫܰܪܺܝܪ ܘܺܐܝܬܰܘܗܝ. ܘܕܰܓܳܠܽܘܬܳܐ ܚܶܫܟܳܐ ܐܺܝܬܶܝܗ̇ ܘܒܺܝ̈ܫܳܬܳܐ. ܘܠܰܝܬܶܝܗ̇܆ ܘܠܳܐ ܫܰܪܺܝܪܳܐ. ܐܶܠܳܐ ܓܶܕܫܰܐ ܗ̱ܘ ܥܳܠܽܘܠܳܐ ܘܓܰܢܳܒܳܐ. ܡܳܕܶܝܢ ܙܳܕܶܩ ܠܰܢ ܕܢܶܓܒܶܐ ܘܢܶܨܛܒܶܐ ܒܰܫܪܳܪܳܐ܆ ܕܺܐܝܬܰܘܗܝ ܢܽܘܗܪܳܐ. ܘܰܡܝܰܒܶܠ ܠܚܰܝ̈ܶܐ ܫܰܪܺܝܪ̈ܶܐ ܘܛܽܘܒ̈ܬܳܢܶܐ ܘܰܠܥܳܠܡܺܝ̈ܢܳܝܶܐ. ܘܢܰܣܠܶܐ ܠܕܰܓܳܠܽܘܬܳܐ ܕܺܐܝܬܶܝܗ̇ ܚܶܫܟܳܐ ܘܡܰܘܒܠܳܐ ܠܰܐܒܕܳܢܳܐ ܕܰܠܥܳܠܰܡ.

ܡܳܕܶܝܢ ܥܰܠ ܗܳܢܳܐ ܙܳܕܶܩ ܠܰܢ ܕܰܢܥܰܩܶܒ ܩܰܕܡܳܐܝܬ̥ ܥܕܰܡܳܐ ܕܰܢܩܽܘܡ ܚܰܬܺܝܬܳܐܝܬ̥. ܘܶܐܡܰܬܝ ܕܩܳܝܡܺܝܢܰܢ ܒܢܽܘܗܪܳܐ ܕܰܫܪܳܪܳܐ܆ ܫܰܦܺܝܪ ܗܳܘܝܳܐ ܡܰܪܕܺܝܬܰܢ ܠܟܽܠ ܟܰܪ ܕܨܳܒܶܝܢܰܢ. ܐܰܝܟ ܗܳܢܽܘܢ ܕܡܰܪܡܶܝܢ ܫܶܬܶܐܣܬܳܐ ܚܠܺܝܡܬܳܐ ܘܥܰܡܺܝܩܬܳܐ ܘܰܡܫܰܪܰܪܬܳܐ. ܘܟܽܠܶܗ ܒܶܢܝܳܢܗܽܘܢ ܫܰܦܺܝܪ ܣܳܠܶܩ ܘܡܶܫܬܰܡܠܶܐ ܐܰܝܟ ܨܶܒܝܳܢܗܽܘܢ܀

ܗܳܫܳܐ ܚܰܒܺܝ̈ܒܰܝ ܘܰܐܚܰܝ̈ ܘܗܰܕܳܡܰܝ̈ ܟܽܠܗܽܘܢ ܒܢܰܝ̈ܢܳܫܳܐ ܫܳܡܽܘ̈ܥܶܐ ܕܗܳܠܶܝܢ. ܝܳܕܥܺܝܢ ܕܡܰܢ ܕܰܡܫܰܪܶܐ ܒܣܽܘܥܪܳܢܳܐ ܐܰܝܢܳܐ ܕܗܽܘ. ܡܶܢ ܫܽܘܪܳܝܳܐ ܙܳܕܶܩ ܠܶܗ ܕܰܢܫܰܪܶܐ ܘܰܐܝܟ ܛܶܟܣܳܐ ܢܶܪܕܶܐ. ܕܫܳܩܶܠ ܫܽܘܡܠܳܝܳܐ ܣܽܘܥܪܳܢܶܗ. ܐܶܢܕܶܝܢ ܡܫܰܪܶܐ ܡܛܰܟܣܳܐܝܬ̥ ܘܡܶܢ ܐܰܝܟܳܐ ܕܙܳܕܶܩ ܕܰܢܫܰܪܶܐ. ܐܶܠܳܐ ܒܠܺܝܠܳܐܝܬ̥ ܡܶܢ ܡܨܰܥܬܶܗ ܕܣܽܘܥܪܳܢܳܐ܆ ܐܰܘ ܒܚܰܪܬܶܗ. ܐܶܠܳܐ ܐܶܢ ܚܽܘܣܪܳܢܳܐ ܘܒܽܘܠܒܳܠܳܐ ܠܳܐ ܝܳܬ̥ܰܪ. ܘܰܠܫܽܘܡܠܳܝܳܐ ܠܳܐ ܡܳܛܶܐ ܣܪܺܝܩܰܐ ܗ̱ܘ ܥܰܡܠܶܗ. ܡܳܕܶܝܢ ܠܟܽܠܰܢ ܙܳܕܶܩ ܠܰܢ ܕܡܶܢ ܐܰܝܟܳܐ ܕܙܳܕܶܩ ܘܺܐܝܬܰܘܗܝ ܫܽܘܪܳܝܶܗ ܕܣܽܘܥܪܳܢܳܐ ܢܫܰܪܶܐ. ܚܢܰܢ ܡܰܢ ܒܡܶܠܬܳܐ ܘܰܐܢ̱ܬܽܘܢ ܒܫܶܡܥܳܐ܀

ܢܶܚܫܽܘܒ ܟܽܠܰܢ ܕܝܰܘܡܳܢܳܐ ܐܶܬܒܪܺܝܢܰܢ ܘܥ̣ܰܠܢܰܢ ܠܥܳܠܡܳܐ ܗܳܢܳܐ. ܗܳܢܰܘ ܫܽܘܪܳܝܳܐ ܫܰܪܺܝܪܳܐ ܘܚܰܬܺܝܬ̥ܳܐ ܕܠܳܚܶܡ ܠܟܽܠܗܽܘܢ ܥܰܡܡ̈ܶܐ. ܒܗܳܝ ܕܰܡܩܰܒܰܠ ܥܰܠ ܟܽܠܗܽܘܢ. ܘܠܳܐ ܡܰܨܝܳܐ ܠܐ̱ܢܳܫ ܕܰܢܕܰܓܠܺܝܘܗܝ ܣܳܟ. ܐܶܬܒܪܺܝܢܰܢ ܕܶܝܢ ܡܶܢ ܡܰܢ ܕܗܽܘ. ܘܶܐܬܛܰܝܰܒܢܰܢ ܟܽܠܰܢ ܒܰܦܩܰܥܬܳܐ ܡܶܕܶܡ ܪܘܺܝܚܬܳܐ ܣܰܓܺܝ ܕܠܰܝܬ ܒܳܗ̇ ܥܕܰܟܺܝܠ ܡܶܕܶܡ ܣܳܟ. ܠܳܐ ܛܽܘܪ̈ܶܐ ܘܠܳܐ ܡܥܰܪ̈ܶܐ ܘܠܳܐ ܐܺܝܠܳܢ̈ܶܐ. ܘܠܳܐ ܙܰܪ̈ܥܶܐ. ܘܠܳܐ ܒܶܢ̈ܝܳܢܶܐ ܘܠܳܐ ܩܶܢ̈ܝܳܢܶܐ. ܐܶܠܳܐ ܚܢܰܢ ܒܰܠܚܽܘܕܰܝܢ ܥܰܪ̈ܛܶܠܳܝܶܐ. ܘܰܚܙܰܝܢܰܢ ܚܢܰܢ ܠܰܢ ܕܺܐܝܬ ܠܰܢ ܦܰܓܪܳܐ ܚܳܫܽܘܫܳܐ. ܘܰܠܥܶܠ ܡܶܢ ܫܶܡܫܳܐ ܘܢܰܗܺܝܪ̈ܶܐ ܕܫܰܪܟܳܐ. ܘܳܐܐܰܪ ܡܶܫܬܰܚܠܦܳܢܳܐ. ܘܰܠܬܰܚܬ ܡܶܢܰܢ ܐܰܪܥܳܐ ܘܡܰܝ̈ܳܐ. ܘܰܐܪܓܶܫܢܰܢ ܕܺܐܝܬ ܒܰܢ ܟܝܳܢܳܐ ܐ̱ܚܪܺܢܳܐ ܫܰܦܝܳܐ ܘܢܰܗܺܝܪܳܐ. ܕܺܐܝܬܶܝܗ̇ ܗܳܕܶܐ ܢܰܦܫܳܐ ܡܠܺܝܠܬܳܐ ܘܗܰܘܢܳܐ ܝܰܕܽܘܥܬܳܢܳܐ. ܘܺܐܝܬ ܒܰܢ ܚܰܝܽܘܬܳܐ. ܘܗܳܝܕܶܝܢ ܫܰܪܺܝ ܗܳܢܳܐ ܦܰܓܪܳܐ ܚܳܐܶܫ ܡܶܢ ܫܽܘܚ̈ܠܳܦܶܐ ܕܳܐܐܰܪ ܕܰܠܥܶܠ ܡܶܢܰܢ. ܒܰܙܒܰܢ ܡܰܢ ܡܰܘܩܶܕ ܠܰܢ ܫܶܡܫܳܐ ܒܚܽܘܡܶܗ ܘܰܡܫܰܠܗܶܒ. ܘܒܰܙܒܰܢ ܬܽܘܒ ܡܣܰܝܶܛ ܠܰܢ ܐܳܐܰܪ ܒܥܰܙܺܝܙܽܘܬܳܐ ܕܩܽܘܪܶܗ ܘܰܡܪܰܛܶܒ ܠܰܢ ܒ̈ܛܰܠܶܐ ܘܰܪ̈ܣܺܝܣܶܐ. ܘܰܐܪܥܳܐ ܬܽܘܒ ܕܰܬܚܽܘܬܰܝܢ ܟܰܕ ܡܶܬܚܰܠܛܳܐ ܒܡܰܝ̈ܳܐ ܘܗܳܘܝܳܐ ܛܺܝܢܳܐ ܘܰܣܝܳܢܳܐ ܘܰܡܠܰܘܬܳܐ ܠܰܢ. ܘܟܰܕ ܗܳܠܶܝܢ ܚܰܫܢܰܢ ܒܥܰܝܢܰܢ ܢܛܺܝܪܽܘܬܳܐ ܕܡܶܢ ܗܳܠܶܝܢ ܡܰܚ̈ܫܳܢܝܳܬܳܐ ܕܦܰܓܪܳܐ. ܗܳܝܕܶܝܢ ܫܰܪܺܝ ܗܳܢܳܐ ܡܶܕܶܡ. ܓܰܘܳܝܳܐ ܕܒܰܢ ܗܳܢܰܘ ܕܶܝܢ ܗܰܘܢܳܐ ܝܰܕܽܘܥܬܳܢܳܐ ܡܰܘܠܶܕ ܚܽܘ̈ܫܳܒܶܐ ܘܡܶܬܦܰܪܰܣ ܕܢܶܥܒܶܕ ܢܛܺܝܪܽܘܬܳܐ ܠܒܰܪ ܙܰܘܓܶܗ ܦܰܓܪܳܐ ܡܶܢ ܚܰܫ̈ܶܐ ܗܳܠܶܝܢ ܕܶܐܡܰܪܢܰܢ ܕܗܳܐ ܡܫܺܝܡܺܝܢ ܠܰܢ. ܘܶܐܬܚܰܫܒ ܕܬܰܛܠܺܝܠܳܐ ܡܶܕܶܡ ܙܳܕܶܩ ܕܢܶܗܘܶܐ ܠܥܶܠ ܡܶܢܰܢ ܕܢܶܟܠܶܐ ܡܶܢܰܢ ܠܚܽܘܡܶܗ ܕܫܶܡܫܳܐ ܘܰܠܥܰܙܺܝܙܽܘܬܳܐ ܕܳܐܐܰܪ ܘܰܕܡܶܛܪܳܐ. ܗܳܢܰܘ ܚܽܘܫܳܒܳܐ ܩܰܕܡܳܝܳܐ ܕܶܐܬܗܰܘܢܰܢ ܒܰܪܢܳܫܳܐ. ܒܳܬܰܪܟܶܢ ܬܽܘܒ ܐܶܬܚܰܫܰܒܢܰܢ ܕܗܳܢܳܐ ܬܰܛܠܺܝܠܳܐ ܣܢܺܝܩ ܥܰܠ ܐܶܣ̈ܶܐ ܕܛܳܥ̈ܢܳܢ ܠܶܗ. ܘܬܽܘܒ ܐܶܬܚܰܫܰܒܢܰܢ ܕܳܐܦ [ܥܰܠ] ܗܳܠܶܝܢ ܐܶܣ̈ܶܐ ܣܢܺܝܩܺܝܢ ܥܰܠ ܥܽܘܡܩܳܐ ܕܫܶܬܶܐܣ̈ܶܐ ܡܫܰܪܪ̈ܳܬܳܐ ܕܣܳܠ̈ܩܳܢ ܥܠܰܝܗܶܝܢ. ܗܳܪܟܳܐ ܫܠܶܡ ܚܽܘܫܒܳܢܳܐ ܕܒܶܢܝܳܢܶܗ ܕܡܰܫܟܢܳܐ ܕܶܐܬܩܪܺܝ ܒܰܝܬܳܐ.

ܘܰܐܝܟܳܐ ܕܰܫܠܶܡ ܚܽܘܫܳܒܳܐ ܡܶܢ ܬܰܡܳܢ ܙܳܕܶܩ ܕܰܬܫܰܪܶܐ ܣܳܥܽܘܪܽܘܬܳܐ. ܘܰܐܝܟܳܐ ܕܩܰܕܶܡ ܫܰܪܺܝ ܘܶܐܬܗܰܘܢܰܢ ܚܽܘܫܳܒܳܐ. ܬܰܡܳܢ ܗܘܳܐ ܫܽܘܠܳܡܳܐ ܠܣܳܥܽܘܪܽܘܬܳܐ. ܘܶܐܬܩܪܺܝ ܗܳܢܳܐ ܫܽܘܠܳܡܳܐ ܕܩܳܕܶܡ ܡܶܬܗܰܘܢܰܢ. ܐܰܝܟ ܕܳܐܦ ܝܺܕܺܝܥܳܐ ܗܳܕܶܐ ܠܣܰܓܺܝ̈ܶܐܐ. ܗܳܟܰܢܳܐ ܘܥܰܠ ܫܰܪܒܳܐ ܕܢܰܦܫܳܐ ܕܰܠܓܰܘ ܙܳܕܶܩ ܕܢܶܬܚܰܫܰܒ. ܕܗܳܐ ܚܳܙܶܝܢܰܢ ܕܺܐܝܬ ܠܳܗ̇ ܚܰܫ̈ܶܐ ܡܰܚ̈ܫܳܢܶܐ ܘܰܡܫܺܝ̈ܡܳܢܶܐ. ܕܺܐܝܬܰܝܗܽܘܢ ܚܶܫܟܳܐ ܕܠܳܐ ܝܺܕܰܥܬܳܐ. ܘܛܳܥܝܽܘܬܳܐ ܕܕܰܓܳܠܽܘܬܳܐ ܕܺܐܝܬܰܝܗܽܘܢ ܗܳܠܶܝܢ ܚܰܫ̈ܶܐ ܓܰܢܳܒ̈ܶܐ ܕܥܳܐܠܺܝܢ ܥܰܠ ܢܰܦܫܳܐ ܒܚܶܫܟܳܐ ܕܠܺܠܝܳܐ ܕܛܳܥܝܽܘܬܳܐ. ܘܟܰܕ ܗܳܠܶܝܢ ܥܳܐܠܺܝܢ ܥܠܶܝܗ̇ ܓܶܕܫܳܢܳܐܝܬ̥܆ ܡܰܘܠܕܺܝܢ ܒܳܗ̇ ܟܽܠܗܽܘܢ ܚܰܫ̈ܶܐ ܒܺܝ̈ܫܶܐ ܕܫܰܪܟܳܐ. ܘܫܳܪܟ̥ܳܐ ܠܰܐܒܕܳܢܳܐ ܓܡܺܝܪܳܐ.

ܘܰܐܟܡܳܐ ܕܶܐܬܦܰܪܰܣܢܰܢ ܥܰܠ ܣܽܘܓ̈ܦܳܢܰܘܗܝ ܕܦܰܓܪܳܐ. ܘܰܥܒܰܕܢܰܢ ܠܶܗ ܒܰܝܬܳܐ ܘܣܰܬܰܪܢܳܝܗܝ ܒܶܗ. ܘܶܐܬܢܛܰܪ ܡܶܢ ܗܳܠܶܝܢ ܡܰܚܫܳܢ̈ܝܳܬܶܗ ܥܰܡ ܣܽܘܓܦܳܢ̈ܶܐ ܐ̱ܚܪ̈ܳܝܶܐ ܕܰܥܬܺܝܕܺܝܢ ܗ̱ܘܰܘ ܠܶܗ ܐܶܠܽܘܠܳܐ ܕܶܐܣܬܰܬܰܪ ܒܒܰܝܬܳܐ ܠܓܰܘ ܡܶܢ ܐܶܣ̈ܶܐ ܘܬܰܪ̈ܥܶܐ. ܗܳܟܰܢܳܐ ܝܰܬܺܝܪ ܘܳܠܶܐ ܠܰܢ ܕܢܶܬܦܰܪܰܣ ܥܰܠ ܢܰܦܫܳܐ ܕܗܺܝ ܐܺܝܬܶܝܗ̇ ܡܳܪܬܶܗ ܕܦܰܓܪܳܐ. ܘܢܶܥܒܶܕ ܠܳܗ̇ ܒܰܝܬܳܐ ܡܣܰܬܪܳܢܳܐ ܡܶܢ ܣܽܘܓܦܳܢ̈ܶܐ ܕܥܳܕܶܝܢ ܥܠܶܝܗ̇ ܒܟܽܠܙܒܰܢ. ܘܰܐܝܟܰܢܳܐ ܕܒܰܝܬܳܐ ܗܳܢܳܐ ܕܶܐܬܒܢܺܝ ܠܦܰܓܪܳܐ܆ ܡܢܰܛܰܪ ܠܶܗ ܡܶܢ ܚܽܘܡܳܐ ܘܡܶܢ ܩܽܘܪܳܐ. ܘܡܶܢ ܡܶܛܪܳܐ ܘܡܶܢ ܛܠܘܫܘܬܐ ܕܛܺܝܢܳܐ ܕܰܣܝܳܢܳܐ. ܘܡܶܢ ܚܰܝ̈ܘܳܬܳܐ ܚܰܒܴ̈ܠܳܬܳܐ ܘܪ̈ܰܚܫܳܐ ܩܳܛܽܘܠܳܐ. ܘܡܶܢ ܓܰܢܳܒ̈ܶܐ ܘܰܒܥܶܠܕܒܳܒ̈ܶܐ. ܘܒܳܬܰܪ ܕܰܡܫܰܘܙܶܒ ܠܶܗ ܡܶܢ ܗܳܠܶܝܢ ܟܽܠܗܶܝܢ. ܬܽܘܒ ܡܢܺܝܚ ܠܶܗ ܒܟܽܠܗܶܝܢ ܚܰܫ̈ܚܳܬܶܗ. ܗܳܟܰܢܳܐ ܘܒܰܝܬܳܐ ܕܡܶܬ̊ܬܰܩܰܢ ܠܢܰܦܫܳܐ܆ ܡܢܰܛܰܪ ܠܳܗ̇ ܡܶܢ ܣܰܓܺܝ ܣܽܘܓܦܳܢ̈ܶܐ ܕܝܰܬܺܝܪܺܝܢ ܡܶܢ ܗܳܠܶܝܢ ܐܰܝܟ ܕܰܥܬܺܝܕܺܝܢܰܢ ܕܰܢܚܰܘܶܐ ܒܝܰܕ ܐܰܠܳܗܳܐ ܕܰܡܚܰܟܶܡ ܘܰܡܗܰܕܶܐ.

ܡܰܒܘܿܥܳܐ ܕܟܬܺܝܼܒܬܐ:  https://w3id.org/vhmml/readingRoom/view/125667

ܢܽܘܼܗܳܪܳܐ: ܟܬܺܝܼܒܬܳܐ ܗܳܕܶܐ ܫܟܺܝܼܚܳܐ ܒܰܟܬܳܒܳܐ ܚܰܕ ܕܰܛܥܺܝܼܢ ܫܶܡ «ܥܶܠܬܳܐ ܕܟܽܠ ܥܶܠ̈ܠܳܢ. ܟܬܳܒܳܐ ܓܰܘܳܢܳܝܳܐ ܠܟܽܠ ܥܰܡ̈ܡܺܝܼܢ ܕܰܬܚܶܝܬ ܫܡܰܝܳܐ».  ܘܰܢܛܺܝܼܪ ܒܒܶܝܬ ܐܰܪ̈ܟܶܐ ܕܥܺܕܬܐ ܕܐܰܪܒܥܺܝܢ ܣܳܗ̈ܕܶܐ ܕܡܰܪܕܺܝܢ. ܘܰܢܣܺܝܟ ܒܝܰܕ ܕܰܝܪܳܝܳܐ ܓܰܒܪܐܝܼܠ ܣܒܺܝܼܪܝܼܢܳܝܳܐ ܒܰܫܢܰܬ ܐܰܠܦܳܐ ܘܰܫܒܰܥ̈ܡܳܐܐ ܘܰܬܡܳܢܺܝܢ ܘܚܰܡܶܫ ܕܝܰܘ̈ܢܳܝܶܐ (ܕܡܰܘܠܳܕܳܐ 1474) ܒܥܽܘܼܡܪܳܐ ܕܒܶܝܬ ܡܳܪܝ ܫܶܡܥܽܘܢ ܘܡܳܪܝ ܫܡܽܘܐܝܼܠ ܘܡܳܪܝ ܓܰܒܪܐܝܼܠ ܒܝܰܘ̈ܡܰܝ ܡܳܪܝ ܝܘܼܚܰܢܳܢ ܐܶܦܶܣܩܺܘܼܦܳܐ ܕܺܝܼܠܶܗ ܕܥܽܘܼܡܪܳܐ.

ܘܰܟܬܺܝܼܒܬܳܐ ܗܳܕܶܐ ܠܩܺܝܛܳܐ ܡܼܶܢ ܐܰܣܳܪܳܐ ܕܢܰܘܠܐ ܕܰܠܥܶܠ ܒܝܰܕ ܡܝܰܩܪܳܐ ܡܰܠܦܳܢܳܐ ܥܺܝܼܣܰܐ ܡܽܘܼܣܰܐ ܕܶܡܺܝܪ ܗܳܢܳܐ ܕܚܳܝܶܐ ܒܐܰܘܣܛܘܪܝܰܐ. ܬܰܘܕܺܝ ܣܰܓܺܝ ܠܐܟܺܝܼܦܘܼܬܶܗ ܘܰܒܛܝܼܠܘܼܬܶܗ ܠܶܫܳܢܳܝܬܐ.

ܦܳܪܘܿܣܳܐ ܝܰܘܣܶܦ ܒܶܓܬܰܫ